匯豐業績，Paypal又話唔買Pinterest，Tesla一萬億市值， Tesla Netflix Nvidia JP Morgan新高。垃圾倉升到癲。全球股市市值大過GDP，好多人研究智利烏干達，NetFlix未來在邊？點樣可以快手成為CEO，市場係咪一定啱？言論自由嘅弔詭 (Patreon)

快評兩句 — 匯豐業績，Paypal又話唔買Pinterest，Tesla一萬億市值，

大師冇點你— Tesla Netflix Nvidia JP Morgan新高。垃圾倉升到癲。

每日一圖— 全球股市市值大過GDP，好多人研究智利烏干達，NetFlix未來在邊？

Good Read — 點樣可以快手成為CEO，市場係咪一定啱？言論自由嘅弔詭

FB Post Summary —勒到呼吸困難才知變扯線木偶。竊聽者。Donki試食活動．Panasonic 大升。Tesla 1000蚊

1. 週末出咗篇專題，講全球最有錢家族買嘅ETF，反應幾好，記得去睇。

2. 今日內容極多，所以廣告快手講，嚟緊仲會有其他券商合作，有閒錢可以準備定，唔使咁快買貨住。拎優惠。

3. 極速小廣告兩個。星期六講座已完成，如果冇去到嘅，可以網上重溫，價錢一樣，呢度報名。留意星期二先有得睇。

4. WeBull開戶送你1000蚊港紙股票呢度。詳情睇返舊文。我自己都開咗，仲已經完成 註冊—開戶—入錢（1萬港紙）—交易 四部曲。記得你今個月內要入埋錢，交易就可以唔使趕今個月內，45日內可以。

快評兩句 — 匯豐業績，Paypal又話唔買Pinterest，Tesla一萬億市值，

5. 極速講，幾單值得留意嘅嘢，匯豐業績相當唔錯，仲會啟動20億美金回購，但股價反應唔算大。一早升晒啦，今年升15%，大幅跑贏大市的。又話咩恒大爆煲，扯。

6. 另外，Paypal又話唔買Pinterest，十分兒戲，我Facebook同ig都有講。但係咪之前路透社流料？我諗又唔係，咁當中真係好多空間嘅，有機會係因為漏咗料所以唔買，亦可能真係未傾到成事，可能只係好初步，甚至可能係公司見出面一面倒負評而縮手，好多原因。

7. 當然仲有，萬眾注目嘅Tesla，差不多一千蚊，一萬億美金市值，第六間打入four comma club，引爆點係租車公司Hertz會大手買10萬架車，差不多等於Tesla一季出貨量嘅四成。故事教訓？好簡單，舊年我短炒一轉Tesla後，都只係食咗一半先，冇沽晒，否則就好後悔。真係要take profit，都可以用呢個零成本方法。

大師冇點你— Tesla Netflix Nvidia JP Morgan新高。垃圾倉升到癲。

8. Tesla Netflix Nvidia JP Morgan新高就不用講，留意呢期都係啲二線科技股（FAAMG以外嘅）比較強，都講咗一輪

9. 仲有，垃圾股先真係升到癲，跑贏晒啲指數，搞到我懷疑人生，實情係咪完全唔使理間公司做乜，聽冧把好過？

每日一圖— 全球股市市值大過GDP，好多人研究智利，NetFlix未來在邊？

10. 全球股市市值大過GDP—呢個股市市值／GDP比例可能唔少人聽過，有個別名叫畢菲特指標。首先留意，呢個係全球，你睇唔同地方比較冇意思，例如香港，新加坡，瑞士呢啲金融業發達嘅地方，個股市會係GDP嘅好多倍的（香港仲要有大陸公司上市喎），個比較根本唔公平。二來，我自己認為，將股市同GDP比，本身都有問題，一個係flow，一個係stock．三來，呢個比例，到底係咪會迴歸平均值？定根本過去幾十年有結構性改變？印咗好多錢喎。

11. 好多人研究智利烏干達—講Journal of Economic Development，研究智利嘅論文，不成比例地高，當然係調整返唔同國家嘅人口。點解會咁？首先係呢啲地方高增長。但另外，亦因為地理上（智利墨西哥近美國），仲有語言（烏干達用英文，甚麼布基納法索就唔會有人寫的）

12. NetFlix未來在邊？— 以前都提過，呢個圖更加明顯。北美已經飽和晒，新增長一定係其他地方，主要就係亞洲。就係印度，菲律賓，孟加拉，印尼，巴基斯坦，越南呢啲。

Good Read — 點樣可以快手成為CEO，市場係咪一定啱？言論自由嘅弔詭

13. 點樣可以快手成為CEO—應該有人睇咗做「點樣可以成為快手 CEO」。講返，乜嘢係做CEO嘅捷徑？固然你可以好多意見，但人地真係有研究，追縱啲人十年，睇佢地做過乜。好多人以為係傳統名校，讀個名牌MBA，搵間勁公司，然後扶搖直上。但實驗見到唔係，最常見嘅方法，係啲人會在職場做啲好大膽嘅決定。例如乜？例如大公司轉細公司（或者高低轉低位），或者做一份明明自己都未準備好嘅工作，又者，執人蘇州屎收拾殘局。你諗真啲，實情呢啲先係好方法，人地唔敢做嘅你去做，先上到位。

