講幾句拜登，仲有愛馬士 微軟 Shopify 新高．「港股已死」後就六連升，仲可以買乜？開咗USMART，買咗隻出行股．另外亦都買咗隻歐洲股．東南亞騰訊冬海集團SEA．睇緊南美股．高通升到1400蚊港紙一股，微牛開戶奬勵變相又加碼 (Patreon)

美股：講幾句拜登，仲有愛馬士 微軟 Shopify 新高

「港股已死」後就六連升，仲可以買乜？

開咗USMART，買咗隻出行股

另外亦都買咗隻歐洲股

東南亞騰訊冬海集團SEA

睇緊南美股

高通升到1400蚊港紙一股，微牛開戶奬勵變相又加碼

1. 話明今日有廣告，就係USMART，開戶嘅用我條Link．

2. 有乜好？除咗其他互聯網券商都有嘅例牌嘢外，我係鍾意佢有得月供美股，唔係咁多間有。詳情我在Facebook Page有講。當然美股可以一股一股咁買，但個別股份一股都比較貴，平嘅，固然你可以自己手動月供，即係每個月出糧走去買，甚至唔買死一隻都得。不過用月供嘅好處，就真係迫你儲錢的。呢個亦係供樓嘅一個正面副作用，人嘅自制力就係低。

3. 至於送禮方面，請睇圖。但留意返佢個rule都有點複雜，所以再細解。

4. 你問我，A餐（投資課程）同B餐（BITO）都係唔吸引的。不過都照解咗先．

5. A餐嘅，開戶，入錢，30日要維持15000蚊資產，不過唔使做任何交易。

6. B餐呢？一樣係30日要維持15000蚊資產。仲要完成一筆e-DDA，至少要500蚊（好似馬會戶口轉錢咁，留意，你銀行戶口冇錢的話，銀行有機會罰你錢，確認咗有錢先好做）。仲有要買嘢，但買500蚊以上就得，港股美股基金ETF都得（但抽新股同期權唔計）。記住三個條件（15000蚊，500蚊e-DDA，同埋買500蚊嘢）要全部完成先得。

7. 真正吸引就係C餐D餐，CD餐條件一樣的。CD餐要放30000蚊30日，仲有亦係要做500蚊e-DDA，同埋買500蚊嘢。

8. 我就開咗架啦，下面有圖為證。

9. 咁順手講埋，幾時揀餐？係在app入面有得揀的，如圖，在「獎品中心」入面。記住，你揀完餐，就不能再轉，同埋即時開始計你個資產要求，所以強烈建議你入好晒錢先揀，不過揀餐都有時間限制（應該係開戶內30日），唔好拖得太耐。

10. 大約就係咁，開戶嘅用我條Link

11. 另外仲有微牛同富途嘅廣告，我就放到最尾了，廢事講咁耐都唔入正題。

美股：講幾句拜登，仲有愛馬士 微軟 Shopify 新高

12. 一來冬令時間，二來近排都早咗瞓，結果寫嗰時美股都未收市。雖然唔算太多嘢講，咁愛馬士 微軟 Shopify 強勢都講過啦。指數亦都升些少，近半年一路都係在爬住憂慮之牆而升。

13. 一向少講政治，但都講少少。拜登嘅民望一路跌，咁民主選舉嘅政客，當然只係著眼下一次選舉，下年就已經中期選舉。共和黨明顯就咬住通脹呢樣嘢唔放，所以睇睇拜登去到幾時唔耐煩要出重手，昨日亦都講過，聯儲局主席任命都有啲變數。不過唔好忘記，現任聯儲局主席鮑威爾其實係共和黨員。

「港股已死」後就六連升，仲可以買乜？

14. 反而今日講少少港股。由拜登嘅民望，就可以引伸到習近平同拜登嘅視像通話。講咗乜，冇乜人知，大家都係各自表述各自同國內民眾交差，你在媒體睇到嘅，多數只係廢話。

15. 正如我呢排嘅文都有講，在貿易方面，似乎進展不錯，分分鐘有機會撤關稅，而我依然相信中國會大手買返美國貨。固然減關稅有助降低美國嘅通脹（就算冇助，耶倫都會咁講），但我依然覺得，中國點都係要釋出善意。拜登唔希望畀人覺得佢對中國太軟弱（過去一年已經好多人批評），中國再唔識做啲呢，拜登民望咁差，陣間物極必反，可能忽然轉強硬。留意下，侵侵上任初期都仲講到同習近平老友鬼鬼，然後到2018年頭先加關稅的，正係中期選舉之前。

