半廣告：高通業績後勁升．心法/想法：升市反而冇乜好講．港股通關股，都係嗰啲啦．國際開關股（非中港美）．美股業績幾隻（有reopening亦有其他）：Booking，ViacomCBS，AirBNB，Roku．美股六連升，Nvidia升12%，大倉跑贏大市．Nike BlackRock（仲有5隻都係）．Chanel加價 愛馬士新高 (Patreon)

半廣告：高通業績後勁升

心法/想法：升市反而冇乜好講

港股通關股，都係嗰啲啦

國際開關股（非中港美）

美股業績幾隻（有reopening亦有其他）：Booking，ViacomCBS，AirBNB，Roku

美股六連升，Nvidia升12%，大倉跑贏大市．Nike BlackRock（仲有5隻都係）

Chanel加價 愛馬士新高

1. 相信大家玩過俄羅斯方塊，而家我嘅InBox就好似係咁，一路清咁啲嘢，但未清晒，但新出現嘅更多。不過放心，未咁易GameOver嘅

半廣告：高通業績後勁升

2. 高通Qualcomm出咗業績，相當強勁，股價大升（今年大落後的）。講真，唔關我事，冇買亦冇推 — 但好快會關我事，同埋關大家事。

3. 因為，微牛開戶，就係送一股高通。嗰時佢同你講1000蚊，就係綽頭，實情係送一股高通。咁的確，由你申請到收到獎賞，分分鐘都隔咗兩三個月，中間可以發生好多事，但至少而家你見到隻高通，係升咗唔少嘅。上個月你開戶時就1000蚊，而家已經變咗1200蚊。個搞笑點係，好大機會呢隻嘢嘅表現，好過你成個倉（隻嘢升兩成喎！）

4. 之後升定跌？唔知。但佢地係照樣會送一股高通的，所以都係嗰句，之前註咗冊未入錢未完成嘅，可以繼續，跨月都仲有，但下個月我唔知佢地仲做唔做。另外嘅，未開嘅可以開下。有錢齊齊拎。

5. 記得用我個link．

心法/想法：升市反而冇乜好講

6. 有時升市我覺得反而冇乜好講，你見我鍾意用比喻，投資除咗似出海打魚同上山打獵，亦都可以係似耕作。有機會寫篇文解，但，首先一分耕耘未必一分收穫，不過長線嚟講，都係算公平。仲有，四季有時，唔同時間炒唔同嘅嘢，唔好種完唔開花結果又講粗口。有時只係時機未成熟，或者升過咗龍，或者純係運氣唔好，或者你揀錯股（有幾出奇？）。

7. 重要嘅係，應該講過幾百次，正常嘅人都係市況旺先仆入去。絶對明白的，唔好話普通新手，就算我都好難避免。人始終係社會嘅動物，見身邊人個個搵到快錢，好難唔投入。

8. 點克服？實情好難。而你亦見到每一次，總係覺得世界末日，買股票畀人當白痴時，係最好時間。當然，實行上極之極。但我覺得你唔使對自己要求過高，根本絶大多數人嘅水平低得可以。

9. 即係點？即係，亢奮時，都照買，唔使忍手，不過唔好去得太盡—我指嘅唔太盡係，100%好啦，唔好又孖展又乜，你見我而家都係咁，美股日日破頂，我要買嘅嘢都照買，但我又唔會去借錢或做槓杆。

10. 仲有，全人類恐慌時，你去買，實在太難太難。不過至少你做到兩樣嘢：第一，唔使低位打靶。第二，原本定咗嘅計劃，咪照買。我亦親身示範到，2020年第一季，我一樣都係有錢就瞓晒落股票。

11. 但最易做嘅就係：市況悶，先係最好嘅買貨時機。唔太興奮，唔太恐慌，你買得舒服。又唔好走去話唔郁，回下先買。

12. 講咗咁多，想表達嘅係：我個Patreon 2020年8月開，疫情股災之後嘅幾個月，過去嗰十幾個月，你理應該儲咗好多股票，而家係享受緊成果。

13. 但，唔係叫你「食糊」！有機會細講。對我嚟講「食糊」難聽過粗口，成個想法都有問題，但我亦知好多人都會咁諗。應該開篇新文，但你見，我就真係唔使點「食糊」的。

港股通關股，都係嗰啲啦

14. 好多日冇寫港股，因為實在係唔得。有個別讀者或者朋友早早唔買港股，我又未係咁極端，首先以前買落，而家仲每個月有啲月供，但慢慢地分散去其他市場多啲（因為美股我都好多）。

