ivanliresearch

星期六講座最後召集．港股我係跑贏大市嘅，美股都係。PayPal大跌（仲要平時5/6倍成交）點算好．Verizon 渣五年得個桔．美股期權輸六成．微牛開戶跟進 (Patreon)

Published:

2021-10-21 20:59:56

Imported:

2022-09

Downloads

Content

星期六講座最後召集

港股我係跑贏大市嘅，美股都係。

PayPal大跌（仲要平時5/6倍成交）點算好

Verizon 渣五年得個桔

美股期權輸六成

微牛開戶跟進。記得今個月要完成開戶同入錢。搞唔掂可以睇舊文，或者PM我。

星期六講座最後召集

1. 照舊，極速小廣告兩個。星期六講座報名呢度。未報名嘅記住報，內容詳情Facebook都有，Email可以send去呢度（admin@homeblogger.com.hk），當然你畀我都得，但為免漏答，最好都係send 去Homeblogger

2. 因為我要預備星期六個seminar，所以可能星期五篇文會去到週末後先有了。

3. WeBull開戶送你1000蚊股票呢度（披露返，我都有得分錢）。詳情睇返舊文。另外陣間都會講多少少細節。都有唔少讀者開咗，多謝晒大家先。

港股我係跑贏大市嘅，美股都係。

4. 經過9月大跌後，大市近日唔錯，港股你話跌咩，我啲嘢逆市升（講過HK3係主倉，可以睇Excel）。

5. 當然中國海外688 華潤置地1109呢啲都係我之前買落，有月供，你見我都好少講，亦不見得係而家好吸引嘅嘢。但例如長江基建1038，中銀香港2388呢啲舊經濟又殘又有啲股息嘅，都做得唔錯。

6. 同樣情況仲有之前提過，我亦都月月買嘅三星亞太房託3187，都係10日新高了，仲要收過息，計埋啲息已經有賺少少。但當然呢啲只係當好過銀行存款，同埋分散下風險，長期增值不能靠呢啲。

7. 冇咁悶嘅嘢？扯，咁早排買嘅王維基HKTV 1137，6個月新高啦。冇呃你架，執34%。（又，呢個華盛戶口，正係之前啲推廣活動開。股騰訊係送嘅，仲有股美股輝瑞Pfizer PFE）

8. 美股嘅，情況差不多，大市悶悶地，但標普指數叫做創到新高，我堆嘢亦都可以跑贏大市（講過US3先係大倉）

PayPal大跌（仲要平時5/6倍成交）點算好

9. 不過我想講隻PayPal，絶對係「一支獨秀」。故事星期三講咗，傳會買Pinterest，作價都幾貴，投資者亦都黑人問號，唔明買嚟做乜。結果連跌兩日，每日都超過5%，成交仲要相當大（可以睇返個Excel比較平時成交）。

10. 咁點？都冇乜點。上次業績令人失望，之後股價跌，我有諗過沽，但結果都冇。今次又可能睇埋業績先，但你見我真係好似……搞呢個Patreon以嚟都冇沽過任何股票。使乜「食糊」？唔沽就唔係賺咩？咁你隻嘢跌九成係咪唔沽唔蝕？梗係唔係！講到尾好多人就係驚佢跌返落去，但，你點知呢？或者佢升更多，你賺少少走咗，咪仲笨。

Verizon 渣五年得個桔

11. 反而原本最想沽嘅，係Verizon（VZ），你見我好少講，因為股價唔得。差又唔係好差，至少我唔使輸錢，但大落後。特別係你要明白，我差不多係2017年買的，買咁耐都得個桔，唔少股票升咗幾倍。我唔使輸錢，但又冇贏錢，平手咁滯。

12. 最重要係都唔係好記得當初做乜買（有錢手痕啩，估炒5G啩），然後後來發現公司啲生意好難有乜增長，七年前收入咁多，而家又係咁多，所以股價咪唔得（股價長期嚟講都係幾公平的）。有人之前不停問，如果我好急用錢，會沽乜股票，可能就係呢啲。

