港股大成交抽上，英國股市疫後新高，美股都強但升勢唔太好全面．Bitcoin 6萬蚊 Tesla又升，Reopening買乜股．王維基1137 HKTV大成交抽上，北水買緊。日本人運動時間全球尾二？俄羅斯選舉做馬？Creator Economy 幫唔到共同富裕。美國連登推介一堆有用網站 (Patreon)

港股大成交抽上，英國股市疫後新高，美股都強但升勢唔太好全面

Bitcoin 6萬蚊 Tesla又升，Reopening買乜股

王維基1137 HKTV大成交抽上，北水買緊。

每日一圖— 日本人運動時間全球尾二？俄羅斯選舉做馬？

Good Read — Creator Economy 幫唔到共同富裕。美國連登推介一堆有用網站

FB Post Summary —　死親機Fastly 都升。LV唔驚共同富容，銷售已高過2019年。CRM摸頂的故事。途經北海道

港股大成交抽上，英國股市疫後新高，美股都強但升勢唔係好全面

1. 市況嘅，快講。港股反彈幾好，更難得係成交去到1800億，咩雷曼時刻鬥地主又唔知去咗邊，再講一次，睇埋啲垃圾對你冇乜益。當然大家已經做咗明智決定，「但如果有朋友仲係迷途嘅記得介紹佢過嚟」

2. 港股主力嘅，咪銀行股，美國香港都係咁，恒生11已經七連升，悶有悶好。亦部份多得匯控5帶挈（仲有啲礦股），英國股市都創咗疫後新高。上星期明報文有寫英國股市雖然萎縮，但唔代表不值得買，Attachment 有篇文

3. 美股嘅，望落幾強。有話係因為retail sales好，或者係業績好，不太重要。但留意，美股星期五個升勢唔係太全面（星期四就好全面），唔少我渣嘅嘢都仲要跌，詳情你可以睇個Live Excel，整埋畀你的了。

4. 另外都見到，個垃圾倉要跌，見到升勢又唔係咁全面。（入面有乜？下面講1137時有。實情個Live Excel都有，或睇舊文，呢篇同呢篇，貼咗幾十次，下次唔再貼架啦下！唔該平時聽書，或者善用個Index）

Bitcoin 6萬蚊 Tesla又升，Reopening買乜股

5. 另外都值得講，Bitcoin相當強，升返去到6萬蚊樓上 話好大機會美國會批ETF（BTCC係加拿大的），但留意，本身唔代表乜，好可能到時就反高潮。另外留意，啲ETF，好似係買期貨的，正如你原油ETF都係買期貨，唔係買桶油，有機會細講。

6. 咁順理成章地，Tesla都相當強。之前提過，另外留意下星期出業績，應該週末寫。

7. 我隻ETF BTCC（自己睇舊文，另外之前2月都買過一次，但已換馬去隻BTCC）都差不多回家。再一次見到，隻嘢插咗一半，我都係唔會走去止蝕的。由買嗰刻我都預可以輸晒，如果我低位止咗蝕而家又會揼心口了。

8. 最後跟進返，依然覺得都係Reopening係大勢，你見美國都開關，韓國都應該快。但你估到個大勢同你買股票買得中，又係兩回事。早兩日寫過可以買乜，呢篇，同呢篇。

9. 有讀者問，係咪買Booking.com Expedia嗰啲都得，又唔受油價影響。當然可以，舊文啲ETF都有渣。不過如果只揀一隻，我反而可能揀AirBNB，可惜冇錢，可能下個月先，希望未升天。（有冇讀者肯去做100蚊會員？「最好畀年費，我就有錢買AirBNB」，呢個Tier有乜福利？冇的，純粹你當自己錢多得滯賺夠想益我。但亦都真係有人加入，多謝先。）

10. 點解揀呢隻？希望有機會細講。但都係老原則，似乎有一定護城河，規模大，而係賺錢嘅唔係不停燒錢，仲有唔係已經升到痴晒線咁。

王維基1137 HKTV大成交抽上，北水買緊。

11. 新讀者可能唔知，呢隻兩個月之前買的，亦都有同大家講（實情除咗月供嘅太多外，其他每一隻我都會講），而家執緊27%，算係咁啦。港股呢啲咁惡劣嘅市況都逆市執三成喎，仲有一早估佢入港股通的。

12. 消息？係冇的。但見到成交都大，平時280萬股，星期五640萬。係咪北水買？有可能，但當然星期五嘅動作要過兩日先睇到。但呢排都仲係北水買緊，雖然唔算多。紀錄可以自己搵。

