美股準備開車。國泰293。Nvidia業績前曕． 愛馬士微軟NetFlix 新高。Rivian 散水。Tesla反彈．ETF 上市後就走樣。創新高後先高追美股有乜後果？股市同實體經濟係兩回事。數碼廣告好快玩完？ (Patreon)

快評兩句 — 美股準備開車。國泰293。Nvidia業績前曕

大師冇點你 — 愛馬士微軟NetFlix  新高。Rivian 散水。Tesla反彈

每日一圖— ETF 上市後就走樣。創新高後先高追美股有乜後果？

Good Read —  股市同實體經濟係兩回事。數碼廣告好快玩完？

FB Post Summary —  土耳其股市屢創新高。Oatly插水。

1. 快賣一下廣告，USMART，記得用我個開戶link

2. 我自己都有用，覺得佢個月供美股幾好。有乜好就昨日篇文，同埋Facebook Page都有講。你最關心嘅禮物，有ABCD餐，個人覺得AB餐全不吸引，點都係揀C或D，而C同D要求一樣。要維持30000蚊，同做一次500蚊交易（港股美股均可），同埋要做500蚊eDDA．詳情昨日篇文有講。最好你轉咗30000蚊先揀餐，因為你一揀完佢就即計你資產結餘

3. 記得用我個開戶link

4. 呢排繼續早睡早起，寫嗰時美股未收市。原因？樓下鑽嘢。樓上鑽完又到樓下。

快評兩句 — 美股準備開車。國泰293盈警定盈喜？Nvidia業績前曕

5. 都有少少標題黨，但，呢個美股每年走勢圖，今年都貼過幾次，而見到今年都跟得幾足。過往都係呢段日子比較牛皮，然後年尾就開始一路升。記得往年聖誕節都強。當然只供參考。

6. 國泰293嘅，冇跟開，亦都冇乜點推過。留意最新嘅通告，講7-10月間營運現金已經接近收支平衡，即係「唔使再燒錢」。但當然，營運現金收支平衡，同賺錢，係完全兩回事。只係啲折舊都夠大舊（非現金嘅嘢）。所以公司同時間話你知，2021年都會重大虧損。不過，有講到下半年較上半年大幅改善。即係點？即係全年埋單肯定蝕（預咗啦），但下半年應該蝕得少過上半年咁咯。係咪利好股價？我估應該係，但冇叫你買呀下。

7. 至於Nvidia業績？收市先出，但我直覺估股價會插。主要都真係估值貴，業績差固然會大插，業績好都可能會跌。當然我可能錯啦下，所以唔好自作聰明趕在業績前嗰幾個鐘沽走佢。萬一升點算？

大師冇點你 — 愛馬士微軟NetFlix  新高。Rivian 散水。Tesla反彈

8. 愛馬士微軟新高呢下冇乜出奇，但NetFlix居然搞搞下上到歷史新高，夠晒唔明，總唔會仲係講《魷魚遊戲》啩？我個人覺得，公司都係會想賣廣告。證據係近期成日都出啲收視數字，以前好秘密的。咁，畀邊個睇？你話呢？

9. 至於電動車嘅嘢，走勢唔意外，雖然事前你好難估到去到邊日或者乜位先會發生咁嘅事。Rivian一早講咗貴到無倫，純係鬥傻，咁而家高位跌落嚟，遊戲就玩完架啦，之前有幸買咗嘅好快手走。

10. 至於Tesla，一直都講，呀首富減持，同公司嘅估值有乜關係？應該近乎冇的。咁佢都沽到一半咁滯，股價反彈唔奇。雖然我都仲係覺得間公司好貴，就唔會建議你呢啲位追。

每日一圖— ETF 上市後就走樣。創新高後先高追美股有乜後果？

11. ETF 上市後就走樣— 個圖係度啲ETF跑贏大市嘅幅度。你見到，申請上市前嗰三年一定係好的，跑贏大市幾條街，到上完市就變咗平平無奇，同大市同步了。原因好簡單：因為雖然個個都知過去表現不代表將來，但都係會陷入呢種謬誤。你隻嘢如果不停跌嘅，點推隻ETF上市？冇人買的。推得出嘅，必定係之前不停升嘅嘢。咁亦好多時都係已經相當貴，甚至炒到過晒籠嘅嘢。

12. 創新高後先高追美股有乜後果？— 好多人都對於「高追」好抗拒，成日希望跌返啲先買。又會問，如果買完即跌咁點？咁我幾時都係反問返一句：咁如果升呢？睇數字你可以見到，絶大多數情況下，即使你在美股創新高後追入去，一個月，三個月，一年，都仲係有唔錯嘅正回報的。當然原因亦因為美股過去多年都係長升長有。

Good Read —  股市同實體經濟係兩回事。數碼廣告好快玩完？

13. 股市同實體經濟係兩回事 — Charlie Bilello 嘅文。呢句「股市同實體經濟兩回事」，長期讀者應該實聽過。咁新讀者唔知嘅，可以睇下呢篇文。舊讀者都可以，因為呢篇文解得好淺。事實你見到，無數咁多次經濟收縮，但股市照升。相反亦都係，冇人話經濟擴長時股市唔可以跌。當中嘅重點當然係：股市永遠炒前景，而經濟數據一定滯後。

14. 數碼廣告好快玩完？ —  Scott Galloway嘅文，以前都有貼過。呢篇我係唔同意的。佢覺得Digital Advertising 呢樣嘢好快玩完，原因好簡單，因為係一個騙局。啲客畀咗錢，但好多都係去咗啲中介人度。而唔少公司聲稱接觸到嘅讀者人數，都係吹大咗不少。再加上，好多亦都係啲機械人或南亞仔工場係咁click．以上嘅現象，本身落過Facebook 廣告嘅我，當然都知道。但點解仲落？因為撇除呢啲嘢外，都仲係抵畀，大約都睇到帶到幾多新讀者的。作者講嘅問題，傳統媒體一樣都有。更重要係，廣告開支呢啲嘢，往往都係人做我又做，而你唔使真係reach到好多好多人，你多過你嘅對手已經夠啦。

FB Post Summary —  土耳其股市屢創新高。Oatly插水。

15. 兩篇都幾好睇

16. 土耳其股市屢創新高 — 呢篇我好鍾意。土耳其固然都幾大鑊，里拉係咁跌，通脹又狂升，經濟當然差。但你見伊斯坦堡股市，就升到癲。原因好簡單，因為用返本幣計價嘛，咁始終公司持有啲實質資產，而貨幣就貶值，股價咪水漲船高。但仲有一樣嘢，你睇到，即使當你買美金計價嘅ETF，咁因為土耳其里拉轉返咗美金蝕咗好多，回報當然唔及土耳其當地人用里拉買伊斯坦堡指數 - 但即使美金計價，個股市表現，都唔係極差的，至少唔係災難級。證明股市真係可以抗通脹

17. Oatly插水— 之前都有人問呢間公司，燕麥奶嘛，個故事好似幾無敵的，市場佔有率都唔細。但故事還故事，金融市場就好殘酷嘅。你蝕錢都算啦，但至少交到個高增長出嚟丫。可惜今次Oatly嘅業績令人幾失望。年初到而家蒸發一半。點避？有啲難。唯一可以做嘅，就係唔好經常走去追啲好Fancy嘅嘢。係要買都得，但唔好買得多。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。