業績 生意大拆解 LVMH 同 BlackRock　（有晒Excel） (Patreon)

點解要搞咁多嘢，睇業績睇間公司點賺錢？

LVMH是業績好教材—估下LVMH純利率 毛利率幾多？

LVMH乜嘢產品最賺錢？邊個市場貢獻最多？（有晒Excel）

BlackRock—你冇聽過嘅金融霸王（有晒Excel）

點解AUM 跌但收入升利潤升股價升？

明明話渣咗好多恒大，股市又差，點解收入升利潤升股價升？

BlackRock profit margin仲高過賣LV，問你服未

1. 忽然週末多咗唔少新讀者，可能係富途條片幫到手吸客，如果你係因為富途條片嚟嘅，PM話我知啦。

2. 介紹返畀新讀者知，週末一般我會有篇專題文，多數都相當長，相當深入。因為要用好多時間，有時（特別係月尾）會因為事忙遲出，但多數都有。聽聞好多人都好鍾意呢個環節

3. 另外講返，十月頭原本在尖沙咀有個真人講座，打風取消咗，而家改咗去今個星期六（10月23日），報名呢度。會講嚟緊兩個月睇嘅嘢，仲有我啲各樣股票嘅表現，同埋各種想法。內容就唔會第二度貼嘅，上次都冇貼過。

4. 篇幅關係，NetFlix同Snap 仲有Tesla嘅業績preview，留返下篇先。Netflix星期二收市後出（香港星期三天光），我應該會星期一或星期二寫畀你。

點解要搞咁多嘢，睇業績睇間公司點賺錢？

5. 今次專題，睇返兩間公司（我買咗乜在呢度有）嘅業績，LVMH同埋Black Rock，另外我有幫你入埋晒啲數。早前已經有業績速評。

6. 有啲人心諗，點解要睇呢啲？答案係，你認真睇間公司，至少知道佢做乜，點賺錢，有乜挑戰，咁好多時你會安心啲。如果你唔理間公司做乜嘅，咁同你求其買隻三四線微信女股冇分別啫，你就好難坐得穩，亦唔敢買得大，畀你賺到錢都會最後輸返。而我應該寫過好多次，股票最難玩係因為有「價格」，你點講間公司掂定唔掂，冇意思的，再好嘅嘢去到某個位都貴，再差嘅嘢都仲有個價。你唔睇數字，亦冇法了解間公司。

LVMH是業績好教材

7. 首先揀嘅係「奢侈品美心」或者「奢侈品味將軍」嘅LVMH，冇錯係LV袋Louis Vuitton嘅母公司，但仲有好多好業務。

8. 點解揀呢間講？除咗因為佢早出業績，亦因為呢間係幾適合新手去睇嘅公司。因為業務大家日常見到（雖然大客一次買幾多你未必見到），生意又唔會難明，加上業務多瓣數，又有唔同地方。而公司啲數亦都算易睇，冇乜古怪嘢，冇乜咩restate，冇乜好深嘅會計嘢

9. 公司網站，相當清楚咁列出啲投資者有關嘅嘢。差不多每次都係有個業績新聞稿，然後有個業績presentation，如果係半年或全年會多嘢睇，例如半年報先睇到公司不同地方收入嘅實數。

10. 另外，想十分簡潔嘅，公司有個Snapshot ，但好似一年先整一張，有點慢。呢張係2020年。

11. 仲有想講，作為世界頭20大市值嘅公司，仲係歐洲最大公司，你見到業績係冇乜新聞嘅！因為係歐洲股，又冇在美國上市，平時唔多人理。我好似係出完第二日先知的。你見報導都唔多，例如呢篇。

12. 最新業績，我費事搬字過紙講好多，而反正季度業績連利潤都唔講，只講收入。但正如公司講，今年頭三季嘅收入，已經係歷史新高。呢個好重要，因為你只睇按年升幅，就往往因為舊年疫情下低基數而大扭曲（而LVMH舊年都算重創，雖然回復得快）。咁公司話你知，頭三季收入歷史新高，即係仲高過疫情前，你就明白唔止係因為低基數。留意返公司好多數字都會拎返嚟同2019比

13. 不過你睇，頭三季同2019年同期比，收入升15%，又係咪極好呢？就見仁見智。當然大家知係睇預期，咁應該同預期相差唔係太遠。

14. 再講落去之前，利用公司呢張圖，解一樣嘢。你見收入同2019同期升15%，係reported growth，官方財報嘅數。咁organic growth 就只得11%，係乜嚟？就係踢走咗 currency effect同埋 structural impact．留意唔少跨國公司都會有呢啲嘢。

