大陸嘅嘢：一死就放，一放就亂，一亂就收，一收就死．迪士尼大插，Rivian大升．垃圾倉：隻嘢由升17%變跌5%．Donki Mizuno 大插！ (Patreon)

大陸嘅嘢：一死就放，一放就亂，一亂就收，一收就死

美股：迪士尼大插，Rivian大升

垃圾倉：隻嘢由升17%變跌5%

日本股：Donki Mizuno 大插！

今日買牛奶國際（不喜勿入）

1. 原本係會有新廣告，新合作伙伴，但真心的，你不能叫我拍我就馬上拍，我要自己試一下嘛，我自己試用過OK先會推畀大家。所以今日繼續係舊廣告，有錢齊齊拎。

2. Anyway，微牛開戶呢度

3. 富途就用我個code：9M85BY4D．兩間都有嘢送的。

4. 另外，篇FAAMG業績，應該今個週末出到了。希望可以出多篇專題。

大陸嘅嘢：一死就放，一放就亂，一亂就收，一收就死

5. 港股嘅，近排好似有啲起色呀下，我向來唔會好悲觀咩清倉，但當然亦唔會忽然仆入去。但近日走勢係靚的，星期二單日轉升後，星期三仲有力，仲要係成交上返1400億。如果唔係騰訊700業績後拖低少少，指數更加靚仔。

6. 另外留意，我就冇內幕，但都幾明顯地大陸嘅政策開始轉向。講真亦唔難預計，大家都知中國嘅嘢一向係「一死就放，一放就亂，一亂就收，一收就死」，近廿幾三十年都係咁。玩到咁上下，又要放鬆了，而家係似的。

7. 證據？之前十惡不赦嘅教育公司，又開始有返生路行。當然仲有內房，亦開始放返鬆，你甚至可以諗下，恒大到底何來會有錢還債？冇乜可能冇國家支持，或者至少係默許。

8. 當然你要事先捉到呢啲轉角，就近乎不可能。長遠嚟講亦都可能只係有波幅冇升幅，但你話睇到好淡會必死甚至走去沽空，又係另一回事。你睇今年中國海外688 華潤置地1109都有得升，跑贏晒大市的。而內房我亦只係買過呢兩隻，而家仲有每月供，唔使點輸錢的

9. 仲有，另一方面，雙11。今年低調咗好多，你睇啲數字都同高峰時爭好遠，但至少仲有得玩。京東，阿里巴巴之類ADR都有得彈，你見啲中概股呀，港股夜期ADR呀等等彈升返。

10. 再講一次，唔係叫你飛入去一注獨贏撈底。但亦唔使之前睇到好淡低位沽走。平常心，有錢就買下好公司（例如領展823，。雖然你睇長遠，即係十幾廿年，照計都會係美股或其他地方跑贏中資股嘅。講到尾都係到底個政府容唔容許你賺大錢。

美股：迪士尼大插，Rivian大升

11. 美股嘅，算係跌定咗。星期二同星期三晚，指數跌幅唔勁，但個別股份跌得好誇張，咁去到星期四晚就定咗落嚟了。納指標指都回穩，道指就只係因為迪士尼業績後大跌而拖低，業績的確係差的，而家市值又再畀NetFlix過咗頭。而我多年前買，執咗幾倍，但金額唔大，所以沽一半都廢事了。

12. 之前幾日跌得幾勁嘅一堆嘢，Nvidia Palantir之類又開始反彈返，係好消息。

13. 循例提下你，隻Rivian第二日都仲有得升，之前都提過有得炒下，雖然基本因素近乎係冇，公司連收入都未有嘅。我就不了，但你知你地有啲人賭癮好重嘛。

垃圾倉：隻嘢由升17%變跌5%

14. 講開個垃圾倉，星期三大瀉7%後，星期四晚回穩返。之前都講過，我見有人講隻MQ，昨晚出咗業績，CNBC都講了。好似好勁，一度升17%，但最後倒跌5%，點捉？間嘢個故事大有來頭呀，後幫Buy now pay later 公司Affirm Klarna發卡，夠晒Sexy，但結果呢隻嘢正係個垃圾倉表現最差嘅。好故事同好股價，真係兩回事。

日本股：Donki Mizuno 大插！

15. 日本股嘅，昨日我一起身見到，發生乜事？兩隻嘢都跌成10%，就係Pan Pacific （Donki）同埋Mizuno。最好笑係日經仲要係升嘅。唔識日文，但實情你上兩間公司嘅網站都見到，都係出咗業績（Donki呢度，Mizuno呢度）。

16. 我就好難深究業績好定差，咁你睇股價反應就梗係差。見新聞解釋就話Donki個展望令人失望，但如果我冇睇錯，公司並冇上調或下調展望，咁你可以話分析員預期會調高嘅，點都好。另外，Mizuno我亦唔知預期，但至少見到個業績改善咗。而隻嘢亦係夠晒殘，430億市值。

17. 所以當然係繼續持有，不過真係見到近期啲股票業績後可以插得幾勁。你見資生堂（Shiseido）同朝日啤酒（Asahi）都係業績後大跌的。

今日買牛奶國際（不喜勿入）

18. 早兩日都講過，reopening Stock，我想買牛奶國際Dairy Farm（咁入面唔止美心嘅，仲有惠康七仔萬寧YUU）。順手亦買下坡股，原來都係要100股一手，不過入場費唔高，唔係一個問題。又，原來係美金報價？長知識。果然買多啲股票都識多啲嘢。

19. 公司昨晚仲出咗個新聞稿，第三季嘅營運，但我見新交所都未有，亦可能唔需要上交易所。只係講下盤生意點，冇實數，唔係業績。你睇中文報導嘅，可以睇呢度。睇原文就呢度。整體望落，都係麻麻地的，舊年又有政府津貼等等，但話個銷售都低過舊年就有啲奇怪（固然疫情高峰啲人反而買多咗超市嘢）。照計份稿就夜晚出，股價未反映，我估反應都不大。講到尾，股價夠晒殘。

20. 順手講埋，新加坡所其他東西，我就冇乜意慾。星航就早早已經升咗一浸，況且航空公司始終好難長渣。新交所呢？呵欠，即使話香港股市唔掂，都唔會係新加坡。我舊公司星展理論上幾好，但銀行嘅嘢，都難啲高增長。剩低嘅，可能係堆REIT，又或者怡和系嘅嘢（牛奶國際咪怡和系）。

21. 但應該唔止一次寫過，未來N年，就東南亞/南亞了。越南印度固然早早炒起，但仲有印尼孟加拉巴基斯坦菲律賓，全部都夠窮，又多人，慢慢會走入中產。都有啲ETF可以買下，有機會講。

22. 另外，之前講過幾次隻SEA，「東南亞騰訊」，做電商，個故事無敵，亦從來都冇平過，結果都係冇買，等等等。可能下個月就買。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。