ivanliresearch

港股成交強，道指歷史新高，標普指數6連升。美股業績：NetFlix，ASML，Verizon，Tesla．大師冇點你：Pinterest 果然賣盤！跟下進微牛開戶．美股十間公司貢獻咗31%盈利。諾貝爾獎識人好過識字．低息環境令大企業更著數？冇才華冇運氣，可以點成功？ (Patreon)

Published:

2021-10-20 22:17:59

Imported:

2022-09

Downloads

Download US live .xlsx

Content

快評兩句 — 港股成交強，道指歷史新高，標普指數6連升。

美股業績：NetFlix，ASML，Verizon，Tesla

大師冇點你：Pinterest 果然賣盤！

跟下進微牛開戶

每日一圖— 美股十間公司貢獻咗31%盈利。諾貝爾獎識人好過識字

Good Read —低息環境令大企業更著數？冇才華冇運氣，可以點成功？

FB Post Summary —　我使唔使食過熊仔餅先可以買樂天？真龍床盤！威華達盛京銀行

1. 照舊，極速小廣告兩個。星期六講座報名呢度。

2. WeBull開戶送你1000蚊股票呢度（披露返，我都有得分錢）。詳情睇返舊文。另外陣間都會講多少少細節。

快評兩句 — 港股成交強，道指歷史新高，標普指數6連升。

3. 不經不覺，道指創咗新高。另外標普指數亦都6連升，離新高亦只有一步之遙。反而納指落後啲，昨晚仲要係跌嘅。

4. 港股方面，成交相當強，去到近1600億。大市繼續都係科技股帶動。記得之前又講咩監管風險冇人敢買，仲有中國經濟數據差（事實係差），但差完就連升幾日。所以諗嘢真係唔好咁直線。當然你要捉到啲科技股個底，近乎不可能，而家科指低位都彈返14%，但點捉？近乎捉唔到的。倒不如你坐定定，或者定期投資。你話二三月低位追入去嗰啲，就有排都未回家—但邊個叫你全部錢只係嗰個位買晒落去？

美股業績：NetFlix，ASML，Verizon，Tesla

5. 不過，重頭戲當然係美股業績。但我只會快講，亦講真冇乜特別好講（Tesla可能之後會講多啲）。呢四隻我全部都有買。

6. 首先係NetFlix，星期二收市出（可以睇公司份嘢），之前我快寫咗，冇乜補充。你見星期三晚股價就跌2%，成交都大，係平時三倍。但唔覺有乜特別，近年好似出親業績都要跌。早兩季我都冇沽，更加睇唔到點解而家要沽。

7. 類似嘅係ASML，星期三開市前出的。盈利勝預期，收入不及預期，指引亦都普普通通。咁見到股價跌4%，但一樣，對我嚟講完全唔會理，只係今年都升咗50%，跌返5%又係乜？。又，我發現好似都唔少公司係盈利勝預期，但收入不及預期。

8. 仲有一隻，好少講，因為股價太差，Verizon（VZ），星期三開市前出咗業績。我唔使輸錢，但因為好早買，係大落後嘅，早排仲要可以逆市創52星期新低。不過今次出完業績，股價就OK，應該因為真係太殘。亦都同ASML一樣，盈利勝預期，收入不及預期。呢隻聽日我會詳細講。

9. 最後，大家關心嘅Tesla，聽日先細講。但，收入同純利都去到歷史新高，亦都當然兩樣都勝過預期。應該冇乜好挑剔。盤後股價，又只係麻麻地咋下。

大師冇點你：Pinterest 果然賣盤！

10. 另外，由舊年年尾講到而家，科技公司嘅併購係今年焦點（下年都仲會係，星期六講座會講多啲）。星期三傳嚟嘅消息係，PayPal會買Pinterest，心諗都完全唔啦更。

11. 不過，呢度嘅讀者應該唔會陌生，因為我真係好早寫過，呢間公司會畀人買起！（呢度，同呢度），最初係講微軟想買，嫌貴。

12. 不過你留意下，第一次寫時年頭，86蚊。第二次寫時四月，75蚊。而家？呢單收購新聞之後，升多13%，先63蚊（未有消息前56蚊）。即係畀你估中，都仲要輸錢。正如即使股價在呢單新聞後抽咗上嚟，今年到而家都仲要跌8%。因為之前貴得太過份了。傳話Paypal會70蚊買，我就當然唔會搏嗰幾蚊，雖然照計唔會被監管當局阻止

