ivanliresearch

Reopening，王維基1137數字（Excel），首富減持Tesla。11月買貨紀錄。Google愛馬士Bitcoin新高。垃圾倉狂升美股年尾例旺。QE完債息先跌。標普指數超越所有分析員目標價。技術同運氣。早早睇淡UBER嘅人。你應該聽乜人嘅意見？ (Patreon)

Published:

2021-11-08 23:54:32

Edited:

2021-11-10 02:37:40

Imported:

2022-09

Downloads

Download 1137 HKTV Mall.xlsx

Content

快評兩句— Reopening，王維基1137數字（Excel），首富減持Tesla

大師冇點你—11月買貨紀錄。Google愛馬士Bitcoin新高。垃圾倉狂升

每日一圖— 美股年尾例旺。QE完債息先跌。標普指數超越所有分析員目標價。

Good Read — 技術同運氣。早早睇淡UBER嘅人。你應該聽乜人嘅意見？

FB Post Summary —Tesla 共同富裕。波音option．領展國家任務。Do you know Tesla？

1. 好消息，我啲舊嘅email卒之清晒，雖然又有啲新嘅，但暫時仲係樂觀。至於篇週末專題，應該呢兩日會出現返。

2. 壞消息，廣告時間，呢排會更多。首先，Webull開戶送高通，因為呢排高通係咁升，個獎賞越嚟越值錢。咁你大可以之後拎完股票沽咗佢的，到我收到會話畀大家知。記住記住用我嘅link去開戶先，註冊咗之後先download app，然後就入10000蚊，買一次美股，keep住45日。之前未完成嘅，而家可以繼續

3. 仲有，富途。如果想開戶嘅，用我個referral code：9M85BY4D．我自己都用緊富途，所以就……唔使咁驚嘅。今個月係送1股蘋果，200蚊股票現金券，同埋100蚊超市禮券。講真，富途就真係好用的。

快評兩句— Reopening，王維基1137數字（Excel），首富減持Tesla

4. 美股，就又係慢慢升咁上新高。港股嘅，大家都唔係幾想講（但我個港股倉逆市升的！），不過我想你留意，香港亦都係炒開關股，疫苗股就多數死晒，照計全世界都會係咁了。香港嘅，固然炒堆航空股（國泰293加埋大陸航空），機場股。反而香港啲消費股同商場就冇乜點郁，之前都講過下，我覺得仲係OK的。

5. 但你真係叫我揀，我會揀澳門股。啲生意正常啲，而且可持續，唔係炒一浸就算。不過我係冇嘅，亦冇打算買，以上嗰啲我都冇，只有少量嘅香港地產

6. 另外，王維基隻1137出咗數，我Excel都入咗。我只會簡評。你睇按月就好似大反彈，但只係因為9月差咗，而當時公司話係因為10月出消費券啲友會延後消費。咁你見到，10月嘅數，同8月比，又唔見得好靚

7. 最後，週末在Facebook 都寫咗，Elon Musk搞投票嘛，話唔會走數，結果網民叫佢沽10% Tesla，睇佢係咪照做。但都係順手人情啫。影響？其實係冇乜的

大師冇點你—11月買貨紀錄。Google愛馬士Bitcoin新高。垃圾倉狂升

8. 循例貼返啲11月嘅買貨紀錄，有啲你可以搵下舊文。咁你見3187照樣每個月買（實情有啲想轉第隻，都係覺得開支有啲貴，遲下研究）。仲有VOO（標指）TQQQ（納指）。仲有新買嘅VB（美國小型股），IDEV（成熟市場），EMXC（非中國嘅新興市場），咁新買就用IB了。

9. 個股嘅？全部係日本股。7532咪Pan Pacific International，即係Donki．

10. 仲有，樓上都有講，reopening 嘛，上次篇文都有講，日航9201，全日空9202都買埋，小小地，都係一手。至於隻4661？「買錯嘢，即時沽返」，FB會講成個故事

