ivanliresearch

美股跌1000點，講下點應對．驚？冇驚過。沽？一股都冇沽過。估下美股升幅主要係嚟自開市嘅時間，定交易時間以外？基金經理渣重商品同銀行，咁有乜渣得唔夠？公司冠名球場就係爆煲先兆？點解運動員做KOL有先天優勢？ (Patreon)

Published:

2021-11-26 19:00:47

Edited:

2021-11-27 00:25:09

Imported:

2022-09

Content

快評兩句 — 美股跌1000點，講下點應對

快評兩句 — 驚？冇驚過。沽？一股都冇沽過。

每日一圖— 估下美股升幅主要係嚟自開市嘅時間，定交易時間以外？基金經理渣重商品同銀行，咁有乜渣得唔夠？

Good Read — 公司冠名球場就係爆煲先兆？點解運動員做KOL有先天優勢？

FB Post Summary — NetFlix and Chill．相對論。非洲佬。風險管理

快評兩句 — 美股跌1000點，講下點應對

1. 照計不用我多講大家都知，病毒變種嘛，亞洲時段已傳出嚟，日頭美股期貨已經急跌。留意歐洲股市表現仲差過美國，但香港就跌得少過歐洲些少（因為之前已經跌好多）。但見到到星期五晚，唔少中概股都仲係大跌嘅。

2. 美股今次三大指數就表現差不多，道指跌2.5%，標指同納指都跌2.2%。原本以為納指會再硬淨啲（因為債息跌，下面會講。仲有之前封城都相對係對科技股有利）。

3. 而我個美股倉，都真係仲可以跌得少過大市些少的，證明啲配置都還好（當然係睇US3。US2跌咁多就同隻波音期權有關）。最得意係垃圾倉居然幾硬淨。但唔多唔少亦因為個債息跌（下面解）

4. 行業方面，都好清楚見到，啲出行股當然死晒。疫苗股就抽升。仲有一大堆封城股（Zoom，Peloton 等等）就彈返上嚟。但我相信呢個趨勢好短暫，點睇都唔似會返返去之前咁了。

5. 仲有，可以留意下油價急跌，仲有債息都急跌。照計係「好消息」。油價急跌嘅，變相都幫到減低下通脹壓力。債息跌嘅，亦代表可以支持股市較高嘅估值。雖然我估債息跌應該係好短期嘅現象，只係因為人人避險，啲錢放晒入國債啫。

快評兩句 — 驚？冇驚過。沽？一股都冇沽過。

6. 早兩日嘅Patreon已經有講，美股唔少股份嘅跌幅都幾急，因為高估值。嗰刻當然唔會知道咩非洲變種病毒啦。但係咪咁大影響？我覺得唔係。我相信，股市急跌嘅原因，主要係因為估值高。估值一高就少少風吹草動都大跌。況且唔少人有一定利潤，好多都會選擇take profit離場（但我就唔會的，我又唔係基金經理）

7. 美股嘅跌幅，你話好多咩？普普通通。道指跌900點，聽好似誇張，但亦只係2.5%。當然，呢個跌幅都係今年最大單日跌幅。但今年股市係平穩得唔多正常嘅，歷史上呢啲2.5%跌幅實在唔係乜（遲下搵啲數據畀你睇）

8. 當然好多人最關心嘅，就係到底係一路會再一路跌，定會反彈？而家應該撈底未？答案你都估到：我當然唔知。況且你個問題都唔係太有意義，跌幾多先叫再一路跌？但我具體少少分享我嘅想法：如果再跌多啲，我都唔會好意外 — 但你千萬唔好又走去而家沽晒啲嘢，真係講過好多次，如果我錯咁你點？

9. 我比較相信，下年啲價值股，或者美國以外嘅股市跑出嘅機會大啲。正如之前提過，我嘅新錢都會放嗰啲地方多啲，因為我本身原來都唔少美國嘅增長股，科技股亦不少，發夢股都有些少，垃圾股都有個倉。

10. 記住，千萬唔好咁極端，即使你信有排跌都好，都唔好沽晒佢 — 因為，如果你錯呢？況且，沽咗亦唔知幾時買返。同樣地，你摶反彈嘅，亦唔使一次過瞓晒落去。

11. 我做嘅嘢好簡單，就係一股都唔會沽，繼續有錢就掟入去股市。只不過我買嘅嘢可能會微調下咁解。

每日一圖— 估下美股升幅主要係嚟自開市嘅時間，定交易時間以外？基金經理渣重商品同銀行，咁有乜渣得唔夠？

12. 估下美股升幅主要係嚟自開市嘅時間，定交易時間以外？—最初有人可能以為係咪寫錯，唔開市都有得升？當然有，好多時指數，一開市或收市，已經大升或大跌，在交易時間嘅波幅反而唔大。咁睇圖啦喎，過往近三十年，美股在交易時間外嘅累計升幅，係745%。在開市嘅時間，反而夾埋仲係要跌嘅。亦即係話你day trade係跌多過升。不過更得意嘅係，近一年情況就唔同咗，開市時間入面嘅升幅，比得上交易時間以外嘅。點解？好可能係多咗好多散戶炒即日。

13. 基金經理渣重商品同銀行，咁有乜渣得唔夠？—佢地配置得少嘅，就係公用股，債券，同埋新興市場股票。咁你大約估到，呢個好可能係反向指標，基金經理好多都係跟紅頂白。留意科技股原來都唔係渣得極多的（但佢呢個表係同呢班人自己嘅歷史平均比）

Good Read — 公司冠名球場就係爆煲先兆？點解運動員做KOL有先天優勢？

14. 公司冠名球場就係爆煲先兆？ — 最新就係NBA洛杉磯湖人嘅主場（快艇都係同一個場，仲有一支WNBA，同埋冰球隊），會改名做Crypto.com球場。就有人話預示加密幣見頂，就快爆煲。因為史上真係見好多公司都係咁，高調命名球場後，股價就大跌，甚至間公司都冇埋。文入面例咗唔少例子，包括Enron，Worldcom（兩間都爆咗煲），金融海嘯前嘅花旗同Wachovia Bank（前者大瀉，後者畀人食咗），聯合航空（破產重組）。幾有趣嘅現象，我覺得有一定根據的，唔只係事後講。你可以比較下封面魔咒，或者摩天大廈魔咒。當然就係同樂觀情緒，以及太豪氣有關。篇文十年前了，仲有一篇新啲的（但寫得冇咁好），

15. 點解運動員做KOL有先天優勢？ — 唔止係講「形象健康」，篇文仲有講其他嘢。首先有啲KOL人氣可能仲高過唔少運動員，但運動員嘅表現冇得呃冇得吹水，特別仲要係佢地自己著落場嘅嘢，更加冇得呃。佢冇可能只係為咗賺代言費，搵自己嘅職業生涯較飛。另外亦都因為，佢地本身唔係因為社交平台而出名，啲fans嘅忠誠度係高好多的。