NetFlix 業績preview (Patreon)

魷魚遊戲二三事。外語劇嘅成功

多人睇，後勁好，成本平，但「9億價值」代表乜？

「魷魚遊戲」帶動股價？咁可樂係咪因為C朗跌？FB係咪因為死機跌？

今次業績睇啲乜？照計上返400萬客，好過前兩季（有埋個Excel）

公司當然有新增長，不能只靠下一套鱆紅魚遊戲

1. 因為美股星期二收市後（香港星期三朝早四點）NetFlix 出業績，所以今日呢篇preview早啲出。咁原本星期二嗰篇？都會寫，但寫短啲。

2. 介紹返新讀者，我係例牌會寫preview的，以前只係FAAMG，後來去到NTSTP（我亂作嘅名），NTSTP就咁款。FAAMG就咁。好多時出完再寫多次review。

3. 又，極速小廣告兩個。星期六講座報名呢度。

4. WeBull開戶送你1000蚊股票呢度（披露返，我都有得分錢）。

5. 詳情睇返舊文。之後都會詳細講。

魷魚遊戲二三事。外語劇嘅成功

6. 講返NetFlix，大家都知魷魚遊戲，但實情可以討論嘅嘢有好多。不過我先講咗魷魚遊戲先，重點唔係好唔好睇（我使唔使睇晒先可以買NetFlix？雖然我第一日睇晒），唔係你鍾唔鍾意睇，亦唔係好多人鍾意。最重要係，你可以了解多啲間公司嘅方向。

7. 先講魷魚遊戲，之後我Facebook可能會細講，但首先，昨日嘅每日一圖貼過，呢套劇嘅「表現」同其他唔係幾同，後勁強。仲有留意，佢係代表咗NetFlix推外語劇嘅成功—以往其他人係唔敢的。詳情呢度，同呢度（兩篇都有paywall）．一個提示係：在英國差不多45%嘅戲係外語片，但佢地夾埋只係佔2%票房，美國情況都差不多。但，首先明顯英語國家嘅人似乎抗拒外語，你對印尼人嚟講，英文同韓文都一樣係外語啦！另外，戲院同串流平台嘅玩法，亦都唔同。

8. 另外，留意公司公佈咗，17日已經1.1億人睇，十分誇張，因為NetFlix得2億用戶多啲，即係差不多一半人睇咗。當然得閒留意返公司點定義「睇咗」，以我所知你睇過兩分鐘都叫「睇咗」，但嗰1.1億，就係計戶口，即係你入去睇10次都係計一個人

多人睇，後勁好，成本平，但「9億價值」代表乜？

9. 同時間，我亦想你留意，公司內部文件話，呢套劇為公司帶嚟咗9億美金價值。最初係Bloomberg報，公司律師出嚟話係機密數字，唔應該報導，「即係真嘅」。好多以只聚焦於個成本點平（聽聞NetFlix有條友因為咁畀人炒咗），但，有冇諗過呢個「9億美金價值」，到底係咩意思？唔該大家多思考。你諗真啲？唔係票房喎，你個個月畀月費，睇幾多套都係咁嘅錢。亦唔係代表有9億美金嘅新客戶會費，反正你亦唔會知佢地係因為乜加入。咁呢9億，即係乜？當然有意思，但唔係你諗咁簡單。

10. 仲有，留意埋，好多人都會知，呢套嘢刀仔鋸大樹。呢個圖貼多次，魷魚遊戲受歡迎程度，係普通劇嘅100倍—但亦話你知，好多普通劇，真係冇乜人睇。呢個根本同捧新人，開戲，甚至你投資一樣：80/20定律，甚至更極端。我一套跑出嘅，夠我輸幾十套普通嘢啦。

11. 可能講遠咗，但最初，我唔當魷魚遊戲係咩一回事。我提過，我係9月17日，第一日已經睇晒。頭幾日唔見好多人講，你睇上面個圖都知。

「魷魚遊戲」帶動股價？咁可樂係咪因為C朗跌？FB係咪因為死機跌？

12. 好啦，講返公司。我係唔同意「魷魚遊戲」帶動股價嘅。正如我唔同意話Facebook 死機，「所以股價跌」（未死機已跌，況且「受惠」嘅Twitter跌得仲勁）。正如我唔同意 C朗推開可樂令股價跌（未開記者會已經跌，到佢開嗰時根本係升）。你由好多事見到，我諗嘢同其他人係唔同的（亦係好婉轉咁講：你見到好多人寫嘅嘢根本係錯，或者極低質嘅）

13. 好簡單，你睇股價，幾時炒上去？橙色圈係9月17日，明顯之前嘅升勢，多過套劇出咗之後。由低位到套劇出嚟，升咗21%。套劇開始播到而家？只係升8%。

14. 當然，你會講，喂，「炒預期嘛」。原則冇錯，但唔好只係識口號。固然好多人會mon住啲上客數字之類，對沖基金亦用好多方法想去拎，但似乎都唔易，「否則唔會出完業績啲股價咁波動」（陣間詳解）。更何況係個別一套劇？你話有人一早估到套戲出嚟會爆紅炒定上去，我就唔係好信。

15. 講到尾係乜？係之前好殘！你睇NetFlix年初至今，升20%，同大市同步。但睇圖都知，好大段時間都係跑輸，甚至潛過水

16. 原因？睇圖會見到。另外之前三個圈，正係之前三次業績（公司好似好鍾意19或20號出業績，1月4月7月10月）。第一次，1月出返條數其實好靚，出舊年第四季條數，當然靚，即時大抽上去。但你見到升完一日，之後就係咁跌，同大市有關，但亦因為好多人估不能持續，要上嘅都上晒啦

17. 果然之後嗰兩次，4月同7月，就大大鑊的。兩次我都寫過，4月呢度，7月呢度。4月嗰次特別係重災區，上得4百萬客，同之前爭好遠，當然大家都預咗，已經調低咗期望，但同期望比仲係爭一截。公司亦都調低全年展望，咁結果去到7月嗰次，得返154萬。留意好得意，係高過市場預期，「但大家預你一定會好過預期好多嘛」。但無論如何，7月嗰次，股價已經冇跌得咁誇張.

