ivanliresearch

十月很美好，十一月都多數升。多數啦。Tesla Nvidia 愛馬士SPGI SCI SalesForce新高．Cisco 21年都未回家。標普指數升勢好全面。股份回購大解放．20年前荷里活開始不停拍續集，咩事？Adele係占士邦而BTS係魷魚遊戲，點解？Twitter CEO話超級通脹喎，當真？ (Patreon)

Published:

2021-11-01 18:58:49

Imported:

2022-09

Content

快評幾句—十月很美好，十一月都多數升。多數啦。

大師冇點你—Tesla Nvidia 愛馬士SPGI SCI SalesForce新高

每日一圖— Cisco 21年都未回家。標普指數升勢好全面。股份回購大解放

Good Read — 20年前荷里活開始不停拍續集，咩事？Adele係占士邦而BTS係魷魚遊戲，點解？Twitter CEO話超級通脹喎，當真？

FB Post Summary —　北韓食黑天鵝。蘇豪的最後一夜

1. 去到十一月，歡迎新舊讀者，舊讀者應該都唔少都睇咗超過一年（呢度係舊年八月開始的），多謝大家。

2. 新讀者可能唔知，多數週末我會整篇專題，幾受歡迎的，自己去目錄搵。

3. 但今個星期未有，因為事忙。希望呢兩日會寫返。其實有兩篇主題文想寫，一篇係Big Tech業績（以前寫過類似嘅專題文，呢度），另一篇係講ETF，（係上次講Walmart家族篇文嘅延續）兼順手今個月我買乜。

4. 我估以後可能都每個月寫下我打算買乜，同埋又檢討下上個月啲表現咁，咁我就可以唔使諗題材諗爆頭。留意，每個月寫我會買乜嗰啲文，最後未必會買晒（唔係無限錢嘛），但多數總會買啲，同埋又好少有啲完全冇預告嘅嘢我會忽然買咗。而任何情況下，我買咗股票都會話畀大家知。

5. 今日唔賣廣告，但跟進返，之前有啲註冊咗微牛戶口（詳情睇返舊文），但未完成入錢嘅，我幫大家問咗，佢個活動十一月會繼續，所以請未入錢未完成嘅繼續去做。我未細睇，但個獎賞好似冇變到的。（未開想開嘅，開戶送你1000蚊港紙股票呢度）

6. 預告定，之後微牛就會有新一輪嘅推廣，會在呢度賣幾日廣告。另外，仲有另外幾間券商找我的。嫌廣告煩就快飛吧，有著數齊齊拎。

快評幾句—十月很美好，十一月都多數升。多數啦。

7. 真係得幾句，星期一多數係咁，因為其他嘢寫得多。港股嘅又再跌過，實在冇乜好講，當然我唔會叫你所有錢都買晒美股，買咗港股嘅亦唔係叫你清倉，但你見我新錢都係買美股多。個場太難玩，你神仙都冇用。又，你即管問下啲咩睇圖嘅大師，買港股又贏唔贏到錢？（不過，港股十月都仲有得升）

8. 美股嘅，又再創新高。幾時回？我都唔知。但九月咪回過5%咯，咁你又買咗未？又可能驚嘛。實情，冇嘢驚，又點會跌到5%？又或者掉轉，只要跌到5%，一定有故事可以講的。但呢啲乜乜擔心，好多都係廢話。

9. 好消息係，for some unknown reason（每日一圖有講可能同回購有關），美股一般11月都好強的。

10. 實情呢，美股10月都已經好強，道指升6%，標指同納指升7%，極之咁好。12個月以嚟最好。但你又有冇9月嚇走晒？定又要「確認」見底？定又驚通脹又驚乜而沽走？

11. 講咗無數次，股票嘅嘢好簡單，你長期stay invested，揀啲好股票 —揀唔到就指數ETF算。千萬唔好自作聰明跳嚟跳去。呢個亦係我叫你寫Trade Log（你唔使寫篇文，打幾隻字，甚至錄10秒音都得）嘅重要 — 你睇到自己嘅往績，就會忠實咁面對自己，唔會自欺欺人，謙卑啲。跑贏大市咁易嘅，你啲網友發咗達啦，就算未發達都至少搵到份筍工。市場好似大自然，你冇乜可能同佢鬥的，佢發火前亦唔會話你知，只能順勢而行。幸好市場大多數時間都係對你好嘅，你唔好因為佢發火時嚇走就得。

