ivanliresearch

大家樂341，和黃醫藥13，澳門股。鮑威爾連任，債息急升，納指急跌，垃圾倉散晒。蘋果微軟 Nvidia 創新高。市場仲係信通脹只係暫時。增長股一路跑贏價值股。而家啲研究全部都「史無前例」「革命性」。4% rule 已死。Metaverse咪即係 Big Tech．唔好再平均成本法啦 (Patreon)

Published:

2021-11-22 18:28:10

Imported:

2022-09

Content

港股 — 大家樂341，和黃醫藥13，澳門股

美股 — 鮑威爾連任，債息急升，納指急跌，垃圾倉散晒

大師冇點你 — 蘋果微軟 Nvidia 創新高

每日一圖— 市場仲係信通脹只係暫時。增長股一路跑贏價值股。而家啲研究全部都「史無前例」「革命性」

Good Read — 4% rule 已死。Metaverse咪即係 Big Tech．唔好再平均成本法啦

FB Post Summary — 689 大跌。《智齒》。鮑威爾連任

1. 再一次，早寫早瞓早起身，而家係兩點，美股有排都未收市。今日多嘢寫，唔賣廣告，聽日會有

2. 另外，週末專題寫咗篇NTSTP業績，記住去睇。

港股 — 大家樂341，和黃醫藥13，澳門股

3. 港股嘅，就真係只同你講兩句。首先，澳門股強勢，之前都大約有講過，我諗係少數值得睇嘅香港股票，似乎仲有得上的。始終通關同埋各樣嘢回復正常都係大勢。

4. 但另外，見到有個外國基金，走去增持咗大家樂341。應該都唔止第一次，佢地亦都之前有買其他港股。（睇唔到就自己去網站搵Mondrian）。可能都係睇重啟概念？定覺得夠殘？斷估應該唔係想去狙擊間公司。

5. 最後，之前好少提，和黃醫藥13昨日夠強勢，有臨床研究成果喎。我對間公司完全唔清楚，但至少長和系啲嘢都仲有個譜，亦唔係已經升到癲嘅嘢。我就唔會買的，但有啲想睇港股又手痕嘅，可以留意下。

美股 — 鮑威爾連任，債息急升，納指急跌，垃圾倉散晒

6. 美股最大嘅新聞，當然係鮑威爾有得連任。我在Facebook都速評咗。正常應該係歌舞昇平，至少冇咗個不明朗因素。咁你見道指都大升，標指同納指都創新高，但回得好快，納指甚至倒跌喎。好多科技股仲跌得好急添，乜事？

7. 正路個元兇，當然係債息急升（亦見到銀行股急彈）。但點解急升？明明話鮑威爾係溫和嘅鴿派。咁當然你事後講故事，可以話「拜登畀得佢連任，當然要佢重手打通脹啦」。但呢類解釋意義不大。

8. 更重要係你留意下市場發生乜，真係見到好多啲高估值嘅科技股都急跌。增長股跑贏價值股已經好耐（下面每日一圖會講），係咪開始轉勢？係有啲似的。我都好似唔止第一次講，希望側重返啲美股科技股以外嘅嘢，無論係美股舊經濟，美股價值股，定係其他市場，可惜都好似係分散得唔夠快，但總冇完美，至少我唔係成手都發夢股，否則可以死得好慘的（留意呢個表係週末的，都未計星期一晚）

9. 最後，見到垃圾倉啲嘢都散晒，因為垃圾倉正係好多發夢科技股。都唔止一日嘅事，真係見到量度到個市場走勢的。當然我買得咁細，就可以唔理佢。

大師冇點你 — 蘋果微軟 Nvidia 創新高

10. 但真係見到了。即使破頂後，Nvidia 同微軟都好快倒跌，唯獨係在Big Tech中之前大落後，估值又相對冇咁貴嘅蘋果，呢排就不停破頂

每日一圖— 市場仲係信通脹只係暫時。增長股一路跑贏價值股。而家啲研究全部都「史無前例」「革命性」

11. 市場仲係信通脹只係暫時— 近期相當奇怪，你見美國嘅CPI（即使只係計核心CPI）咁高，但債息完全冇跟上的。呢個在史上都幾少見。近期嘅數字（紅色）明顯係偏離。到底係睇死通脹好快會跌返？定係睇準根本美國冇幾多空間加息？可能兩樣都係。

12. 增長股一路跑贏價值股— 舊嘅圖，上星期篇Good Read入面先引過，原文呢度。咁本身係個現象，但下年係繼續？定係逆轉？就難捉。但近期嘅走勢，似乎真係價值股會開始抬頭？可能我啲新錢都會買返多啲（一路都有講，但做得唔足）。另外留意，IWF同IWD，就係分別代表增長，同埋價值嘅ETF。你可以上ETF.com去睇下到底入面渣住乜，同埋睇下係咩準則，有機會我細講。

13. 而家啲研究全部都「史無前例」「革命性」—同金融無關，但幾有趣地，見到而家啲研究，係不停出現innovative，unprecedented 呢啲字。亦唔止係因為研究多咗，已經計咗呢個因素。原因？明顯係因為而家嘅人講嘢越嚟越浮誇。

Good Read — 4% rule 已死。Metaverse咪即係 Big Tech．唔好再平均成本法啦

14. 4% rule 已死 — 4% Rule，以前有篇講財務自由嘅文都講過。都好多人聽過，都算make sense的，大約就係話你個倉每年拎4%出嚟呢，咁你就一路都會食極都係面嗰浸，可以食到死，因為你堆嘢嘅回報，就會追到通脹，仲容許你每年拎4%出嚟。亦即係話，如果你一年洗費40萬嘅，咁你有1000萬就可以退休。但，壞消息係，而家專家話唔夠啦，而家3.3% rule 先合理。亦即係，你嘅退休儲備，又要多21%（4除以3.3）。點解？因為專家認為，將來幾十年嘅股市債回報，唔會好似之前咁好了。因為低息環境，同埋估值

15. Metaverse咪即係 Big Tech—　有啲長嘅文，但唔深，易理解。一街都講Metaverse，但我相信都係Big Tech幾間嘅世界。以前都引過篇文講，之前十幾年，所有嘢都係圍住智能手機發展。Metaverse就係next big thing，而Big Tech公司有人才，亦有大把錢，本業太好搵，所以好有優勢。當然世事無絶對，最初智能手機冒起時，大家又未必估到係Big Tech 呢堆公司跑出啫。下個月信報月刊我篇文都會講呢樣嘢

16. 唔好再平均成本法啦— 月供股票，同平均成本法，差不多係同一回事。呀作者好煞有介事咁，話唔好用平均成本法，應該一鑊過放晒落去，仲用返以前嘅數字做例子。的確，你睇美股，如果標普指數，當然係一鑊過放落去，好過平均成本法的。但你應該知道點解：因為一路美股長升長有嘛，但如果唔係呢？如果你買隻係個股呢？咁如果我一早知道將來都係長升長有，我應該瞓身家買晒借盡孖展買落去添。況且，大多數人嘅收入，都係每個月咁得嚟嘛，所以我都係認為用平均成本法最合理。當然，如果你忽然係有舊大錢嘅情況，我舊文都講過（都話啲舊文好有用）。問題又係，點解你而家會係拎住一大舊錢架呢？你話如果你中咗六合彩，或者拎咗遺產就冇得講。但如果之前一路都只係拎現金嘅，本身個想法就出咗啲問題了。