五大趨勢：道指跑贏納指，舊經濟跑贏新經濟，價值跑贏增長，發夢股香晒，垃圾倉重創。回帶返星期一晚嘅觸發點：債息升。NordStrom，Gap，BestBuy 一樣大跌。Zoom 業績勝預期，一樣大跌。解剖下死因 (Patreon)

五大趨勢：道指跑贏納指，舊經濟跑贏新經濟，價值跑贏增長，發夢股香晒，垃圾倉重創

回帶返星期一晚嘅觸發點：債息升

NordStrom，Gap，BestBuy 一樣大跌

Zoom 業績勝預期，一樣大跌。解剖下死因

小版務

1. 因為種種原因（小事，但加埋就會有啲影響），今日篇文遲咗出，雖然我亦不覺得好大關係。港股繼續死咕咕，都係睇美股。呢兩日（星期一，二晚）係比較值得講嘅。先講咗星期二晚先

2. 另外，告下急，仲爭啲開戶數先達到Webull嗰邊嘅quota，如果未開嘅請用我嘅專屬link，一個都不能少呀

五大趨勢：道指跑贏納指，舊經濟跑贏新經濟，價值跑贏增長，發夢股香晒，垃圾倉重創

3. 先講昨晚（星期二晚）情況，用醫學術語嚟講，病人就算穩定的。但星期一晚，由鮑威爾獲提名連任後，觸發嘅幾個大趨勢都冇變（好可能只係個引爆點同鮑威爾本人冇乜關係）。乜趨勢？你可以睇返星期一嘅文 。

4. 幾個趨勢：債息升。然後道指跑贏納指，舊經濟股跑贏新經濟股，價值股跑贏增長股，同埋啲發夢股香晒，我個垃圾倉重創。留意呢啲係幾典型嘅教科書教材，絶對跟到傳統理論，而你可以話債息升係觸發點。打後嗰五樣嘢，實情係同一個risk off 現象。

5. 例如星期二晚見，見到債息繼續升啦。但冇星期一咁誇張。

6. 咁同星期一一樣，都係道指OK升，標普升少少，納指就要跌。而好多 垃圾股 發夢股  冇盈利嘅科技股就重創。

7. 張圖就係我個垃圾倉

8. 仲有，見到啲公司嘅表現開始分化。你見銀行股，當然受惠於債息升而繼續升

9. Big Tech呢？差，但又唔係特別差喎。之前專題都講過，相對地係唔算貴得太過火。況且有一定盈利支持。

10. 至於我買啲嘢，當然都有啲跌，拉勻都要跌少少，但亦有啲企得住。你見又唔係全部舊經濟先升，例如之前勁跌嘅SNAP就反彈。

11. 講到尾，個教訓都係同平時一樣，唔該分散少少，同埋估值都係重要。之前梗係個個股神上身，我推Big Tech都畀人嫌升得唔夠快。最好成手都係發夢股，最好借錢再做孖展買Tesla 期權，但到跌落嚟時你係咪頂得住？呢兩日都已經聽有人話叫救命，話啲嘢兩日跌超過10%。首先我完全唔知佢渣乜可以兩日跌10%，另外，都肯定集中晒啲發夢科技股

12. 呢兩日嘅走勢，唔知係咪中長期，但我覺得有啲似的。當然，講咗好多次，唔係叫你沽晒啲嘢佢，而家先轉又遲啦，我發現真係通病嚟的，好多人都係見市況轉，跌就走。根本最初你就唔應該成手都係啲發夢股嘛。咁你而家沽晒佢，好可能輸錢之餘，陣間你一沽又反彈喎，咪左一巴右一巴。咁點解唔最初已經平衡啲？

13. 當然我都唔係做得完美，我都似乎新經濟增長股偏多，你見我都係Big Tech多，仲要買埋QQQ，仲要有埋咩ASML Nvidia 嗰啲，亦冇話你一定要分到極散，但真係唔好極之咁集中咯。況且，我之前都知有呢個問題，都有開始分散的，只係有點遲，但亦幾時都唔會太遲。

回帶返星期一晚嘅觸發點：債息升

14. 再講返嗰幾大趨勢。先講觸發點。點解債息升？都真係唔知。都話照計鮑威爾連任，話佢放水係鴿派喎。我亦甚至懷疑如果換人，市場震蘯會更加勁。當然呢啲假設完全不能驗證。

15. 另外我想分享呢兩個圖，係星期一晚（唔係星期二晚）的。第一個圖，藍色係納指，黑色標指。畀你見到，星期一晚幾咁奇怪，宣佈鮑威爾連任冇耐，股市就升。但好快就急跌。你話咩短炒或者 day trade嗰啲，我都唔知點捉。

16. 第二個圖更加好，留意有時我講「發夢股」，好多時係指meme股。但到底即係乜？我發現原來唔同人指嘅嘢可能唔同。正如我講「價值股」，有人當咗Tesla都係「價值股」，又或者我話「冇盈利嘅科技股」，有人當係亞馬遜

17. 咁唔緊要，我地搵啲指標。例如最簡單，睇契媽隻ARKK，好多就係啲「發夢股」或「冇盈利嘅科技股」。又或者，高盛直頭有個 Non Profitable Tech Basket，不過我唔肯定你去邊會拎到報價，Bloomberg就好似有，但至少有個知字。咁你睇下，渣呢啲嘢有乜後果。明明指數差不多新高，自己啲嘢都咁慘烈，仲要諗下係咪要止蝕。

