通脹仲買唔買得股票？買乜好？ (Patreon)

通脹買乜好？

點解2008年印錢冇通脹，今次印錢就有？

通脹梗係買股票，仲使討論？

有Pricing Power嘅公司，盈利就不受影響，甚至更賺錢

乜嘢公司先有Pricing Power？

不過……仲有樣嘢叫做估值

咁即係可以點？

週末專題呀下! 但畀我快速賣個廣告。未開Webull嘅記住去，仲爭十幾個先夠數。記得用我個開戶link 

通脹買乜好？

1. 問題好簡單，通脹點都出現咗，仲要應該會維持一段時間。當然呢個「一段時間」係十年定一年，就未知。但可以講，即使係一年好，都已經超過好多人嘅investment horizon（唔知點譯做中文），正如你會問加息點算好，你亦都實會問，通脹買乜好。

2. 你問我，呢個問題真係唔使問，甚至問得太遲。通脹，就梗係買股票買樓買Bitcoin之類，總之就stay invested，唔好渣現金，有幾難明？用我比較偏激嘅定義，過去十幾廿年都係高通脹架啦！只係你在CPI 見唔到之嘛。

3. 通脹大家明係乜啦，例如你玩大富翁，不停咁大家都經過起點有錢拎，大家都越嚟越多錢，啲嘢當然越嚟越貴。如果你玩電腦版更加明顯。所有嘢都自動水漲船高

點解2008年印錢冇通脹，今次印錢就有？

4. 但點解2008年嘅印錢冇引起通脹？我認為，你留意啲錢去左乜嘢人手中。2008年之後帶嚟嘅股市升，樓市升，錢好多去咗企業度（同埋做回購），同埋有錢嘅人度（有錢人先會買股票買樓，包括你地）。問題係，有錢人實情係唔多消費的 — 聽落好似好荒謬，但你諗真啲？你去到超級富豪嘅嘅，佢洗得幾多錢？你諗下超級富豪食早餐食幾錢？四千？四萬？當四十萬港紙好未？當我食四十蚊早餐，即係佢係我一萬倍 — 但佢收入點止我一萬倍？我當個富豪月入一億，佢可以洗幾多？但如果我分畀十萬個窮人，每人一個月一千，佢地絶對係會用晒的

5. 講呢啲嚟做乜？就係話你知，富豪係唔消費的。所以如果錢去咗佢地度，就唔會令通脹大升 — 有乜會升？就只有佢地會買嘅嘢升。例如乜？股票啦，房地產啦，藝術品啦，高等教育啦，呢啲嘢咪升得多！但你見CPI冇乜點升，因為CPI係平民嘅嘢，富豪可以食得幾多隻雞蛋？都會貴咗，但唔會好似有錢人買嘅嘢貴咁多。況且政府亦總會壓低呢啲民生用品嘅價格，甚至補貼（你見馬來西亞大幅補貼汽油價的，當然係為選票）

6. 不過今次嘅通脹潮，有少少唔同，好多都係嚟自失業救濟或者派錢，亦有因為請唔到人要加人工，啲錢好多落咗去普通人手上，而普通人係會買雞蛋嘅，所以CPI會升

7. Anyway，以上係我嘅理論。唔會全無根據，其他人有認真啲嘅講法，但遲下先再討論。反正CPI會繼續高企一排，應該大家都同意？

通脹梗係買股票，仲使討論？

8. 咁買乜好？根本好簡單，當然係買股票。低通脹你應該買股票，高通脹你更加應該買股票！

9. 點解？至少你睇歷史都係咁，包括啲咩「惡性通脹」嘅日子都係。以上呢個圖，非常之好，畀你睇到歷年高通脹時，各種資產嘅表現。留意入面嘅回報已扣除通脹，real return

