美股業績一堆：Facebook，SPGI，VISA，Microsoft，Twitter，Google．理文化工兩日升27%，升乜？追唔追？買咗又點算？Webull 我已完成開戶 入錢 仲買埋美股 仲潛埋水 (Patreon)

美股業績一堆：Facebook，SPGI，VISA，Microsoft，Twitter，Google

理文化工兩日升27%，升乜？追唔追？買咗又點算？

Webull 我已完成開戶 入錢 仲買埋美股 仲潛埋水

1. 呢篇應該係星期二晚嘅，實在太累好早就瞓咗，文都遲咗出。不過有遲到冇走數啦。

2. 預告定，下個月仲會有其他券商合作，有閒錢可以準備定，唔使咁快買貨住。仲有得拎優惠。

3. 極速小廣告兩個。星期六講座已完成，如果冇去到嘅，可以網上重溫，價錢一樣，呢度報名。而家已經有得重溫。

4. WeBull開戶送你1000蚊港紙股票呢度。詳情睇返舊文。我自己都開咗，下面會細講。留意有幾十人應該註冊咗但未成功開戶，要呢幾日內搞掂了，月尾就冇。如果搞唔掂可以PM我，有啲奇難雜症可以試下幫你問客服特快搞。但記得畀晒你開戶嘅資料（電話同電郵）畀我）

5. 下面會詳細講Webull，但講咗正經嘢先

美股業績一堆：Facebook，SPGI，VISA，Microsoft，Twitter，Google

6. FB Page貼咗，呢堆嘢創咗新高，但整體美股只係普普通通。留意Tesla高位蒸發返7%升幅。

7. 美股方面，一大堆list 上面嘅公司出咗業績，只能快講，留返週末詳細講。另外，請善用Zacks呢個calendar，可以跟市值去排。同埋特別留意係amc定bmo，開市前定收市後出。

8. 首先係Facebook，留意係星期一收市出。Snap業績後大插，多得iOS私隱設定，當時都提過，成堆社交媒體股都大跌，Facebook當然都不例外。Facebook出嚟嘅業績，都係算麻麻，亦係受iOS影響，只得盈利高過預期，收入差過預期，當然下調第四季指引。但星期一收市盤後反而係升，好可能因為宣佈咗大手回購，同埋之前已跌。點知到星期二常規時段再要跌4%。現價我就覺得麻麻地，唔貴，但真係睇下新增長點在邊（VR？Metaverse？）

9. 其他嘅，快講。特別留意SPGI係開市前出嘅，咁你見到升4%，去到歷史新高。呢隻係得意之作之一，都唔少讀者有跟。故事可以睇舊年，公司點搵錢早排都有寫過，盤生意相當暴利下。今年就升40%，相當不錯，平時冇乜新聞，波幅亦唔大，陰啲陰啲升上去。另外FB Page都有提，最初我買完，又係跌10%（仲要嗰期個市唔錯），唔通我又去「止蝕」？

10. 仲有，另一隻non tech嘅VISA，收市後出，加派息17%。不過盤後要跌3%，未認真睇點睇，今年股價都麻麻地。

11. 科技股嘅，首先講我冇買嘅Twtter．收入連續四季超過10億，按年升37%，似乎市場幾滿意，盤後升4%，公司話iOS對收入嘅影響較預期低．好可能今晚會買些少，1萬港紙咁大把。你估到了，係我幫埃汾太開嘅微牛戶口。實情買呢隻同Snap，亦可能係Facebook落難受惠股，雖然我懷疑即使啲人唔用Facebook，都唔會益咗呢兩間公司。

12. 然後兩間Big Tech，兩間我都有買嘅，兩間都唔錯。先講Microsoft，相當強勁，收入增長22%，7年最勁。留意Azure嘅增長放慢，但主要因為匯率，唔及匯率因素仲有增長。一般投資者都係唔會睇匯率影響，因為公司一般控制唔到。呢樣在舊文講LVMH已提過（拿，全部都係環環相扣的）。盤後股價有得升2%，分分鐘可以挑戰蘋果成為全球最大市值嘅公司。

13. 最後係Google，收入同盈利都勝預期，收入去到651億嘅季度新高，按年升41%。公司講話iOS對YouTube廣告有部份影響。盤後股價反而要跌，但今年已經升咗60%

14. 提返新讀者，好多呢啲公司，我都有個Excel玩。FAAMG同埋NTSTP（個名我作的）就固然有，LVMH BlackRock之前貼過，SPGI都有的。稍後會update．

理文化工兩日升27%，升乜？追唔追？買咗又點算？

15. 另外想講，理文化工746呢兩日又再開車，兩日升咗27%。原因？全無特別，只係公司出咗個自願公告，在江西瑞昌化工項目甚麼。

16. 想講嘅係，江西瑞昌，好耐的了。有幾耐？耐到我都去過，2014年11月嘅事。但今次應該係新一幅地（又，500畝先5000萬人民幣，可見啲地幾咁唔值錢）。

17. 當然呢排因為Tesla強勢，成堆電動車相關嘅嘢都升晒上嚟，亦包括埋電池，甚至電池相關嘅嘢。之前東岳189升到癲，亦係因為做PVDF。理文呢個廠亦都係PVDF（之前都有做）。實情佔收入唔會好多的，我甚至覺得公司打蛇隨棍上主動公佈，等個股價炒上去。會唔會之後批新股？唔知呢，但實情公司從來都冇發過新股！咁多年都冇。全部靠內部資源，或者借銀行錢（但當然大股東有stock option，之後會行使）

18. 咁而家點？追就梗係唔好，原本已有嘅，我都建議沽一半先，照計你應該差不多食緊100%嘅profit，沽一半後你啲嘢就零成本，慢慢睇戲。「鍾意可以去股東會食嘢」。咪講笑，N年前佢地股東會在尖沙嘴麗晶大賓館（Intercon），有自助餐食的。

Webull 我已完成開戶 入錢 仲買埋美股 仲潛埋水

19. Webull方面，正如上面講，有幾十人註冊咗未入金的，如果有咩搞唔掂可以試下問我，有啲問題可能可以「特批」。記住月尾就截，即係今個星期五，最好快手入埋10000蚊。買美股就唔使趕，45日內就可以

20. 另外都講返，你見我自己都有開（自己refer自己！），亦都入埋錢，買埋隻SNAP，「潛埋水」。但真的，至少我自己都開埋一份，盡量希望自己都試過先refer畀你地。

21. 你見到我買完之後，就收到個email確認完成咗的

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。