中概股除牌？又如何？我買咗……Twitter．Microsoft Google SalesForce 新高．上次科網爆煲時乜嘢跑出？股票回報由乜決定？十張相就可以預測股市。根本冇「懶人」呢回事。 (Patreon)

快評兩句：中概股除牌？又如何？

我買咗……Twitter

大師冇點你—Microsoft Google SalesForce 新高

每日一圖— 上次科網爆煲時乜嘢跑出？股票回報由乜決定？

Good Read — 十張相就可以預測股市。根本冇「懶人」呢回事。

FB Post Summary —　Tesla 一萬億市值。我部GD90。SPGI新高。

1. 好咯，今日每日一圖同Good Read寫得夠多字，咁呢度正文寫短啲。

2. 但，首先，廣告兩則（極速講）。上星期六冇嚟講座，想重溫嘅，呢度訂。

3. 仲有，微牛活動送1000蚊股票嘅，應該最後呢兩日，用呢條link去開。搞唔切嘅，我就真係唔知會點，可能十一月有，但亦可能冇，唔敢講，問公司先知

4. 另外，唔止一個人PM我，話入條link開唔到戶，收唔到驗證碼。我估係佢地系統維修或神咗，你今日再試過吧。我會將啲資料問返佢地客服，但講真，唔好有乜期望，何況客服六點收工，但我往往瞓到三四點。所以之前都叫大家盡量快手，唔好拖到最尾有意外（但我有口話人冇口話自己，我好多時都會咁）

快評兩句：中概股除牌？又如何？

5. 大市嘅，唔係太多嘢講。港股係差的，講點數只係跌400點，成交又細，唔誇張，但啲中資科技股又跌過，係令人驚的，心諗係咪又嚟過？但，大陸方面嘅消息唔多，反而係美國嗰邊話中電信釘牌呀，或者中概股除牌之類。所以星期二晚中概股急跌，我都冇特別留意。講真，冇乜新意？甚麼中移動嗰啲，今年照樣做得好好，唯獨最驚就係本身冇在香港上市，又唔夠大嗰啲，就自求多福。咁你見到，去到星期三晚，啲中概股都回穩。

6. 美股嘅，高位回啲，個別股（Microsoft 同 Google）咪做得好，但表現幾分化的。

我買咗……Twitter

7. 咁順手講埋，Twitter 原本業績好似OK，盤前都升，但到常規時段大插10%（我以為睇錯添）。好簡單，我就低位買埋。之前都話買，咁升固然買，跌亦都買，當幫Facebook買個保險。

8. 又，你見到了，我係用微牛買的，埃汾太個帳戶，即係我一萬蚊買咗SNAP，一萬蚊買咗Twitter，「兩隻都輸緊錢」

大師冇點你—Microsoft Google SalesForce 新高

9. 昨日寫業績寫過，不再多講。但，二選一揀邊隻？甚至乎，如果呢個位FAAMG五選一我揀邊隻？當然我係唔會揀一隻（我五隻都有），但三個月前都寫過，你拎支槍指住我只準買一隻嘅，我揀Microsoft，因為啲業務冇咁惹火，比較能持續。

每日一圖— 上次科網爆煲時乜嘢跑出？股票回報由乜決定？

10. 上次科網爆煲時乜嘢跑出？—原文WSJ，好睇，但要畀錢。篇文首先講一個常識，股市見底反彈時，多數都好快手又大力（望下2020年3月尾？）。但見頂回落時，就多數係慢慢，溫和咁跌，仲要係個別類型嘅嘢先跌。咁例如，2000年科網泡沫時，啲科技股死晒，但乜嘢股跑出？你估到了，就係價值股，同埋小企業。留意篇文冇講，但仲有就係新興市場。短期嘅，一兩星期嘅，全世界一齊跌好合理（2020年2/3月咪係），但長期少少嘅，好少會全球每一度都熊市，啲錢總會搵地方去鑽。所以，你見到分散係幾咁重要。BTW，你可以認真諗下，週末專題講嘅一啲ETF（都話環環相扣好有用！）。唔好買晒港股美股，諗下歐洲日本呢啲，好多人都聽過。但，我反而特別有興趣隻VB，美股small cap，分分鐘我下個月會開始每個月買啲—點解？因為你應該留意到，我買親都係大cap．就係應該戥返勻啲。

11. 股票回報由乜決定？—最簡單嘅答法，有人買咪升。而我最怕啲識少少扮代表嘅人，講「一切都係供求」。因為，呢句等於廢話，等於冇答過。點解理文化工會升？因為多人買咯。咁點解會跌？因為冇人買。發唔發現根本冇任何內容？你唔同意都好，一般股市長線必升，原因係因為企業盈利升。企業盈利點解升？因為通脹，同埋生意嘅擴張。咁但，大家都大約知，市值＝純利X市盈率（或者 股價＝每股純利X市盈率），咁明顯有啲股票，盈利冇乜升好多，但個估值升好多。亦有啲公司純利一路升，但估值一路跌，最後股價要跌（例如中資銀行）。咁估值升同盈利升，邊個因素重要？呢個圖畀你見到，過去10年，美股嘅回報，當中只有20個百份點係嚟自市盈率擴張（即係指數升咗337%，有71%係嚟自市盈率擴張）。剩返嘅？30個百份點嚟自每股純利增長。咁仲有50個百份點呢？有趣，嚟自派息，同埋回購—但，當然你要有盈利先有派息同回購啦。咁但同時，低息環境幫到回購好多，啲公司可以加重負債，借錢回購。你見到，回購佔咗40個百份點，派息只係10個百份點，亦同稅務有關。