15. Currency effect大家應該易明，呢類公司，全世界開店，好多都係實體生意，咁你收入會有不同貨幣，但佢報表係歐元（唔係美金！），所以啲匯率會幾影響佢。一般投資者都唔睇Currency effect，你因為匯率靚仔賺多咗只係好彩，正如你因為匯率不利賺少咗亦唔係你問題，大家係聚集一啲公司專長嘅嘢，能夠控制到嘅嘢（就係自己嘅品牌，銷售，宣傳之類）。你睇Nike或者有啲航空公司都會係咁

16. Structural impact係乜？好簡單，有時我買咗新業務，咁完成咗，佢啲數咪入埋帳，咪無啦啦多咗一大舊收入？咁應該踢走唔計的。又或者我係沽走咗啲業務，原理一樣。Structural impact就係講呢樣嘢，計organic應該踢走唔計。LVMH剛好就係完成咗一單大收購，完成收購Tiffany．

17. 教完你睇啲數字，可以睇返，點解一份普通嘅業績，但股價反應幾好？當然係因為之前股價跌咗落嚟，所以你出個業績普通已經夠。8月嗰時一個星期跌咗13%（我又使唔使止蝕？），因乜？當然係因為習近平嘅共同富裕甚麼。

18. 但，事後你見到真係反應過敏。正如公司講，奢侈品最大嘅客源，係啲中上級中產，唔係富豪。一個身家10億嘅富豪，你身家係一個100萬身家嘅中產1000倍，但你一條友買嘅LV，正路唔會多過佢地1000個夾埋。你而家事後見到，當時跌落嚟，就算係買嘅好時機。當然冇人保證之後唔會跌（原來買股票有得保證？），而家離高位都仲係跌咗10%，而中國同埋其他地方嘅經濟，又放慢緊。但，唔使諗咁多呢啲嘢嘅。

LVMH乜嘢產品最賺錢？邊個市場貢獻最多？

19. 最後可以畀你睇下，到底公司啲收入嚟自邊，利潤又嚟自邊度。

20. 先講產品，應該好易估到，收入最大貢獻，當然係Fashion and Leather Goods，LV，Christian Dior，CELINE之類，貢獻一半收入。每一門業務包括乜，上網站或者Snapshot都有。第二大貢獻你可能估唔到，係Selective Retailing，DFS同Sephora．另外留意Watches & Jewelry之前單位數，而家忽然佔比重多咗好多，當然係因為買咗Tiffany。呢個亦可能係公司做呢單收購嘅原因，想呢瓣嘅比重多返啲。

21. 仲有留意返，公司每半年先公司一次利潤。但睇返，以operating profit計，Fashion and Leather Goods貢獻得更多，七八成嘅利潤（疫情下更加單天保至尊咁滯）。化妝品同Selective retailing呢？利錢好低。特別係Selective retailing，收入佔唔少，利潤貢獻就好細。可見幾時都係做品牌好賺，但鬼唔知咩，就唔係咁易。當然自己做retail亦可以賣自己嘢嘅。

22. 地區呢？留意日本同法國係拆開出嚟的，應該係歷史原因。最大市場就係日本以外嘅亞洲（應該唔計中東），36%。咁大家估到，入面好多就係中國。但有幾大？有點難搞，首先睇你計唔計香港（但香港亦有其他地方嘅人嚟買），另外，中國係公司第二大市場。如果單一國家最大，應該就係美國，25%。咁即係中國係唔夠25%嘅，但會多過法國或日本嘅6至7%。法國以外嘅歐洲就15%，其他地方11%。

23. 另外留意下個走勢，見到同疫情前相比，美國，以及日本以外亞洲嘅份額升咗。日本大約不變，歐洲，法國，同埋其他地方都跌，大約都畀你見到個增長嚟自邊度。

24. 最後，畀呢個表你睇下，自己諗下有乜玄機，遲下我在Facebook 解。公司冇拆開中國或香港佔幾多，但，疫情前只係港紙都佔咗5%，等於成個法國或日本咁滯！而家得返3%，但你見亞洲區冇少到。點解？應該好大程度因為大陸人嚟唔到香港買，在國內買。

25. 真係最後，同你拆解埋公司成盤大數。就真係易睇的。留意個毛利率有六七成，100蚊生意執70蚊毛利左右，同你想像中同唔同？但另外 marketing and selling啲開支都大，再加埋交稅交得多。最後純利率，都只係十幾巴仙。係咪好暴利？又好似唔係。所以你見即使做到全世界最大，都只係4000億市值，同啲科企冇得比。不過又諗下，做到20大企業，都好誇張了。個護城河就真係個品牌，始終有個傳統，唔好話大陸人香港人，連美國人都未學得到。當然亦都係因為公司洗好多好多錢做marketing

