FAAMG 業績全攻略（第三季） (Patreon)

總評：增長依然勁過市好多，但股價開始跑輸，要睇第二跑道了

Facebook：改完名股價即時見底喎

Google：YouTube同Google Cloud未賺錢都咁勁，賺埋錢仲得了？

亞馬遜：下季可能白做，邊個話網購好賺錢？

微軟：所有業務都勁過預期，不過有點貴

蘋果：五年嚟第一次收入差過預期，仲等緊下一個增長點

1. 遲來的FAAMG業績專題，有遲到冇缺席，整夠5000字，廢事斬開兩篇了。希望今個週末都出到多一篇短嘅專題。上次寫嗰篇FAAMG，呢度，係8月頭嘅事，都係出晒業績一排先寫的。

2. 留意今次個Excel又比上次多咗好多嘢

總評：增長依然勁過市好多，但股價開始跑輸，要睇第二跑道了

3. 首先睇最基本嘅嘢，股價表現。年頭到而家，FAAMG都仲係跑贏晒三大指數。如果睇由上次到而家，同道指比FAAMG都仲跑贏，同納指標指就差不多，近期甚至跑輸。如果你睇五隻嘅中位數（Amazon）就會好少少，而你買齊五隻，都仲係有得升嘅。

4. 留意我上次寫過呢五隻之中，我嘅偏好。擺明話鍾意微軟，唔鍾意蘋果亞馬遜，你見股價表現都大約係咁。唯獨睇錯咗嘅係Facebook，有啲突發醜聞嘛。

5. 另一樣嘢，你可以比較下上次同今次嘅估值，建議睇市銷率Price to Sales，雖然股價升咗，但普遍並冇貴到（除咗微軟）。點解會咁？因為分母個Sales升得快過個股價，留意Sales用 T12，過去十二個月，所以會一路郁。

6. （應該有人留意到，有啲表上次係8月5，有啲係8月15，因為後來我再郁過個Excel，但照計分別不大）

7. 仲有，可以留意下公司嘅sales growth（收入增長），講緊15-40%，指數就只得11%，所以點都仲係高增長的，但值唔值呢個估值就好難講，你問就當然覺得冇問題。

8. 另外我仲想你留意下，啲公司嘅Price to Sales，同佢地嘅Net profit margin（純利除以收入），似乎係有相當關係嘅，利錢深，你嘅「銷售」更值錢，好合理。仲有，你應該唔使計數都大約估到，亞馬遜嘅利錢寧舍低，啲貨倉同人工好大成本，辛苦錢。蘋果做硬件成本都高。Facebook Google就平台。但食水最深係微軟，軟件為主，仲要好多係食老本，近乎零成本。

9. 提提你，睇開我嘅文都知，回購係支持美股嘅一大動力。但，回購係大公司嘅專利，五間最大嘅佔咗美股30%回購額（但佢地嘅純利只佔15%）。邊五間？正係FAAMG，不過冇亞馬遜，換咗Oracle

10. 最後想講下，可以睇下我朋友高天佑寫嘅文，講第二增長曲線。FAAMG呢堆嘢，我認為已經進入第二回合。首先，大家啲本業做到幾成熟，開始畀政府或各方面搞。另外，以前分得好開，但而家互相踩入對方嘅領域。Facebook同蘋果嘅交惡只係其中一單，你見根本五間公司都有做廣告，因為太好搵。仲有，Google Cloud同微軟嘅Azure以及亞馬遜AWS爭，當然仲有之後人人爭嘅Metaverse

11. 你可以睇到個演化的。原本Facebook只係廣告，而家要做硬件（因為唔想畀人牽制）。蘋果原本做硬件，之後拓展服務收入（利錢高），然後仲諗住做埋廣告（所以要封殺其他公司）。Google最初係search，後來有YouTube（同 Facebook爭廣告），亦有Cloud．微軟大家知，以前係Windows Office，後來又係做Cloud，而家仲會做廣告（Edge Browser嘛）。最神奇係亞馬遜，你以為做網購，唔知做乜搞咗個AWS出嚟，仲拍埋戲，亦都有埋廣告（都話同廣告收入同YouTube有得比）

12. 我諗呢個係個好好嘅例子，畀你見到企業係咩一回事。你真係好難食老本，對手總會挑戰你，搞你，抄你。市場亦會飽和。你間公司去到咁上下，就要諗新嘅嘢。亦唔止FAAMG係咁，你睇NetFlix都要做遊戲（遲早賣埋廣告，我話嘅），UBER明明係call車又要做埋外賣。

