全世界最有錢嘅家族買乜股票？就係ETF (Patreon)

全世界最有錢嘅家族係……？（趕時間可skip）

全世界最有錢嘅家族買乜股票？就係ETF

逐隻ETF討論

啟示一堆

1. 極速小廣告兩個。星期六講座已完成，如果冇去到嘅，可以網上重溫，價錢一樣，呢度報名。留意星期二先有得睇。

2. WeBull開戶送你1000蚊股票呢度（披露返，我都有得分錢）。詳情睇返舊文。都有唔少讀者開咗，我都開埋，有錢齊齊拎。記住今個月內要完成註冊，開戶，同入10000蚊。買美股就唔使趕住今個月，45日內都得

3. 新讀者未必知，每個星期六日我都盡量會寫篇 周末專題，一般係一個課題，深入講，好多時係啲基本嘢，心法嘢，big picture嘢。花費時間極多，但因為廣受好評，所以盡量都每個星期做，即使呢個星期六開咗seminar，比較忙，都會照做

4. 我知道好多人平時未必有時間日日睇晒我寫嘅嘢，快睇亦可以，或者有時你冇買隻股票，就唔關你事，唔睇都得。但，至少你應該去睇晒啲週末專題。目錄嘅Page有，好多基本問題，都在入面有答案。

全世界最有錢嘅家族係……？（趕時間可skip）

5. 首先，全世界最有錢嘅家族，係邊個？如果有朋友答你（或者你以為）甚麼羅富齊家族嘅，er……我只能叫你睇少啲《貨幣戰爭》，睇少啲陰謀論。之前成日有讀者問我，點樣分嘢文章或資料嘅好壞，呢個係大學問。但，如果你個朋友或個KOL當呢本《貨幣戰爭》係聖經嘅，基本上你就可以對佢講嘅嘢打個三折，甚至更多。

6. 固然，陰謀論者常用嘅論調就係：你點證明冇？你點證明唔係？但，唔該文明些少。你一開始信奉呢種「你點證明冇」嘅思考，保證你個人就會退步。但凡咩滿口Deep State 共濟會嘅人，遠離為妙。

7. 講返今日嘅課題，冇錯，有錢人嘅身家，好難量度。但大佬呀，好難量度唔等於冇個譜，唔等於唔可以去估。固然多數都係估低，但至少我地有一個比較好嘅標準。所以你唔可以因為咁，就話啲富豪排行榜「冇用」，「唔準」。否則你可以話譚仔個老細有錢過Elon Musk，咩呀，人地在雲南收埋幾億噸黃金呀，又要話你知？「你點證明冇？」

8. 另外，人地對於乜嘢叫做「家族財富」，有一個定義。所以你見呢啲List 上面，唔會有Elon Musk，雖然佢一條友嘅身家應該已經有錢過以下任何一個家庭，「我自己計一個Family得唔得？」。唔得。同樣地，你見香港嘅，只有新地郭氏家族，冇李嘉誠李澤楷李澤鉅，原因亦因為啲郭氏就真係成堆共同持有。

9. 同樣地，入面亦都冇計咩泰王 汶萊王子 英女皇之類。反正亦冇你想像中咁有錢。當然你堅持人地有幾萬億身家你查唔到嘅，就唔使討論。

10. 咁全球最有錢嘅，係美國嘅Walton Family．唔使拗，公認。乜水？Walmart創辦人兼大股東，而家仲持有大約一半股權，以美國咁大間嘅上市公司嚟講，好少見。

11. 好啦，呢個家族，點投資架呢？當然，渣住Walmart咁大間公司一半股權，佢地大多數身家就係呢啲股票，但其他呢？

12. 一般，就唔使同公眾交代嘅，不過早前因為啲Family Office都要披露，所以先見到部份。當然，呢度只係少部份嘅東西，但即管睇下見到乜。

13. 以下，就係其中50億美金嘅投資

全世界最有錢嘅家族買乜股票？就係ETF

14. 冇錯，你見到，差不多全部都係ETF。仲要係極之悶嘅ETF，但我地呢篇文會逐隻睇下。順便，如果唔熟悉嘅，可以學下點睇ETF最基本嘅嘢，邊度搵資料好。將來嘅文都會再用到。

15. 我就整理咗一個咁嘅Excel（有attach埋），Ticker全部係美股買到嘅嘢，ETF名不用多介紹。有幾隻我油咗色，因為同其他唔同，藍色呢幾隻係債券，其他係股票。在股票入面，橙色嗰幾隻係新興市場。咩叫新興市場？陣間解

16. Expense Ratio開支比率應該好易明，個ETF一年抽你幾錢。之前都有讀者問，係點收的？答案好簡單，就係在個NAV度直接扣。例如你個ETF可能一開頭一手代表一安士黃金，咁搞得十年廿年，就唔足一安士了。基本上係每日咁扣，所以唔使諗咩「收錢之前沽咗佢」呢啲咁自作聰明嘅嘢。All things equal，收費當然越平越好，但唔同ETF未必可以直接比較

