港股五連升，美股回調未？波音期權升70%，Rivian 大升，愛馬士同Shopify創新高 。 德國股市大幅跑輸法國。Bitcoin今年跑輸標普指數。今年美股10日有6日升。點解美債得1.5厘息都仲有人買？Sex and the City 女主角一個月洗幾錢搵幾錢？Internet 工具使用指南 (Patreon)

快評兩句 —港股五連升，美股回調未？

大師冇點你 — 波音期權升70%，Rivian 大升，愛馬士同Shopify創新高

每日一圖— 德國股市大幅跑輸法國。Bitcoin今年跑輸標普指數。今年美股10日有6日升

Good Read — 點解美債得1.5厘息都仲有人買？Sex and the City 女主角一個月洗幾錢搵幾錢？Internet 工具使用指南

FB Post Summary — 本人不是Most People（下集）。皇家荷蘭殼牌回歸英國。梅艷芳。 USMART廣告

1. 出咗篇週末專題檢討返啲日本股，幾過癮。另外，亦補返上星期嘅週末專題，講Big Tech業績。記住睇。今日都仲係唔貼廣告，聽日就會有大把。

快評兩句 —港股五連升，美股回調未？

2. 就真係兩句。首先，你見呢排人人話放棄港股，但港股就5連升。似乎真係反向指標。不過，呢五連升連3%都唔夠，都係可以不理。雖然我就唔會走去沽晒啲港股嘅，頂多係新錢買少啲。

3. 另外寫文時美股都未收市（好難得！之前有一排好多時都收市先寫），但見到由升轉跌的，原因不明。不過留意下，應該今個星期，就會宣佈聯儲局主席嘅人選，鮑威爾連唔連任到，好快知道。

4. 連唔連任到，我都唔知，但我估OK。正路嘅估法，鮑威爾連任就唔會太多人講，但萬一連任失敗呢，可能就令個市場有啲波動。實情關唔關事？我覺得唔關的，但既然估值貴，好多無聊嘢都可以觸發回調。咁鮑威爾做得好地地，忽然換人，多數市場都唔鍾意的。

大師冇點你 — 波音期權升70%，Rivian 大升，愛馬士同Shopify創新高

5. 隻波音期權大升70%喎（原本故事在呢度，同呢度），當然因為波音正股升返5%，至於波音點解升就各有不同解說。不過呢，升返70%，我都係剛剛上返水面啫。又，我仲係相信中國會宣佈買波音飛機，你見啲貿易談判都係正面的。

6. 另外，隻Rivian都繼續有得升。上市後都同你講搏得過，嗰時100蚊，而家145。不過就真係超貴，近乎冇基本因素可言，純粹鬥傻。我就唔會買的，你自己就適可而好了。

7. 愛馬士同Shopify又創新高就不用多講。不過都順手話埋你知，你見我買嗰隻愛馬士ADR，今年跑輸正股不少的。大部份係同匯價有關，亦有啲同時差或其他嘢有關。而你見拉到去5年呢，就反而係ADR好啲。理論上跟得足的，應該唔存在話邊隻好啲嘅問題（當然成交量唔同）。仲有，你買歐洲正股，咁你換返做港紙，一樣係蝕匯水啫。所以不能只睇個股價表現 的。

每日一圖— 德國股市大幅跑輸法國。Bitcoin今年跑輸標普指數。今年美股10日有6日升

8. 德國股市大幅跑輸法國 – 兩國貨幣就一樣，經濟周期亦差不多，講經濟增長可能德國仲會好少少，大家都冇Big Tech，點解法國股市跑贏咁多？你可以睇下兩國嘅指數（法國，德國）入面係乜。法國嘅，好多係啲奢侈品股，愛馬士，L’OREAL，Kering（Gucci母公司），當然仲有最大嘅LVMH，一隻佔咗指數超過10%。而呢堆嘢都係近年喪升嘅。但點解呢堆嘢咁強？就另一個課題了。不過一個字，都係護城河。唔好以為德國嗰啲「科技」就一定有優勢，賣名牌就冇優勢。

