富途同老虎嘅嘢，兩個層面去睇—你係客嘅點？你係股東又點？一隻高位跌99%然後升返 百幾倍嘅美股，個名你應該聽過 (Patreon)

微牛開戶最後召集

富途同老虎嘅嘢，兩個層面去睇—你係客嘅點？你係股東又點？

一隻高位跌99%然後升返 百幾倍嘅美股，個名你應該聽過

1. 近排有啲其他事情，打亂咗作息時間，加上樓上樓下鑽嘢（鑽咗半年都有！），所以有時啲出文時間唔多穩定。今日呢篇係美股收市後寫，但焉知非福？今日實在好多嘢寫，根本唔得閒寫港股

2. 呢篇算號外，另外晏啲（如有時間）先再寫埋一大堆美股業績。太長，唔在呢度寫。

微牛開戶最後召集

3. 見我咁勤力亦畀我最後賣多一日廣告。

4. 照舊，極速小廣告兩個。上星期六冇嚟講座，想重溫嘅，呢度訂

5. WeBull開戶送你1000蚊股票呢度。

6. 講座重溫，就應該就快到期（我仲問緊homeblogger）。微牛推廣呢，今個月截。但照計下個月又有新嘢，同埋，下個月仲應該有其他券商。大家準備定錢同啲開戶文件。

7. 仲有，最後一日（星期五），但如果之前微牛開戶有乜問題嘅，PM我，畀埋你個電話同email嚟，我盡量叫客服幫你搞。佢六點收工。

8. 最後提埋，如果你完成開戶同入金，應該就可以買到美股港股。買唔到即係未完成。

9. 咁當你完成後，買一次美股（記住要美股！），就會收到個咁嘅訊息或者email，咁之後你keep 45日就有獎了。

富途同老虎嘅嘢，兩個層面去睇—你係客嘅點？你係股東又點？

10. 先講富途同老虎，主要係富途。唔知咩事嘅，自己睇。當然可能係舊料重炒。我一般都幾老定，甚至過份老定。但，上次講用戶信息，今次就講到無照經營非法活動咁滯，好似都幾大件事。

11. 咁都見有唔少讀者有啲擔心，我就講下。但講明先，非法律意見或乜，唔該咁大個人為自己嘅決定負下責任。我亦都冇同佢地公司嘅任何人近期傾過呢類嘢（除咗我段片第二部份上咗線）

12. 我在富途都有戶口，咁我相信，大家嘅擔心，嚟自兩個層面。第一，富途會唔會有事，你啲貨會唔會有事。第二，富途隻股票又會唔會有事，撈底好定沽咗佢好，呢兩個會係唔同嘅問題，雖然唔係完全無關。

13. 第一個問題（富途會唔會有事，你啲貨會唔會有事）簡單啲。TLDR嘅：唔使咁擔心。

14. 官方就當然話公司穩健，但，唔通話你知會爆煲？唔會的。我唔係話佢會（我亦相信唔會），但公司本身講乜係可以不理。另外，理論上，你啲股票，係放在第三方嘅。但，證券公司出古惑，亦唔係冇試過（雖然而家應該少咗好多）。再強調，我唔係話佢地會，但，「最壞打算」嘛

15. 之但係，講到「最壞打算」，間嘢真係爆煲/倒閉/執笠嘅，「都唔使極擔心」。因為，原來好多人唔知，香港係有投資者賠償基金嘅。有人問係咪好似存款保障咁？有啲類似。但係唔同嘅嘢。

16. 詳情？自己睇。非法律意見，但，講得簡單啲，照計證券行執笠，你啲貨唔會血本無歸，有得賠，上限50萬港紙。

17. 所以短答案係：如果你唔夠50萬貨嘅，真係唔使點驚。雖然，搞到要拎投資者賠償呢，就當然要搞一輪，又填下表又等下咁，政府嘢嘛。如果你唔在香港就再煩啲。

18. 咁所以，掉返轉頭，唔放心嘅，咪轉走咯。你唔好以為我係富途打手先得架。但講真，用銀行你又覺得貴同唔方便啫。總有取捨。或者你唔鍾意中資嘅，咪用外資嘢IB之類（我都有），或者土炮。但我見連登仔同新一代早早個個用富途喎。

19. 咁你話係咪最好每個倉唔好超過50萬？Well，視乎你有幾「驚」。答你唔到，咁有啲讀者肯定一千幾百萬身家，我估唔會開廿間下話？

20. 又去到另一極端，如果你覺得個賠償基金都係搵笨實嘅，香港政府都係昆你嘅，咁就冇乜好討論啦，你啲錢唔應該放銀行添。

21. 最後，講埋我個情況。大家都聽過我有很多倉，香港去到HK5，美股都係去到US5（多得呢期開咗兩個微牛）。但可以話你知，除咗最大嘅兩個倉HK4同US3（我一直都咁講的），其他係全部唔超過港幣50萬。當中亦都包括富途—我指富途戶口我都唔超過50萬，照計你都計到，以前貼過。

