港股低位升返10%，美股社交媒體股全部大跌． NetFlix Tesla JP Morgan Nvidia Microsoft 創新高． 全球八成人覺得自己財政狀況差咗。內房三道紅線情況．音樂市場嘅未來。魷魚市場示範NetFlix有幾屈機。 (Patreon)

快評兩句 — 港股低位升返10%，美股社交媒體股全部大跌

大師冇點你— NetFlix Tesla JP Morgan Nvidia Microsoft 創新高

每日一圖— 全球八成人覺得自己財政狀況差咗。內房三道紅線情況

Good Read — 音樂市場嘅未來。魷魚市場示範NetFlix有幾屈機。

FB Post Summary —　富途訪問上線。Snap業績後大跌25%。Facebook 10000億市值，侵侵平台點都值一半？Nvidia Tesla新高。已在Webull開戶買SNAP．是日Portal

1. 因為星期六Seminar關係，呢篇原本係星期五嘅，遲咗出。另外未知會唔會有週末專題。

2. 結果Seminar當日嚟嘅都有十幾人，多謝大家，另外仲有十幾人係之後會重溫的。最初未報名嘅，而家都仲可以報名網上重溫 

3. 今日嘅每日一圖同Good Read都相當精彩

4. 仲有，WeBull開戶送你1000蚊港紙股票呢度（披露返，我都有得分錢）。詳情睇返舊文。我自己都開咗，仲已經完成 註冊—開戶—入錢（1萬港紙）—交易 四部曲，我去買咗隻SNAP，下面有講。咁佢地send咗個email畀我確認的。

5. 見到都唔少朋友註咗冊但未成功開戶（開戶就同時入埋錢了），都不厭其煩提返，10月內必定要完成 註冊—開戶—入錢（1萬港紙）呢三步。反而買美股可以唔使趕住今個月，45日內可以了。記住係美股！最好唔好買啲OTC嘢或ADR，實情我都唔知買唔買到。ETF就應該得嘅。最後留意返，佢地會畀啲開戶情況我睇，但只會係咁嘅一個表，打晒格仔，我唔會知你啲個人資料的。

6. 另外，有啲奇難雜症，可以試下PM我。我問過嗰邊，都唔係太幫到手。但特別要提，你要有香港身份證同香港銀行戶口。至於已經移咗民，冇香港地址證明嘅，似乎都可以搞到，但你PM你資料畀我，我同你叫嗰邊「特批」

快評兩句 — 港股低位升返10%，美股社交媒體股全部大跌

7. 港股嘅，教材級嘅示範，你見之前真係講到世界末日，又科企監管又鬥地主又恒大爆煲又限電中國GDP又差，全部都係事實，但，正係咁情況，港股已經連升四個星期，升咗2100點（唔好忘記好多人跌500點已經話股災），都差不多10%。當然事後你先睇到咩係「極度恐慌」，「別人恐懼時我貪婪」冇錯，但實行起上嚟都幾難。但至少你可以做到，別人恐懼時你唔使太擔心。

8. 唯一美中不足，係成交偏低。而你見到跑出嘅，係中海外688華潤置地1099之類，恒大爆煲佢地係贏家，仲有人民幣強（好少人講）。仲有香港啲地產股，之前「鬥地主」跌過度，當然有聰明人會買。國泰293唔多唔少都係re opening trade，但都要睇大陸，就似乎仲唔知幾時。留意星航日航Qantas之類升唔少的。

9. 美股嘅，繼續舊經濟跑贏，道指升納指跌，但至少你見我渣住嘅部份科技股都仲可以新高（下段有講），分散都係重要的。你諗下之前有一輪個個只講科技股，但市場大調轉嗰時冇人話你知。

10. 另外想講嘅係，Snap出業績後重創（25%！），結果我走去咗買，就係用咗Webull微牛開戶嘅10000蚊，冇呃你，Facebook 有講，有埋圖。但留意呢個都唔係重點，重點係你見Facebook Google Twitter 股價都大插，因為Snap特別提到蘋果iOS嘅影響，相信嚟緊呢幾間公司出嘅業績都有啲危，就算第三季未反映，第四季指引都應該調低。但，幾時都係有危有機，如果之後跌，你又敢唔敢買？我當你話Facebook有自己嘅問題，咁Google呢？

大師冇點你— NetFlix Tesla JP Morgan Nvidia Microsoft 創新高

11. 唔詳細寫，但我認為NetFlix Tesla Nvidia 咁強，都因為大家驚咗一線科企嘅監管問題（Microsoft 正係最少呢啲問題嘅一間）。

12. 另外，當然有人會話，扯，道指標指都創新高，你個倉幾十隻嘢，咁有幾隻創新高好合理 —也是，但，正係你要至少做到咁。係「好合理」，但唔少人嘅投資就係「唔多合理」！明明指數創新高自己啲嘢都大落後，甚至輸錢。如果係咁嘅，就要檢討下，或者簡單啲放返多啲錢在指數ETF。

