NTSTP（NetFlix，Twitter，Snap，Tesla，Pinterest） 業績全攻略 (Patreon)

FAAMG vs NTSTP

Sector圖表數個

Netflix — 用戶點都會飽和，唯有靠加價，或者廣告

Twitter — 用戶仲增長緊，估值亦唔算貴

Snap — 業績後大插，都仲係幾貴，但至少用戶增長仲在

Tesla — 首富沽得七七八八啦？

Pinterest — 等賣盤？

FAAMG vs NTSTP

1. 來吧，又嚟週末專題。今次都係講科技股業績，但就唔係FAAMG，而係NTSTP（NetFlix，Twitter，Snap，Tesla，Pinterest），呢個名係我作的，唔記得點解咁順序，是但啦。而呢五間公司，除咗都係科技股外，都冇乜共通點。有市值過萬億嘅Tesla，亦有得兩三百億嘅嘢。

2. 入面我原本只係有NetFlix同Tesla，然後因為開Webull戶口（未開記住開），要買嘢，就買埋Snap同Twitter，係業績後大跌再買嘅，「結果仲有得跌」，但買得唔多。

3. 順手講埋，呢個Excel係同埋FAAMG一齊嘅，下次我估我可能會分返開了

4. 好快跟一跟進，上兩星期寫完FAAMG業績（唔使特登返去睇），結果見到，股價就跑出嘅。有一排話冇力，但你見年初至今，又再係大幅跑贏返。特別係之前醜聞多多嘅Facebook，同埋業績唔多掂嘅亞馬遜同蘋果，都追返上嚟（留意圖入面嘅「上次」係8月中，「而家」就真係而家）

5. 但你睇呢堆NTSTP，就另一回事了。年初至今嘅，勉強你可以話五隻平均加埋有得升，但分野好大，兩間要輸錢。由上次（10月中）到而家，更加係夾埋輸錢，大幅跑輸大市，Twitter同Snap都大跌。

6. 點解FAAMG好似強咁多？你見業績，都唔係話全部好，但就算業績唔掂都唔會好似NTSTP咁跌成十幾二十%，因為啲估值相對地低啲，例如你睇Price to Sales都睇到（呢度係用過去四季加埋，有啲公司有畀下一季指引，我兩篇大作在講每間公司時都有提，理論上我應該用埋，但我未得閒搞，況且唔係間間有出）。睇市盈率分野更加明顯，FAAMG嗰堆好多都係相當賺錢嘅公司，NTSTP好多只係微利，甚至輸錢。

7. 當然有人話，唔係平就好。冇錯丫。高估值高增長，都係。咁但就睇下有幾高增長了。咁你睇返收入增長，NTSTP的確係高啲，但係咪值得估值貴咁多，就係最考功夫嘅主觀藝術了，雖然個市場反應都大約話咗你知。

Sector圖表數個

8. Charlie Bilello呢個表，大約話到畀你知，啲公司嘅收入增長。留意名單同我地堆NTSTP唔同的，有啲其他有趣嘅公司

9. 呢個表就畀你見到，納指創新高之時，其他各式科技股（或者扮科技股），同高位仲爭幾多。當中不乏一啲之前喪炒嘅公司。好多都係業績略為低過預期就大插，亦係估值嘅問題。

10. 最後呢張，畀你見到幾個社交平台嘅用家增長（NTSTP有三間都係）。Facebook 去到咁規模都仲有6%增長，認真誇張。雖然唔少人話啲數字有水份，但相信其他平台都一樣，反而NetFlix之類要畀錢嘅，就好難作得太大，睇你個收入睇得到。然後真係唔知Pinterest之類反而咁多人，可惜增長都停滯。不過留意，唔同公司計嘅嘢唔一樣，Twitter計嘅係Monetizable （可變現嘅）DAU，如果只計活躍用家，應該就有近4億

以下會每間都講下

Netflix — 用戶點都會飽和，唯有靠加價，或者廣告

11. 呢間我之前係講得比較詳細嘅，CNBC報導呢度，我嘅Preview呢度，我嘅簡評呢度。簡單嚟講，盈利勝預期，收入符合預期。上客量好過預期。

12. 每股盈利3.19，好過街估嘅2.59。公司已經幾賺錢，純利14.5億。按年升八成。你計過去十二個月，60倍市盈率，當然都好似好貴，但至少有個譜。呢個好可能係公司收入放慢（下一段講），但股價依然唔錯嘅原因。

13. 問題係公司嘅收入開始放慢，亦係必然嘅結果。收入74.8億，同街估嘅差不多。收入按年升16%，係2012年以嚟最低。

14. 幸好，公司上季新增訂戶 438萬，高過自己指引嘅350萬，亦高過街估嘅384萬，上客數字多過之前兩季。

15. 公司預第四季上客850萬，數字只係同街估差不多，留意舊年第四季都係上850萬客。跟呢個數字，年尾就會去到2.22億總訂戶，按年升9%。

16. 第三季呢438萬客，一半嚟自亞太區，四成歐洲中東，一成拉丁美洲，北美近乎係冇嘅。你相當明顯見到，亞太區用戶佔得越嚟越多，亦係公司將來嘅增長點。

17. 留意個收費都仲係平，照計有啲加價空間。實情公司在韓國已經加價，相信其他地方都會，相信NetFlix絶對有能力加價20-30%，而唔會點流失客戶。因為個金額始終細，講緊一百蚊港紙唔夠，你好多地方入戲院睇兩套戲都唔止。