16. 無論如何，只有真係相當直接影響市場嘅我先講。個個講完港股已死呢，果然係反向指標，港股就連升6日，彈夠1000點，都升咗4%，上返三個月新高，好過冇咁咯，科指就低位升夠8%添。見到又係升返啲大型科技股，仲有啲牌子嘢表現比較好，其他冇乜特別。相信唔多唔少個強勢都同習拜會有關，亦可能因為人民幣強勢，另外見到美國啲中概股都持續造好。

17. 當然仲有，澳門股都普遍強嘅，之前都有推過下。Reopening，加埋中美關係改善（如有）。六選一我會揀隻銀河（27），夠大，而且唔係美資。當然到底係中國會拎啲美資嚟做談判籌碼，定係拎嚟釋出善意，就你自己估了。你信會益美資嘅咪買金沙（1928），我就冇乜特別意見。

18. 仲有想講，啲科技股強勢，唔多唔少亦因為估政策係咪已經轉向。證據兩個，首先係傳話會再審批啲遊戲版號，之前停咗3個月了，你見啲手機遊戲股都升晒上去。另外，你見隻網易雲音樂，又會話重啟在香港IPO。之前係煞停咗的，而家又有得去馬，唔怪得有人估政策轉向。

開咗USMART，買咗隻出行股

19. 亦都坐言起行，之前講過想買Airbnb，就順手買埋。正係因為開咗USMART，入咗3萬蚊。咁理論上唔使買晒3萬，但唔爭在啦。又，實不相瞞，我而家個戶口係負數嘅，不過下個月頭有啲大錢返嚟，所以暫時overdraft住先，大家唔好學。真係唔好先洗未來錢，特別唔好拎嚟買股票。

另外亦都買咗隻歐洲股

20. 又，之前都冇預告過，但今日已經忽然買咗間德國公司。實情剛剛在美國出埋ADR，所以我買美股。乜嘢公司？就係呢間Mynaric（美股MYNA）。

21. 做乜的？唔知喎，你去Google下，話做Laser嘛，我唔會比你知得多。至於點解我買？因為聽聞Peter Thiel（留意佢係德國出世的）同埋Cathie Wood都買咗啲，而暫時極少人講呢間公司，華文媒體好似直頭冇。

22. 咁睇個市值，3億Euro都未夠，在德國嘅股價，年初至今仲要跌。照計就完全未炒起，輸極都有個譜……啩。買住少少先，純過癮兼考眼光，未必會長坐，或者升50%-100%就走。

東南亞騰訊冬海集團SEA

23. 之前都提過下隻「東南亞騰訊」冬海集團SEA（美股編號SE），但冇認真寫，亦都冇買，之前升到七彩。咁都有讀者買咗，公司又剛出咗業績，股價就跌5%。但望落業績唔算差，冇錯個虧損高過預期（好似咁耐都冇乜點賺過錢，但冇問題的），但收入高過預期，仲要調高埋全年展望。

24. 間公司好多業務，比較多人知嘅係Garena（遊戲），同埋蝦皮Shopee（電商），仲要有埋Fintech，而業務中心在東南亞，基本上係無敵的。可惜之前冇買

25. 咁你亦都估到個問題就係：估值好貴。我計12個月收入，大約83億美金。但市值就1800億。22倍Price to Sales，就真係要相當貴的。雖然睇落個高增長仲可以維持一排。

26. 我估最大問題，始終係公司嘅背景。理論上係新加坡公司，但騰訊持股23%。會唔會將來遇上任何問題，就你自己估了。整體我覺得都係買得過的。

睇緊南美股

27. 最最最後，心血來潮，望緊隻美股新股。NuBank，故事就無敵的，南美FinTech，仲要畢菲特同騰訊有投資。當然又要睇到時IPO出嚟幾貴。另外仲有一間南美公司，之前都有望，MercadoLibre，南美電商，美國上市（MELI），之前升到七彩，但今年就麻麻地。

高通升到1400蚊港紙一股，微牛開戶奬勵變相又加碼

28. 留意隻高通升到180蚊美金，Webull個開戶獎賞變成1400蚊港紙了．記住，之前未開都好，開到一半又好，而家完成開戶，都繼續有得拎的。況且只係要入10000蚊，買一隻美股（記住一定要美股），放45日就得。用我個開戶link

29. 富途未開嘅，就用我個code：9M85BY4D．兩間都有嘢送的。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。