如何可以買新興市場，但又唔買中國？ (Patreon)

如何可以買新興市場，但又唔買中國？

高盛都話「新興市場」應該踢走中國，係升呢定降級？你自己判斷

EMXC 介紹

咁但，EMXC，我仲會拍邊隻？

成熟市場定新興市場好？有韓國定冇韓國好？

結論

1. 歡迎新舊讀者，呢篇你可以當係遲來了嘅週末專題。一般週末得閒我都會寫篇專題文，有時係啲心法，有時係101入門嘢，有時係 Big Picture，有時係深入嘢。你可以上目錄搵返。

2. 快賣個廣告， WeBull開戶送你1000蚊股票呢度，上個月註咗冊而未完成開戶未入錢嘅，今個月可以繼續進行，今個月依然有差不多嘅獎勵。另外，之後幾日就會真係多啲廣告了，有幾間新券商，準備定錢，身份證同地址證明之類吧。

如何可以買新興市場，但又唔買中國？

3. 呢篇同再對上一篇，講Walmart家族點投資有些少關係，建議你可以睇返（都話啲專題文好有用），特別係我講嗰10隻ETF嘅部份。部份呢篇文都會用到．個Excel我都Attach 埋

4. 之所以有呢篇文，因為有人問我，有冇可能避開投資中資股呢。「買美股咯」。咁但，上篇文講咗幾隻新興市場ETF，隻隻都有中國喎。咁我有冇方法可以買新興市場ETF，唔去投資個別國家，但又可以唔買中國？（至於咩叫新興市場？睇舊文，都話啲專題文好有用）

5. 答案係，可以的。即係想搵EM ex China（新興市場不包括中國）。預告定，隻ETF就叫EMXC，管理費唔算太貴，正正常常。呢篇文會細講

高盛都話「新興市場」應該踢走中國，係升呢定降級？你自己判斷

6. 相信應該唔少讀者都想避開投資中國，原因有好多，可能係政治上，或者係見近期表現差，覺得將來都差。原因並不重要，但我嘅理由就有些少唔同：因為想分散。你可以留意我嘅持倉（都話啲專題文好有用），都係大約美股五成，港股（即係中國啦下）四成，其他一成咁上下。咁即係，似乎應該戥返勻啲嘅。

7. 不過你背後嘅理由同我無關，事實上好多人都想搵呢種EM ex China嘅東西，所以自然就有人發明。金融人就係做呢啲嘢啦。

8. 與此同時，早排又見到Financial Times 有篇文，講類似嘅嘢，可惜係要訂戶先睇到。亦都可以睇返高盛份報告（免費，唔太長，唔太深），可以話係講中國應該「獨立」成為一個類別，亦可以話講新興市場指數應該剔除中國。

9. 係咪「別有用心」就你自己估，但至少佢係有啲言之成理嘅理由。第一係中國太大，你啲新興市場指數入面，必然好大份係中國，扭曲咗。第二就係呢個EM ex China嘅東西，都仲會相當有吸引力，台灣韓國半導體之類，啲公司亦都夠大。第三，講返當年，日本由泛亞洲指數抽走咗後，對大家都好，日本同埋Asia-ex-Japan都有相當大資金流入，因為投資者各取所需，唔使套餐咁迫你一次要晒。

EMXC 介紹

10. 咁，咪就係EMXC呢隻ETF，詳情你可以上網睇。0.25% fee，亦唔算貴，不過你見規模都極細，AUM16億美金咋下。一日成交億幾港紙，Bid Ask都有啲濶。拎嚟炒就真係唔掂，只能長渣。

11. 渣乜？先睇地方。最多就係台灣。唔好煩，in this context，呢度嘅「中國」不包台灣，但包香港。所以呢個EM ex China就有台灣，冇香港。

12. 第二嘅係韓國，好重要，因為韓國係咪新興市場，就真係唔同指數唔同標準，好煩的。舊文有講。呢隻EMXC有韓國嘅。打後嘅另外你都估到，印度巴西南非之類，冇乜特別

13. 五大重倉持股，你都估到。台積電，三星，之後三間印度嘢。

咁但，EMXC，我仲會拍邊隻？

14. 咁，仲有乜好討論？買啦！對，我會之後每個月買，即日開始，但並不代表我特別睇淡中國（雖然長線都係應該跑輸），主要就係因為分散，樓上所講，我本身已經多香港股。唔好忘記你啲強積金可能都有，又或者你在香港有層樓，亦係 China Exposure，甚至你在香港工作都係。咁應該戥返勻少少。