18. 正如CEO一路都希望大家唔好聚焦於個用家增長（因為真係飽和，又唔入唔到大陸），下一步，就睇公司點樣在啲訂戶身上拎更多錢。

19. 加價係一個方法，另外之前我都有講，公司用咗新計法，出每個星期top 10，話埋你知到底即係啲人睇咗幾耐。你估下為乜？我估都係想試賣廣告。

20. 當然，另外仲有公司推出咗手機遊機，另外仲好可能會賣嘢（故事呢度，同埋呢度），但呢啲照計只係實驗性質，有排都未可以有似樣嘅收入貢獻。短期都係睇加價，同埋賣廣告。

Twitter — 用戶仲增長緊，估值亦唔算貴

21. CNBC報導呢度，我嘅簡評呢度。盈利好過預期，收入同預期差不多，用戶數字都係同預期差不多。公司話iOS私隱設定對收入嘅影響較預期低。

22. 每股盈利0.18，好過街估嘅0.15。收入12.84億，同街估嘅12.85億差不多，按年升37%。留意公司已經連續4季錄得超過10億收入。下季收入指引係15-16億，亦即係16-24%增長，明顯低過今季一截，好可能係股價跌嘅原因，街原本估15.8億，

23. Monetizable DAU（可變現每日活躍用戶）2.11億，街估2.12億。留意公司有筆法律開支7.7億，所以今季轉蝕5.4億，舊年就有純利嘅。

24. 整體見到，個用戶增長勢頭依然係幾好的。當然第四季指引預個收入增長大幅放緩就係個問題，但亦唔好忘記舊年第四季係高基數。你睇Price to Sales 8倍，又點都唔算好過份。

Snap — 業績後大插，都仲係幾貴，但至少用戶增長仲在

25. 呢隻就勁咯，一出業績大插25%。CNBC報導呢度，我嘅Preview呢度。盈利好過預期，收入略為低過預期。用戶數字好過預期，但個展望差。同埋最大問題個估值貴，小小風吹草動就大跌了。

26. 每股盈利0.17，好過街估嘅0.08好多。收入10.7億，升58%，但略為低過街估嘅11億，但至少公司第一次收入突破10億。問題係第四季預收入11.6至12億，同街估嘅13.6億。呢個數字亦代表公司第四季收入增長27-32%，亦較今季大幅放慢。

27. 收入受影響嘅原因，當然又係萬惡嘅iOS私隱設定更新（與此同時你見呢排蘋果股價強返好多，大家卒之發現公司有幾惡）。

28. 比較好嘅係，SNAP嘅DAU仲有 3.06億，按年升23%，街估3.02億．不過個ARPU （每戶平均收入）得3.49，同街估嘅3.67都爭好多。另外留意，雖然用家好多都係北美以外，但你見北美以外嘅ARPU，係低過北美嘅好多好多的

29. 展望？仲係成22倍Price to Sales，相當貴的，但至少個DAU增長仲係幾勁

Tesla — 首富沽得七七八八啦？

30. 好多人關心嘅Tesla，業績反而冇乜好講，但循例都寫。CNBC報導呢度。見到收入同盈利都勝預期嘅，兩者都係連續三季歷史新高，邊個話收入同盈利唔重要？

31. 公司上季收入去到137.6億，高過街估嘅136.3億，按年升57%，依然相當高增長。每股盈利1.86，亦高過街估嘅1.59。純利16.2億，係舊年嘅幾倍。

32. 公司嘅汽車業務毛利達到30.5%，成間公司就26.6%，兩者都係五季新高，亦帶動咗個純利升。至於賣車同出車數字，一早出咗，冇乜好評。

33. 出完業績後，公司見過1萬億市值，成為第六間入到會嘅公司（Facebook之前過1萬億，而家唔過），而家仲頂得住。

34. 不過近排嘅焦點當然係Elon Musk搞嘅大龍鳳投票，照計就唔應該影響股價，但可能影響到大家情緒，股價一度都高位跌兩成咁滯，「使唔使又止蝕」？但照計佢都沽得七七八八，亦應該唔會再沽（因為今次係行使期權交稅啫），所以你見股價都低位彈返。

Pinterest — 等賣盤？

35. 最後，唯一一間冇買嘅，Pinterest。CNBC報導呢度，盈利同收入都勝預期，但用戶增長低過預期。

36. 每股盈利0.28，好過街估嘅0.23。收入6.33億，好過街估嘅6.31億些少，按年升43%。第四季公司估收入升接近20%，街估24%，亦即係會大幅放慢。

37. MAU 4.40億，低過街估4.6億，數字已經連跌兩季。ARPU 就1.41，好過街估嘅1.38。

38. 著實個用戶數字在跌，都真係幾難搞的。不過，至少公司係有錢賺嘅。同埋，你睇啲估值，12倍Price to Sales，又冇去到Snap嘅22倍咁誇張。所以你見業績後（11月頭出的）反而跌定咗的。

39. 公司嘅下場，好可能都係賣盤。之前傳過Paypal買，但Paypal又話唔再買，十分兒嬉。陰謀論話Paypal自己放風，見到股價反應差，即時彈弓手。年頭亦都傳過微軟會買，好似嫌貴，但畀你見到真係待價而沽的。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。