星期六講座，WeBull開戶送1000蚊股票。中國GDP數字遠遜預期，股災未？微軟同SalesForce新高。每次股災投資者都轉投ETF。魷魚遊戲比普通劇受歡迎100倍。十年後嘅30大消費者市場。秘撈最緊要有耐性。Hosting Economy會變到Creator Economy咁大。拉丁美洲一鑊泡之謎。 (Patreon)

小廣告兩則—星期六講座，WeBull開戶送1000蚊股票

快評兩句：中國GDP數字遠遜預期，股災未？

大師冇點你：微軟同SalesForce新高

每日一圖— 每次股災投資者都轉投ETF。魷魚遊戲比普通劇受歡迎100倍。十年後嘅30大消費者市場

Good Read — 秘撈最緊要有耐性。Hosting Economy會變到Creator Economy咁大。拉丁美洲一鑊泡之謎。

FB Post Summary —　李氏力場。微軟新高。記得找卡數。我的快樂時代續篇。Donki VIP活動戰記。港媽打工換宿。

小廣告兩則—星期六講座，WeBull開戶送1000股票

1. 有啲私務（主要係樓上鑽嘢），所以篇NetFlix星期二日頭先出，留意星期二美股收市出業績，即係香港星期三朝，應該仲有足夠時間畀你睇。

2. 短廣告兩個，首先，星期六嘅尖沙嘴講座，記住報名。內容唔會在第度公開，呢度都唔會，會講嚟緊兩個月部署，我會買乜股，仲有你最擔心嗰啲咩通脹呀，恒大呀，加息呀，縮表呀嗰啲問題。上次因為打風改期，咁報咗名嘅唔使再報，記得到時出現。想報名嘅，呢度。嚟唔到到嘅可以之後網上重溫，不過價錢一樣。到時可以搵我合照同拎本書畀我簽名。仲有，可以預先發兩條問題去homeblogger，必定回答。

3. 第二個仲好玩，但我仲未得閒在Facebook寫。

4. 上次咪同大家分享過Mox？你又有錢拎，我又有錢拎。今次類似，但唔係Virtual Bank，係券商，微牛 WeBull，基本上全世界都係抄RobinHood，富途又好華盛又好USmart又好，甚至美國SoFi或者喜鵲都係一樣

5. 但，話知佢，我地食窮啲股東，有錢齊齊拎。你去WeBull開戶，會送返1000蚊股票畀你（係送一股高通Qualcomm）．條件係你要買一次美股，同埋Keep 港紙1萬蚊，當然要有香港身份證，同埋只限新用戶。

6. 咁我，都會係有錢分返的，講過我一定披露呢啲。大家想自肥又好，益我又好，就去開個戶吧。拎完股票咪沽貨走。

7. 記住記住要用我嘅referral link：　https://a.webull.hk/i/IvanLi

8. 條件細則在呢度。最好唔好問我，因為我都答你唔到。

快評兩句：中國GDP數字遠遜預期，股災未？

9. 大市嘅，真係冇乜好講。港股先好嘢，首先個成交極之thin，完全唔知想點。

10. 但更好嘢嘅係，啲股票好多都唔點郁，至少我嗰啲係。你睇我個持倉（HK4）（文章底你可以download埋個Excel），差不多全部都係1%以內！唯一一隻例外就係早排係咁趺嘅安踏2020。

11. 咁當然你話東岳189，理文746嗰啲都反彈嘅，但我冇渣嘛。

12. 另外，留意下，中國出咗第3季嘅GDP數據，係相當差嘅，仲要低過預期。但你見股市？乜反應都冇。呢個好值得你思考。

13. 首先，你見股市對經濟消息，係真係可以絶冇反應嘅！經濟嘅嘢我都會睇，但你唔好以為係經濟好股票就升，經濟差就跌，呢種想法真係太天真，股票郁得快好多，仲要係行在經濟前

14. 另外，你可以諗下，如果出完個數，今日恒指跌返400點，你就必然見到會講係「因為經濟數據差，所以點點點」。但你諗真啲，唔係好奇怪咩？如果係跌，你就覺得有關。如果唔跌呢？你又覺得冇關。如果你係呢種心態嘅，都係有啲問題 —點解你判斷一樣嘢有冇關，要睇個市場反應點？

大師冇點你：微軟同SalesForce新高

15. 就真係只寫一句，微軟同SalesForce都創咗新高，就真係唔使咩特別原因。好公司自然會慢慢增長，有時行快咗，有時行慢咗，但個長期趨勢係升嘅。

16. 我在Facebook都快寫咗幾句，留意微軟就快會大過蘋果。蘋果呢排係跑輸嘅，但我唔會太悲觀。賣iPHone 都事小，我想講蘋果仲有一個增長點，冇乜人講，就係廣告。我記得以前都寫過，iOS update，美其名係保護用家私隱，但實際上可以打擊Facebook，仲可以將啲廣告收入拎返嚟自己袋，一舉三得。而家見到有初步成果的，有機會再講。但梗係一啲未有太多人知嘅嘢先有意思，如果畀佢搞得掂，股價又有理由再上（正如Amazon都係，暫時冇乜人講佢嘅廣告收入）

每日一圖— 每次股災投資者都轉投ETF。魷魚遊戲比普通劇受歡迎100倍。十年後嘅30大消費者市場

17. 每次股災投資者都轉投ETF—個題夠晒直接啦，留意，ETF嘅流入，係放埋同傳統基金相比。並唔止係因為投資者自己輸錢之後就畀錢人地管算，而係股災後就唔要基金，要ETF。好可能因為發現啲基金都係會輸大錢，不如自己買ETF算。BlackRock近年咁強，都係多得呢樣嘢（當然BlackRock唔止做ETF）