22. 但我係咪刻意的？唔係，只係呢一年先開始冇返工，先開得多戶口（以前好煩的）。

23. 咁，我HK4同US3最大兩個倉，當然超過50萬。但放邊？都好似貼過，以前買落，在匯豐的。係架，又貴又唔方便，但以前買落啦。

24. 最後一提，再講多次，非法律意見，唔該你自行思考。我近期絶對冇同富途傾過呢啲嘢，我亦唔使幫佢地維穩。但，我在富途啲嘢都冇驚過，亦唔會轉走。當然我係唔過50萬嘅

25. 最最最後，以上嘅嘢，你同意又好，唔同意都好。唔該唔好轉貼，免得我惹麻煩。可能你用意係好，但真係自己睇好了，唔好走去cap畀人。陣間又有人話我幫富途維穩呀乜鬼，至撚憎呢啲是非。

26. 好啦，第二個問題（富途隻股票又會唔會有事，撈底好定沽咗佢好）。短答：唔好咁爛賭啦。

27. 咁又真係，上次已經有讀者衝入去。今次亦都有（呢張圖係今次的）。

28. 咁正如你見到，呢位朋友就已經執咗啲，應該係佢本事。但我就不了

29. 事實上次爆鑊時我都有寫文，我就梗係兩隻都唔買。而你見到，而家兩隻嘢股價，都係低過上次爆鑊時。當然中途好似有反彈，你捉到係你叻仔

30. 另外你留意，星期四，兩隻都係低開高收嘅。睇走勢，就唔似爆煲。

31. 不過having said that，大佬呀，唔會爆煲，唔等於之後會升嘛（睇下中資銀行？）。會升亦不等於你買嘛，你買亦不等於要瞓身嘛。

一隻高位跌99%然後升返 百幾倍嘅美股，個名你應該聽過

32. 順手講講，你見兩隻嘢高位都跌咗超過七成。仲要個市係好的。點講呢？雖然我唔止蝕亦唔介意捱價，唔少公司我買完即跌，一兩成都有。但你見我買嘅公司，真係又唔會跌到咁的。我一個諗法，就係啲真係好嘅公司，你跌到三四成，點都有大資金飛入去撈啦。

33. 當然極端嘅咪阿里巴巴 騰訊，高位跌一半，或者2018嘅蘋果，都跌咗三四成（騰訊當年都跌一半）。但，都只係五成啫。況且，當時個市仲要差。

34. 咁你話，唔係喎老細，你啲YALA同WISH都唔止跌七成。咪就係錯誤咯！但幸好我係買得細嘅。

35. 我都有啲唔係好知想表達乜，但大約係：我買嘅公司，有一定護城河嘅公司，照計真係唔會個市好地地都跌七成。兩三成正常，但七成好似好誇。

36. 你諗下，富途老虎之類生意模式，實情只係鬥燒錢，同埋鬥快，鬥抄（你睇華盛 微牛 USMART都係咁抄），呢啲公司，難啲長期賺錢下話？RobinHood都唔掂啦。

37. 當然，比兩個反例你。可能有人會記得，Amazon，經典。科網爆煲時好似跌90%，然後升返幾萬倍。

38. 但你都大約可以理解，嗰時真係大泡沫嘛。況且，Amazon嘛，萬中無一嘅股王。

39. 但接下嚟呢間公司，以前Facebook寫過，先真係神奇頂級超卓，睇到我懷疑人生。大名，但唔係科技公司

40. 登登，就係CROX，冇錯係膠鞋CROCS

41. 經Q典，金融海嘯時，70蚊跌到1蚊（你冇睇錯）。輸98%。但而家？係156蚊！「止蝕嘅一定唔揼心口」

42. 你話，金融海嘯百年一遇？「咪證明百年一遇先應該買貨」。我扑中一隻CROCS，夠輸幾十隻total loss

43. 仲有，疫情下，佢一樣高位跌75%！42蚊跌到10蚊，強調返，而家156蚊，一年就十幾倍。當然你捉唔到個底，但真係見到，我一隻好嘢，可以頂好多衰嘢。

44. 咁但，呢啲公司，萬中無一啦。我就都係完全唔會諗住買富途同老虎，我都已經好多股票想買，好可能買到死嗰日都未買完。正如我Amazon上面想買嘅書，根本死之前都睇唔晒。唔止，我屋企嘅書都應該夠我睇到死。我想睇嘅戲，都係死之前都睇唔晒。想去嘅地方，亦都死之前去唔晒。

45. 所以，真係冇辦法kiss all the girls，雖然我已經好努力。「或者你買SPY QQQ 甚甚至羅素2000指數咪當自己全部有份」

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。