恒指跌300但我嘅港股倉有得升。恒指季檢有乜炒。納指新高，但唔少高位都回得急。又話封城又話加息，驚未？ Nvidia 愛馬士 蘋果 Shopify 微軟 Google新高．美股45%股票跑贏大市。科技股五個月以嚟最多資金流出． 亞洲躺平一族及投資機遇。唔知道將來的話，點去投資？ (Patreon)

快評兩句 —  恒指跌300但我嘅港股倉有得升。恒指季檢有乜炒。

快評兩句 —納指新高，但唔少高位都回得急。又話封城又話加息，驚未？

大師冇點你 — Nvidia 愛馬士 蘋果 Shopify 微軟 Google新高

每日一圖—  美股45%股票跑贏大市。科技股五個月以嚟最多資金流出

Good Read —  亞洲躺平一族及投資機遇。唔知道將來的話，點去投資？

FB Post Summary — 港產爛片。投資四步曲必勝法。8964日本股。酒樓式清盤。

1. 原本係星期五晚嘅文，但都話呢期不停鑽嘢（實情都鑽咗超過半年，樓上鑽完到樓下，又到返樓上）。所以啲作息時間都受影響，將來你都預可能星期五晚嗰篇會遲啲，反正冇市，不急，亦都等我多啲時間「放空」，睇下其他嘢，唔使成日太過貼市。而週末專題呢，都仲係盡可能做嘅。

2. 但都仲係快手講講廣告，USMART，記得用我個開戶link，當支持下我，你又有嘢拎。佢地個月供美股幾好用，開戶注意就睇返睇返舊文。

3. 我見到都十幾人註冊咗，但未完成開戶同入錢的。我就認為你入3萬蚊博CD餐先抵。

4. 另外，Webull仲係有得玩的，嗰股高通真係升極都有。千五蚊都嚟緊，唔知佢地之後會唔會改。照舊，用我個開戶link，當支持下我

5. 當然仲有最後，富途。未開嘅，就用我個code：9M85BY4D．都有嘢送的。

快評兩句 —  恒指跌300但我嘅港股倉有得升。恒指季檢有乜炒。

6. 好，卒之有少少港股可以講下。雖然星期五都要跌270點，不過你見跌勢真係只係集在中阿里巴巴9988 一隻（佢一隻拖低210點），成個科指仲要冇乜跌，而成交亦都有返近1400億。同時間亦都見到啲牌子公司做得比較好啲

7. 真的，你見我嘅港股倉，都唔使跌。關鍵就係冇渣阿里巴巴。你見靠華潤置地1109同中海外688 頂住唔少，而真正跌得多嘅近乎冇（隻太古地產早排先開始月供，得幾千銀）

8. 當然，仲可以講一講恒指執位，雖然都冇乜嘢講。信報個圖做得好，話你知入完恒指都唔代表之後實升，有啲仲要大跌，因為入恒指時往往因為估值超貴先炒到咁大市值。當然如果你比較埋同一時段嘅恒指升跌更好

9. 真係要睇嘅，可以睇明報呢個圖，留意首先睇資金流入。但就咁都唔足夠，仲要同返啲股票平時嘅成交去比嘛。大約幫你睇過，影響最大應該係隻華潤啤291，第二大就新奧能源2688，其他全部可以不理

10. 當然仲有一樣嘢，又出咗恒生綜合指數名單。入到呢個指數，之後就有機會入港股通，有北水買，三個月前王維基隻1137都係咁。今次係呢幾隻：騰盛博藥2137，醫脈通2192同埋海倫司9869。市值照計三隻都夠，但業務好似三隻都麻麻地，前兩者相當貴，海倫司做酒吧，食正疫情打擊 — 不過股票炒將來，三選一，可能搏呢隻。留意只係博港股通，冇人叫你長期持有

快評兩句 —納指新高，但唔少高位都回得急。又話封城又話加息，驚未？

11. 至於美股嘅，見納指創咗新高。但啲指數高位都回得幾急，道指標指直頭要跌。創新高嗰啲高位都回得好急（下面「大師冇點你」有講）。

12. 市況急回，似乎都同疫情又有啲反彈有關，特別係歐洲可能又要封城。所以你見啲郵輪或航空公司都跌，但唔算跌好多。我相信點都冇可能返返去到舊年嗰啲封城措施了，疫情消退，生活如常，始終係大方向。

13. 另外我懷疑亦係因為咁，所以見到債息高位都跌返，而科技股就跑贏大市。至於有話要加快縮表同加息，但你見債息都冇升的。

大師冇點你 — Nvidia 愛馬士 蘋果 Shopify 微軟 Google新高

14. 同樣地，我個美股大倉US3都仲有得升。固然都唔止一日係高位回落，相信大家呢排都可能面對指數創新高，但自己啲嘢未必跟得上。但我又認為應該處之泰然，始終係長途賽，咁快升晒都冇用，講真我唔信有邊個係美股升多兩成可以即時退休。聽落廢廢地，但唔跌邊有平嘢買？