每日一圖— 全球八成人覺得自己財政狀況差咗。內房三道紅線情況

13. 全球八成人覺得自己財政狀況差咗— 呢個調查相當有趣，首先你見到股票升，又好似加人工，但大家唔覺得自己情況好咗。咁當然股票升只係中上階層受惠，而加人工好似暫時只係美國最多。但，更奇怪嘅係，你見最多人覺得自己改善嘅，反而係中國。相當奇怪。你可能話中國人盲目樂觀？可能吧。定富有國家啲人就冇咁易滿足？但你見同樣係高收入國，美國同英國嘅分別都好大。正如同樣中等收入國，中國同墨西哥又兩回事。

14. 內房三道紅線情況—就係講大陸地產商嘅「三道紅線」，呢類列表好多地方你都搵到。但Financial Times呢張圖做得幾靚，另外，個格仔嘅大細代表2020嘅賣樓金額。咁你見到，中國海外688同華潤置地1109兩間國企龍頭，股價真係跑贏大市。亦見到我就只係買呢兩隻內房，係有原因的。

Good Read — 音樂市場嘅未來。魷魚市場示範NetFlix有幾屈機。

15. 音樂市場嘅未來 —相當精彩，你自己去睇，當然部份趨勢而家已見到。例如講唱片公司冇能力意冇意慾再捧新人，只會食老本。亦因為歌手自己可以在平台爆紅。將來大家只會識歌唔識人（我不同意）。歌手只能靠代言廣告搵食。死咗嘅歌手會復活（科技）。又，入面講嘅嘢，亦係我打算（雖然打算咗好耐）買Spotify嘅原因

16. 魷魚市場示範NetFlix有幾屈機—唔係討論套劇本身，呢個作者我亦都貼過。留意NetFlix係一間「真正」全球公司，真係個個國家都有（除咗中國），亦都有不同嘅配音字幕，呢樣嘢亦係Network effect，西瓜靠大邊。仲有，作者另外提到Roku，早幾年升到癲，都有讀者同我提過。今年冇乜郁，反而可能值得留意下

FB Post Summary —　富途訪問上線。Snap業績後大跌25%。Facebook 10000億市值，侵侵平台點都值一半？Nvidia Tesla新高。已在Webull開戶買SNAP．是日Portal

17. 都出咗唔少文，而且積咗幾日

18. 富途訪問上線—我覺得個訪問幾好（段片呢度），雖然有啲嘢在我本書都有講（未買記住買，最底有link）．同埋可以留意下YouTube上面一啲反對嘅留言，你可以諗下點反駁（或者我會點反駁）。固然我唔會走去回，或者動氣，但用意係畀你見到其他人一啲（我認為）唔啱嘅想法。同場加映，我係好怕睇返自己嘅文或者片，特別係怕聽到自己把聲。

19. Snap業績後大跌 25%— 呢篇好睇，唔止係佢一間公司嘅問題，仲反映成個數碼廣告市場？或者係蘋果帶嚟好大影響。而我係走去買咗少少SNAP嘅。仲有，因為發現廣告太好搵，間間科企都會做。

20. Facebook 10000億市值，侵侵平台點都值一半啦？ — 當然係反話，個世界唔係咁運作，開唔開得成又唔知，到時點攤薄你又唔知，有冇廣告商肯落更大問題— 你見之前嗰啲咩MeWe之類，都唔多值錢的。

21. Nvidia Tesla新高—本身冇乜特別，但你留意我總係可以搵到啲其他嘢寫，都係嗰啲核心信念。總有人問，長渣買著匯控點算（講真，好失禮你？大把人連匯控都跑輸），買著富途點算。咁我答返你，我買著升幾倍嘅股又點算？

22. 已在Webull開戶買SNAP—本身冇乜特別，亦不等於你都應該一齊買。但至少畀你見到一樣嘢：我盡量做到言行一致，唔會講一套做一套，叫你做A我自己做B。再講白啲，你話咩驚Webull有問題嘅，咁我都開埋一份，自己放埋錢，做埋trade的。係有當然有時「叫你做A我自己做B」呢種行為本身未必一定錯題，因為始終你唔係我，正如你係年青人應該食多啲甜品，我就不了。

23. 是日Portal—街度睇到嘅街招，順手懷念下當年嘅香港科網狂潮。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。