大家樂341 業績— 盈利跌一半又如何？維他奶345 業績— 廿年首次唔派中期息，又如何？ (Patreon)

大家樂341 業績— 盈利跌一半又如何？（有Excel）

維他奶345 業績— 廿年首次唔派中期息，又如何？（有Excel）

1. 好彩感恩節，美股冇市，我可以抖下氣。今日講少少港股。集中講兩隻近期出咗業績嘅港股，大家樂341同埋維他奶345，情況都相當唔同，實情業務都唔同。但簡單講就兩隻都過左最壞時刻

2. 係咪好抵買就答唔到你，照計就比好多港股好，但亦不代表你一定要買，我都冇買，亦冇打算買。但唔買都睇下，對你睇財務報表，或者了解個世界，都有幫助。

大家樂341 — 盈利跌一半又如何？

3. 首先係大家樂，早兩日先寫過基金入股。但當時我都冇留意出業績。業績呢度，留意星期三中午出，你見出完業績股價反應唔錯，兩個星期新高。但當然今年係嚴重跑輸大市嘅。記住，公司3月年結，今次係2021年4月至9月嘅中期業績。陣間維他奶情況都一樣

4. 上次出業績（6月時出全年業績），都有寫過，可以開嚟參考下

5. 如果你睇新聞嘅，咪話按年少賺五成，好似好差。但當然不能咁睇，首先起碼，你都要該係半年半年咁比，先睇到係改善中定惡化中。第二，舊年同期拎咗3.4億保就業，今次就乜冇，梗係要剔走返佢。

6. 可以跳去個結論：業績改善好多，當然仲未返到疫情前咁。一來仲有不少限制，二來都係冇遊客（主要大陸）。照計仲有得改善。

7. 睇圖，第一樣嘢，綠色。勾走保就業嘅核心盈利。今次冇保就業，所以核心盈利同報嘅一樣，但上次有，上次勾走，就蝕得好勁的。

8. 你睇核心業務，而家已經賺錢啦，其實上次半年（2020年10月至2021年3月）都賺錢。但今次呢半年仲多，係近四次半年最好。不過，仲係只得疫情前（藍色）嗰半年一半

9. （順手留意下，藍色嗰半年，又已經撞著社運。再之前啲日子呢，公司半年差一般有兩三億盈利的。圖入面冇，但你可以拆開個Excel睇）

10. 點解咁？睇個毛利就知。個毛利雖然係近四次半年最好，但只得藍色半年嘅75%左右

11. 又點解會咁？一路睇落去啦喎。原來成間公司收入，而家係藍色半年嘅九成左右。

12. 再拆細嚟睇，問題就當然在香港。香港嘅收入，未有疫情前九成。最近半年，甚至低過 2019年10月至2020年3月嗰半年（嗰半年已經部份受疫情同社運影響）。

13. 大陸反而係相當不錯（梗有人話因為太窮搞到食大家樂，但返過大陸都知仲貴過香港），谷底一路增長，上次半年已經好過疫情前嘅藍色半年，但始終香港先係主要地方，大陸只係佔收入17%

14. 成本當然跌咗啲，但冇低咁多。By the way in case 有人唔知，做飲食最大嘅成本係人工，而唔係舖租。

15. 公司坐住8億  net cash，仲高過 2019年9月。派息能力就當然有。中期息係不變嘅。末期息呢？照計都派，但有可能冇上次咁多。

16. 點解？咪話上次保就業令到條數靚，咁保就業嘅錢，當然都可以派息。以前都寫過，有啲人覺得拎咗政府錢去派畀股東，實情就唔使咁執著。錢冇記認嘛。你可以話政府錢係拎咗去出糧都得，咁我慳返出糧嘅錢去派息之嘛，冇保就業可能炒人嘛。所以不能堅持話係用咗攻府「嗰舊錢」去派息。況且，就算係，咁又點？有冇話拎保就業嘅公司唔可以賺錢一定要蝕錢？好似唔係。咁既然賺錢，點解唔派得息？