9. Bitcoin今年跑輸標普指數 — 應該好多人都已經黑人問號，明明Bitcoin升一個開，標普指數肯定冇。但人地度嘅係Risk Adjusted return（學術嘢，叫 Sharpe Ratio）．當然在香港就畀人笑，個個都只睇 upside唔睇downside輸死罷就，但人地正經討論一定要計Risk Adjusted，否則你槓杆10倍嗰個出嚟就叻過唔做嗰槓杆嗰個啦。

10. 今年美股10日有6日升— 實情係57.6%嘅日子升。你心諗，咁少？絶對唔少。歷史平均講緊52.3%嘅日子升。但，唔好睇少呢2.3%嘅優勢—積得夠長，你見美股就升N倍了。然後再講一次，你走去短炒嗰啲，真係唔知條數點計。

Good Read — 點解美債得1.5厘息都仲有人買？Sex and the City 女主角一個月洗幾錢搵幾錢？Internet 工具使用指南

11. 點解美債得1.5厘息都仲有人買？ — 相當有趣嘅文。好多人都知，因為債息低得可恥，助長咗股市表現好，我都信呢個理由。但，咁仲有乜人去買美債？1.5厘息都要？除咗有啲係保險公司焗買之類，仲有幾有趣嘅原因：唔好忘記，除咗收息，你隻債仲可以賺價。點賺價？假設美國債息唔係升，而係跌呢？惡性通脹？真係？可能美國唔係阿根廷津巴布韋，而係德國日本呢。咁如果美債債息跌到零，1.5厘息嘅國債，賺16%，唔錯的。

12. Sex and the City 女主角一個月洗幾錢搵幾錢？ — 講緊戲入面，唔係個演員真實。結論就係一個月搵4000美金，用就過一萬美金，明顯係入不敷支的。你學佢咁生活就死得，害人不淺呀。不過當然冇話你知，現實可能好多錢係條仔貼。類似嘅文仲有唔少，無聊嘢認真做，例如占士邦份糧唔夠洗，或者唐老鴨史高治叔叔有幾錢。

13. Internet 工具使用指南 — 簡單嘢，但隔離台賴叔話我知，有啲基本教用Excel之類嘅101文，幾受歡迎。呢堆我都覺得有用，教下你用Twitter Google Gmail 咁，固然有啲功能你應該一早知，但我又估你應該唔會全部識晒。勝在一站式齊晒。

FB Post Summary — 本人不是Most People（下集）。皇家荷蘭殼牌回歸英國。梅艷芳。 USMART廣告

14. 本人不是Most People（下集） - 我自己幾鍾意，雖然冇乜人睇。講嘅係Contrarian， 好多人把口就特立獨行，實則最緊要多人認同，大家圍爐最開心。咁你數學常識都知，咁樣多數就發唔到圍。原本係冇問題的，正如我講投資，你做到同market 同步已經好夠。衰在好多人嘅 ego又大一大嘛，以為自己點巴閉，就好大鑊的。上集在此。

15. 皇家荷蘭殼牌回歸英國 — 冇錯係 Royal Dutch Shell，原本係英國—荷蘭，而家應該會總部搬去英國。唔多唔少都係受啲 activist investor嘅壓力，相信同稅務都有啲關係。另外，公司亦都會廢除A股B股嘅兩層架構。同埋，就不能再叫Royal Dutch了

16. 梅艷芳 — 實情冇乜特別嘅文。多人睇我唔太意外，但去到咁多人睇我就有啲意外。實不相瞞我篇文都係比較和稀泥，你見比起平時啲文溫和好多。討論相當熱烈，可見呢套戲已經成為一個trending topic．你問我，絶大多數啲爭論無聊之極，講真，你啲網友一年睇幾多套戲咁大把？個個扮大師？咁而如果你唔係大師嘅，講commercial success嘅，個票房咪話畀你知得得咯。有幾難明？

17. USMART廣告 — 聽日會詳細講，但USMART嘅月供美股，我覺得係個賣點嚟的，真心算好用。記住用我嘅開戶link 。留意返佢地有ABCD四款禮揀，而個入錢要求係去到15000/30000嘅（個人覺得點都係拎30000抵）。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。