10. 咁你見到，渣債券，當然近乎係死路一條。現金呢，更唔使講，購買力消息。所以你都係買股票，一年有5-12%回報，仲想點？再講一次，係扣除通脹後嘅數。雖然我唔肯定佢嘅years with high inflation from 1927 to 2020 係指邊啲，有機會再研究多啲。

11. 另一個角度，可以睇呢兩個圖。第一個圖，見到乜？見到通脹脹嘅日子，股票表現都好，甚至在CPI 10%嘅極端時間，都係表現得好，甚至好過平時。留意呢個圖係二次大戰後到而家。

12. 當然，上面個圖係nominal return，如果你扣返通脹，就明顯見到高通脹時股票嘅real return 當然低一截。或者掉轉講，無論通脹高位，股票都大約係咁上下回報（正係第一個圖講嘅嘢）。

13. 咁而家見到股市在通脹中表現都好，問題係，買乜股？

有Pricing Power嘅公司，盈利就不受影響，甚至更賺錢

14. 咁可以返返去諗，點解有人覺得通脹對股市唔好？多數就係話，成本會上升，人工會升，原材料成本會貴。但呢啲講法真係相當膚淺，太過static，假設啲公司乜都唔做。大佬，我會加價架嘛！我會將啲成本轉嫁落消費者身上。

15. 所以，你有冇呢種pricing power，就係最重要嘅問題啦！下一段會講。但一般嚟講，股市成份股，全部係大公司，最惡最成功嘅公司，多數都係有咁嘅pricing power，所以我幾肯定話你知，通脹當然唔會拖低企業盈利，甚至應該係有幫助添。

16. 但，唔好忘記一個好重要嘅問題：估值。時刻記住。

乜嘢公司先有Pricing Power？

17. 返返去pricing power，好似有啲抽象，間間公司都會話自己有能力轉嫁落消費者，但，往往係試過你先知，到你加價你咪知你啲客忠心，定係即時走人（所以我估唔少公司根本知自己冇pricing power，但總不能照直講）。

18. 點先知間公司有冇pricing power？正如我講，到佢加咪知。但未加之前呢？實情都估到嘅，咪同你講，「護城河」咯，如果你了解間公司夠深，大約都知。舉個例，NetFlix加價20%你都仲會用，但如果Food Panda加20%，你即時轉去第檔啦。見到分別冇？

19. 如果想量化嘅（但未必係好事），三樣嘢去睇。第一睇profit margin。一般profit margin高代表有pricing power，代表有個「護城河」。如果冇嘅，好大程度就係你同人鬥平，咁就唔會拎到好高margin，因為人地亦可以減價搶你生意。Profit margin高亦代表個行業競爭細，可以因為好多原因，例如各種嘅壟斷。

20. 第二係睇profit margin係咪穩定。有啲公司在順境時可以好高profit margin，特別係固定成本大嘅（例如理文化工746都係），咁啱個周期，你啲產品賣得貴嘅，自然profit margin高，而對手亦可能係未嚟得切入場搶你（要啲時間）。但到周期逆轉時就唔同了。所以要睇個profit margin係穩定，定大上大落。穩定嘅先係真正有pricing power。

21. 第三當然係睇公司大細，一般都係大公司最惡，燒錢都燒耐啲，借錢又易啲，鍊supplier 嘅力度亦大好多，我咁大張單你夠膽唔做？

22. 利用呢幾樣嘢，UBS整理咗邊啲公司嘅pricing power高，邊啲低。留意呢個純量化計出嚟，實情唔係咁好的。但見到了，最大加價能力嘅就係 consumer staples，必需消費品股，平時你啲洗頭水呀之類，唔通加價唔用？定用霸王？打後係communication services，詳細定義再研究，但我估係電訊商之類，唔通加價你唔用？然後後IT，同埋 consumer discretionary ，可選擇消費品，例如LV愛馬士之類。至於差嘅？係能源同金融公司，Materials 都差，諗真啲唔意外，呢啲公司只係左手嚟右手去，固然產品價高時margin高，但一逆轉時就差好遠，正係20段講嘅嘢

