阿里巴巴9988 京東9618 業績。Nvidia —　33倍 Price to sales啦喎。人窮思舊債— Amazon劇鬥VISA。又有日本股 (Patreon)

阿里巴巴9988 京東9618 業績

Nvidia（有Excel） —　33倍 Price to sales啦喎

人窮思舊債— Amazon劇鬥VISA

又有日本股

1. 照舊，快速廣告，USMART，記得用我個開戶link，當支持下我，你又有嘢拎。佢地個月供美股幾好用，開戶注意就睇返睇返舊文。

2. 另外，Webull仲係有得玩的，嗰股高通真係升極都有。千五蚊都嚟緊，唔知佢地之後會唔會改。照舊，用我個開戶link，當支持下我

3. 當然仲有最後，富途。未開嘅，就用我個code：9M85BY4D．兩間都有嘢送的。

阿里巴巴9988 京東9618 業績

4. 阿里巴巴嘅，我係冇買嘅，應該大家都睇到啦，都唔使我再多補充。情況就幾惡劣的，真係見到盈利都大倒退。雖然如果你睇個收入，就只係略為低過預期。當然，股票始終炒前景，大家都係估啲監管幾時會放寬，原本都以為會，但耐唔耐你又見大陸可能鬆鬆下又緊返，所以真係好難玩。

5. 你見啲中概股都係冇乜運行。但同時間，見隻京東9618就逆市跑出喎，八個月新高了。我都冇買亦冇乜點寫過，但事後睇又都幾合理。表面當然係因為業績好，但諗真啲，京東相對地強，都真係有原因。一方面佢又未去到阿里巴巴騰訊咁大，冇咁多敏感嘢，受嘅監管壓力細啲。但另一方面佢又唔係啲細到蝕錢嘅公司。呢個亦係我呢排都比較留意二線科技股嘅原因，雖然如果美股嘅，一線公司即使面臨監管，都唔會好似中國咁大力。你見近排啲FAAMG又有返力的

Nvidia —　33倍 Price to sales啦喎

6. 另外，Nvidia嘅，股價升成咁，都唔使點講啦下話？之前好似有讀者業績前想買，我叫佢忍一忍手，結果業績後大升，我都估唔到，相當抱歉，但都冇計嘅。另外仲有愛馬士 蘋果 微軟都新高，但冇乜特別消息。

7. 業績當然係好，收入71億，街估68億。每股盈利1.17，街估1.11。但，幾時都係個估值問題，我130蚊時買已經覺得相當貴，而更加唔使講。

8. 同時間我仲將個Excel整咗多啲嘢（attachment有），你見Graphics 同Computer and Networking兩大segment，今次嘅增長都差不多，近幾季佔總收入都係 六四比。但睇再前少少，兩年前講緊七三，甚至係近八二的。

9. 睇返收入增長，仲有50%，當然支持到個高估值。但個升幅放慢緊嘅。當然亦可以留意下公司毛利率一路都好穩定

10. 好啦，隻嘢而家升到8000億市值。咁你見到，12個月收入240億，12個月純利82億。即係33倍Price to Sales！100倍PE。你可以同其他公司比較下，你上macrotrends之類，都搵得到啲公司過去12個月收入同盈利，如果有時未有最新嘅就自己上公司網然後加返最近一季上去。

11. 咁冇話33倍Price to Sales100倍PE。唔得，但，又真係稍有差池就幾危險了。當然會有增長啦，話下一季指引74億收入，街估69億。

12. 貴到甚至令到我會想沽咁一半先，當然我一定唔會沽晒。可能之後如果大跌我就會沽一半，又玩「零成本」，對心理上係幾好的。雖然，我又冇負債（供樓嘅唔計啦），又有收入，唔等錢使，就真係只係為心理上易過啲。無論如何，真係沽咗會話你知，肯定唔會係沽晒，而你睇以往紀錄，多數呢啲我掙扎賣唔賣嘅，十次有九次最後都唔賣。

