你搵唔搵得返Delta 變種幾時爆發？王維基1137盈警．抗通脹ETF有好多種。升得多又跌得多，跌得多又跌得多。好多美股之前已經破底．唔好再打副本。收股息退休不切實際？睇你點睇。 社交媒體爭做Super App． (Patreon)

你搵唔搵得返Delta 變種幾時爆發？

王維基1137盈警

每日一圖— 抗通脹ETF有好多種。升得多又跌得多，跌得多又跌得多。好多美股之前已經破底

Good Read —  唔好再打副本。收股息退休不切實際？睇你點睇。 社交媒體爭做Super App．

FB Post Summary — 蘭歷克教曼聯。冇熱狗腸嘅熱狗。里斯本物語。深藍科技。別人恐懼時我貪婪。王維基1137 盈警。祖雲達斯做假數

你搵唔搵得返Delta 變種幾時爆發？

1. 今日下面堆每日一圖同Good Read 都寫得好長，所以呢度寫短啲。今日唔賣廣告，但去到12月仲會有新的。

2. 另外週末出咗篇專題，寫通脹受惠股，記得去睇下。個結論係：好難捉。但我新錢會買返多啲價值股。

3. 大市嘅嘢，冇乜特別好講。寫文時香港時間兩點，未收市（呢排都早寫，因為鑽嘢，被迫早睡早起）。但見到美股情況係冇再跌落去，但當然反彈唔係好大力。

4. 變種病毒omicron有幾大影響，疫苗有冇效，就梗係留返專家講。但初步睇嚟，傳染性幾高，不過症狀唔嚴重。不過都夠繼續困擾下股市，之前啲咩出行股呀澳門股呀，又有一排都冇運行。

5. 可以留意下，呢個圖入面。你搵唔搵得返Delta變種幾時爆發？答案係7月，照計你都唔記得咗。當時股市亦只係震一震。今次係咪都一樣？就唔知。但當然而家估值又再貴過7月時一截，仲有當時未有咁多加息 縮表 通脹嘅擔心。照計今次冇咁快反彈啦啩？

6. 不過，Facebook 都貼過個圖（你可以詳細睇篇文），星期五美股VIX升咗54%，史上第四高單日升幅。咁正路地呢，之後股市都會有不錯回報嘅。

王維基1137盈警

7. 王維基隻1137，出咗盈警（留意篇文有嘢錯，你可以睇返通告原文）。Facebook post都有講，我冇乜好多補充。首先固然係舊年拎咗保就業，今年冇，咁呢個好多公司都係咁。但好粗略咁計數，佢話舊年同期純利1.8億嘛，咁減走4900萬補貼，即係大約1.3億。但而家話倒退78.5%喎，即係得返4000萬左右？好難只係用冇保就業去解釋

8. 即使唔計保就業，似乎啲業務都差。之前都提過公司今年嘅GMV（可以睇返個Excel，呢篇文有Attach），連公司自己嘅目標都達唔到。仲有之前啲數字麻麻，公司話因為消費券所以啲消費者延後消費 — 但到之後又唔見特別好喎。原來仲話做咗好多推廣，有開支要入帳。

9. 加埋呢期市況都幾差，隻嘢又高估值，我估聽日股價都會幾差。我係有買嘅，不過應該暫時都唔會沽住。

每日一圖— 抗通脹ETF有好多種。升得多又跌得多，跌得多又跌得多。好多美股之前已經破底

10. 抗通脹ETF有好多種 — 鍾意嘅有成篇文畀你睇。實不相瞞，原本週末專題我諗住寫呢樣，但睇完覺得唔夠料整一篇文，無謂夾硬呃大家時間（本作者係有良心的！）。講返，你見市面上有5隻所謂抗通脹嘅ETF，好多都係搵笨嘅。因為有啲只係買債，或者買金，或者只係畀返CPI嘅回報你。如果你係想要「通脹受惠股」嘅，只有隻INFL先係，亦因為咁見到佢個AUM係其他幾隻加埋嘅幾倍。但，又要睇你信唔信佢揀股嘅能力。你問我就根本唔使搞咁多嘢，自己買指數都得。

11. 升得多又跌得多，跌得多又跌得多— 羅素1000指數係大公司指數。好啦，見到舊年升得最多嗰堆，今年都跌得最多。呢個不意外，好多時因為估值太誇張。但見到舊年跌得最多嘅，今年都跌得多。事後講當然係因為本身啲公司都越做越差。我估呢個現象（舊年升得最多同跌得最多嘅，今年都跌得多），係成日出現的。第時你揀股可以留意下。

12. 好多美股之前已經破底— 留意個圖之前都有講過呢個現象。創新高嘅股份越嚟越少，都唔係咩奇怪嘅現象。但你見跌穿52週新低嘅股票，都越嚟越多，都差不多10%（呢度係用羅素3000指數，成個美股大包圍），就比較令人擔心。留意佢個圖係上星期三的，未計星期五晚大跌。

