騰訊700業績，領展823業績．美國通脹升到30年新高，指數唔太差，但個別股跌得幾急． 都唔少標普500成份股創新低。所謂加息震散股市． NetFlix不停畀人告誹謗。ESG 投資嘅虛妄 (Patreon)

騰訊700業績，領展823業績

美國通脹升到30年新高，指數唔太差，但個別股跌得幾急

每日一圖— 都唔少標普500成份股創新低。所謂加息震散股市

Good Read — NetFlix不停畀人告誹謗。ESG 投資嘅虛妄

FB Post Summary —買錯日本股。Tesla 冇驚過。領展業績

今日唔講咁多廣告，但聽日會有更多。

Anyway，微牛開戶呢度

富途就用我個code：9M85BY4D．兩間都有嘢送的。

另外，篇FAAMG業績，仲係努力中，唔會走咗數的。

騰訊700業績，領展823業績

1. 忽然多嘢講喎，不如講港股先。昨日個走勢靚仔的，低位單日轉向，成交都由星期二嘅1000億唔夠，上返去1300億。但當然你見夜期同ADR又係麻麻地，都難言話反彈。

2. 另一方面，昨日嘅升勢，都幾大部份係騰訊700一隻帶動。收市後出咗業績，照計就麻麻地，但去到ADR都冇乜再跌

3. 另一隻要講嘅係領展，在Facebook Page都講咗了。應該係少數仲有唔少人有興趣嘅公司。租金見底，現價都4.5厘息，仲要係相當肯定派到，照計冇乜點有得輸。當然平時你又會嫌升得唔夠快，但我都渣住唔少的。如果有買嘅，記住以股代息添呀。

美國通脹升到30年新高，指數唔太差，但個別股跌得幾急

4. 但，當然要講美股。同星期二晚嘅情況差不多（都有預早話你知），你睇指數就唔跌得勁，但個別股份跌得好甘下。我有渣嘅，例如Palantir 跌得多，Shopify Nvidia ASML Snap 都跌的

5. 但你睇我成個倉位（睇US3），就唔算好誇張，跌得多過標指但少過納指咁咯。都係嗰句，分散嘛，有啲其他嘢頂住。樓上講跌得多嗰啲，基本上全部都係啲估值相當貴嘅嘢。

6. 至於跌市嘅導火線，正路嘅講法係美國通脹，個CPI創咗30年新高。然後債息急升呀，風險胃納收縮呀，啲估值高嘅科技股咪大跌。你見我個垃圾倉， 一晚跌咗7%，10隻跌咗9隻（有隻冇郁），都幾誇張。

7. 但我對以上呢個講法有啲保留，因為你見個CPI數字出嗰時，債息冇乜反應，中後段先抽上去，股市都係中後段先開始跌。我比較覺得係有人profit taking其他人跟住去。但當然，唔使太執著於呢啲解釋，冇乜意思。

8. 咁冇嘢嘅，平常心。首先，冇人話通脹就會拉低股市，亦冇人話加息就會拖冧股市（每日一圖有講）（但當然債息升得快係個問題）。

9. 另外，今年嘅美股回報，點都係遠超我嘅預期，亦畀歷史平均好好多。你應該調整你嘅期望。咁掉轉頭，到市況調整時，你先更加應該慢慢儲貨。唔好永遠都想今日買過兩日就升幾倍，係冇咁著數嘅事的。

10. 搵唔返句原文，但總之大約意思係：ordinary return over long period，結果就會係exceptional return．在呢方面，就的確似長跑，講嘅係靭力。

11. 仲有講多兩隻個股，首先係迪士尼，盤後出咗業績，都係另人相當失望嘅。盤後又唔算跌好多，但今年股價都係大落後。

12. 另外，之前都冇講，隻Rivian上咗市，今年最大嘅IPO，史上第六大，亞馬遜支持兼做股東嘅電動車，當然就係收入都未有。咁見到……IPO價78蚊，高見差不多120蚊，收市都係近100蚊左右。大約860億市值。

13. 我就覺得……似乎可以短期搏下嘅，股東夠勁，不過我就唔會了。反正都冇乜錢，況且個市況好似唔係太就。

每日一圖— 都唔少標普500成份股創新低。所謂加息震散股市

14. 都唔少標普500成份股創新低—實情係兩個圖，早排都已經有人講，標普指數之前日日破頂都好，有啲成份股係創新低嘅，數字仲要上升中。咁你睇上面個圖就睇到。不過，到你拉長少少時間，睇下面個圖，就知道根本冇乜特別。當然你可以話指數新高下都仲有十間八間公司創新低有啲奇怪。

15. 所謂加息震散股市—而家正路嘅估計，係估下年7月會加息。我就估有遲冇早。但，呢個圖畀你睇晒美股歷嚟在「第一次加息」前後12個月嘅表現。見到係點？好簡單，加息之前升，加完息都照升。根本唔關事。

Good Read — NetFlix不停畀人告誹謗。ESG 投資嘅虛妄

16. NetFlix不停畀人告誹謗 —相當好嘅文，亦畀你了解下荷李活同傳媒生態。NetFlix應該係畀人告得最多嘅公司，多過晒咩CNN Fox之類。係咪有啲奇怪？當然個導火線係因為NetFlix好多non fiction 嘅東西。問題係：由頭到尾成件事都好奇怪。畀你諗下，假設套戲有誹謗成份，然後MCL或者百老匯院線去上，會唔會去告戲院？當然係唔會的，你只可以去靠製作人導演編劇之類。咁但，既然戲院唔會畀人告，點解NetFlix會？咁當然，有部份嘅內容，NetFlix有份製作。但，你見畀人告嘅戲或劇，唔少根本NetFlix係冇份製作的

17. ESG 投資嘅虛妄— ESG大家都聽過下，咁「做好事」似乎冇乜人反對。但關投資咩事？ESG投資嘅講法，就係話買呢啲良心公司，回報會更好。實情你諗真啲，個基本邏輯都有問題嘅。好多文都講過，呢篇文講得比較淺。我假設有一大班人特登避開A-H字頭嘅公司唔買—結論就會係呢啲股票更抵買。

FB Post Summary —買錯日本股。Tesla 冇驚過。領展業績

18. 買錯日本股 — 真人真事，早排睇啲日本開關股，除咗大路嘅 Airline，有日本港人讀者醒隻嘢畀我，就係呢隻4661 Oriental Land．咩嚟？東京迪士尼。我絶對Buy，問題係入場費近15萬港紙，咁我就費事了（亦都冇咁多現水）。但結果唔小心碌碌下買咗！於是即時沽返，扣返佣金獲利140円。然後你估到了，隻嘢當然係繼續升

19. Tesla 冇驚過— 講返Tesla 首富話減持單嘢，你計數計到，佢減持嘅股數，同成交相比都唔係咩大數。因為成交實在太大。咁當然你可以話影響情緒，事實亦都跌咗兩日，但去到星期三晚已經反彈了。

20. 領展業績– 都算寫得幾詳細，又，個 Excel我都放埋上嚟，夠晒清楚。但實情你大約睇租金已經知道隻嘢會點。當然佢啲租金同你尖沙嘴銅鑼灣旺區嘅走勢又唔同嘅。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。