17. 最後講多少少，正如上面講，大陸業務呢期做得幾好。但公司早幾年重整過大陸業務，摺埋咗華東區嘅業務（實在不多），而家專做華南（主要廣洲深圳，但仲有其他），今年都會在華南開多27間。

18. 兩樣嘢，首先係大灣區，至少在大家樂嘅情況，見到真係 work—或者你可話，大灣區以外就唔work，真係有個文化差別，廣東仲有人食大家樂，你去上海就炆水了。

19. 第二樣嘢，當然你可以話公司在華東失利。但，做生意梗係咁架啦，包生仔咩。早年大家樂去過北美。但唔係開自己品牌，係做咗收購。滿州鑊Manchu Wok，最後都要蝕錢賣走。

維他奶345 — 廿年首次唔派中期息，又如何？

20. 下半場嘅，講維他奶。業績在呢度。星期四中午出嘅，見到股價最初跌，之後抽升，個V型好靚。但當然今年股價表現相當差。記住，公司3月年結，今次係2021年4月至9月嘅中期業績。同頭先大家樂一樣

21. 一句講完嘅：上次業績先真係恐怖，今次唔差。上次業績（6月時）都有寫過。留意6月時未爆啲政治風波。

22. 首先，最重要嘅，公司一早出咗盈警。咁所以照計啲不利消息出盈警時都反映晒，你只需要比較下今次業績同個盈警比較如何，有冇再差啲，定好咗。

23. 盈警話預半年蝕5000萬至賺6000萬（舊年同期係賺7億！）。結果而家係賺3300萬，算上限。所以你見即使停咗中期息，股價都照升。

24. （不過停中期息都有啲意外，廿年都冇試過。冇錯係冇錢賺，但蝕錢都可以派息的，何況賺錢）（但又話說回頭，維他奶向來中期息都只會派好少的，所以你唔派個中期息，影響不大）（雖然你可以話，小小都唔派，令人更加驚，但股價反應就係一切啦）

25. 你問我，個業績明顯好過好過上個半年好多好多啦，上個半年仲要輸錢，仲要當時仲有好多補貼。留意維他奶啲補貼十分複雜，有大陸有香港，好難拆，所以我冇得好似大家樂咁計返個核心盈利出嚟，不過佢地業績公佈有講過下，但啲數好難勾返出嚟的。

26. 仲有，公司今次仲做咗啲Goodwill write off ，雖然唔太多，千幾萬，但明顯同我之前估嘅差不多，梗係順手有乜衰嘢一次做埋啦。

27. 睇返公司嘅毛利，甚至好過疫情初爆，2019年10月至2020年3月嗰半年。當然同疫情前嘅半年（同大家樂一樣，我用藍色）比，仲爭好遠。

28. 同大家樂嘅情況相當唔同。大家樂就香港差，大陸好。維他奶呢？就香港好，大陸差。但大家樂主要市場係香港，維他奶係大陸，即係大家都係主要市場差！「不如諗下合併」。又，咪講笑，兩間公司創辦人有淵源（大快活都係），細個去大家樂係用維他汽水的。

29. 先講返大陸收入，已經好過上次半年，但暫時只及疫情前藍色半年嘅七成。香港呢？就有九成。澳紐同新加坡甚至超過疫情前。奈何大陸先係最大市場，而家都仲佔公司六成收入。結果成間公司整體收入，係藍色半年嘅七成半

30. 留意，公司有講，啲產品在九月底開始恢復上架，所以照計下次嘅業績點都會更好（彩蛋：留意返八月出盈警時，公司又話已經恢復上架，而家又話原來九月底先開始。但不代表公司講大話或前言不對後言嘅，好多原因。例如「恢復上架」同「完全恢復上架」已經兩回事。加上大陸咁大，某啲地方上返，又唔等於第度都上。況且，亦有可能大陸彈弓手嘛）

31. 最後睇返，公司而家5億 net cash，就唔係特別高的，所以都理解冇派到中期息，但全年應該會派到嘅，不過派幾多就唔知，照計都唔會多。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。