加息縮表經濟數據強但債息照跌，點丫？美匯破頂美股照升，吹咩？ VOO QQQM 3187已買。結果冇買EFA，買咗另一隻。隻期權升150%！ AirBNB，Booking同Expedia 都大升！另外留意迪士尼同Nvidia 都大成交。愛馬士Nike BlackRock 微軟 Google Nvidia SalesForce全部新高。今年美債回報N年最低。今年美股係升盈利，唔係升估值。唔使擔心通脹。IG女過主 Content Creator 當立。 (Patreon)

快評兩句—加息縮表經濟數據強但債息照跌，點丫？美匯破頂美股照升，吹咩？

快評兩句— VOO QQQM 3187已買。結果冇買EFA，買咗另一隻

大師冇點你 — 隻期權升150%！ AirBNB，Booking同Expedia 都大升！另外留意迪士尼同Nvidia 都大成交。

大師冇點你—愛馬士Nike BlackRock 微軟 Google Nvidia SalesForce全部新高

每日一圖— 今年美債回報N年最低。今年美股係升盈利，唔係升估值

Good Read — 唔使擔心通脹。IG女過主 Content Creator 當立。

FB Post Summary —　Nvidia 升一個開。領展停牌。Z Holdings．畢菲特識唔識分中島美雪同中島美嘉？

1. 壞消息係我嘅俄羅斯方塊繼續越堆越高，但好消息係週末應該可以清晒佢。好消息係今日好多好多嘢講，所以唔賣廣告，壞消息係下星期就會好多廣告，自己睇路。

快評兩句—加息縮表經濟數據強但債息照跌，點丫？美匯破頂美股照升，吹咩？

2. 港股我跌得少過大市，咩港交所388 友邦1299 地鐵66 長江基建1038 恒生11 都有得升啲，幫補下（有乜共通點？全部唔係中資，當然我其他有啲中資股，所以要分散）。

3. 不過相信大家都唔係好睇港股，咁都係講美股。三大指數又新高，原因都冇乜特別，話因為就業數據好。「咁係咪好快又要驚加息？」。唔好諗咁多啦

4. 但我另外想講兩樣嘢，首先，你見到就業數字靚，之前又話減慢美債，好快縮表兼加息，但美債債息近排係急跌嘅，原因不明。有人話同早一日英倫銀行意外唔加息有關，我就好有保留。無論如何，債息落應該對股市係好事。

5. 更神奇嘅係，你見到美匯指數今年極之勁。原本都冇乜特別，但，明明話美匯指數強一般代表風險胃納縮，對股市唔好，偏偏美股今年就不停破頂。然後美金強勢，但你睇新興市場，除咗中國外，又好似唔算太差（實情上證都唔太差的！）。結論？呢啲規則，畀你理解基本嘢，但實際上股市複雜好多。你不能好似科學實驗咁去理解的。

快評兩句— VOO QQQM 3187已買。結果冇買EFA，買咗另一隻

6. 星期五得閒返些少，卒之有時間買返啲每個月買嘅股票，固然呢幾日都升咗啲，但當然照買。你見高追我唔介意，大跌買亦冇所謂。

7. 每個月買嘅，咩 VOO QQQM VB EXMC 3187 之類，都買齊，下星期一詳細講同埋貼圖（有圖先有真相嘛）。特別留意VB 同EXMC 今個月先開始的。有冇留意近期我已經少咗買個股？（咁都買咗Palantir ，Twitter同Snap，但好少錢）

8. 另外，日本股，買咗Pan Pacific international 7532，即係乜？即係Donki母公司。實情ig有講，記得follow．一手咁大把，都萬五六蚊的。

9. 不過我最想講，都係澄清返，結果我冇買EFA，結果買咗另一隻IDEV．點解？可以之後細講，但，睇個比較就明（呢個功能好好用！）：買嘅嘢差不多，但管理費再平啲。咁你話你已經買咗EFA？都冇嘢嘅，又唔見得爭好遠。

10. 又，呢個IDEV，係讀者話我知的，表揚下。

大師冇點你 — 隻期權升150%！ AirBNB，Booking同Expedia 都大升！另外留意迪士尼同Nvidia 都大成交。

11. 唔知個故事嘅，睇舊文（有幾篇的）。我星期五日頭寫明報篇稿亦係講呢個故事（呢度有attach），點知星期五晚波音就升5.4%，原因不明。而隻期權，升147%，哈哈哈！（留意，個槓杆真係相當勁的）