18. 見到冇？好大程度就係一個管理期望嘅遊戲。

今次業績睇啲乜？照計上返400萬客，好過前兩季

19. 講返今次業績，留意都有個Excel，有埋其他公司，但其他未得閒搞。今晚（星期二晚）應搞埋Snap preview，儘快可能搞埋Tesla，雖然Tesla未必有乜好講。留意由上次搞呢個Excel（8月頭）到而家，NetFlix係升得最勁嘅（Tesla都不錯），甚至勁過FAAMG

20. NetFlix嘅，先講大數，市場預收入74.8億，按年升16%。會慢過上季，仲會係N咁多季最慢。但都話主要係睇期望（不過，今次股價之前已升咗一截）。每股盈利預2.52，升47%。留意公司過去幾次業績，都希望大家唔好著眼於個上客量，留意返而家開始賺到錢。

21. 不過，今次可能公司又唔介意你聚焦返個上客量。留意相當tricky嘅係，魷魚遊戲9月17號先上，正如我講，你畀月費嘛，啲舊客去睇，唔會收多咗錢，唔會對任何數字有影響，咁有幾多人係「因為」呢套嘢而新裝？我開頭覺得唔多，但諗諗下，又似乎真係有 — 因為呢套劇唔止在美國韓國受歡迎，似乎印度印尼菲律賓之類都幾受歡迎—嗰啲先係大市場呀！所以睇下個數字。

22. 用戶方面，第二季尾總訂戶2.09億人，按年升8%。7月嗰次業績時，公司話第三季你預9%。但照計點都會好過呢個數（如果差過就幾災難），即係十分粗略地，至少會去到2.13億左右，按季至少多4百萬，應該好過之前兩季（我計咋下，唔代表分析員預期）。仲有，留意埋個全年指引，應該會調高，但睇下同分析員估又爭幾多。

23. 仲要睇乜？睇埋啲客源嘅分佈。你睇百份比，明顯見到北美佔得越嚟越少。睇數字，上季直頭流失，因為飽和晒，雖然唔排除有人因為魷魚遊戲又睇返。但點講都好，個重點一定係亞太同拉丁美洲。正如我之前講，你大約都估到，菲律賓巴基斯坦孟加拉越南印度之類。但，有人以為針對呢啲市場要做返當地口味，又或者要用英文（全球語言），NetFlix就係話你知唔係！

公司當然有新增長，不能只靠下一套鱆紅魚遊戲

24. 最後，講咗N次，你知我知人人知，NetFlix嘅用戶增長，點都會見頂的（仲要係入唔到大陸）。咁之後點？人地當然諗早幾步。最簡單，係加價，寫過幾次，唔通加10蚊你唔睇？但一般投資者唔係太鍾意你只係靠加價，你見咩洗頭水一樣年年加價，但消費品股唔會太靚仔。

25. 仲有乜？應該之後講，但我講定我嘅幾個猜測。

26. 首先，週邊產品，我都諗到嘅，公司一早諗到，亦一早有做，搵咗迪士尼嘅人。大家可能都聽過，迪士尼賣勞蘇公仔先最好搵。不過亦唔係咁易，你都估到，大家都會買淘寶，而你NetFlix啲產品，似乎不能告人侵權。況且迪士尼經營多年，個個由細到大畀人洗腦要做Elsa公主，加上你畀人夾咗去迪士尼樂園，個氣氛係唔同的，你家長或男朋友總不能話出去淘寶買平一截。但，除咗迪士尼外，我諗唔到有第間更加有潛質。

27. 仲有，一路都有人講，賣廣告。固然我知道「賣廣告好影響觀眾體驗」，咪就係靠班勁人去諗下點唔咁影響你體驗。況且亦係trade off，公司之前一路高增長當然唔賣，但到見頂，似乎都要。又或者，好似Youtube咁，「都係好影響體驗」，但你一樣照睇。再唔係，出個Ad free版，一個月收你一美金就夠啦。2億用戶喎，我當一半（呢個數亂估咋下）會畀，都已經一季6億美金，而家收入先75億咋。

28. 公司唔諗廣告？幾時都諗！爭在點去做，幾時做，點做得好啲咁解。留意，之前NetFlix主動公佈埋啲劇有幾多人睇。真係唔係陰謀論，平時公司當到最高機密，做乜會主動出？你估下畀咩人睇？好可能同廣告有關吧。

29. 當然仲有，公司會出自己game，魷魚遊戲添呀。但絶對未成熟，但幾時都係未成就先值得期望，畀佢搞得掂，就有新增長引擎，你要等成熟晒就蚊都瞓。

30. 至於Snap同Tesla？應該今晚（星期二晚，星期三朝）寫。Tesla星期三收市出，Snap星期四收市出。Tesla實在冇乜好寫，雖然多人留意。Snap就有嘢寫，但冇乜人留意，雖然我一直都係想買。但真係波幅太大又太貴。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。