十一月恒指跌7.5%，原來未算最勁，咁幾時見底？11月嘅美股，估下升定跌？鮑威爾「忽然變鷹」，放棄「通脹只係暫時」嘅講法．蘋果跑贏大市之謎．來年三大風險 (Patreon)

十一月恒指跌7.5%，原來未算最勁，咁幾時見底？

11月嘅美股，估下升定跌？

鮑威爾「忽然變鷹」，放棄「通脹只係暫時」嘅講法

蘋果跑贏大市之謎

來年三大風險

1. 卒之去到十二月，歡迎各位新舊讀者。照計有唔少係舊年呢個時間轉年費嘅，話咁快就進入第二年。

十一月恒指跌7.5%，原來未算最勁，咁幾時見底？

2. 十一月難唔難捱？當然難捱。輸錢係十分正常嘅。港股恒指就跌1900點，7.5%，但原來都未係今年最勁。七月時仲勁。

3. 你問我幾時見底就…….都有點難答。之前計過下數，0.9倍Book嘅，19100 - 20600左右？

4. 不過唔好忘記債息又高咗啲，恒指成份股又有些少唔同，盈利預測又cut咗啲。所以……得閒幫你再計下數。雖然啲數唔應該爭好遠，而我估大家都唔係太過關心港股。

5. 但仲有值得留意下嘅係，11月恒指跌7.5%，但國企指數（6.6%）同科指（5.4%）居然跌得少啲，有點奇怪。樂觀嘅你可以話啲科技股已經極殘（記得騰訊表現都唔太差），悲觀嘅你可以話連舊經濟都唔掂，隨你。

6. 我嘅做法都係一如以往，仲係有少量月供港股，雖然不多。亦都係香港公司多過大陸，但唔係完全冇大陸。而近期我啲港股都仲係跑贏大市嘅，好似一路都係，雖然都唔見得有幾值得開心。

11月嘅美股，估下升定跌？

7. 好啦，到美股。首先畀你估下，11月嘅美股係升定跌？

8. 答案係，「睇你買乜」，但真的，即使三大指數，都係有些少分別。道指就要跌4%，標普指數都跌1%，但納指叫做升些少的。似乎見到仲係啲大科企有支持（特別係月尾幾日開始驚病毒變種時）。仲有留意，代表細公司嘅羅素2000指數，就跌4%嘅。之前又話大企業貴，但見跌落嚟時又細公司跌得多，好可能都係同病毒變種有關。

9. 有關呢個病毒變種，最新嘅消息，都係……有等於冇。Moderna 話似乎佢地現有疫苗對變種效用大幅下跌，但新嘅版本下年年頭有。BioNTech又話現有疫苗依然有效。牛津（亦即係阿斯利康）就話「冇證據話冇用」。（留意，「冇證據話冇用」，不代表「有證據話有用」）

10. 即係點？即係大家都唔好自己亂咁扮專家，唔清楚就唔清楚。況且，咩叫「證據」「有效」「有用」，都係幾深嘅問題。學術上嘅定義，就唔同大家吹水講啦。但反正呢度唔係醫學專欄，你只需知道，股市估值貴，就梗係乜都會驚。

鮑威爾「忽然變鷹」，放棄「通脹只係暫時」嘅講法

11. 而美股星期二晚係仲有一壇嘢的。就係應該連任（冇乜問題啦，雖然仲要國會確認）嘅聯儲局主席鮑威爾，「忽然變鷹」。似乎同上星期一股市震蕩時一樣，當時啲人估佢有得連任，就要重手壓通脹，似乎有道理。只不過係一個星期多啲，市場氣氛就唔同晒。

12. 呢個「忽然變鷹」嘅詳情，可以睇呢度。除咗話放風提早收水外，最勁係佢直頭話應該「放棄通脹暫時論」，呢個轉變都幾大。但你見債息呢，又唔算升得好多。

13. 擔心病毒變種，同埋又擔心收水下，美股再跌，都唔算太意外。

14. 留意相對地啲大科企個別仲有支持，特別係蘋果單天保至尊，頂住指數唔少。幸好我都有唔少，所以個倉都繼續可以跑贏。

蘋果跑贏大市之謎

15. 講到蘋果，真係唔係馬後炮，早兩日已經想今日講。首先講早兩日想講嘅嘢：Metaverse．睇下睇唔睇到呢篇文。睇唔到嘅我幫你sum up，你見早排Roblox（之前想買，走），Nvidia之類炒得甩碌。但Metaverse嘅嘢，點少得蘋果？

