Shopify Altria Amazon Apple 業績．Tesla Nvidia Netflix Microsoft SPGI SCI SalesForce新高． 今次就業反彈快過金融海嘯好多。美股逢業績期必升．Greed and Fear 新解。通脹是症狀，唔係病症本身 (Patreon)

快評一堆：Shopify Altria Amazon Apple 業績

大師冇點你：美股倉跑贏大市

大師冇點你：Tesla Nvidia Netflix Microsoft SPGI SCI SalesForce新高

每日一圖— 今次就業反彈快過金融海嘯好多。美股逢業績期必升

Good Read — Greed and Fear 新解。通脹是症狀，唔係病症本身

FB Post Summary —Donki的世界地圖。美國滯脹嘅嘢。微軟成為全球市值一哥。愛馬士新高之輪住上力。

1. 繼續有啲俗務，加上星期四晚已經畀咗篇號外你（講富途）。所以星期四啲美股業績都放到今日講，陣間我會講明。

2. 關於富途，講多兩句。的確，投資者賠償基金，就只賠港股。咁你買美股嘅，美股有另一個機制，有冇富途份呢？我就唔知了，好似係有，但真係答你唔實。咁所以，真係驚嘅，咪轉咯。但本人諗都冇諗過。另外，你可以睇下友版規佬寫嘅嘢，佢肯定唔會係富途打手。

3. 又，有人話呢排啲廣告有啲多，我都收到意見，因為最後截止日嘛，而又真係見到好多人最後一日先走去搞。咁呢幾日就冇再有廣告了。

4. 「壞消息」係，下個月又會有！因為有幾間券商合作。大家準備定錢呀，身份證呀地址證明嗰啲。但我盡量只係頭幾日放文章最頭啦。當然，講到尾，唔鍾意咪快手skip。

5. 週末專題應該會寫返Big Tech業績

快評一堆：Shopify Altria Amazon Apple 業績

6. 首先要講明，好重要好重要，呢堆圖，係星期四晚美股嘅。

7. 另外亦要講明，唔該你去睇返個業績時間表，特別小心係開市前定收市後。我會盡量講明

8. 首先，正如FB嘅文都有寫，Service Corporation International（SCI），愛馬士，Netflix，SPGI呢四隻，都係創咗新高嘅。但呢四間唔係出業績的。

9. 到上面呢一個圖，係成交異動。正係兩間開市前出業績嘅，Shopify同埋Altria（萬寶路美國，美國以外就係另一間Philip Morris）．仲有係再之前一日出業績嘅VISA，繼續大成交跌。

10. 唔使講都知，Altria業績當然唔得。盈利收入都差過預期，調低埋個第四季展望，不過叫做擴大咗個回購計劃。Shopify就神奇，業績應該係唔得的，一樣盈利收入都差過預期，但反而大升，我都真係完全解釋唔到，所以有時都好難捉。

11. 好啦，收市後出嘅蘋果同Amazon，中槍雙雙倒地上。兩間當然都唔得，盤後都大跌。去到星期五晚仲跌緊，但唔算好誇張。

12. 我初步望，蘋果嘅情況就冇咁差，雖然盈利僅僅合預期，收入低過預期，係4/5年嚟第一次。但只係供應鏈拖累，整唔切貨出唔切貨，咁頂多一兩季，之後會好返的。當然我仲係想知佢幾時啲廣告收入會飛升，損晒人，但幾時先利到己？

13. Amazon呢？標題都話你知，badly miss，同預期爭好遠，仲要第四季展望都失望。但留意啲「副業」越做越好，網購其實要蝕錢，但AWS賺嘅錢已經可以夠冚．仲有，佢嘅服務收入（AWS，廣告，Prime），已經超過零售嘅收入。

14. 另外留意，改名嘅Facebook，大升交抽上，股價彈返兩日。之後編號唔再係FB，變咗做MVRS（點解唔叫META？因為有人用咗）。又，嚴格嚟講唔係改名，而係學Google咁，上面整間阿媽Alphabet，下面保留原本嘅主力Google同其他嘢。遲下會同大家再講Metaverse

15. 星期四晚美股真係懶理咩GDP低過預期（記唔記得中國個數據差，之後股市都係反彈幾日），照創新高，

16. 至於本人個倉，繼續都係跑贏大市的，你估咁易？你試下丫。一向都話US3係主倉，我唔會咁茅忽然間又話US2先係。

大師冇點你：Tesla Nvidia Netflix Microsoft SPGI SCI SalesForce新高

17. 唔好意思，有啲混亂，呢度係星期五晚嘅美股．留意到Nvidia Tesla Microsoft 發力了

每日一圖— 今次就業反彈快過金融海嘯好多。美股逢業績期必升

18. 今次就業反彈快過金融海嘯好多。—幾好嘅圖，比較返Prime E-POP，比較返2008年金融海嘯後。咩係Prime E-POP？Prime係指25-54歲嘅人，E-POP就指employment to population，簡單嚟講係類似 就業比率，但只計某一個年紀嘅人。咁你見到，今次疫情下，職位消失嘅速度同力度都極快，但反彈亦都快。只係一年半，呢個比率已經反彈到高過金融海嘯後一年半嘅水平。留意金融海嘯後，用咗10年呢個比率先返返金融海嘯前，即係去到2018年—「之後一年多啲又爆疫情」

