日本股表現檢閱：乜嘢公司跑出？邊個朋友最準？ (Patreon)

忽然感言（不太重要，趕時間可skip）

跟進日本股表現

觀察期：9月9 至 11月4日

買嗰四隻都係跑贏大市嘅

上次嗰27隻嘢嘅表現又如何？

呢排股價表現同乜有關？市場？Momentum？估值？

眾多朋友，又邊個揀啲股最好？識日文嘅有冇用？做金融嘅係咪勁啲？

忽然感言（不太重要，趕時間可skip）

1. 我算係一個「專業」嘅作者 — 我指嘅「專業」，唔係指寫得好，，而係指我而家以呢樣嘢作為職業，仲要近乎日日寫。好多人用「專業」幫自己嘅行業，甚至係幫自己貼金。但我認為更加簡單，「專業」就係無論你本人發生任何事，開心定唔開心，你上咗個台，出咗虎度門，就係另一個人。唔可能畀你自己嘅心情影響咗你判斷。

2. 放心，唔係我或我身邊嘅人有乜事，只係有感而發（明顯係因為睇完同寫完《梅艷芳》）．開張一年幾，你見我極少因為心情或發生乜事而甩稿，頂多只係寫得太多要抖下。不過想講，狀態都總係有高低起伏嘅。始終係人嘛

3. 好消息係，呢排我覺得狀態係不錯的。你見我可以星期五找返上週末嘅專題（FAAMG業績），星期六仲出返原本星期五嗰篇，然後今日居然仲可以整篇專題就知 — 唔好忘記同時間我仲要出咗唔少Facebook 文，睇咗好多newsletter，甚至睇咗同金融無關嘅戲同埋書。

4. 不過亦同時間管理你嘅期望，有高潮當然有低潮啦，到第時冇咁好狀態時，就唔好柴台啦。畢竟我在呢度好似寫咗近400篇文，都唔好講質，唔好講背後我睇嘅嘢，光係打到400 X 3000字，都已經係一種成就。

5. 亦都好老土地勉勵大家，我相信做乜都好，consistency 都係最重要。創作係，打工係，投資都係。寫幾篇文爆紅唔難，但一路可以每日不停有嘢啤出嚟，就真係唔容易的。

6. 放心，今日篇專題唔長，所以我可以咁大段開場白。仲有預告，好快就係我被炒一週年（舊文都有寫），到時應該會有啲感言。好似都冇乜點認真寫過，可能係好事，我並唔係偉大，但實在冇時間去怨恨任何人或乜，串啲講句，今日我呢個Patreon有你地兩千幾人睇，已經證明咗公司唔識貨。希望大家第時預到啲「唔如意」「唔公平」嘅嘢，都可以咁諗。

跟進日本股表現

7. 好，是咁的，兩個月前（原來只係咁近期？），寫咗篇「日本股全攻略」。亦都開始買日本股。點解買日本股？文入面有講。唔想睇嘅，咁話你知，分散，估值唔貴，同埋我估會有得re-rate．當然仲有一個私心：呢個係好容易吸到讀者嘅話題。

8. 事隔兩個月，就檢閱下。留意篇文入面我仲提咗27隻日本股，集思廣益得返嚟的。暫時我買嘅日本股，全部都在呢27隻入面．個Excel都有放上嚟

觀察期：9月9 至 11月4日

9. 順手講一講，呢次嘅「觀察期」，就係由9月9號，去到11月4號。點解9月9號？因為上次篇文就係用9月9日嘅價。咁點解去到11月4號？因為咁啱我嗰日再更新咗一次啲股價。

10. 要講嘅係，呢段日子，我買咗四隻日本股，就係Panasonic 6752，樂天 Rakuten 4755，Z Holdings 4689，同埋Mizuno 8022。頭三隻係9月9號之後買，Mizuno係再之後，但大約就當9月9至11月4吧，其他股票都係用呢個「觀察期」。

11. 11月4號之後我仲買咗幾隻（Pan Pacific 7532，即係Donki，仲有日航9201，全日空9202），但冇放入嚟。

買嗰四隻都係跑贏大市嘅

12. 首先畀個Big Picture你，上次篇文時，正係日本股發勢如虹（但留意，9月頭我已經開始集思廣益），結果到篇文出嗰陣，就差不多係今年高位了。在「觀察期」，都係要跌嘅，一度7連跌添，但當然係睇長線。如果覺得呢句太廢，咁亦可以諗下，好故事都要畀時間佢發酵嘅。我講嘅日本股理由，好多人都同意丫，但你見「觀察期」都仲要跌，難道嗰啲理由消失咗？唔係嘛。但投資就唔係咁簡單啦。