16. 個人相信，Metaverse作為智能手機後嘅Next Big Thing，真係有得炒。你見我都好少話追捧呢啲概念，可見真係有信心。但，正如我講，早幾廿年嘅Big Thing係互聯網（再遠嘅唔講啦，唔通由蒸汽機講起咩），然後最近十幾年都係圍繞智能手機，下一波就係Metaverse。

17. 詳情可以落七十一買本信報月刊（費事貼上嚟），但我都幾肯定，係一個長期嘅投資，正如智能手機，你都要唔係一開始知道大贏家係邊個。

18. 呢度就帶到去蘋果，呢間係一間往往可以後發先至嘅公司。例子？MP3，智能手機，平板，甚至啲穿戴裝置，全部唔係佢發明，亦唔係佢最早入場，但佢仲可以後來居上，睇住你班友點撞板，然後仲要賺到錢。

19. 昨晚嘅情況都有趣，蘋果好似係道指成份股唯一一隻升嘅。呢篇文有講下點解，但都係大家知嘅原因：現金流強勁，仲有：估值平。

20. 呢個亦係我早兩日想講蘋果嘅原因，有得博Metaverse之餘，佢又相對地唔貴，你不能只睇upside，亦要睇埋 downside的

來年三大風險

21. 最後，Economist 有篇文都幾有趣（要畀錢，但可能每個月有幾篇免費），講環球經濟復蘇嘅三大威脅。照計唔難估，第一就係變種病毒，第二就係中國經濟放慢，第三就係美國收水。

22. 臨近年尾，又係啲大行 同 各人發表下年展望嘅時間，基本上你必定聽到以上三樣嘢 — 咁睇得我文耐嘅都知，實情呢啲人人都講嘅嘢，即係講咗等於冇講。唔係完全係廢話，但聽過就算，個市場唔係咁運作的，唔係咁樣列啲咩利好利淡消息出嚟。2019年尾你當然不可能估到2020年發生咁多事，但又睇下舊年年尾，講嘅利好利淡，又有幾多真係估中？

23. 不過既然講得呢篇文，當然有啲嘢值得你睇。就係呢個圖。

24. 好簡單，就係睇下各個國家，受中國同美國嘅影響，睇下有幾大。你可以留意下人地點樣去寫個故事。例如中國影響嘅，咁最直接，咪睇下佢地出口去中國幾多，佔佢地GDP幾多，如果中國經濟放慢嘅，出口去中國多嘅咪受影響得多。美國嘅，有啲唔同，但傳統上大約都見到，美國收緊嘅週期，往往令新興市場啲貨幣跌（今年已經見到啦，你睇土耳其？），咁嗰啲負債重嘅國家，就比較危險。

25. 睇圖嘅，越右邊越受美國影響，而越上面嘅就越受中國影響（我指上面嘅因素影響，唔係咩外交軍事上）。兩樣都唔多影響嘅？冇乜喎，沙地阿拉伯同波蘭。好受中國影響而唔多受美國嘅？即係左上角，越南同俄羅斯韓國，你以為越南真係在中國身上爭生意？一樣出口好多去中國。至於好受美國影響而唔多受中國嘅？右下角，巴斯基坦同埃及，債務重，但唔多出口去中國。當然最好玩係兩邊都食到正嘅，巴西，澳洲，智利。

26. 當然留意，以上講嘅係GDP影響，而股市往往行在經濟之前。咁就啱啦，睇下今年嘅股市。巴西股市就今年當然慘烈，智利懶得睇，澳洲呢？睇指數還不錯，但留意澳洲紙對美金都跌一截，你外國人（例如香港人）走去買，應該全年都係得個桔。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

不過，返返去呢個圖。