19. 美股逢業績期必升—留意呢類東西一定要小心，因為，美股近N年都係長升嘅，所以你揀好多條件都可以見到美股升，例如二月必升，單數年份多數升咁。不過又睇下呢個圖，疫情後呢，又真係見到每次業績期，美股都冇跌過。記唔記得我講過，近幾季啲業績，往往都係勝預期嘅唔多升，但差過預期嘅跌好多？咁點解仲會業績期美股升？畀你諗一諗，括號入面開估 （因為首先，可以係出業績嘅嘢跌，其他升。另外，我指嘅「勝預期唔升遜預期就跌」呢種現象，只係指出完嗰一日啫，以前都見唔少好快就消息，彈返上嚟）

Good Read — Greed and Fear 新解。通脹是症狀，唔係病症本身

20. 兩篇都係非常好嘅文，亦都唔深

21. Greed and Fear 新解。 — Greed and Fear係經典嘅股市用語，傳統就講啲人升又貪心想搵多啲錢，跌又驚輸錢。但作者見到而家呢個年代，Fear應該話係不安（Insecurity），而Greed變咗係妒忌（Envy）．點不安？就係怕落後於人，怕人人有份你冇份，好似傻仔咁（人人贏錢自己冇係好慘的）。但作者寫妒忌更加正，講啲人唔止要贏錢，仲要去令到啲唔同意嘅人感到痛苦，「我一早話咗」「鬼叫你唔聽我講」，原理好似啲球員入咗波贏咗波去對家球迷前面挑釁咁。亦因為咁，好多人承受更高嘅風險，因為「嗰啲咁嘅人都可以有咁嘅回報，我一定可以好過佢」。之後篇文仲有講，以前參與股票嘅只係好少人，而家好多人，仲要人人都可以即時知道你贏錢定輸錢。

22. 通脹是症狀，唔係病症本身 —簡單嚟講，作者認為根本唔會有惡性通脹。右翼認為因為工人要求加人工，然後企業就會加價去維持利潤，最後就惡性循環搞到好似1970年代咁。問題係，而家工會嘅勢力弱咗好多，科技亦都唔同咗，好多人只係零工工作，點睇勞工都唔似有好大議價能力（我同意的）。不過另一方面，有人話係印錢印得多所以通脹？作者亦唔同意，佢認為印錢低息咁多年都冇通脹，點解而家忽然先出現？作者認為通脹嘅原因，正係因為產能不足，而供應鏈又受阻，到重啟經濟，啲貨品需求大升，就整唔切啲嘢了。又，點解產能會不足？另外有人解。正係因為公司要跑業績，完全不能容許有啲過剩嘅產能，一路都係chur到最盡—咁到一場疫情嚟到，就出事了。

FB Post Summary —Donki的世界地圖。美國滯脹嘅嘢。微軟成為全球市值一哥。愛馬士新高之輪住上力。

23. Donki的世界地圖。—冇乜特別，就係比較下全世界不同地方，到底做Donki 白金會員要幾錢，香港就係85000蚊，台北就只係80000台幣。呢啲咪見到消費力差距。新加坡同香港差不多好合理，但馬來西亞都居然同香港差不多，估唔到，只能講馬來西亞會去嘅，應該唔係普通收入嘅人。另外，泰國當然仲低過台灣。不過，日本係高過香港一截嘅，因為個模式唔係好同，你在日本Donki可以買部電視機的

24. 美國滯脹嘅嘢— 昨晚美國出嘅第三季經濟數據都幾差，又有人話咩濟脹，但你見美股係照升不誤的。個世界真係唔係咁運作。油價升又話驚，負油價又話驚，根本人類嘅歷史就係屬於樂觀者的

25. 微軟成為全球市值一哥。—都講咗一排，卒之出完今次業績就發生。而你見我8月嘅文真係話你知，首選係微軟，蘋果同亞馬遜係最唔鍾意的（相對地）。唯獨係Facebook比我預期差。

26. 愛馬士新高之輪住上力。—除咗繼續我嘅係咪要乜乜乜先可以買乜乜乜嘅句式外，亦都畀你見到，個組合啲嘢真係輪住上力，Big Tech回氣咩？就有另一啲嘢補上。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。