13. 咁見到，我嗰四隻日本股，都仲係跑贏大市嘅，跑贏好多添。「真實」，咪就係真實咯，由我買入到11月4日計。「計9月9」，就即係我照樣將嗰4隻計入去「觀察期」（咁「真實」唔係全部9月9買嘛）。咁你見分別不大嘅。

14. 順手講埋，如果你計到今日，我個「真實」回報就低咗一截，但依然都係跑贏指數的。

上次嗰27隻嘢嘅表現又如何？

15. 咁仲有乜玩？有。不如睇下，呢27隻嘢，在「觀察期」嘅表現？記住，「觀察期」日經指數跌0.7%，東證指數跌0.5%。

16. 首先，跑贏日經嘅，有13隻（而我買嗰4隻都在呢13隻入面），呢13隻平均回報17.5%，但當然一隻拉高咗。睇呢堆嘢嘅中位數，就係升10.7%。

17. 跑輸嘅呢？14隻，比起跑贏嘅仲要多一隻。咁係咪代表呢個27股名單只係「普通」？咁唔好只睇數目。呢14隻平均回報 負7.3%，中位數就負8.5%。留意，個跌幅係低過贏嗰啲嘅升幅。另一角度睇，輸到超過10%嘅只得3隻，但升到超過10%嘅有7隻。股票都係升多過跌，至少我地揀呢個名單嘅入面係

呢排股價表現同乜有關？市場？Momentum？估值？

18. 至於有乜結論睇到？我可以話你知，近乎冇。

19. 係大企升多啲定細企升多啲？好似冇乜關。我好快咁整咗個咁嘅圖。你發現市值同表現近乎冇關，個R^2細到近零（留意個市值係9月9日，觀察期最初）。我仲要已經整走咗最頂嗰間Enechanger（Outlier，細細間但升到癲），否則仲難睇，之後嘅圖都會踢走呢間。你見市值大細，同「觀察期」表現，近乎完全無關

20. 比較好少少嘅，睇「觀察期」表現，同埋year to date．留意呢個YTD係年初至到9月9，即係觀察期開始，所以冇重疊。咁見到有一定嘅正相關，似乎係有momentum factor的，升開嘅繼續升，但個R^2依然幾細

21. 至於睇估值呢（留意啲估值係9月9日，觀察期最初）？有少少關係，睇市銷率（Price to sales）又好，市盈率又好，都見有少少負相關，但R^2依然好細

22. 我甚至試埋 股票number 或者 股價數字本身，都睇唔到同升跌有乜相關。可能睇行業會有關？目測都唔覺，得閒研究下

眾多朋友，又邊個揀啲股最好？識日文嘅有冇用？做金融嘅係咪勁啲？

23. 最後一部份，最好玩。留意返，最初呢27隻嘢點嚟？就係問唔同嘅朋友，叫佢地一人求其畀幾隻。咁而家睇返，佢地各自嘅表現。

24. 留意呢部份千萬唔好太認真。首先啲朋友都唔知道我會咁用，如果佢地知道可能認法又唔同。另外，當係玩比賽，同你真係放自己錢，又完全係唔同。當然最後，就當真係放自己錢都好，咁呢個觀察期跑出，又唔代表乜嘅，唔代表能力，知識，或者投資表現

25. 不過，都半玩笑睇下有冇咩pattern睇到。順手畀你睇埋，我啲朋友嘅背景資料。係咪做金融嘅準啲？係咪識日文嘅揀得好啲？又睇下點。另外你由佢地揀乜股，都有時睇到佢地咩背景，本身鍾意乜。

26. 首先睇下，表現最好嘅，帶出成條街嘅，就係一位Patreon讀者（之前我唔識的），在日本做嘢嘅香港人。你可以留意到，佢揀嗰啲公司，有啲我係聽都冇聽過嘅，仲有好細嘅公司。仲有，27隻之中，最勁嗰隻又係佢揀，最差嘅都係佢揀中。但一樣，同時揀中最好同最差，夾埋晒都仲係夠贏成條街。亦係我一路嘅講法：你贏嗰隻夠多，足夠你輸好多隻唔掂嘅股。

27. 然後睇下，A君同B君，都係我多年朋友，但佢地唔係做金融嘅，亦唔係話住日本或識日文嗰啲，但兩個表現都好好。仲有留意，佢地揀啲公司，都係好大路嘅嘢。

28. F小姐呢？唯一嘅女士，表現就係在中間。不過得一個女士，啟示冇乜

29. 然後就梗係講，我幾位以前公司嘅馬仔，包辦尾一二三。唔知係我領導無方丫，定佢地懷恨在心想我輸錢特登害我。

30. 最後，區區在下我本人，係有啲特別的，因為我等大家揀晒先的。

31. 我就排在中間，不過你留意一樣嘢，最後我真係買嘅股票，就有6%，夠我排到入頭三名。證明我可以在你地揀嘅公司之中，再揀到啲好嘅，我都仲有啲存在價值，

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。