14. 市場係咪一定啱？—首先你要諗下，「市場冇死錯人」呢句嘢其實係咩意思。又係Charlie Bilello嘅文，入面舉嘅例子唔深，好多你都聽過，主要就係一啲人人睇死間公司（或行業）然後大反彈嘅例子，或者係人人睇好最後齊齊出事嘅例子。講到尾，資產市場一定係炒預期，而一般都係 Greed and Fear，升時升過籠，跌時跌過籠。佢教你點去應對，就係用re balancing，但會涉及同全世界對著幹，人地升時你沽，人地跌時你買，可以好痛苦。我原本唔多同意佢做法，但諗真啲都係異曲同工。我唔會走去沽走啲好似泡沫嘅嘢，但我會將啲新錢放其他地方咯，咁都係拉勻咗的

15. 言論自由嘅弔詭—非財經嘢，文章觀點我亦唔完全同意，但值得諗下。首先，乜嘢叫「言論自由」？你發現唔同嘅人，有好唔同嘅理解。當然好多人都係十分虛偽，自己贊成嘅言論咪有自由，啲仆街人渣講嘅嘢就唔應該存在。但，言論自由唔係保障你同意嘅言論，係保障你憎嘅言論。如果十分學院派嘅講法，好簡單，言論自由只適用於「公權力」—即係，政府唔可以因為你講嘅嘢而收你監罰你（但留意，好多國都家都有hate speech law，我認為係違背言論自由的，另外仲有經典嘅「戲院叫火燭」，或者刻意造謠有冇犯法，誹謗人又有冇犯法之類，遠比你想像中複雜。）。公權力以外，應該係冇呢回事嘅。亦即係，你公司當然可以因為你講嘅嘢（包括你放工講嘅嘢）唔啱聽而炒咗你，我可以因為唔鍾意你嘅言論而杯葛你叫人唔好幫襯你。但，如果係Facebook呢？封殺佢唔同意嘅言論，有冇違反言論自由？我係認為冇的。當然你唔一定要同意我，旨在大家思考。例如篇文，實情係講英國，保守黨當然唔會搵個意見相反嘅人去佢地論壇講嘢，大家唔會講得有問題。但，如果係公營機構呢？例如BBC。又或者係公務員呢？suppose係中立。但作者認為，係唔應該畀厭女，恐同，種族主義嘅人利用呢啲平台講嘢。係咪呢？到底咩係「言論自由」？得閒再思考下

FB Post Summary —　勒到呼吸困難才知變扯線木偶。竊聽者。Donki試食活動．Panasonic 大升。Tesla 1000蚊

16. 勒到呼吸困難才知變扯線木偶 —係兩星期之前一篇，「我的快樂時代」嘅續集。但應該有人發現，我上星期咪已經寫過篇續集。點解會有兩篇一樣嘅續集？我老人痴呆？不，實情兩篇係有小小唔同的。故事係我之前寫完篇文，部機死咗，結果要由頭寫過篇，就係你見到嘅第一篇。但後來唔知點解，篇以為死咗嘅文，又再復活，咁當然唔好嘥，貼多次。然後仲衍生埋下面呢篇。

17. 竊聽者— 呢篇就係因為上面個故事（我篇文死咗又返生）而寫嘅文。你可以留意，即使篇文我由頭寫過，同最初版本都唔爭好多。因為都係我寫嘅，同埋，我會有啲關鍵字儲起咗。同場加映，就真係講返呢套戲，講下創作嘅敍事技巧。

18. Donki試食活動— 非廣告，就係我試食Donki迴轉壽司。好唔好食？話好好食呃你，但咁嘅價位，算係咁啦。同場加映，講KOL marketing 呢樣嘢。最難得嘅係true fans，一啲真心崇拜你品牌嘅人，佢地就係最好嘅廣告。十分幸運，我都有true fans，多謝大家先

19. Panasonic 大升— 冇乜特別，又介紹返，本人嘅日本股倉，係跑贏日經指數的。得四隻之嘛，Z Corp（即係Yahoo Japan同埋LINE），Mizuno，樂天，同埋Panasonic，下個月應該會再加兩隻。

20. Tesla 1000蚊—留意我都係用嗰句「使唔使要XXX先可以XXX」嘅句式，但每次都有啲唔同。今次你留意返，所謂「知識」，都有唔同種類嘅。唔一定話邊種高質個邊種，但投資要嘅「知識」，同好多人以為嘅「知識」，係唔一樣的。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。