Good Read — 十張新聞圖片就可以預測股市。根本冇「懶人」呢回事。

12. 十張新聞圖片就可以預測股市—聽個題好吸引，但，你睇咗咁耐文應該知道，越係聽落吸引嘅越流，邊有咁著數嘅嘢。我睇唔到成份論文，但如果你係大學生或教職員應該睇到（或者返大學圖書館都得）。個故事話，睇啲新聞圖片，分析啲人嘅樣係股災死老豆咁款，定係大奇蹟日咁嘅樣，就睇到投資者情緒喎。聽落，係極之咁流。首先，扯，使鬼睇相咩，睇新聞係咪寫股災咪得。另外，我都一早有諗過，你睇幾時股市會上報紙頭版，就知一係極亢興，一係極恐慌。咁佢地話，用圖片好啲喎，因為冇咗語言隔膜，吹脹，而家機器翻譯呢啲有幾難？又唔係要你譯小說。仲有，度度都有英文媒體啦，你去到咩扎伊爾股市又who cars？而亦一早有人用呢啲方法，睇社交媒體啲貼文去睇情緒。但全部都係同一個問題：講就易，事後你去backward test梗係得，但例如2008金融海嘯，2007年已經股災啦，2008年3月貝爾斯登都爆埋煲，夠恐慌未？但好戲在後頭嘛。最後，係最簡單嘅哲學問題：套嘢真係work嘅，你幾條友就唔係在澳大利亞寫論文啦，發咗達啦。

13. 根本冇「懶人」呢回事—又係學術嘢，文唔長，但用嘅經濟學術字眼較多，讀過下經濟嘅去睇會易啲明。就係話你知，「懶」呢樣東西，唔存在嘅，至少你不能在經濟學研究之中去量化，或者當係一個變數。因為「懶」呢樣嘢嘅定義都好含糊，總之其他人唔返工就懶，我本人畀人炒咗日日在屋企寫Patreon就係好勤力。我鍾意作者提出咗「薛丁格的移民」呢樣嘢（典故係「薛丁格的貓」，物理學嘅嘢）：一方面啲人覺得新移民正懶蟲，但同時間啲人又會覺得佢地搶你飯碗，見到矛盾未？根本係龍門任你搬，你唔鍾意嘅，咪懶。所以話呢樣嘢不能量化，不能去拎去做經濟模型（留意，好多你以為不能量化嘅嘢，其實可以，例如想睇下靚女買叉燒係咪會斬多啲，叉燒幾重有得量化啦，但靚女呢？當然可以。你咪會幾十個人，去幫你呢班叉燒女外表評分。外表美醜未必有絶對標準，但唔係絶對冇標準，你搵一百個人，總唔會大多數都覺得我靚仔過吳彥祖）

FB Post Summary —　Tesla 一萬億市值。我部GD90。SPGI新高。

14. Tesla 一萬億市值— 如題，Tesla成為人類史上第8間1萬億美金市值嘅公司。如果你唔計沙特阿美就係7間。減埋2007年曇花一現既中石油，就得返6間。冇錯就係FAAMG + Tesla，而呢一刻Facebook 連9000億市值都冇。呢個Post幫你重溫歷史，以及睇下下一間再入會嘅係邊間。留意，股票都係升多跌少，FB會入返會，我唔會太意外。數落嘅，Nvidia似最有機會，仲有巴郡，升得唔快但夠耐力，大陸放鬆監管嘅，騰訊阿里巴巴亦未必唔可以打入去。

15. 我部GD90—半玩嘢之作，見有個FB讀者留言（應該唔係Patreon讀者），話我呢個「我係咪要XXX先可以買XXX」嘅句式too much．我心諗，關你春事。唔鍾意嘅，唔好睇。結果我寫隻Panasonic，就只係講我當年在英國用呢部電話去見工嘅故事。當然如果呢個讀者有訂Patreon，睇到呢句，就我同你道歉。畀錢嘅讀者就可以有意見，公海免費仲多多事實就當然令人厭惡。

16. SPGI新高— 一樣，之前六隻股票創新高，我就唔再講使唔使做工程師先可以買Nvidia，就講隻SPGI。同場加映，十居其九嘅企業收購，都係買貴貨的。原因好多，但首先你想橫刀奪愛，當然開個不合理嘅價錢先有人理你。另外，CEO一般好大喜功，傾向do something，衰咗大不了畀人炒，有股東一齊輸錢。贏咗嘅流芳百世，搵份好工，之後一路做大師出書指點江山都仲得。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。