11. 至於Google愛馬士Bitcoin新高就循例貼下，留意Google一度突破2萬億市值，愛馬士呢期都幾多人問，好似女讀者多。至於Bitcoin嘅，一路我都話唔信，但唔信先要買啲，咁可能我錯嘛！（事實都錯錯地）

12. 不過始終最神奇，都係垃圾股倉，又係嗰句，睇到我懷疑人生，升兩成，跑贏晒絶大部份指數。可惜只係買咗三萬蚊（前因呢度，同呢度）。

每日一圖— 美股年尾例旺。QE完債息先跌。標普指數超越所有分析員目標價。

13. 美股年尾例旺— 類似嘅嘢都貼過下，不過留意下，紅色線係過去20年，藍色線係今年。你見都真係跟得幾足，相關性超過80%的。

14. QE完債息先跌—亦係貼過下，但因為呢期開始講減買債，又可以講多次。同好多人嘅想法唔同，好多人以為QE印銀紙就壓低債息，到收水唔買債債息就會升。真係咁？你睇下個圖就知，一般QE期間債息係升嘅，反而到收水就跌。原因都幾簡單：炒預期。仲有，差不多一定係經濟差先會行QE，行完就復蘇，所以債息升定。

15. 標普指數超越所有分析員目標價—美股標普指數已經4700點，年頭最樂觀嘅分析員都只係估4400點。本身冇乜咁特別，你係酸民咪話分析員垃圾（但你拎唔拎到人地份人工？）。咁講真，美股今年嘅表現，都遠超我預期。但，最重要嘅問題，我想你問下自己，其實乜嘢叫「目標價」？諗真啲，唔同人有唔同意思，甚至個字根本冇意思。所以你見但凡有人問我推邊隻嘢講乜目標價，十次有九次我都答冇。我當年頭，我話標普指數目標價係4400點，咁然後今年之前到咗啦，咁點？「食糊」沽晒佢？定反手沽空？如果唔係嘅，咁咩叫目標價？

Good Read — 技術同運氣。早早睇淡UBER嘅人。你應該聽乜人嘅意見？

16. 技術同運氣—雖然超過十年前，但非常精彩嘅文。長，但絶對建議你睇咗佢，反正唔急，亦唔深。技術同運氣，係你人生嘅一大課題，唔止投資，好多嘢都係。偏偏好多人分唔到，亦都有時唔係好易分得出。作者冇畀一個好短嘅答案你（呢個年代乜都要懶人包，令到啲人越嚟越笨）。我最欣賞佢篇文嘅開頭：西班牙六合彩有人中大獎，因為佢揀編號48尾數嘅飛，咁中咗獎，固然會發表好多高見，啲人問佢點解揀48咁有眼光。佢話，因為我連續7晚夢到7字，而七七就係四十八。呢個咁過癮嘅開頭，必定令你會想睇落去。

17. 早早睇淡UBER嘅人—留意係新嘅文，但講返，當年全世界齊齊吹奏UBER（記唔記得香港都好多KOL吹？因為UBER出好多錢做公關），點高科技點改變世界，偏偏有一個人就話成間公司根本唔work，根本唔會賺錢 —除非做到壟斷，然後搵司機同消費者笨。呢位仁兄就係Hubert Horan，佢寫咗幾十篇文去批評UBER。我地呢度都貼過下。留意，佢嘅路就係註定好孤獨。另外，UBER剛剛出咗業績，居然好多人話公司轉虧為盈。我建議大家驗下眼。

18. 你應該聽乜人嘅意見？ —又係一個大課題，亦唔止係投資。我相信，你去選擇到聽乜人嘅意見，係一種極重要嘅能力。但應該聽乜人？專家？專家又未必一定啱喎，況且邊個係專家？你信得過嘅人？但佢未必為你好喎。為你好嘅人呢？又可能點條黑路畀你，況且可能佢自己都唔識。一如以往，呢篇文未必畀到答案你，但至少畀到啲大方向你。例如，唔好叫吳彥祖教你點溝女，佢真心幫你都冇用。