聯儲局縮表，美股照樣新高。你又有冇之前沽貨？Tesla 愛馬士 Nvidia 微軟創新高。美股業績好就唔升，差就跌。外資10月加速淨買入中國股。 SaaS 利潤率根本唔高。A&W嘅3/9磅漢堡。 (Patreon)

快評幾句—聯儲局縮表，美股照樣新高。你又有冇之前沽貨？

大師冇點你—Tesla 愛馬士 Nvidia 微軟創新高

每日一圖— 美股業績好就唔升，差就跌。外資10月加速淨買入中國股。

Good Read — SaaS 利潤率根本唔高。A&W嘅3/9磅漢堡

FB Post Summary —　Pandora 績後大插。蘋果批冷氣企管

1. 忙到一個點，連我自己啲股票都未得閒買，每月買嘅美股都未做（港股我就銀行月供，美股就自已個個月買）。不過我都係隨心，唔得閒咪遲兩日，最重要持之以恒，唔好手痕，無論嗰日狂升定狂跌，我都照買的，唔好自作聰明，升咗又話等下先，跌咗又話跌定先買。

2. 仲有，昨日寫咗篇EMXC，如何買Emerging market ex China，我覺得真係好文（雖然舖排可以好啲），照計好多人想睇，你可以推畀朋友叫佢訂。將來我會再寫文跟進，例如話，仲有冇第二隻可以咁？仲有，呢隻嘢點解得嗰16億美金AUM？iShares喎，BlackRock喎。另外，你有冇諗過佢會執笠？唔係BlackRock，係隻ETF。ETF執笠好出奇？咁細AUM，又唔係收得貴，計唔掂數咪摺埋。咁會點處理？將來會講。

3. 最後，廣告，微牛開戶，今個月仲有獎，之前做咗一半嘅可以繼續。開戶呢度，用我條link，照計仲係會有1000蚊獎賞，最緊要註冊，開戶，入錢（10000港紙），買一次美股（記住係美股！），然後keep 45日。

4. 你見11月得5個註冊，但11個開戶/入錢成功，即係有幾位讀者係上個月註冊今個月完成的，一樣有效，唔使擔心。但佢下個月仲做唔做，冇人知。所以自己快手。開戶呢度，用我條link

快評幾句—聯儲局縮表，美股照樣新高。你又有冇之前沽貨？

5. 聯儲局剛結束今年竹第7次議息會議。提埋你，12月中仲有一次，而12月中呢一次會有埋啲經濟預測。剛剛呢次呢？唔加息人人都知，但一如所料，聯儲局宣佈咗減少買債（但留意，並未係「收水」，只係減少買），詳情可以睇呢度。另外，主席亦強調，唔代表好快加息。但如有需要亦都唔會遲疑。即係點？即係覺得冇需要，仲係覺得通脹暫時。

6. 美股，就照升不誤，創新高。以前都講過，有人話縮表或加息周期美股就會跌，你睇2009-2020美股年年升咁滯，當中有縮表有加息。加息就會跌，只係某啲人嘅想像。

7. 不過，始終舊文都講過（呢篇好嘢），你股市嘅估值，除咗睇自己（市盈率市帳率市銷率市乜率都好），仲要睇埋相對，即係「機會成本」，即係其他嘢嘅回報。咁，債息好關鍵。而債息雖然有起有落（所以我唔知啲人點睇圖），未升穿今年高位，但都係由年頭嘅1厘，升到而家1.6厘，明顥股市係貴咗的（當然盈利有增長可以拉低返）。所以，如果有個大調整（10%以上啦，唔夠10%嘅討論都費事），我唔會意外。

8. 睇到呢度，你心諗，喂，即係點？又話加息縮表唔代表一定跌，但又話跌唔意外，即係升跌都有機會？冇錯！正係咁！

9. 唔好柴台，係叫你諗真啲，股市本身就係無常，我知必升嘅一定瞓盡孖展買call啦下話。以往加息縮表冇跌，唔等於今次唔會喎。股市邊有得包生仔？但好多人就係想要呢啲虛假嘅安全感。冇用的。你之所以有回報，係因為你犧牲咗安全感，price of admission（又寫過！都話要睇舊文！有上下集的）。

10. 我嘅意思，唔係話實會升，亦唔係覺得實會跌。下年升定跌？唔知。但，你就唔好以為係「多數會跌」。接受未來係未知嘅。有乜分法明朗啲？有。分散咯，同埋長期。你睇股市短期，波幅大，回報唔高。拉長就剛好掉轉。美股你坐得長，真係冇輸過咁滯。再驚嘅？咪買啲其他地方。咁如果全世界股市都衰足十幾廿年呢？咁你有樓有Bitcoin都好。咁如果真係未來十年乜都跌呢？咁，仲有乜好講？