13. 順手講埋，啲咩技術指標，我差不多全部唔睇，頂多睇52星期新高新低，同埋成交量（有啲人都唔當呢啲係技術指標，總之我唔會去睇圖畫線之類）。睇成交真係真係有用的。最簡單咪睇當日成交同平時平均比。咁固然報價都會有（上一段1137個圖咪有），但你亦可以參考我個Live Excel，拎當日成交，再拎平時平均，再睇個比例，咪睇到（以上個圖用美股垃圾倉做例）。例如隻SGH係成交異動的。你鍾意自己計埋同52星期新低新高爭幾多，全部可以。免費嘢

每日一圖— 日本人運動時間全球尾二？俄羅斯選舉做馬？

14. 日本人運動時間全球尾二？— 睇返全世界嘅人，每星期做幾多鍾意運動（physical exercise）．荷蘭人德國人最多，應該符合你想像。意大利人法國人好少，都符答大家嘅stereotype．但，日本人居然尾二？係咪同你想像唔同？而中國人印度人都排到好高。可能係你嘅想像錯，又或者根本唔同人對physical exercise定義不同，或者日本人比較誠實，任你。原本嘅調查在呢度。

15. 俄羅斯選舉做馬？—十分好玩，俄羅斯選舉做馬你唔會意外，但好歹都要做場戲，都真係有得投票，有晒數字。但，就畀人拎啲數字嚟分析，就似乎露出馬腳。有人將啲數字貼個圖，投票率同支持普京嘅比例咁。你發現，畫出嚟，個圖有痕的！點解？因為好多數字都集中在80，85之類。正常唔應該係咁。哈，作數都真係要啲功夫。

Good Read — Creator Economy 幫唔到共同富裕。美國連登推介一堆有用的網站。

16. Creator Economy 幫唔到共同富裕 —老生常談嘢，話creator economy 原本係去除中介人，「民主化」（我相信只係作者自己一廂情願），但最後都係見到，小部份嘅Creator拎咗大部份嘅錢。但，根本完全係預期之中啦，自然現象，而且西瓜靠大邊，人都係鍾意有朋輩認同。另外有篇文反駁，遲下再解。

17. 一堆有用的網站—美國連登嘅強帖，叫啲人分享啲好用而冇乜人知嘅網站。我未閒全部去試，但見到以下呢啲不錯：Tineye 同 Foto Forensics（畀你查下張相有冇Edit過。Deepl.com （聲稱相當好用嘅翻譯，勁過Google），remove.bg（退地，即係張相整走背景），12ft.io（十分邪惡，幫你繞過paywall，會唔會畀人封？）

FB Post Summary —　死親機Fastly 都升。LV唔驚共同富容，銷售已高過2019年。CRM摸頂的故事。途經北海道

18. 呢排都寫得幾密

19. 死親機Fastly 都升—講返Fastly呢間公司，相當奇怪，就係大死機佢先升，唔止一次，可能要死機大家先知呢間名不經傳嘅公司都幾重要。又，往年佢因為冇咗大客（抖音）而大插時，我有諗過買，好彩只係諗下，今年跌足一半。

20. LV業績銷售已高過2019年—都未得閒詳細講，但，LV嘅銷售，你見報出嚟條數幾靚。但當然你可以話只係2020年低基數（其實唔算係，公司2020年影響都有，但唔係極大）。咁所以咪同返2019年比，你見到銷售同2019年比都有雙位數增長—但係咪好勁？又唔算。不過之前股價已跌咗落嚟，所以你出普通嘅數字都夠市場興奮。最重要係公司冇驚過共同富裕，話主力客仔唔係超級富豪。你諗真啲都係，點都係啲普通有錢人或上級中產買得多。

21. CRM摸頂的故事—之前呢度都略寫過，費事再詳細解。但你見我真係唔會走去「止蝕」，亦都唔會點睇Timing．就算買貴咗摸頂又點？冇錯之後潛足大半年水，但只要你間公司正正常常，啲生意慢慢返嚟，好大機會都係會升返嘅。你亦可以話，因為我多數買中啲比較好嘅公司，所以根本唔使「止蝕」，更加唔使「止賺」

22. 途經北海道—無聊文一則，但實多人睇。講返香港間2億市值嘅公司，做室內裝修嘅，但走去日本買地。100萬港紙咋，買到8000尺。不過係北海道啲山卡啦地方。應該係起酒店吧。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。