13. 同時間，其他啲晶片或半導體股當然都升埋。AMD，高通（QCOM，開咗Webull未？）都創新高。大落後係隻美光Micron，但當然落後有原因，隻隻做嘅嘢都有啲唔同，有機會細講，或者根本你熟過我。你問我就反而搏高通甚至…..台積電仲好啲。當然台積電嘅問題係又要睇埋個ADR溢價之類（如果你去到台灣買就簡單好多）

人窮思舊債— Amazon劇鬥VISA

14. 仲有，VISA，我係有買嘅，今年表現麻麻地。星期三跌得多，星期四就回穩返啲。但我都想借機討論下。

15. 個導火線當然係Amazon話唔收英國嘅VISA卡，咁固然英國佔VISA自己唔會太多，但你都可以想像，再搞落去可能就到其他地方。

16. 當然成件事嘅動機，都係分贓唔勻，之前都講Amazon啲網購蝕住做，人窮思舊債，就出嚟搵人搞。咁Amazon嘅文化當然唔會搞啲客，一定係搞啲中間人，或者員工。講到尾覺得VISA食水深咯，想迫佢減價，以前都有積怨，而Amazon亦唔係第一間。以我所知，佢就照收Master嘅，諗住逐個擊破咁。

17. 寫到呢度，大約你都知，睇下邊個牙力大。我估都難講，但我又唔係好相信Amazon可以全面封殺VISA咁惡，你可以諗下你有幾多嘢都仲係用信用卡？咁如果只封VISA 收Master，逐個擊破得唔得？理論上可能得，但你諗下，如果個個轉Master，Amazon又唔會見得著數咗啫，除非你話Master收平好多。所以講到尾，照計都係求財，有得傾嘅。

18. 成件事你仲睇到幾樣嘢。第一，啲大公司開始互相踩入對方嘅領域，就越嚟越多呢啲嘢，就真係睇邊個夠惡。第二，「護城河」呢味嘢，都可以隨時間而變，亦冇話你有「護城河」人地就打唔到入嚟，頂多慢啲，代價大啲。VISA一路嘅「護城河」都係規模大，同Master Duopoly，每單交易舔你少少就夠。我又唔係好覺得會咁易跪低。第三，暫時你睇股價反應呢，VISA就跌，Amazon就升唔少，唔知關唔關事，但亦畀你見到，太集中於個別公司就未必好。而家就算VISA跌，我在Amazon都可以賺返

又有日本股

19. 有加拿大香港人讀者，醒咗隻日本股畀我（又，會唔會呢啲係股災先兆？）。望落都幾有趣，又同大家分享下。

20. 間公司就係Recruit 6098，我心諗，仲未執架咩？明顯我當咗係香港嗰間（而香港嗰間都未執），至於香港嗰間同日本呢間有冇關係，我都仲未有深究。應該係冇嘅，香港嗰檔最初好似係周融（冇錯係嗰個周融）廿幾年前搞出嚟的。

21. 科網公司，咁固然本業做求職廣告，人力派遣等等。但業務極之多，我都未一一細睇。特別留意，公司好多收入係嚟自海外的。

22. 不過你大約睇下個圖都知，升咗唔少。Price to Sales都5/6倍（自己計吧，不太難），以日本股嚟講都算偏貴，但我亦唔係冇買過咁貴嘅嘢（Z Holdings 之類都係咁上下）。

23. 所以好簡單，好公司，有趣，但相當貴。咁必定又係返到去嗰個「好嘢唔會平」「再好嘅嘢都有個價」嘅掙扎，或者係「等回下先買」「但萬一唔回呢？」之類。我就暫時放在觀察名單上，有錢先買，但冇錢。呢個月已經買到戶口負數（未到十萬嘅），咁固然我月尾或十二月月頭會有啲特別錢收到，但大家最好唔好學。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。