15. 早排有個朋友，原本一路都唔肯買美股，怕煩又覺得貴（估值啦），早幾個月都開始轉戰美股。好似許冠文套《雞同鴨講》，個尼姑都走去食丹尼炸雞咁。我地仲半講笑咁估佢會唔會就係摸咗頂，結果都冇事．咪好地地

16. Anyway，港股昨日（星期四）個走勢卒之冇咁難睇。但留意，美國堆中資股都係全線跌的，夜期ADR之類都係。所以都係……冇乜起色

17. 不過，睇啲細股反而有得睇。之前都冇講，似乎開始真係一步步同大陸通關了。你見當然利好啲香港零售股，莎莎178，六福290，周大福1929咁，唔算升咗好多，有機會短期仲有得搏。

18. 不過我自己，就鍾意商場多啲，九倉1997都升唔少，而我有月供太古19同太古地產1972（可惜冇得升）。無論如何，都只係買得極小。

國際開關股（非中港美）

19. 另外，我係留意緊日本嘅……Airline．有機會細講，都係嗰兩間。我知佢開關遙遙無期，但正係咁先有得買，到一傳話開就升晒啦。好可能短期會買日航或全日空，但應該只係短炒，甚至可能唔買，可能諗其他國家公司—但選擇唔多，星航又升咗唔少，大陸嗰啲又唔係極多國際線收入，國泰又唔係好想買，其他咩馬航泰航印尼加魯達一係停牌一係半死，再研究下先。

20. 仲有，大逆不道都要講，你叫我揀一隻。其實我會買……牛奶國際。冇錯有美心，但佢亦唔止係美心，仲有惠康七仔萬寧YUU。股價都仲係……幾殘的。況且，等我又進軍埋新加坡股市嘛。

美股業績幾隻（有reopening亦有其他）：Booking，ViacomCBS，AirBNB，Roku

21. 仲有，上個月寫過幾篇講reopening（但我都冇乜買），有讀者問過Booking.com，我都鍾意的（但冇買）。出咗業績，其實幾靚，但股價要跌。

22. 同樣情況嘅，仲有我有買嘅ViaComCBS，實情買咗後都冇乜好過，都係嗰時搏佢會畀人收購，但等了又等。業績呢？著實唔差，但一樣係要跌。冇嘅，咪等下咯。

23. 之前講過，我係想買AirBNB嘅，業績似乎不錯，盤後都升。

24. 最後有隻Roku，亦係在觀察名單，想買，業績後大跌。不過，幾時都係想買嘅股票太多，錢太少（仲有時間都係個問題，要睇要寫）

美股六連升，Nvidia升12%，大倉跑贏大市．Nike BlackRock　愛馬士新高（仲有5隻都係）

25. 美股嘅，輕輕鬆鬆六連升。標指同納指又創新高。之前又話驚加息驚通脹嘅，又點算？

26. 順手講埋，我個倉繼續係跑贏大市的。當然係多得隻NVIDIA破頂（SSYS已經變殘廢咁滯，好似得幾千蚊港紙，升十倍都冇乜關）

27. 但另外都想你留意。個大倉US3，8隻股票新高了。呢幾日成日講嗰啲不再重覆，但，Nike BlackRock都破頂了，特別係Nike，之前業績唔得，回咗，根本又係好機會。

28. 到底呢個US3渣咗乜？睇返個Excel（Attachment有）。未係完全齊，呢兩個月買嘅未得閒入，但九成都在入面了。

Chanel加價 愛馬士新高

29. 同場加映，Chanel係咁加價，固然我識條鐵，而Chanel冇上市亦不在任何上市公司入面（幾時賣？）。但你見文中話，加價加到愛馬士咁貴，啲友可能寧願買愛馬士。無論係咪真都好，你亦見到呢啲就係有加價能力嘅品牌，佢加完，咪到其他公司加。所以愛馬士LVMH依然坐得放心。貴？就幾時都貴的。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。