星期六講座，WeBull開戶送1000股票．居然有人寫垃圾倉隻MQ．是日美股新股—但在隔離台今年升咗5倍了．．港股夠靜，但唔少嘢創近期新高，三星FANG+ ETF 2814 歷史新高．業績：Johnson and Johnson 賣疫苗先5億一季咋，P&G 成本有壓力．Snap 業績preview．新鮮滾熱辣：NetFlix業績 （入埋Excel） (Patreon)

廣告兩則—星期六講座，WeBull開戶送1000股票

居然有人寫垃圾倉隻MQ

是日美股新股—但在隔離台今年升咗5倍了

港股夠靜，但唔少嘢創近期新高，三星FANG+ ETF 2814 歷史新高

業績：Johnson and Johnson 賣疫苗先5億一季咋，P&G 成本有壓力

Snap 業績preview

新鮮滾熱辣：NetFlix業績 （入埋Excel）

拿，日頭仲寫咗篇NetFlix preview，即係今日連出兩篇畀你的。

小廣告兩則—星期六講座，WeBull開戶送1000股票

1. 繼續短廣告兩個，首先，星期六嘅尖沙嘴講座，記住報名。內容唔會在第度公開，呢度都唔會，會講嚟緊兩個月部署，我會買乜股，仲有你最擔心嗰啲咩通脹呀，恒大呀，加息呀，縮表呀嗰啲問題。上次因為打風改期，咁報咗名嘅唔使再報，記得到時出現。想報名嘅，呢度。嚟唔到到嘅可以之後網上重溫，不過價錢一樣。到時可以搵我合照同拎本書畀我簽名。仲有，可以預先發兩條問題去homeblogger，必定回答。

2. 第二個仲好玩，你去WeBull開戶，會送返1000蚊股票畀你（係送一股高通Qualcomm）．條件係你要買一次美股，同埋Keep 港紙1萬蚊，當然要有香港身份證，同埋只限新用戶。

3. 咁我，都會係有錢分返的，講過我一定披露呢啲。大家想自肥又好，益我又好，就去開個戶吧。拎完股票咪沽貨走。

4. 我鍾意佢地有個介面畀我睇返有幾多人開咗，透明度高。

5. 記住記住要用我嘅referral link：　https://a.webull.hk/i/IvanLi

6. 條件細則在呢度。

居然有人寫垃圾倉隻MQ

7. 首先介紹返，居然中文媒體有人寫隻MQ。甚麼MQ？Marqeta，垃圾倉之中嘅其中一隻（舊文呢度，同呢度）。講到好似好勁咁，同Square（SQ）合作，發卡平台喎。不過睇定啲先。幾時都係睇核心技術，平台，護城河。你見手機賺大錢都係蘋果。

8. 今日隻嘢就彈返7%，但同我買嗰時比仲係輸咗18%，最差就呢隻。但又如何？最勁嗰隻Monday.com 升64%，第二嘅ZETA升34%，幾時都係一兩隻勁嘅夠輸其他啦。計數量都係 六隻升四隻跌，夾埋升13%，實情跑贏晒啲指數

是日美股新股—但在隔離台今年升咗5倍了

9. 另外，有隻美國新股，應該未咁快上，但你地可以留意下，我就不了。講嘅係Rock Tech。Bloomberg 個題已經解釋一切: Thiel-Backed Lithium Miner Is Said to Prepare Nasdaq Listing。就係 Peter Thiel，同埋鋰礦。

10. 不過，隻嘢本身已經在加拿大同德國上市啦。今年升咗5倍，只係今個月都升一倍，但只係5億加紙市值，爛賭嘅可以玩下。我就不了。「或者買返一皮嘢玩下？」。應該好多人留意到，我對資源股係好有戒心的。