12. 不過，你有睇我文嘅都知，扯，我5.5買的（都話我好高透明度）。而家仲潛水22%。

13. 想講幾樣嘢，首先，我仲相信個故事，好有信心，但太早睇啱等於睇錯，記得投資冇你吹水咁簡單，特別係買event driven用衍生工具。第二，換著其他作者，當然就會貼上網，講一晚贏150%— 但唔會話你知佢之前5.5買。所以點解成日叫你上少啲網。

14. 留意，波音係大成交的。仲有迪士尼都係，可能都係reopening．Nvidia都大成交，但同波音迪士尼冇關啦。

15. 同時間，你見一大堆Re opening stock都升返的，包括之前讀者問過嘅Booking 同Expedia。當然仲有我想買未買嘅AirBNB，績後大升。

大師冇點你—愛馬士Nike BlackRock 微軟 Google Nvidia SalesForce全部新高

16. 循例貼（SalesForce唔夠位放，費事cap多張），但另外留意，力度唔係好夠的，幾隻都倒跌。

每日一圖— 今年美債回報N年最低。今年美股係升盈利，唔係升估值

17. 今年美債回報N年最低—一樣好重要嘅嘢：債息同債券格價，走向係剛好相反的。你張借據轉手價貴啲，亦即係代表買嗰位收到嘅潛在回報細咗。咁所以，今年美債價格跌，大家應該好易理解對不？10年美債息由頭年1厘，升到而家1.5厘，咁個價當然係大跌。但我特別想你留意嘅係，見唔見個圖，由1970年到而家50年，得5年係跌？咁你估下，係咪得5年係債息升？當然唔係（可以睇呢度），七十年代末八十年代初，好多年都係債息升。但點解個回報仲係正數？因為，嗰時啲債息有近十厘！你蝕價，但賺到息，見唔見個圖寫total return？但而家，債息低到咁，你個total return就可能只睇個價了

18. 今年美股係升盈利，唔係升估值—上次寫過相關嘅嘢（幾時都話啲嘢環環相扣），咁股價＝盈利X市盈率。股價升，一係公司賺多咗錢，一係估值（市盈率）升，兩者可以同方向亦可以唔同。見唔見到今年同舊年好唔同？舊年就只係升估值，今年就只係因為盈利升。實情兩者未必可以分開，股價炒預期嘛，舊年咪就係預咗今年嘅盈利會升，個估值先上升咯。

Good Read — 唔使擔心通脹。IG女過主 Content Creator 當立。

19. 唔使擔心通脹— 應該話，通脹就梗架啦，但有乜好驚？唔會返返去70年代嗰種惡性通脹。篇文有好詳細咁話你知點解。有啲長，但唔算太深，但當然有少少經濟學底去睇會好啲

20. IG女過主 Content Creator 當立— 實情原文講Instagram influencer （外國唔興講KOL），咁同獨立嘅Content Creator 有乜分別，你可以睇文入面講。講嘅大勢，就係唔再係以往開IG開YouTube開FB Page賺流量然後搵廣告商咁，改為直接同讀者收訂閱（即係你而家做緊嘅嘢）。但實情，係可以並存嘅。

FB Post Summary —　Nvidia 升一個開。領展停牌。Z Holdings．畢菲特識唔識分中島美雪同中島美嘉？

21. Nvidia 升一個開  — 有用的。頭三份一就發泄下，啲人覺得我係科技盲（事實亦係），質疑做乜要聽我講買Nvidia．結果半年就一個開，大家有見證住。不過更重要係後面三份二：想講，「識」有好多層次。好多人以為做金融係投資嘅優勢，我覺得係相反。特別係如果好似我咁要出嚟寫嘢嘅，總會不停有人動搖你嘅信心，可能係好意可能係惡意，但點都有影響的。你係應該睇多啲唔同嘅嘢，我都會，但我講呢種情況係好多人會不請自來的（無論好心定黑心）

22. 領展停牌 — 原本估「安心出行」，順便講埋領展啲管理層係打工仔，梗係小心。不過好快講咗係收購，我估係澳洲或英國。有人估咩佳兆業同恒大，冇乜可能啦

23. Z Holdings— 呢隻係我日本倉嘅持股之一（仲有Mizuno，樂天Rakuten，Panasonic），咩東西？就係Yahoo Japan同 LINE，同場講下孫正義嘅故事。

24. 畢菲特識唔識分中島美雪同中島美嘉？— 講早排創新高嗰堆嘢，你見，之前全部都因為「負面因素」跌的。好多時你都發現，根本唔使驚。甚至更加多時係跌咗先有人搵啲負面因素出嚟。同場加映嘅，都係我核心信念啦，你N咁多網友一年去十幾次日本，畢菲特九十幾歲人只係去過一次，但佢照樣買日本股，回報相當不錯添。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。