放棄港股？早就半放棄。但我買咗隻reopening 股。FAAMG又有力，仲有LVMH 同愛馬士。不過識睇睇Richemont。。Shopify 同 BlackRock新高。美股得16%公司創新高。但美股唔止得FAAMG跑贏大市。ESG 投資和Ozy Media的共通點．美股並唔係你想像中咁「例外」 (Patreon)

放棄港股？早就半放棄。但我買咗隻reopening 股

美股：FAAMG又有力，仲有LVMH 同愛馬士。不過識睇睇Richemont

大師冇點你：Shopify 同 BlackRock新高

每日一圖— 美股得16%公司創新高。但美股唔止得FAAMG跑贏大市

Good Read — ESG 投資和Ozy Media的共通點．美股並唔係你想像中咁「例外」

FB Post Summary — Johnson & Johnson分拆。本人不是most people（上）。假裝在日本。Coloring Stephy．首富減持第一步。首富減持第二步

1. 剛剛出咗篇文講FAAMG業績，算係補返上星期嘅專題，好睇的，個Excel亦多咗好多新嘢。另外，希望今個週末（即係聽日）寫多篇短嘅專題。咁而你而家睇緊呢篇，就原本應該係星期五晚嘅。

2. 今日唔賣廣告住，但下星期會有了，試用咗OK就推畀大家。

放棄港股？早就放棄。但我買咗隻reopening 股

3. 近日先好多人講「放棄港股」「轉戰美股」，我心諗遲唔遲啲？而家先如夢初醒？但我嘅取向一路好明顯，新錢就買美股甚至歐洲日本多，但亦唔係完全唔買香港，更加唔係沽晒啲港股。之前美股跑輸十年又唔見有人講？

4. 另外，星期四晚話買牛奶國際（美心七仔萬寧惠康），星期五就買埋。我就只係因為佢夠殘，炒reopening，亦相信盤生意仲係好穩陣，唔係TVB咁。你見我買得兩萬幾蚊，考眼光多於一切。當然我明白兩千幾個讀者，總有機會有人唔多高興 — 冇問題的，人人有唔同想法。但我想講嘅係：我大可以買咗唔話你知，不過呢個Patreon（我本人都係）嘅宗旨係盡可能最高透明度。我寧願可能有幾個讀者唔高興，都不能接受自己買咗然後唔出聲。你可以細心諗下呢句嘢，搞呢個Patreon咁耐，所有交易我都貼晒上嚟的。唔會係呢邊就買少少，嗰邊另一個倉其實大手造淡咁，我不屑做呢啲嘢。

5. 講返，話港股廢，但近期有起色，成交又上返1400億左右。當然我唔會有咩特別厚望，除咗你見啲體育用品股升，都冇乜好講。咁但，至少你都見到我揀到理文化工，或者領展823之類嘅好股。

美股：FAAMG又有力，仲有LVMH 同愛馬士。不過識睇睇Richemont

6. 不過，主力當然都係講美股，你見至少呢幾年都係相當易玩。又畀你睇下，我個倉都係跑贏三大指數的。固然唔係日日都係，但拉勻晒都大約跟到指數，好好架啦。你以為咁易？

7. 留意下，剛剛篇文先話FAAMG呢排跑輸，但星期五晚又有返力喎，早排醜聞不斷嘅Facebook（打死我都唔會叫做Meta），呢排相當不錯。仲有之前受壓嘅PayPal都上返嚟。你見好多時我都唔會輕易沽貨的。

8. 另外可以留意下，愛馬士同LVMH都反彈唔少。同時間你亦可以留意下，歷峰Richemont都升到歷史高位。乜東東？正係LVMH之後嘅全球奢侈品三哥（二哥好似係Estee Lauder，又走寶），卡地亞Montblanc 伯爵表 江詩丹頓嘅母公司。瑞士同南非上市，IB好似買到。

大師冇點你：Shopify 同 BlackRock新高

9. 留意隻Shopify又係創咗新高，但我完全唔知咩事。今年升咗53%！但我唔會造假，我係7月中先買嘅。當時未係摸到最頂，但真係又係買完冇耐就潛水，一度輸過10%，唔通我又沽走佢？

10. 同時間BlackRock又創新高，就唔使點講啦，1000蚊都嚟緊。早早已經買，今年升四成咁滯。但早排咪驚恒大，一樣高位跌14%。要你捉到個底梗係難，但都唔好走去低位沽嘛。好公司就係不停成長，講完。