15. 咁仲有乜討論？上面講分散，但你買EMXC，就全部新興市場啫。咁美國以外嘅成熟市場呢？之前都有啲日本股歐洲股，咁仲想買多啲跟指數嘅ETF

16. 咁即係，EMXC，我仲應該拍邊隻？

成熟市場定新興市場好？有韓國定冇韓國好？

17. 留意上次講Walmart篇文，10隻ETF，三隻係債券嘅，呢篇唔討論。另外仲有隻VB，買美國小型股，好東西，我嚟緊都會每個月買（因為我本身全部係大股！），但亦唔係呢篇討論。有隻ESG嘢，我覺得搵笨，亦唔打算呢篇講。

18. 咁十隻減咗五隻，再加返隻EMXC，就係今日呢個表嘅六隻！（個Excel有得download），陣間我會重覆貼，方便你睇。

19. 講幾樣嘢先，在個Excel有埋ETF.com條link（Column A，呢度我hide咗）。另外，啲五大持股有時係「現金」，我會唔計。仲有，有唔少嘅持股極之極之散，所以可能你睇國家好啲。例如VEA，第二第三係ASML 三星，但韓國荷蘭都唔入頭五。入得五大持股啲公司都大路嘢，版位關係用簡寫或中文，唔知乜嘅自己Google．仲有隻VWO兩格台積電，我冇打錯，佢係又買ADR又買台股，吹脹

20. 另外留意嘅係，韓國特別處理，因為有啲計成熟有啲計新興，我有寫明包唔包。而你見到只要買韓國嘅，三星一定在五大持股入面。所以要唔要韓國，亦差不多等於要唔要三星，至少而家係。

21. 最後留意，個回報應該前幾日的，但分別不大。同埋，呢堆嘢全部都美國上市，美金計價，所以你見到嘅回報已計及咗匯率影響。

22. 首先睇最頂嗰兩隻，VEA EFA，都係成熟市場（留意兩隻都冇美國），國家都係嗰啲。但VEA有韓國，EFA冇。結果點？你見表現都冇乜分別，雖然三星係VEA五大持股，但都只係1.4%，而韓國亦不在五大國家。如果計五年表現，可能VEA管理費平啲都係表現略勝嘅原因。留意，好難話VEA就好過EFA，視乎你想要乜，韓唔韓國，三唔三星。

23. 然後，睇下面新興市場頭三隻，你見，亦係跑輸樓上成熟市場嗰兩隻（留意兩隻都冇美國），差不多所有時段都係。

24. 係咪因為中國拖累？大部份係。你睇最近一年，EMXC都明顯跑贏其他三隻，當然係因為冇咗中國。但你睇五年，EMXC反而係咁多隻（計埋樓上）最差嘅一隻，亦係因為冇中國。所以中國好定唔好，都好難講。你呢刻梗係覺得中國唔掂，但五年後呢？唔好高估自己嘅判斷能力喎

25. 最後做多兩個比較。首先係，睇下VWO同IEMG，差不多都係嗰啲嘢，VWO冇韓國，IEMG有。留意韓國係IEMG五大國家，同樓上VEA唔同，你成熟市場包韓國就應唔會五大，但新興市場包韓國就多數入五大。兩隻收費亦差不多。結果表現點？都唔差太遠，但五年嘅就IEMG略為好啲，有韓國就唔係太差的，至少三星唔係。

26. 咁之後，睇埋IEMG同EEM，差不多完全一樣嘅嘢。唯一分別？就係EEM管理費貴啲。咁你見到，表現真係差啲的。

結論

27. 結論，好簡單，今個月起，除咗現有嘅港股美股月供，仲會加埋VB，EMXC，EFA，「越嚟越多不同股票」。留意之前美股月供已經有VOO同QQQM（即係標指同納指）。

28. 點解係VB，EMXC，EFA？上面已解過個邏輯。VB好簡單，因為我之前全部買大股，想要返啲細嘢，但冇理由自己一隻隻咁買。

29. 至於點解EMXC？咪本身已經多香港中資股，咪搵啲非中資戥勻。咁但，有美國大股美國細股中資股EMXC，仲爭啲乜？咪仲爭成熟市場。

30. 咁點解要EFA唔係VEA？因為，EMXC已經有韓國嘛！所以我揀冇韓國嘅EFA。雖然講真，我估分別真係唔大。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。