13. 唯一賣點，你見佢都年年加到派息（雖然好少），個股息率高的，但一向我都話呢啲假象，正係因為個股價唔得先會咁。既然美債都只係1.6厘，咁你買股收息，有4厘5厘嘅，點會冇風險？買美債嗰啲友傻的？況且，你盤生意冇增長嘅，又何來派到息？我當你真係年年收4厘5厘息，但一隻好嘅股票，一年升幅應該點都唔止4-5%，

14. 不過難得地，今次業績唔太差，盈利勝預期，收入不及預期，出完仲有得升。亦因為股價真係太殘了。

美股期權輸六成

15. 最後講講，波音期權。你見呢排好少講，原因好簡單，因為輸錢。都輸得幾甘，輸足6成。當然輸得更多嘅股票都有。重點係，隻期權我只係買咗1100蚊美金啫。你亦可以留意，輸嘅嘢我多數買得少的，好少可我買到好大注嘅嘢會輸得好勁

16. 點解輸錢？好簡單，波音股價唔得咯。但點解唔得？都好多原因。飛機迷咪會講啲安全問題呀之類。

17. 不過，我依然覺得，最初嘅諗法冇錯。我依然係相信中國會大手宣佈買波音飛機。特別最新你見美國好似會減關稅，我唔係特別愛國或反美，但你估美國真係怕咗你咩。冇乜可能空手而回，冇乜可能中國唔讓步，去做返啲嘢。

18. 之但係，呢個故事畀你見到，就算我估中成個故事，都未必會贏錢。因為波音股價可以因為其他嘢而跌，甚至一個唔該，中國拖到下年6月先宣布買，到時我隻期權都落咗堆填區。甚至亦可以係，年尾中國真係宣佈買，但波音股價唔升（邊個話一定會升？），或者升少少，都唔夠我隻嘢回家。

19. 呢個故事唔係叫你唔好買期權（雖然我唔會點買），而係畀你見到，你有個想法，最後真係估中，同你可以賺到錢，就真係兩樣好唔同嘅事。

20. 我特別講呢樣嘢，因為你見好多小朋友，好似料事如神咁—但我經常會恥笑：咁醒，做乜仲咁窮？特別你涉及投資嘅嘢，邊有得呃。講十次中一次貼出嚟，我都會做，但唔代表你會搵到錢的。

21. 你見我買股票嘅理由，即使event driven，都好少係「只係靠一個原因」。例如舊年短炒Tesla，係估入標普指數後有好多資金要追—但即使冇都冇壞，公司都仲有增長，你見炒完嗰浸，之後今年年頭散晒，但近期又再強返的。又例如上面講嘅HKTV 1137，嗰時買估佢入北水，但即使入唔到，依然唔驚。或者你見我買NetFlix，會估公司推廣告，出game，賣產品等等，但即使唔仗，都唔會死。

22. 當然，仲有一個關鍵：我渣波音正股嘅，同一時間只係輸5%，但期權就輸60%。咁固然係因為我貪心，同埋想過癮，拎啲經驗。亦冇話你一定唔可以買期權之類（但我真係好少）。只係示範畀你睇，你見人贏快錢梗過癮，但人地輸錢唔會貼出嚟嘛。你見我啲正股，有啲高位跌10%啲人已經嚟叫救命，你點買一隻一個月唔夠跌60%嘅期權？—當然可以嘅，學我咁，買得細咯，咁買得細就好難贏大錢。

微牛開戶跟進。記得今個月要完成開戶同入錢。搞唔掂可以睇舊文，或者PM我。

23. 多謝晒大家先。都同大家跟進返，微牛開戶。我就完成晒，註冊，開戶，入錢三部曲。記住呢三樣嘢都要今個月內完成，我見佢地開戶同入錢都快手，但都預返一兩個工作天。如果未開過呢啲戶口，最難搞可能係入錢嗰部份，入完（強烈建議你用e banking）然後要cap screen upload畀返佢。詳情你睇返昨日篇文都得，再搞唔掂就PM問我都可以。

24. 當然要香港身份證，同埋要有香港銀行戶口。但如果已經移咗民，得外國地址開唔開到？幫大家問緊，聽日有答案。