BlackRock—你冇聽過嘅金融霸王

26. 有關BlackRock，會寫得短啲，因為上星期篇專題就係講公司來龍去脈，點賺錢，所以不再重覆，記得睇。

27. 另外，CNBC都有段片，講BlackRock堀起之路。但得罪講句，我覺得係嘥時間，同樣時間應該夠你睇完我篇文，入面講嘅嘢會更多更深入。固然有啲嘢係用片去解好啲，但亦有唔少嘢冇乜分別，而人就係睇字快過睇片或聽嘢的。

點解AUM 跌但收入升利潤升股價升？

28. 公司業績呢度，另外有個附件，舊文都教咗你點睇。留意，個AUM係按季跌嘅，都有啲意外，唔少人（包括我）都以為呢一季可以突跛10萬億（10 Trillion），點知去唔到，仲要係按季跌！

29. 原因係乜？好簡單，股市唔好！記住個AUM由兩部份組成，一方面係現有嘅東西，會因為市場升跌而跟住行。另一方面係你會有新錢入嚟，或者有客戶拎錢走。兩樣嘢可以相反方向。

30. 咁你會見到，今季仲係net inflow嘅，75b，實情公司已經連續N季net inflow，即使疫情股災嘅2020年第一季都係（但嗰季因為股災，個AUM當然跌到七彩）。留意，今季AUM跌咗32b，即係一來一回，股市跌令個AUM跌咗107b，大約係成個AUM嘅1%。冇你想像中咁波動，疫情嗰季就好誇張。

31. 留意雖然個AUM按季跌，公司嘅季度收入，同上季比仲係有得升。亦因為個「平均AUM」係升的，你報表上嘅係一季最後一日嘅數字啫。

32. 亦都留意下，個performance fee按年都跌好多，市道唔好嘛，但始終唔係主要收入。Base fee硬堀收你嘅，先係最好。

明明話渣咗好多恒大，股市又差，點解收入升利潤升股價升？

33. 其他嘅，都冇乜特別。留意按年計，見個人工開支升咗唔少，因為加咗人工。照計9月先生效，未反映晒的。

34. 亦因為加人工，同埋股市唔好，估AUM同 performance fee都跌，出面嘅期望比較低，股價之前亦跌咗落嚟。高位跌14%，我使唔使又「止蝕」？

35. 講到尾，AUM呢啲只係手段，收入先最實際，利潤就更佳。咁收入去到50.5億，街估48.2億。每個盈利10.95，街估9.39。收入同利潤都勝預期，股價當然靚仔。

36. 又係老道理，你見到，之前除咗驚加人工 驚AUM跌 驚performance fee差，仲有，話渣咗好多恒大債嘛，呢張圖好多人都見過啦。

37. 你睇，事後見到，根本就係過度擔心，嗰時就係買入機會。OPM之嘛，啲客輸錢，關BlackRock乜事—當然你輸晒錢冇AUM畀我抽水都係問題，但銀碼太細啦，幾億美金，好多錢？我當收你1% fee，幾億美金嘅1%，對公司嚟講，係乜？

38. 順手一提，近排匯控5都相當強。可見你如果走去因為咩「壞消息」沽貨幾咁笨。

BlackRock profit margin仲高過賣LV，問你服未

39. 最後想講樣嘢，雖然公司AUM 10萬億美金，但 Larry Fink十分謙虛，強調公司在全球 Financial Asset嘅 share，只不過係3%之嘛！十幾年前買完iShares嗰時2.4%，呢十幾年只係升咗少少。

40. 點解講呢啲？當然係想低調啲，強調自己公司係small potato，悶聲發大財。而家一大就會畀人搞，都有人提過BlackRock嘅地位太重要。咁，正如之前Facebook一樣，所有呢啲反競爭嘅講法都係，招股嗰時梗係將個market定義到好細，自己市佔率好高。但到畀人搞嗰時，當然個market就好，自己只係細公司。

41. 留意，你睇net profit margin，50億生意，純利17億，超過30%的。之前幾季都係咁。樓上咪講話，LV都只不過係15%？稅係一個問題，但LV稅前都未有30% profit margin！

42. 但當然，asset management 好大程度都係鬥減價，以本傷人，鬥做大。同你LV可以不停加價，又唔係同一回事。

43. 而且，公司只係過河濕腳，人地啲資產，你舔小小，個量夠大斬埋有柴，但都只係一季50億收入。人地賣LV一季可以賣150億！但當然，LV又要好多marketing expense啦。

44. 結果只係寫呢兩間，都寫5000字。唯有下一篇先寫NetFlix，Snap同Tesla 業績preview

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。