NordStrom，Gap，BestBuy 一樣大跌

18. 仲有留意下，亦唔止係「發夢股」或「冇盈利嘅科技股」就大跌。你睇呢幾隻，NordStrom，Gap，BestBuy呢啲，一樣出完業績或指引，就跌到七彩。原因？都係因為估值太貴，實情美股冇乜嘢唔貴。都講咗好耐。你業績好有時都照跌，何況業績唔得？

Zoom 業績勝預期，一樣大跌。解剖下死因

19. 而我最想講嘅，係隻Zoom，出完業績大插。我冇買，但留意呀Charlie Bilello個 8-80 Portfolio好似有的（類似勞蘇基金嘅嘢，但我冇抄佢）。留意下，呢隻嘢唔係好似佢作風會買嘅嘢。佢8月時有買，之後都冇再提，又冇話清咗。

20. 我地可以睇返Zoom嘅情況，大家都知間公司做乜同點收錢。亦都大約估到係疫情受惠股，重啟經濟就唔掂。但亦有人話個習慣開始咗，啲人都仲會繼續用（我早兩日先用完）

21. 所以？所以我成日話，unless你討論嗰啲係好勁嘅人，否則？以上啲討論，多數都係廢話。你講理由大家都有理由的，好多股票嘅盈利前景，你可以搵到正面因素，又搵到負面。講乜都假，睇數字先實際。

22. 你可以睇返公司嘅業績。另外，我入咗啲數字（可以在MacroTrends搵）。

23. 業績永遠可以用好多角度去演繹，仲係唔少人用丫，仲要有錢賺的。你見明明業績高過預期添啦，做乜仲大插？仲跌到52星期新低？（而指數剛剛先新高）

24. 有時冇得解，但今次都仲解到，因為兩樣嘢，個展望，同埋估值。

25. 展望嗰格在黃色，公司畀嘅數字，你見下一季，收入數字（10.5億）只係同今季差不多。如果按年計，由今季嘅35%增長，放慢到19%增長。而你見之前係三位數嘅增長。咁就好難支持個估值了。

26. 咁19%增長快定慢？見仁見智，但當然仲要睇埋個估值。估值有幾貴？我用12個月（計埋下一季了）Price to Sales計，15倍。咁19%增長，對15倍Price to Sales，算係咩概念？咁你可以搵我地之前講FAAMG 或NTSTP啲Excel（呢篇文有attach），比較下啲不同公司．遲下有時間我直頭整個大表。但例如就咁睇， Twitter下季都應該同Zoom咁上下增長，但只係8倍嘅 Price to Sales

27. 當然，亦不能只係睇一季嘅數字，況且有啲公司盈利能力高啲（股票係好複雜的）。咁你話，公司畀得一季你，點知到之後嘅增長？就好多時睇你有幾了解間公司，有幾熟個行業，或者你對世界嘅觀察力有幾強了。

28. 你見到我個圖，仲有埋 PayPal同埋VISA，咁啱整埋啫，可能過兩日後講。但你睇PayPal，話係科技股，但都已經幾大間。收入增長係唔高嘅，亦都係面對競爭。但你見估值，又唔係好離地。

29. VISA呢？嚴格係金融股，但又好似有啲科技股支付股嘅特性。你見增長指引（公司話high teens，即係可能16-19咁上下，我畀到20%），肯定高過Paypal，問題係，隻嘢一路都相當貴的，亦見到個展望稍為低過預期，已經大跌。再加上後來話Amazon唔收英國嘅 VISA ．

30. 應該過兩日會詳細講。

小版務

31. 另外，將來應該會放返我在明報或者經濟一週啲文上嚟。一般明報我就比較用心機寫，但因為佢地要訂戶先睇到，所以我都隔一星期先放上嚟，免得佢地唔高興。至於經濟一週，反正佢地都會免費放上網（但多數都隔一排），照計冇乜所謂，但都係一星期後吧。

32. 首先啲文都係我自己寫嘅（居然有人以為我搵人代筆），另外，問良心就明報嘅比較用心。原因兩個，你都未必估到。首先明報容許嘅篇幅較長。另外，經濟一周會放上Facebook，而佢地個Facebook reach相當不錯，我認為都相當「標題黨化」「新假期化」，佢地亦會將我篇文加下工甚至有時扭曲改個吸引啲嘅題，我又冇乜所謂。所以你見啲文唔少人鬧的（唔使send比我），但實情冇關係，我係唔會去睇—最重要係，可能1000個之中有900個鬧，但有100個讚，而有10個變咗我讀者，有1個變咗join Patreon，已經好夠。既然係咁，經濟一週啲文，我亦唔介意嘩眾取寵啲，迎合佢地定位，唔使咁高質，高質冇人睇。

33. 相比之下，明報啲文呢，冇放上網，Facebook亦正經做，咁所以 —係冇乜人睇嘅。不過有時睇嘅係啲比較富貴或有地位嘅人（老嘢），咁有時對我其他嘢都有幫助嘅。

34. 最後，你會發現，好多時入面寫嘅嘢，都係我在Facebook甚至呢度寫過嘅。係咁架啦，但必定係呢度優先，Facebook次之。不過因為真係全篇文寫一個課題，你都可以當係迷你版嘅週末專題，都要認真花腦筋，都值得睇。

35. 暫時我冇定低幾時放上嚟，但可能係星期六或者星期日？咁即係你應該會日日都有文睇到。明報我應該會放佢地edit咗嘅版本（都會幫我執下錯字），經濟一周就……可能只係貼我交畀佢地嘅版本。但再強調，會係延遲一兩星期。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。