17. 之後係1個月，1年同5年嘅表現，當然已經扣除管理費，美金計價，Google Finance 搵最快，當然你亦可以set個Excel自動拎。

18. 另外每隻會有條Link，etf.com，你可以睇到隻嘢嘅介紹，差不多所有嘢都有，隻嘢嘅mandate係乜，track 乜指數（如有），會買乜唔會買乜，全部有，開支比率我都係在呢度搵。呢個網嘅好處係會話埋你知，有乜嘢競爭對手，咁你可以兩隻拍埋一睇，就比較到。

19. 壞處係佢10大持股個畫面比較難cap，所以我用另一個中文網。你睇，呢啲全部都係學問，我幫你揀都要時間，所以係抵睇的。自己搞唔難，不過煩咯

20. 至於最後係佢地家族持有嘅銀碼，以及每隻ETF佔呢堆嘢總數幾多，只係方便我計回報。

逐隻ETF討論

21. 然後我就會逐隻講，可能悶啲，但反正都唔會好多嘢講

22. 第一隻係VWO，FTSE新興市場，留意係冇韓國嘅，因為有啲人當係新興市場，有啲唔當，詳情以前專題講過（拿，都話十分有用！）。咁買乜？原來係台積電（仲要又買台股又買ADR），騰訊，阿里巴巴，美團。扯！之後仲有幾間印度公司，有間巴西（Vale淡水河谷，留意係萄文，所以讀Va-Le）。管理費先0.1%，十分實惠。留意都算分得幾散，呢啲ETF嘅特色。

23. 第二隻VGSH，短期美債，實在唔使討論。留意呢類嘅嘢fee會極平，回報冇乜，波幅又細，升又唔升跌又唔跌，真係當放銀行戶口咁咋。

24. 第三隻IMEG，MSCI新興市場。同第一隻VWO有乜分別？冇乜！就係有南韓同冇嘅分別。買乜？咪又係VWO嗰啲嘢！不過多咗隻三星。我有時懷疑啲指數公司特登整到咁，特別整到有啲唔同，各自吸客，咁大家都有著數。如果完全一樣就只能鬥平，大家冇肉食。

25. 第四隻BSV，短期債券，只係美國（但可以唔係政府），同埋要investment grade，不能高息high yield bond 或 junk bond，不能買恒大債。咁你見渣乜？扯，又係美債為主！同第二隻嘅VGSH冇乜分別。

26. 第五隻EEM，亦係MSCI新興市場。咁同隻IMEG又乜分別？冇乜！就只係IMEG買多啲細公司，呢隻EEM冇買。EEM就最突出嘅一定係收費，收到0.7%，貴過晒其他截。何德何能？就係因為冇買細公司？入面買乜？扯，咪又係台積電騰訊阿里巴巴三星。

27. 第六隻，VEA。呢隻唔係新興市場啦。FTSE成熟市場，留意冇美國，有韓國。渣乜？卒之有啲新嘢，除咗有三星，就係歐洲公司雀巢，ASML，Roche，Novatis，LVMH，SAP，仲有Shopify（係加拿大公司！），同埋日本Toyota．第時詳細講，但港股美股以外嘅，可以睇呢隻ETF，管理費亦平，0.05%。留意呢隻嘢渣得幾之散，最top持股都只係1.5%

28. 第七隻，EFA，MSCI EAFE，EAFE即係歐洲，澳紐同遠東。冇北美，冇中東非洲，冇韓國。只係已發展市場（所以冇中資股，亦冇台灣），咁變咗渣乜？扯，同樓上隻VEA差不多，只係冇三星，又係雀巢，ASML，Roche，Novatis，LVMH，SAP。但管理費貴一大截

29. 第八隻，VB，卒之有啲新意。因為係small cap，最細嘅2-15%股票。難得地管理費都平，0.05%，辛苦錢。渣住嘅嘢，多數都唔識。有隻POOL，疫情後炒咗上嚟，就真係做泳池的。仲有隻Novavax，疫苗嘢。你見隻ETF表現真係好。

30. 第九隻，SUB。買乜？唔係Subway（冇上市的），而係美國嘅地方債，短期，冇乜特別，息口可能高過國債少少，但當然風險又高啲。

31. 最後一隻，ESGE，燈燈。MSCI 新興市場ESG指數，咪買啲ESG良好嘅新興市場公司，收你0.25%。即係買乜？又係台積電 騰訊 三星 阿里巴巴 美團，死未。所以點解我成日都恥笑ESG

啟示一堆：

32. 呢度講一啲想法同啟示，貼多次個圖。

33. 首先，ETF嘅嘢，好似感冒藥，或者叫套餐咁，嚟嚟去去咪嗰啲嘢。呢度話十隻嘢，最後好多都係差不多。VGSH，BSV，SUB，都係短債，差不多等於現水咁嘅嘢。然後根本新興市場VWO，IEMG，EEM，甚至話有ESG嘅ESGE，全部咪又係嗰堆嘢，頂多有冇韓國嘅分別，即係有冇三星嘅分別！然後，VEA，EFA，亦係差不多嘅嘢，有冇韓國嘅分別。唯獨係VB同其他有好大分別，專揀small cap。