每日一圖—  美股45%股票跑贏大市。科技股五個月以嚟最多資金流出

15. 美股45%股票跑贏大市— 簡單易明，標普指數今年回報24%，但500隻股票排位，中位數就只得21%，而只得45%股票係跑贏大市。固然係因為部份公司貢獻大多數升幅，雖然都好正常，唔代表就好快會爆煲。亦都即係就算你買指數入面嗰堆嘢，10隻都有5隻半係跑輸指數。但另一方面亦唔使太難過，如果你自己揀股嘅，做到21%回報亦都已經幾好。留意個圖係直到10月尾為止，到呢一刻應該更加側埋一邊，應該少過45%股票跑贏大市。

16. 科技股五個月以嚟最多資金流出 — 特登揀今日貼。留意上星期見到科技股係好多資金流出嘅 — 但見唔見剛剛Nasdaq就創新高？可見好多人執著於啲咩資金流出流入，好大程度係廢嘅，完全滯後晒。人地反手再買前唔會話你知。況且資金落出亦不等於會跌，都話任何買賣都係有人沽有人買。

Good Read —  亞洲躺平一族及投資機遇。唔知道將來的話，點去投資？

17. 亞洲躺平一族及投資機遇— 唔長嘅文，留意返「躺平」當然唔止係大陸獨有嘅嘢，全個亞洲都係。背後當然亦因為經濟環境，人口結構等等。「不過我地唔係做社會學研究，最關心都係有乜投資機遇」。答案當然係手機同網上遊戲。篇文有link去其他佢地發表嘅報告，但只得summary，完全版要畀錢。幾千甚至萬幾蚊（我都冇研究係港紙定美金），我心諗，傻的嗎？邊個去買？可能只得啲洗客戶錢嘅基金公司（所以，唔好買基金）。都有啲免費報告嘅，但要你email．

18. 唔知道將來的話，點去投資？—又係Charlie Bilello嘅文（我應該去請佢食飯）。但真係諗好多嘢同我不謀而合。好淺嘅文，但核心思想係話你知，人類，包括啲專家（甚至佢自己），預測市場嘅能力極之低。唔好話2020年估唔到V型大反彈，就連2021年股市咁勁，又有幾多人估到（我都估唔到）。但偏偏人性嘅弱點係鍾意「確定性」，等於每日都好多讀者問我，「你點知唔會乜乜乜」「如果乜乜乜咁點？你點知唔會？」。答案係唔知的，未來就係不可知，否則我一定借盡槓杆狂買。但，好多人覺得，「唔知將來發生咩事點投資」，甚至更挑釁嘅「你都唔知會發生乜事學乜人寫文扮專家」。錯，正好相反，投資就係買不確定性。你嘅回報就係嚟自你肯面對呢啲嘢。作者舉咗幾個有可能會逆轉嘅趨勢，所以覺得應該買啲價值股呀，新興市場呀咁。留意，佢講明，唔係因為佢「知道會發生」，而係因為「可能發生」。正如我成日講嘅，「如果我錯呢？」「如果你錯呢？」。唔該，謙虛少少，接受你根本唔知道將來會發生乜事。可惜你見多數人都係會認為講得大聲，「肯定係」，「買晒落去」，嗰啲先係專家。

FB Post Summary — 港產爛片。投資四步曲必勝法。8964日本股。酒樓式清盤。

19. 港產爛片 — 投資無關，但幾多人睇。就係講返何謂「爛片」，兼且推介幾套

20. 投資四步曲必勝法 — 早前蘋果 愛馬士 Nvidia 微軟新高時寫的。四步曲必勝法就係：1搵好公司，2買得大，3坐得穩，4渣得長。都仲要有先後之分，表面上第一步最難，但你諗真啲，之後嗰三步仲難，一層比一層難。好多人都買過啲後來勁升嘅公司，但有冇坐得穩 渣得長 買得大？同埋留意，第一步你難啲控制，亦可能要啲知識。但二三四純係你個人嘅心態。

21. 8964日本股 —  由恒指變64隻開始講。香港有64號股票，百無禁忌，大陸就冇008964或608964。而日本都有8964，50萬円一股！不過原來係REIT，可以一股一股咁買。

22. 酒樓式清盤 — 極其無聊嘅post，但多人睇。講Mount Kelly國際學校啲債券變廢紙，但個疑似中介入另外又搞間公司，吹咩。有限公司喎。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。