13. 呀仲有，基於上面講嘅嘢，我覺得下年係應該睇啲二線科技股。不能一一列出，但總之係呢五間以外嘅公司。增長空間大啲，而監管壓力亦細啲。雖然舊年我都已經咁講，而今年FAAMG都仲跑贏大市嘅。

14. 總評即係點？我就五間都有嘅，但應該唔會再點加上去，買啲QQQ都已經夠，都係睇好二線嘅科技股多啲。但，在呢五間之中，暫時都係睇好微軟同Google多啲，甚至二選一我會揀Google． Facebook呢？當然面臨好多挑戰，但估值已經反映唔少，只要啲廣告唔好太差，然後個乜鬼Metaverse做到啲成績，未必睇得太淡。蘋果嘅情況都類似，亦係唔貴，睇下幾時有啲新突破，例如真係有廣告收入，或者甚至推啲同加密貨幣有關嘅嘢。亞馬遜嘛，就真係比較難搞，雖然我估公司就快會分拆啲業務？

15. 以下會分開五間公司講。順手話你知，你搵佢地嘅網頁（Investor嗰欄），都可以睇到啲數，普遍都算幾易睇，一定易過你睇佢地上交易所啲文件。蘋果同Google算易睇，亞馬遜同微軟難搞啲（業務太散）。至於Facebook？我係睇都唔睇的，因為業務太簡單，全部係廣告，但將來可能唔同。

Facebook：改完名股價即時見底喎

16. 首先，人見人憎嘅Facebook，我都係一股都冇沽。業績CNBC報導在此（免費嘢中佢地相當好），上次業績我寫嘅文呢度。出業績前醜聞極多，雖然絶大多數我都覺得無關痛癢，公司當然係為賺錢啦。至於控制咩仇恨言論之類，我都講過，沒完沒了，有一班人覺得唔應該有呢啲言論，但另一班人又覺得冇可能去禁止呢啲言論。所以你亦都可以話，Facebook呢門生意，本質注定係會惹嚟好多麻煩，但亦因為咁佢先咁重要。

17. 反而我覺得吹哨人爆內幕當中，對公司最大打擊嘅，係關於「誇大廣告效用」嘅指控。你諗下，都非同小可，因為直接影響畀錢落廣告嘅客。我係客嘅，你個台播乜有乜人鬧我唔理丫，總之有人睇咪得。但原來你昆我？話可以接觸到300萬人，實情得100萬？就有問題了。睇下將來啲廣告走勢點先。

18. 業績呢？係唔得的，指引又調低咗。不過之前醜聞多多，業績又唔係太得，但出完業績股價就回勇喎。亦都可能投資者信佢嘅新方向，或者係股價已經夠殘。仲有公司公佈咗500億美金嘅回購方案，但係咪好多呢？平時一日90億成交喎。

19. 睇睇個業績：盈利高過預期，收入差過預期。每股盈利3.22，街估3.19。收入290億，街估296億，按年升35%，慢過上兩季了，另外，第四季收入指引315-340億，街估348億。跟公司指引的話，下季收入按年升12-21%，肯定近年最低。

20. 點解業績唔得？都有一定程度因為iOS嘅私隱設定影響，啲客再難以好準確咁投放廣告，咪唔落，或者用其他方法。

21. DAU叫做合預期，MAU低過預期。ARPU 10蚊，街估10.15，全部都係放慢中，但預咗啦，邊度搵啲新用家出嚟呢？

22. 當然仲有最重要嘅，Metaverse，公司連名都改埋，上市編號都會改。有人話公司改名想轉移視線，我覺得呢種諗法相當幼稚，人地早早已經諗呢樣嘢，絶對唔係爆咗醜聞先做

23. 成壇嘢會點玩，大家都唔知。但正如上面講，明顯公司見到自己畀蘋果同Google 牽制住，因為人地出手機OS（蘋果出埋硬件添），自己冇。所以，就要諗個新嘅賽道出嚟啦。另外，留意公司嘅本業，頂多增長慢咗，但依然係印錢嘅機器，絶對可以養住公司去投資其嘢。

24. 朱克格伯亦都講到明，呢個係長線投資，短期都唔會見到回報，仲會令今年經營溢利將減少100億美元。不過留意，下一季開始，公司會將Facebook Reality Labs嘅東西分開拆出嚟報數，當然唔會賺錢住，但只要啲用戶數字夠靚，一樣可以支持股價。

25. 有人可能以為佢只係Buy Time，但根本亦不必要，同股不同樣嘛，冇人可以踢佢走的。呢個亦係公司同其他對手一個好大嘅分別，留意其他幾間FAMMG，CEO都只係打工嘅，但Faceook就真係夠獨裁，大股東係佢CEO又係佢，所以朱克伯格要推嘅嘢，應該係全公司上下配合，理論上會有效率啲？