Good Read —  唔好再打副本。收股息退休不切實際？睇你點睇。 社交媒體爭做Super App．

13. 唔好再打副本—原文個題No More Side Quests，我覺得篇文寫得唔係太好。但入面講嘅嘢重要。作者舉例話，你見到有啲人，五六十歲人都仲係internet troll（唔識點譯做中文，可以叫做「網上煩膠」）。你心諗，呢啲人嘅生命，係咪冇其他更值得佢地去做嘅嘢？應該都係。要在任何範圍做到成績，差不多總係專心。但如果你有睇我本書或者以前寫嘅文，我又會講生命唔係一條直線，好多後生時你以為冇用嘅嘢，最後都變得有用。求職擇業我又會講，初入職場不妨多作嘗試，轉工或者轉行都可以。咁即係點？我估係階段嘅分別。你廿幾歲嘅當然可以不停轉行，但四十歲人冇理由仲唔知自己想點。

14. 收股息退休不切實際？睇你點睇 —差不多每個星期都會有人問我買乜股可以穩穩陣陣收5厘息（甚至有人問10厘息 ）。答案係：冇。美債都只係1.5%息。呢篇文話你知，你即使去買Vanguard隻高息ETF（VYM），都只係2.7%股息。唔好話5厘，連4% rule 都做唔到。但呢個係現實，你不能夾硬改變佢。作者話你知，你今日去買就梗係得2.7%息啦，但，如果你十年前買呢？情況同你睇地產新聞一樣，而家嘅 rental yield（租金/樓價）梗係低，但好多業主廿年前買嘛。 講到尾，根本你唔應該只係留意個股息（我甚至係近乎唔理的），有得增長先係重點。以前都寫過，作者文中都有提，Dividend Aristocrat（有ETF的，NOBL），過去幾十年冇減過派息嘅公司。重點唔係個股息率（呢隻嘢2厘唔夠），而係我個息可以一路加上去嘛。呢個課題好大，有機會週末專題講。

15. 社交媒體爭做Super App —中國嘅情況，當然係微信，可以一個app做晒極之多嘅嘢。呢個絶對係相當成功嘅例子，亦唔止中國係咁，你見東南亞都係GRAB可以打車又可以支付仲有N咁多功能，日本韓國都有類似情況（LINE同Kakao，但冇咁誇張，好多時係分開唔同 app，雖然係同一間公司）。雖然生態唔同，但鬼佬見到咁神奇，當然想抄。最正路嘅就係社交媒體做埋payment．上星期嘅文都講過（拿，都話環環相扣的），有人認為Paypal應該同Pinterest合併，亦係咁嘅原因。

FB Post Summary — 蘭歷克教曼聯。冇熱狗腸嘅熱狗。里斯本物語。深藍科技。別人恐懼時我貪婪。王維基1137 盈警。祖雲達斯做假數

居然又係寫咗唔少文，但多數都無聊嘢，唔少仲要係街寫。例如你見到冇段落數字嘅，就九成係在街寫（有嘅亦不一定不在街上寫，有啲唔趕嘅文，街上寫完返屋企先整返數字，例如熱狗嗰篇）。另外，好似多咗啲足球相關文，咁啱多新聞啫。

16. 蘭歷克教曼聯— 冇乜特別，但我個重點想講，球會呢啲生意實情冇你想像中咁大，但都越嚟越複雜，唔再係我細個時咁一條友一腳踢。所以而家教波嘅一個，負責買賣青訓等等嘅又一個，搞商業嘅又另一個。留意好多行業都會係咁，你最初茶餐廳梗係落單又你 煮嘢又你 宣傳都係你，但到你變米芝蓮三星嘅，全部嘢都分返開啦。唔止係時間上嘅考慮，亦都係因為唔同領域要唔同嘅專才。

17. 冇熱狗腸嘅熱狗 — 呢篇就夠無聊，不過長期讀者應該知道，Kebab係烤肉而唔係個包，Frankenstein 係個醫生唔係隻怪物。而熱狗，係條腸，唔係個包。

18. 里斯本物語 — 講葡萄牙聯賽有隊波出得九個人，因為肺炎中晒招。同場加映：葡萄牙係真係有萄撻的

19. 深藍科技— 呢單都夠神奇，台灣人嘅戶口畀人偷咗嚟買港股。仲要係好多個戶口。似乎成個認證系統都幾兒戲。

20. 別人恐懼時我貪婪—比較正經嘅文，見到星期五美股VIX一日升54%，史上第四高（但VIX由1990年先開始有）。歷史見到，多數之後美股表現都不錯。

21. 王維基1137 盈警 — 個Post入面都講得幾詳細。固然因為冇咗政府補貼，今年嘅盈利實低過舊年。但唔計呢條數都好，似乎啲業務都係差的

22. 祖雲達斯做假數 — 新鮮滾熱辣，股價跌三成。另外留意入面有解點解啲球會咁鍾意交換球員，財技嚟的。其他行業理論上都可以，但難好多，係球會先可以有啲一件上億美金嘅貨交換。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。