債息回落，發夢股回穩．澳門股， 大家樂341。長江基建1038．美股分析員對長期增長太樂觀，多數出事。第四季實升，除非信貸市場有大鑊嘢．vidia點在Metaverse搵錢。點解Paypal應該買Pinterest (Patreon)

快講兩句 — 債息回落，發夢股回穩

大師冇點你 —  澳門股， 大家樂341。長江基建1038

每日一圖— 美股分析員對長期增長太樂觀，多數出事。第四季實升，除非信貸市場有大鑊嘢

Good Read — Nvidia點在Metaverse搵錢。點解Paypal應該買Pinterest

FB Post Summary — 真臘風土記。土耳其里拉狂跌。羅富齊個朋友何富齊。香港 Metaverse第一股。譚詠麟。譚詠麟 X 2

1. 壞消息係早睡早起對我唔好，又搞到黃昏先有文，但好消息係至少仲keep到出文，另外今晚（星期四）美股冇市，可以講下其他Big Picture啲嘅嘢。

快講兩句 — 債息回落，發夢股回穩

2. 美股我真係唔係太多嘢講，看圖識字得了。首先見到扭轉返星期一二嘅情況，見到納指反彈返，原因亦因為債息跌返，似乎之前都係反應過敏？

3. Big Tech回穩，仲有啲中概股都反彈，當然亦係risk off停止嘅蹟象

4. 我渣嘅嘢，你見都有得升（講過計US3，唔會因為US1升得多我就咁矛），一啲個別之前急跌（VISA，Shopify）嘅都有反彈。

5. 垃圾股倉，一樣係好分化，有啲狂升，有啲大跌，但拉勻星期三晚都有得升。全部都係預示緊差不多嘅嘢，就係星期一二啲趨勢未再繼續

6. 但，到底嗰堆趨勢（債息升 — 道指跑贏納指，舊經濟跑贏新經濟，價值跑贏增長，發夢股香晒，垃圾倉重創）只係維持兩日？定會再繼續？當然係唔知。不過可以幾肯定話你知，嚟緊一兩個月，我都會再保守返啲 — 唔係唔買QQQ，只係將啲新錢，更偏重 歐洲日本，或者係美國嘅舊經濟，或者係價值股。

大師冇點你 —  澳門股， 大家樂341。長江基建1038

7. 都真係的，早排力堆澳門股，上小炒王節目都講過（呢度，呢度），仲係有得升的。食正通關，同埋都係少數大家覺得買得落嘅香港股。

8. 仲有，大家樂亦係早兩日推過，因為基金增持。我都冇留意出埋業績，10日新高了，今晚會講多啲。

9. 長江基建嘅，不經不覺3個月新高，今年跑贏大市一大截。但，留意之前幾年都要跌，高位係七十幾蚊 ，你高位追都仲要輸三成— 所以你不能只係因為佢高息（一向都高）飛入去，會蝕價的。除非你係好似我咁月供，就應該唔會輸錢。又一次示範到點解都係要分散啲好，唔止股票冧把要分散，時機都要。

每日一圖— 美股分析員對長期增長太樂觀，多數出事。第四季實升，除非信貸市場有大鑊嘢

10. 美股分析員對長期增長太樂觀，多數出事—首先解下呢個Long term growth （LTG）rate，如果讀書讀過下嘅會有印象。基本上絶大多數估值（甚麼DCF，DDM之類），最後都係涉及將啲未來嘢discount返去今。時間係無限，但去到最尾，你總不可能假設佢每一年都50%增長，咁有個LTG．見到而家啲分析員，將呢個數字整到史上最高。點解會咁？往往因為唔整到咁高，就不能合理化啲目標價。亦都所以，歷史上都見到，多數啲LTG整到咁高，打後股市都冇乜好結果

11. 第四季實升，除非信貸市場有大鑊嘢 — 第四季美股呢，差不多一定升嘅，咁個表話你知，如果唔升呢，就一定係信貸市場有啲大件事。但我認為，咩叫信貸市場大件事，都好任佢講。雷曼爆煲當然算，咩墨西哥危機，歐債危機，我都畀你過骨。但2018都計，就好似龍門任搬了。

Good Read — Nvidia點在Metaverse搵錢。點解Paypal應該買Pinterest

12. Nvidia點在Metaverse搵錢 — 可以留意下，呢期雖然啲高估值科技股狂插，但Nvidia都仲係幾堅挺。明明佢啲估值先誇張到極（應該30倍Price to Sales），但當然大家真係認為佢前景無限。呢篇文有講公司在Metaverse會點搵到錢。而Facebook 之類都仲係話未諗點收錢，Nvidia已經好清楚話你知佢地會點搵到錢，就係做licensing

13. 點解Paypal應該買Pinterest —  呢位作者嘅文都幾好睇，雖然又唔係成日都「中」。原本Paypal 買Pinterest，人人都話係Shitty Idea，但作者力排眾議，仲相信嚟緊更多FinTech公司會買媒體或平台公司。佢嘅原因係，平台公司有用家，但難搵錢。FinTech公司就有搵錢嘅方法，但冇用家。一拍即合，亦即係去買啲用家。雖然我係有懷疑嘅，例如你睇佢文入面嘅圖，講到 PayPal同Pinterest嘅用家冇乜重叠，我就幾懷疑

FB Post Summary — 真臘風土記。土耳其里拉狂跌。羅富齊個朋友何富齊。香港 Metaverse第一股。譚詠麟。譚詠麟 X 2

15. 都係無聊文多，唯獨第一篇幾好睇

16. 真臘風土記 —呢期得意之作，叫好叫座。講點解全世界一度有一半語音訊息，都係嚟自人口唔算極多嘅柬埔寨。係咪因為文盲多？又唔係喎。原來係因為傳統鍵盤對高棉語嘅支援好差，所以啲人索性唔會打字

17. 土耳其里拉狂跌— 早排都寫過下，呢排更勁，上次寫（上星期咋）先一對十，寫嗰時一對十三都嚟緊。亦都同時衍生咗好多出古惑搵著數嘅商機。同埋，留意股市都係一路升嘅，至少可以彌補部份損失。

18. 羅富齊個朋友何富齊— 講英國上市嘅HochSchild Mining，實情係秘魯公司。忽然大插一半，因為秘魯大選，左翼政府上台，用違反環保規則為理由封咗啲礦。你懂的。然後呢兩日又話講掂數，又升返了。同場加映簡單德文知識

19. 香港 Metaverse第一股。— 創業板 羅馬集團8072 改名做 羅馬（元宇宙）。結果？今日係大插嘅。同場加映其他古怪公司改名歷史

20. 譚詠麟 譚詠麟 X 2 — 就實在冇乜好講。雖然我實在唔明白做乜大家咁大反應。定係驚歎倫伯居然在大陸有廿幾歲嘅粉絲？

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。