Google：YouTube同Google Cloud未賺錢都咁勁，賺埋錢仲得了？

26. 第二間，Google。CNBC報導在此，我上次寫嘅在呢度。業績相當強勁，收入同盈利都勝預期。收入651億，史上單季最高，街估633億。收入按年升41%，好耐冇見過呢啲增速（上季係因為舊年第二季低基數）。每股盈利27.99，街估23.48，純利189億，連續三季新高。

27. 留意市值一度突破咗20000億，第三間去到呢個門檻嘅公司，今年股價差不多升70%，亦係五間中最好。

28. 講過好多次，Google係一間廣告公司。廣告收入531億，佔佢82%收入。留意廣告收入按年升43%，高過總收入，亦即係其他業務增長係冇咁快的。

29. 廣告入面可以再拆開，Search，Google Network，同大家最熟嘅YouTube。YouTube收入72億，低過預期嘅74億，另外留意佔總收入只係11%。

30. 非廣告方面，Google Cloud 收入49.9億，亦係低過預期50.7億。呢舊嘢仲係蝕錢中，上季蝕5.9億，原本以為就快轉盈，結果今季蝕6.4億，繼續努力。Google Cloud佔總收入嘅比例多咗（因為增長勁），YouTube就差不多。留意YouTube同Google Cloud都未轉盈，但應該唔會太耐，到轉盈的話，股價可能會爆上。

31. 咁，YouTube收入又低過預期，Google Cloud 收入又低過預期，仲有流量獲得成本TAC又高過預期（115億，預期112億），咁公司靠乜？一如以往，都係search單天保至尊，亦係公司冇人可挑戰嘅業務（幾時會畀人搞？）。最正係因為iOS限制咗廣告商精準投放嘅能力，唔少反而就走去搵有大量客戶數據嘅Google落廣告

32. 不過，公司都係有受iOS私隱更新負面打擊的，就係在YouTube，但影響當然冇其他公司咁大。

33. 展望？就咁睇真係幾無敵，search ad依然係印銀紙，仲要半受惠於iOS嘅私隱更新。如果Google Cloud或YouTube轉虧為盈更不得了，唯一嘅敵人只係高估值。固然search ad嘅優勢亦有機會被政府盯上，但至少啲業務冇Facebook 咁危險。

亞馬遜：下季可能白做，邊個話網購好賺錢？

34. 相當差嘅，就係亞馬遜。CNBC報導在此，我上次寫嘅文在呢度。你見個業績，真係幾災難，但之後股價又唔係極差，因為年初至今都跑輸晒。

35. 業績同預期爭好遠，盈利又差過預期，收入又差過預期，仲調低埋展望，完美風暴咁。每股盈利6.12，同街估嘅8.92爭好遠好遠。收入1108億，低過街估嘅1116億。收入只只升15%，N年最低。

36. 嚟緊第四季係公司旺季，收入當然較今季高，但公司指引預1300-1400億，按年係4-12%增長（舊年都高基數嘛），好可能得單位數。街係估緊1420億。

37. 你大約都估到問題在邊，人工成本升得快，當然最影響亞馬遜，FAAMG之中得佢先請咁多人（但連收入都低過預期就唔知點解釋）。仲有留意個運輸成本都升得好快的。

38. 仲有，個operating income（已減成本，你當係operating profit 吧），上年第四季係69億，今年第四季呢？公司指引係0 -30億，即係近乎白做咁滯。驚未？

39. 不過，正面啲，可以留意下公司嘅服務收入，已經多過產品嘅收入。而當然係服務嘅利錢高啲。最右邊有拆開啲收入，但留意加埋都唔係等於大數的，仲爭少少，唔知係乜，太多業務。但照計Prime，AWS同第三方服務都計入服務的，網店同實體店（Whole Food）計咪產品。至於「其他」，主要係廣告，應該都計服務。另外仲有啲呢度冇出現嘅嘢。

40. 咁一如以往，亮點照樣係AWS。收入161億，街估155億。留意而家「只係」佔公司15%收入，但呢個比例一路升緊，搞AWS堪稱公司史上最好嘅決定

41. 另外，雖然AWS「只係」佔公司15%收入，但今季貢獻晒成間公司盈利！AWS嘅operating income 48.8億，而成間公司先48.5億，亦即係其他嘢夾埋都仲要蝕錢。