23. 第二個圖仲正，UBS畀你睇下，根據上面分類，啲高pricing power嘅公司，跑贏低pricing power嘅公司。時間越耐越明顯。另外，通脹越高時亦都分野越大。

24. 不過，呢度有一個好大嘅問題。你留意下個圖，寫住2010-2021，而呢段日子，全部係相對好低通脹嘅。死未。

25. 我以下貼呢個圖，足以令你懷疑人生

26. 見唔見到，消費品股，反而係大跑輸？

27. 點解同上面嘅結論咁唔同？原因好多，但主要係睇嘅時間唔同，今次呢個圖，係1947年至2021年嘅高通脹時期。好難話邊個「準」，我亦唔多認為嚟緊嘅通脹好似咩70年代石油危機咁，成個世界都唔同晒啦。但UBS個研究，做2010-2021，就真係冇乜說服力。

不過……仲有樣嘢叫做估值

28. 記唔記得我頭先講過，有樣好重要嘅嘢，叫做估值？呢樣先係最難玩嘅嘢。

29. 一般而言，對於好多公司，特別係大公司（亦即係指數成份股），通脹唔會點打擊佢地嘅盈利，甚至係有利，因為有pricing power 嘛。解咗啦

30. 但，邊個話你知，對盈利有利，股價就實會升？最簡單嘅講法，市值＝盈利 X 估值。你盈利升都好，估值可以跌的

31. 我記得之前睇文講過，但我搵唔返。但Hershey's朱古力以前試過呢個情況。係呀，大品牌，好有pricing power，盈利頂得住，仲有得升 — 但股價係咁跌。點解？因為個估值跌。

咁即係可以點？

32. 咁即係可以點？我講一大輪，都係答你，唔好走去貼一兩隻股票，以為實受惠於通脹。當中好多嘢可以出錯。可能個pricing power根本冇你諗咁強，亦可能有pricing power而盈利升，但估值跌。

33. 但睇返呢個圖，你見係乜嘢股跑出？原來係價值股跑出，仲要係small cap多。

34. 諗唔諗起乜？就係早幾日我講嘅東西。呢N年，一路都係價值股跑輸，small cap跑輸。固然冇人話到你知個趨勢會繼續，定逆轉。但如果係開始逆轉嘅，「加息」「縮表」同埋「通脹」，就係個相當好嘅劇本

35. 況且，價值股同small cap，都係估值比較殘嘅嘢。記唔記得上面講過，大公司pricing power應該強啲？照計合符所有人嘅常識。但點解你見呢個圖中，好似細公司表現仲好？答案就係：估值。

36. 退一萬步講，亦因為我渣嘅股票，絶大多數都係增長股（照計你地十個有十個都係，應該渣增長股嘅比率仲高過我），同埋大企（呢個可能你地冇我咁多）。咁所以，分散返去啲small cap同價值股，都好合理。

37. 做法一如以往，都係將啲新錢放多啲去small cap同價值股。上個月已經開始個個月買VB啦，遲下會每個月買隻IWD（價值股嘅ETF）。越買越多？都係，變相限制咗我買個股嘅錢，亦係我一路想做嘅：買返多啲ETF，個股只係畀你過下癮。

38. 最後一講，你可以睇下，IWD（價值股嘅ETF）同IWF（增長股嘅ETF）分別渣啲乜。你望都望到，IWF嘅十大持股，我買咗九隻（只有Home Depot冇）。至於IWD嘅十大持股呢？我得兩隻（JP Morgan同迪士尼）。明顯我都係側重咗增長

39. 仲有留意，而家啲必需消費品股，都係比較殘的，一般都係價值股。

40. 下次會再講多啲呢個課題，但，呢期見到價值股開始跑返贏，又睇下係一兩日嘅事定轉勢。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。