港股夠靜，但唔少嘢創近期新高，三星FANG+ ETF 2814 歷史新高

11. 港股方面，成交夠晒thin，但靜靜地咁升上嚟。你見咩中國經濟減慢呢啲嘢，實在冇人理的。冇乜股票特別好講，但唔少都已經創近期新高。

12. 另一方面，三星隻FANG+ ETF 2814都創咗今年新高。你見個圖話1個月新高，但如果計收市價係今年新高了。以前都講過隻嘢，留意佢係Track FANG+ Index，唔係納指，而FANG+ 有阿里巴巴同百度，所以早排跑輸，但呢排中資呢兩隻彈返，仲有Tesla NetFlix都強，咪強返。

13. 你見FANG+ Index 今年升22%，Nasdaq就稍為落後啲，19%。所以好難話邊個指數「好啲」，之前又個個覺得FANG+冇咁好。結果納指都未創新高，FANG+ Index就創咗新高，而2814 係跟得算足的。我有諗過買，最後都冇買，都係直接美股算，如果買ETF就不如 QQQ 或者 QQQM，但人各有志吧，呢隻就亞洲時段有交易，亦啱啲冇美股戶口嘅人。

業績：Johnson and Johnson 賣疫苗先5億一季咋，P&G 成本有壓力

14. 美股業績嘅，開市前有Johnson and Johnson（JNJ）同埋 P&G（PG）出咗業績，由於長期只係睇，冇買，唔寫太詳細。

15. JNJ嘅，疫苗收入5億美金，絶對冇你想像咁多，BlackRock收入一季50億，LV賣袋一季150億添，但當然JNJ唔只得疫苗。盈利係勝預期，收入就略低過預期的。不過上調咗盈利指引，所以你見股價反應唔錯，但今年當然大落後。

16. P&G，盈利同收入都好過預期。成本係上升的，但加價抵消到部份，應該會繼續加價。維持返全年指引，股價就跌了，今年亦係大落後。

17. 今年呢類FMCG消費品股都係差嘅，但我估到個市唔掂，呢啲公司就會跑出了。

Snap 業績preview

18. 星期四收市先出，實情都冇乜人留意，不過話咗寫preview就寫埋。Tesla（星期三收市後出）就真係冇乜preview好寫了，但出完可能寫兩句。

19. Snap好似對上兩次出完業績都大升，我冇買，但會留意嘅原因係因為多數佢係最早出業績嘅社交媒體，往往話到你知成個數碼廣告市場嘅情況。

20. 咁留意返，由上次整呢個Excel到而家，Snap股價係持平嘅，並唔係特別好。

21. 今季預收入去到10.9億，第一次突破10億，按年升62%。低過之前幾季，但依然係好強嘅增長。但賺錢依然未見，預每股蝕0.10，舊年一股蝕0.14，公司上市以嚟近乎冇賺過錢，但問題應該不大，首先收入增長高，利息仲係低，投資者又有耐性，同埋亦唔係真係蝕得好誇張。

22. 最後，公司一直定位係Anti Facebook，雖然我用咗咁耐都唔知有乜好玩，但唔好用自己嘅口味判斷個世界。Facebook近來都幾多麻煩，驚Facebook唔掂嘅，不如買呢隻當買個保險？無論係用家，定投資者，可能都有部份由Facebook走過去？

新鮮滾熱辣：NetFlix業績

23. 寫完晒剛剛美股收市，NetFlix出埋業績，之後先詳細講，Preview睇返之前篇文（一早號外畀多篇你的）。

24. 一個字，算幾好，但盤後股價反應不大。

25. 市場預收入74.8億，按年升16%。結果亦係74.8億，符合預期。市場預每股盈利2.56（舊文好似打錯字），結果去到3.19，按年升83%。

26. 另外我寫咗，訂戶方面，公司之前指引按年升9%，大約即係去到2.09億。結果去到2.14億，按年升9.4%。

27. 單季新客440萬，公司指引350萬，街估380萬，我估400萬，結果個數好過之前兩季。

28. 公司指引都算進取（算掛？），第四季預上850萬新客，即係年尾去到2.22億，按年升9%。留意舊年第四季亦係850新客。

29. 另外留意，上嘅440客，一半嚟自亞太區，四成歐洲中東，一成拉丁美洲，北美係乎冇嘅。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。