42. 展望？我都唔知點收科喎。但亞馬遜好長時期都唔係太追求盈利，而係不停投資，仲有壓低個價，免運費，令到對手無法競爭。AWS近年相當強勁，但當然對手都會追上嚟。又睇下啲廣告業務有冇突破先

微軟：所有業務都勁過預期，不過有點貴

43. 恭喜晒，早排我都有預言，微軟會超越蘋果，成為全世界最大市值公司，就係今次業績後達到。業績CNBC報導在此，我上次我寫嘅在呢度。

44. 業績極之強勁，收入盈利都高過預期，個展望亦高過預期。收入453億，街估440億。收入升22%，N年未見過咁嘅增長，亦係連續17季雙位數增長。指引方面，公司預下季去到502億至511億，高過街估嘅489億。每股盈利2.77，街估2.07。

45. 相當多人留意嘅Azure，收入增長50%，慢過上一季嘅51%，但主要係因為貨幣匯率影響，公司話如果唔計匯率因素就仲係增速嘅。留意公司一直都冇公開到底Azure嘅收入金額有幾多。

46. 順手講埋，公司將自己分開三瓣業務。生產力（Productivity and Business Processes，包咗Office同LinkedIn），智能雲（Azure public cloud, Windows Server, SQL Server and GitHub）同埋 More PC（Windows，Surface電腦，Xbox，仲有Edge嘅廣告）。

47. 咁首先你見到，收入貢獻就，就33/37/ 30%。但去到Operating income（你當利潤啦），就37/37/25%。明顯見到生產力業務（即係主要係Office）利錢極高，食老本，你年年畀訂閱費。More PC就擺明係利錢最低。

48. 但講增長，就智能雲最高，收入升31%，生產力業務收入升22%，More PC收入升11%，三瓣都係高過預期。

49. 仲有，見到公司服務收入佔比越嚟越多。發唔發現同邊間公司相似？就係蘋果。不過留意，同蘋果或亞馬遜唔同，微軟嘅「產品」，利錢係高過服務嘅，做軟件同硬件嘅分別。所以唔好以為服務嘅利錢一定高過產品

50. 展望？冇乜，估值真係幾貴下，又睇下公司搞Metaverse搞到乜出嚟。

蘋果：五年嚟第一次收入差過預期，仲等緊下一個增長點

51. 最後係蘋果，CNBC報導在此，我上次寫嘅文在呢度，亦都係差嘅，業績後就失落咗全球最大市值企業嘅寶座，畀微軟追過咗。

52. 今次業績盈利同預期差不多，而收入係低過預期。要知道蘋果好少可盈利同收入唔超過預期的，上一次係去到四五年前了。問題亦都係供應鏈，咁應該係暫時性的？

53. 留意公司過去12個月嘅收入， 剛好超過3650億，即係一日10億收入，實在好難想像。咁當然亞馬遜一早過咗呢個門檻， Walmart都係，但蘋果嘅利錢高好多。至於講盈利，過去12個月蘋果純利去到950億—仲未到1000億，但相信下次業績會做到，因為年尾係旺季。

54. 另外留意，蘋果嘅純利，係遠高過微軟嘅，但市值反而不及，就係估值問題，大家覺得微軟增長強啲，或者更加能持續。係咪真就之後先知

55. 不過以上講乜都假，股價睇預期。每股盈利1.24，預期一樣。收入834億，但仲係低過街估嘅849億。雖然按年都仲有29%增長，但舊年係低基數的。

56. 另外，都話第四季例旺，蘋果自從疫情爆後後已經冇再畀指引，但CEO Tim Cook預第四季按年有一定升幅。街就估緊1200億，按年升8%.

57. 睇返每個環節，服務收入係亮點，收入 183億，高過街估嘅176億。產品收入方面，就當然不及預期。iPhone收入去到 389億，按年升47%，但依然未及預期，街估415億。

58. 至於其他產品，差不多全部都低過預期，只有iPad嘅收入好過。詳情在CNBC篇文已經有講。毛利率有42.2%，好過街估嘅42.0%。

59. 留意在蘋果嘅情況，服務嘅利錢差不多70%，高過產品（35%）好多。你見收入低過預期但盈利都符合到預期，正係因為服務收入比預期高，拉高咗個毛利率。

60. 地理上，大中華收入增長勁，不過舊年係低基數。暫時你見都係 北美貢獻44%收入， 歐洲 25%， 大中華 17%。

61. 展望？照計啲供應鏈問題只係暫時，但公司真係好耐都未有「第二樣嘢」。好耐都係靠iPhone一樣嘢頂住，後來加埋啲服務收入，但總有盡頭的。我始終覺得公司嘅廣告業務有潛質。