每日一圖— 美股得16%公司創新高。但美股唔止得FAAMG跑贏大市

11. 美股得16%公司創新高 —又係睇你點演繹，咁有啲人會話指數破頂但只得16%公司係創新高，即係個升勢唔全面。但舊文話你知應該唔係，你不能只係睇創新高嘅數目嘛，好多都「差不多新高」又唔計？實情可能有16%已經相當多。另外，亦留意下，有啲人話既然美股新高，咁我個倉啲嘢有N隻新高都好平常，但你諗真啲，都未必係容易，大市都係講緊16%公司新高之嘛，咁理論上你買嘅股，六隻有一隻新高咯，而我個倉之前往往有七隻八隻（咁而我冇渣100隻股票啦），都幾好的

12. 但美股唔止得FAAMG跑贏大市—正如有啲人會話美股只係啲大公司帶動，但實情唔係。呢個係 equal weight index，我唔用market cap去做比重，每一隻都計同等份量。你見到，美股一樣係跑贏世界成條街。實則你自己買美股咪會知。

Good Read — ESG 投資和Ozy Media的共通點．美股並唔係你想像中咁「例外」

13. ESG 投資和Ozy Media的共通點．— 有啲長，但好睇。首先講講 Ozy Media，基本上已執笠，但你唔知係乜都唔緊要。作者講返，ESG投資，同呢個世界上好多嘢一樣： Too good to be true。又賺到錢又推到社會進步，幾咁好。用行動改變世界云云。但最重要嘅係，好多人信，佢地寧願相信，因為呢啲係佢地「想聽」嘅嘢。如果有咁簡單，如果可以用金融市場救地球，老早就做咗啦。

14. 美股並唔係你想像中咁「例外」—唔太長嘅文，好睇。一個好簡單嘅問題：美股到底佔全球股市幾多？都唔係咁易答，因為睇你點定義。固然你可以計晒全世界嘅股市，講緊122 Trillion 美金。但，實際上只有 67 Trillion 係 「investable 」嘅，即時差不多細咗一半。咁咩係investable？就睇你點度啦，入面好多技術嘢（但唔算太深），例如入唔入到指數呀，free float呀之類，好多時就係 SPGI，MSCI 或者富時之類說了算。你見新興市場嘅規模，可能係被低估咗50%嘅。

FB Post Summary — Johnson & Johnson分拆。本人不是most people（上）。假裝在日本。Coloring Stephy．首富減持第一步。首富減持第二步

15. 忽然間幾勤力，可能多突發新聞？

16. Johnson & Johnson分拆 — 又話分開兩間，一間係consumer product（爽生粉膠布之類），另一間係醫藥（疫苗同醫療器材），呢排潮流興。GE早排又話一拆三，東芝又係一拆三。有冇留意，無論係合併又好，分拆又好，總係大條道理？有啲就真係釋放價值，但有啲只係益咗管理層，同埋投資銀行。好大嘅課題。

17. 本人不是most people（上）— 由資本策略497講起，但完全唔關事咁滯。首部曲講我以前做分析員，真係見好多古怪公司。但老氣橫秋都要講句，後生仔唔好怕蝕底。我大可以一句「我唔識」「份糧唔包」去推晒佢，但而家明顯見到嗰啲嘢係寶貴嘅經験。下集都寫好，呢兩日出

18. 假裝在日本— 無聊之極嘅文，但最多人睇。講屯門市廣場，有晒無印 Donki GU Uniqlo  AEON 壽司郎，「去咗日本一樣」。留意堆公司全部有上市，但股價表現都幾大分別，唔係咁表面的。「 不過股價最強嘅壽司郎真係最多人排」

19. Coloring Stephy— 話說Stephy（仲有邊個Stephy）2004年畫咗幅畫，幫復康會籌款。輾轉七年後，有人就搵咗個善長去買，嗰個就係我。可惜未有機會合照，下次啦。

20. 首富減持第一步—  Elon Musk上週末投完票，星期一就即時沽貨。另外，亦見到同時行使埋option增持— 咁佢行使的話就要畀稅，所以咪要沽貨咯，所以根本好可能由頭到尾都一早決定會沽，只係等你地刷下存在感

21. 首富減持第二步— 下集，順手跟進下佢個10b5-1。呢個係一早set定嘅沽貨機制，但到底因為乜條件而trigger就冇人知。留意個減持都應該完成咗至少四份一了

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。