34. 睇到呢度，照計你都對揀ETF有一定認識，都係睇買乜指數，收費，同埋到底買乜股。以下係其他啟示

35. 首先，分散分散再分散。人地唔止買ETF，仲要買唔同嘅ETF，仲要唔係全部股票。你見到明顯地啲債券ETF拉低回報架，但又如何？成個組合五年大幅跑輸大市（同埋Walmart自己股價），但又如何？最緊要做到分散，美股唔掂，大公司唔掂時，都唔會死晒。甚至全部股票都唔掂時，都仲有啲債券。

36. 正如你睇過去一年，佢呢堆嘢，跑輸美股標普指數—但跑贏自己股價嘛！自己股價唔掂時，都有其他嘢跑出。

37. 仲有，你見啲ETF，佢地仲要揀啲好低cost嘅，有錢人一樣係咁。

38. 你會留意到，以上成堆嘢，差不多都係冇美股嘅。點解？留意返，買嘅人係美國巨企Walmart嘅大股東，自己都成手美股啦，仲美股？仲有，你見佢地唯一買嘅美股ETF，就買返small cap

39. 極簡單嘅例子，比你見到分散嘅重要。唔止係你買嘅嘢—仲有你本身有嘅嘢。呢個亦係你地成日問我（或者問其他人）應唔應該買乜，冇考慮嘅問題。你係Walmart大股東，咁你梗係買small cap 同埋外國股啦。相反，你係大陸人，就買返美股嘛！甚至你自己做邊行，都會影響你嘅配置。之前都半講笑話，九倉都走去買Amazon啦，搶自己生意嘛，唔通佢買返香港地產股咩。

40. 當然，仲有一個問題，我地講緊全世界最有錢嘅家族，所以佢地重點唔係get rich，係stay rich，最緊要唔好變返普通中產，一年有6-8%夠晒啦，唔使理啲咩Elon Musk過晒頭。

41. 咁大家冇佢地咁有錢，但都要留意下。你如果年青嘅，進取啲當然應該，但你頂多只係去到略高於指數，你咩望一年兩三成嘅，係必死的，畀你做到幾年，之後都只會輸返。你嘅策略係大大注咁買，瞓身買，然後承受一個同市場同步，頂多高市場少少嘅風險，然後用你嘅優勢，即係你嘅時間，去攤低個風險。

42. 仲有，你見佢地啲「新興市場」ETF，表現都唔錯的。又話中國唔掂？咁人地新興市場唔止中國嘛，分散呀。我知好多人以為分散係拖低回報，但針無兩頭利，到輸錢嗰時又可以幫你戥返勻啫。最重要係，多數人都係輸錢嗰時極痛苦，仲會做錯決定，所以分散係幫你瞓得安心，同你買人壽保險買意外保差不多。千萬唔好有嗰種「冇出事就蝕晒」嘅心態。

43. 仲有，有啲讀者實情都唔係太年青，又或者唔係太窮。你剛出嚟做嘢，幾萬蚊輸晒當然好快搵返。但你玩得五年十年，就開始小心啲，你理應已經儲咗啲錢，時間又越嚟越少，被炒而搵唔返份同樣人工嘅工嘅機會又大咗，開支又多咗。你未去到好似Walmart家庭咁富有，但都要開始唔好亂咁炒。

44. 仲有，人地嘅配置，都解答埋好多讀者之前問嘅問題：你買晒股又唔沽，咁要用錢點算？喂大佬，咁我有收入架嘛。咁有讀者堅持話當我會冇晒收入（但我估我播雪花都有10%人會繼續支持幾個月？），乜都好。咁你啲股票有股息架嘛，有人話見我少收息股，咁你盈富基金都3厘息啦，仲有啲咩三星3187，又中銀香港又恒生又領展又長江基建之類。況且，根本股票就係錢，你唔放心嘅，咪學Walton家族咁，買啲債券ETF，叫做好過銀行存款多少少，況且如果係長債或者高息啲嘅債，有得賺價添（但當然高息債風險又高啲，冇免費午餐）

45. 而實在我都要講，最好你就有你自己本業嘅收入，例如人地開Walmart，我就開Patreon。你咩「全職炒股」嘅，亦係必死，因為你根本冇錢撈底。咁你話我唔會全部錢買晒股票，扯，咁你個回報咪低咗咯。

46. 另外，ESG ETF（實情唔止ETF）實在搵笨，呢度你見到了

47. 最後，你發現，佢地啲ETF，都係Vanguard 同iShares，冇第三間。Vanguard冇上市，而iShares係Black Rock嘅。呢間公司之前都寫過（呢度，同呢度）

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。