12. 話明幾句，又寫到咁長，呼。

大師冇點你—Tesla Nvidia 愛馬士SPGI SCI SalesForce新高

13. 有冇留意，呢六隻嘢，同上星期五創新高嘅七隻，有五隻係一樣的？明顯係強勢股。雖然隻SPGI破頂後就回落。呢六隻嘢有乜共通點？都冇乜，但見到冇一隻係FAAMG，幾隻都係二線（FAAMG打後嘅）科技股，亦有舊經濟。

每日一圖— Cisco 21年都未回家。標普指數升勢好全面。股份回購大解放

14. Cisco 21年都未回家—上一代嘅科技股王思科，呢個係極之好嘅圖，好多教訓，但睇你點睇。首先，思科係一間正常嘅公司，並冇爆咗煲，呢廿年嚟，收入純利都係一路穩步升（頂多你可以話唔升得快）。而家嘅收入，係當年10倍！但點解股價未回家？因為個估值，Price to sales，收縮咗九成。你可以有好多演繹，負面睇嘅話，你時機錯嘅，間公司收入升10倍仲要輸錢。但正面啲嘅，「你間公司夠勁嘅，再貴一貴買都可以等到回家」。而to be fair，冇人叫你頂位飛入去下話？根本你過去廿幾年，絶大多數買都係贏錢。但好多人走去最貴時買，因為升咗，個個話好。點避免？你可以每個月買啲，又或者唔好理股價照買，又或者分散咁，唔好買死一隻。只要你唔一注獨贏，就唔使點輸錢嘅。

15. 標普指數升勢好全面—又解下個圖，講嘅係market breadth 市寬，即係量度升勢「全唔全面」。即係乜？即係個市係只係得個別股票升（重磅指數成份股），定好多股票都升。傳統上傾向覺得全面嘅升勢較有說服力，係咪真？遲下研究。呢度係用Advance-Decline Index去度，睇下每日升嘅股票數目，減走跌嘅數目，再累積加上去。咁你見到了，呢浸升勢極之全面，真係合埋眼買都中。

16. 股份回購大解放—個Today係9月尾，但不重要。簡單嚟講，美股公司出業績之前嗰排（幾個星期？冇認真研究），係不能做回購嘅。咁大家都知10月一大堆業績，所以回購停晒。好消息係，而家出晒業績啦，咪可以大手回購咯，又為股價提供支持。可能呢個亦係股市11月12月多數旺嘅原因。不過留意，10月冇回購，美股都仲做得好好

Good Read — 20年前荷里活開始不停拍續集，咩事？Adele係占士邦而BTS係魷魚遊戲，點解？Twitter CEO話超級通脹喎，當真？

17. 20年前荷里活開始不停拍續集，咩事？ — 大家都知「食老本」好搵，拍新嘢冒險，但見1999年之前，荷里活並冇特別多拍續集，係去到1999年開始忽然多。點解？作者就有講。好可能係因為技術成熟，cable TV，又或者係因為當年Phantom Menace（星球大戰魅影危機）嘅成功，畀大家發現可以食老本。

18. Adele係占士邦而BTS係魷魚遊戲，點解？ — 由Adele同BTS嘅「紀錄」講起，到底點樣量度一首歌（或一套戲，一套劇）係咪「成功」？少不免任何量度，都有意無意地偏袒咗某啲類型嘅用家，以前大家消費模式好單一，電視就坐定定睇，睇戲就入戲院，但而家多樣化好多。同呢幾年拗咩無線定Viu嘅收視差不多。因為市場太碎片化，所以好似「好流行」嘅嘢，可能根本唔係好多人聽，只係啲粉絲夠狂熱。又或者，有啲產品嘅文化影響力好大，例如魷魚遊戲，1.3億人睇，好似好多？但你諗真啲，根本每一個國家，都只係極少數嘅人睇咗（可能香港例外），但就真係全世界都講。

19. Twitter CEO話超級通脹喎，當真？— In case 有人唔知，Twitter嘅CEO，同時亦都係支付公司Square 嘅CEO（呢種一條友做兩間唔啦更上市公司CEO嘅情況極少見）。咁一方面，似乎唔應該陰謀論動機論。但又事實，閣下如果相信超級通脹，點解你兩間公司仲拎住100億美金現水？超級通脹喎。所以，行動勝於一切。你發現用呢個準則，可以eliminate 好多廢人，例如話港紙變廢紙嗰啲，你有幾多？將來你出嘅糧，我1蚊換你100蚊。廢紙喎，係咁嘅價啦，係咪？同樣地，如果係超級通脹，你公司唔應該美金出糧啦？至少都應該狂加人工。當然篇文亦有正經咁同你講返點解唔會超級通脹。