大師冇點你—Tesla 愛馬士 Nvidia 微軟創新高

11. 都同上星期講嘅差不多，呢四隻都仲係強勢。留意晏啲在Facebook Post有詳細寫（點解晏啲先有？因為set咗時間掣，唔想等嘅睇我Instagram，早早叫你follow．而Instagram係冇得較時間掣的）

12. 又，只在呢度講嘅，咁呢四隻我睇好邊隻？「當然四隻都睇好，否則沽咗啦」，但如果真係拎支槍指住我呢？我會鍾意Nvidia同愛馬士多啲，前者照計一路會炒Metaverse，後者品牌實在太勁。微軟都好，但真係貴，Tesla就仲貴。冇話唔買得，但就預有機會調整咯。

每日一圖— 美股業績好就唔升，差就跌。外資10月加速淨買入中國股。

13. 美股業績好就唔升，差就跌 —唔止一次講過呢個現象，近幾季更明顯，睇埋個圖仲明顯。點解會咁？以前都解過，好可能因為業績「好過預期」都一早預期。亦因為估值貴，你交到貨都仲頂得住，一達唔到期望就大跌。但，之前又寫過，美股逢業績期必升。有冇矛盾？冇嘅，首先個圖只係講一日。另外，咁實情絶大多數公司嘅業績，都係勝預期嘅，差過預期會大插嘅，實在係少。

14. 外資10月加速淨買入中國股—當然要睇定義，可惜我未搵到。咩係「中國股」先？但應該係計A股，好似冇計港股，唔肯定。咁另外，亦有人話係「假外資」，大陸嘅錢出咗嚟又扮返外資去買，都有可能。咁但至少，啲錢走咗出嚟佢都照買返大陸股丫？事實你見到，差不多每個月都仲係淨流入，就同你想像中唔係好同的。原因？我都唔知，固然你可以話係假外資塘水滾塘魚，亦可能係ETF焗住要買。

Good Read — SaaS 利潤率根本唔高。A&W嘅3/9磅漢堡

15. SaaS 利潤率根本唔高—幾好嘅文。SaaS者，Software as a service，早一兩年嘅金融潮語。微軟又話係SaaS，Adobe又話Saas．有個迷思話，呢啲公司食老本，利潤率好高。作者用數字話你知，根本唔係咁嘅事。甚至見到，有好多即使都有2億收入一年，都仲係operating loss嘅。原因？因為雖然固定成本低，但啲工程師貴喎，而且好難減，話炒人好影響士氣（我有保留）。即使有錢賺嘅，都只係10% operating margin，不能話好好賺。但點解呢啲股都唔少人追捧？因為只要個客用開，就年年畀錢，好少會停（你諗下就算你一路鍾意間餐廳，都未必會個個月幫襯），亦都往往只會加價唔會減價。做得夠大就真係印錢，例如微軟。

16. A&W嘅3/9磅漢堡—A&W，美國嘢，加拿大都有，新加坡馬來西亞印尼都有，沖繩都有，但大中華應該冇。3/9磅，就真係即係1/3磅。咩回事？話說N年前佢地出過一隻1/3磅漢堡，就係打麥當勞嘅Quarter pounder．但完全唔成功，聽聞好多美國人覺得1/3 係細過1/4，因為3細過4。所以，今次公司捲土重來，就整大個分母！叫做3/9。又，當然亦都係一個gimmick，因為又會好多人重提Quarter pounder嘅故事

FB Post Summary —Pandora 績後大插。蘋果批冷氣企管

17. Pandora 績後大插 —穿珠仔嗰間，唔係聽歌嗰間（賣咗盤了）。講返呢間嘢，丹麥上市的，之前十分好賺的，你估都估到，泰國廠嘅嘢，然後賣到貴一貴。之前利錢高過晒其他咩Tiffany LV Gucci，但近年已經收窄，原因唔知。不過，股價過去兩年升咗三倍，之前都有留意，又走寶。但冇買，就講乜都係廢話。

18. 蘋果批冷氣企管—冇乜特別，講我樓下間蘋果批舖，幾個月又轉咗賣熱狗同漢堡（同一老細），而家又變咗韓仔三文治。個位對面嘅鮮芋仙長期排隊，亦唔見得平過佢，所以明顯唔係舖位或客戶消費力嘅問題。咪就係啲產品唔得，我食過都真係唔得。但相信咁簡單嘅嘢，冇人同老細講。當然，唔得嘅嘢都可以好好賣或者好好賺嘅，就睇你其他實力，包裝，行銷，全部都係學問。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。