13. 同時間，Paypal仲好笑，一出呢個消息，即跌5%。仲要係平時嘅5倍成交，明顯投資者唔多睇好，覺得買得貴，又唔知買嚟有乜用。

跟下進微牛開戶

14. 十分感謝大家，已經見到唔少人註咗冊（我只會睇到人數，唔會睇到你地資料，放心）。

15. 註冊後，記得今個月內要完成埋開戶。點開戶？個app呢度有得開，我自己都開咗，尚算順利。記得準備身份證，地址證明，同埋銀行證明。如果開過富途之類嘅，應該好熟手。

16. 開完戶，記得今個月內入埋錢（1萬蚊）！轉完錢佢會叫你畀個證明佢，所以記得轉錢時cap screen。仲有，唔轉齊頭數就易啲認到你，例如我就轉10000.12。我昨日試過，都算快手，中午12點開戶同轉錢，下午3點就搞掂。好似話3點前轉嘅錢當日會搞掂畀你，3點後就等聽日，但我唔肯定。

17. 至於買美股，都一定要買一次，但可以唔使趕住今個月。45日內做就得（最簡單咪買SPY或QQQ之類，當儲錢）。記住，45日要內維持1萬蚊，到拎到你嘅Qualcomm股票就沽走佢吧。

每日一圖— 美股十間公司貢獻咗31%盈利。諾貝爾獎識人好過識字

18. 美股十間公司貢獻咗31%盈利—唔使詳細解啦？亦因為咁，所以你話股市由啲最大嘅一堆公司貢獻晒升幅，好合理，因為市值都係集中在呢堆公司。而點解市值集中在呢堆公司？亦因為啲盈利集中在呢堆公司。留意返，頭十大公司嘅市值，亦都剛剛好係標普500所有公司嘅……三成多啲。

19. 諾貝爾獎識人好過識字—呢個相當有趣。留意唔係講你識啲評審，而係講你嘅提名人，如果提名人以往都拎過諾貝爾獎，被提名嗰個拎嘅機會大好多。不過個圖有啲難解，係一個比例。比例係講返，根據返提名人嘅唔同身份，睇下佢地提名嗰啲人，最終拎獎數目，同埋「預期」拎獎數目嘅比例。例如當個獎每屆三個提名人，每人提名一個，只得一個中獎。如果人人影響力一樣，咁我提名嗰條友應該三份一機會中。當我提名6屆，6個人，應該有兩個中。呢個就係「預期」數目，咁我地可以拎返啲實際數目嚟比。於是見到，個提名人之前拎過諾貝爾獎，佢提名嗰啲友，呢個比例係高啲嘅。每一個獎都係咁，好難話係巧合。另外留意，你可以話文學獎和平獎呢啲，十分主觀。但你見醫學獎都係咁的，個分野仲大過文學獎和平獎。最後留意，1901-66年。因為啲提名人同埋被提名嘅人嘅資料，會保密一段長時間（大約50年）。亦因為咁，個圖冇經濟學獎—因為1969年先開始有呢個獎

Good Read —低息環境令大企業更著數？冇才華冇運氣，可以點成功？

20. 低息環境令大企業更著數？ — 實情都好明顯，但你可以download人地成份Paper睇下。你有個猜想，都要搵證據嘅。講返，低息當然對企業好，但對大公司係更加好，所以令到每個行業龍頭幾間嘅優勢更明顯。點解會咁？你大約都估到。首先，大家嘅融資成本都齊齊跌，但大公司跌得更多。第二，我成日講嘅，大公司舉債能力更高，可以更高槓杆，亦可以回購更多股票。最後，大公司做嘅收購，係多過細公司。然後你可以諗下，如果之後加息，情況又會點？我估分別唔係好大 —因為，2015年咪加過息，加到2018。嗰幾年係咪都係大公司更大？似乎都係。好大程度種種科技進步，亦係大公司比較能受惠。

21. 冇才華冇運氣，可以點成功？— 個題夠晒吸引，小小雞湯嘢，Twitter thread，相當長。例如教你在自己嘅能力領域內發運（扯，咁已經要才華啦！），雙贏思考，想要就開口，睇長線，唔好怕失敗，跟住你嘅好奇心行，重視過程而唔係結果，重視人，學講故事。未必全部我都同意，亦都好多唔易實行甚至有矛盾（凡親原則嘢梗係咁），但值得一睇。但，如果你做到呢啲嘢，又點會冇才華？例如我覺得識得講故事，會睇長線等等，已經係好難得嘅才華。