18. 魷魚遊戲比普通劇受歡迎100倍—打橫係推出後嘅日數，打楝係個Demand Multiplier，代表套劇同普通劇相比，受歡迎程度多幾多。魷魚遊戲係100倍—呢個本身冇乜意外，因為「普通劇」真係可以好普通，之前有啲劇可以更高—但魷魚遊戲奇在，個後勁好好，你見其他好多係兩三日就見頂，呢套唔係。我都發現到，因為本人就係第一日已經睇晒（失業人士嘛），都唔覺好多人講，但之後先越嚟越流行。點解會咁？值得研究下。

19. 十年後嘅30大消費者市場—指嘅係，有幾多人一日有11蚊美金去用，當然計及埋當地物價。頭三位冇變，中國印度美國，多人嘛。然後睇而家第四五位，俄羅斯同日本，嚟緊會跌，因為人口萎縮。亦因為此消彼長。印尼會跳上第四，好簡單，多人。但仲有咩國家大躍進？你都估到，多數亞洲國家。巴基斯坦，孟加拉，菲律賓，越南。因為多人，同埋而家窮！「可以諗下有乜商機」，特別係巴基斯坦孟加拉。

Good Read — 秘撈最緊要有耐性。Hosting Economy會變到Creator Economy咁大。拉丁美洲一鑊泡之謎。

20. 秘撈最緊要有耐性— 唔係講會畀人發現之類，而係講一開頭必然係冇乜錢，甚至完全冇錢。做Content Creator/KOL亦都係。固然你本身係明星就冇問題，但你本身已經係明星嘛！咁你可以話我一開Patreon第一個月都500人（多謝大家！），但因為我之前Facebook Page都成萬幾人嘛！咁你又可以話我 Facebook Page好快都有幾千人。但因為我之前上網寫咗十幾廿年文嘛，一個仙都冇，仲係咁畀人鬧。我始終認為，好嘢，係要時間煲出嚟的，投資係，創作係，各種感情關係都係。可惜我發現而家啲人個個只係想一夜爆紅，可能見到其他例子—而有冇諗過人地根本都唔係「一夜」爆紅？例如我個Patreon咁，唔係我寫文寫咗咁多年，邊會個頭開得靚？

21. Hosting Economy會變到Creator Economy咁大—留意講嗰個係Airbnb嘅高層。Hosting Economy 唔知點譯中文，就係做包租公包租婆吧．Creator Economy 大約有5000萬人，而Airbnb只係得約得600萬個listing，計埋其他平台都唔會過1000萬。當然係Airbnb想話畀大家知盤生意大有可為。我都相信係，不過始終覺得有啲生意做到大就會出問題，而家Facebook咁都煩。Airbnb嘅，你估都估到最大嘅問題，當然係啲人入住，然後畀人侵犯，甚至殺埋。以前Bloomberg做過個故事，講Airbnb有專門一隊人，好似特工咁，去對付呢啲問題—就係同啲受害者傾和解，賠一舊大錢，唔好鬧大件事，「人死不能復生呀」。你越做越大，就更加難搞。

22. 拉丁美洲一鑊泡之謎 — Facebook 都有簡介過，呢篇係全篇文。你睇30年前甚至再早啲，拉丁美洲就係等於咩金磚四國咁。但30年後，你見韓國波蘭土耳其中國等等全部後來居上。原因係乜？作者認為應該係產業結構，你靠出口商品原材料，個經濟難持續，因為value add低。你有冇聽過拉丁美洲有乜大工業，或者品牌？都唔好講科企。文中有量度唔同經濟體系出口嘅複雜性，阿根廷巴西之類，一路退步的。

FB Post Summary —　李氏力場。微軟新高。記得找卡數。我的快樂時代續篇。Donki VIP活動戰記。港媽打工換宿。

23. 繼續相當多產。

24. 李氏力場— 無聊文一篇，純粹講李嘉誠李澤鉅日日增持長實，唯獨係收市掛八號波嗰日冇，「仲唔係有內幕」？同場加映，唔好以為自己好重要，同埋有錢人更加大條道理叫你做免費嘢

25. 微軟新高 — 冇乜特別嘢，我唔明點解好多人覺得股票要「有原因」先升。今年升足四成，就快會過蘋果頭，成為市值最高公司了。

26. 記得找卡數— 都提返大家，之前出咗Mox Credit 用嚟消費嗰啲，記住係要找卡數的，唔好到時畀人罰錢。我就7號月結單，下個月1號找數，唔知係咪個個都係。

27. 我的快樂時代續篇— 之前篇「我的快樂時代」好受歡迎，問大家最懷念邊個年代。我就係大學年代。呢篇話埋你知點解，唔係因為當年多錢或好多朋友，但因為當年全無顧忌，做嘢唔諗後果。打後咁多年都不能咁了。

28. Donki VIP活動戰記— 冇乜特別，純分享返VIP活動。又，打從埃汾太去咗次活動後，股價就反彈不少，之前Pan Pacific （7532 JP）一路跑輸的，唔好以為香港好受歡迎就股價會掂。但另一隻，壽司郎母企（3563 JP），就股價好勁。

29. 港媽打工換宿— 無聊嘢，但實多人睇。同場加映點解珍珠奶茶叫Bubble Tea，冋埋點解有 叉雞飯 冇 雞叉飯。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。