ivanliresearch

通脹升就業強業績好但債息就跌，美股升幅7個月最勁．美股銀行業績．富途老虎大跌，撈唔撈好？撈邊隻好？SportsRadar大升，唔知點解．有賭未為輸，但隻期權算失敗。「但都買到教訓」．Reopening Trade 買乜好 (Patreon)

Published:

2021-10-14 23:12:34

Imported:

2022-09

Content

通脹升就業強業績好但債息就跌，美股升幅7個月最勁

美股銀行業績

富途老虎大跌，撈唔撈好？撈邊隻好？

SportsRadar大升，唔知點解

有賭未為輸，但隻期權算失敗。「但都買到教訓」

Reopening Trade 買乜好

預告：Tesla Netflix Snap Preview，LVMH BlackRock Review

通脹升就業強業績好但債息就跌，美股升幅7個月最勁

1. 港股星期四放假，但我估星期五都唔會太好。美股方面就相當強勢，9月嘅調整，再一次畀你見到係買入嘅機會，即使你冇低位買，都千萬唔好震走，更唔好信咩10月股災（雖然冇人可以保證唔會）。

2. 唔想搞到咁複雜嘅，咪定期買，或者有錢就買。你見我都係，有錢就好快瞓入去，唔睇市況，亦唔多睇股價（咁有時有幾隻想買，咁有可能我會揀隻未升得好多嘅—但總之我買股票呢個決定真係唔理大市狂升定狂跌，頂多會影響我買乜，例如個市太癲可能買啲有咁高估值嘅嘢咁）

3. 講返，美股昨晚（星期四）係3月以嚟最大升幅，因乜事？實情冇乜事。固然你要講嘅可以好多原因，可能係就業數據好，又或者係銀行業績勁。問題係，如果個市跌，你又會見人話經濟好所以驚加息之類—的確有時會係咁，所以唔好畀啲市場評論拉住你走—你要知媒體講乜，但冇叫你要信晒。反正記者好多時都唔知自己講乜（否則發晒達啦）

4. 又睇下，我嘅美股倉算係跑贏大市（一早講咗US3先係最重，其他兩個好細），都再一次示範，唔係買大股就會升時跑輸。（昨日討論過呢個問題）。倉內嘅CRM（SalesForce）創新高，呢隻係幾好嘅教材，我摸頂買的，FB會詳細講，廢事在呢度霸咗字數。

5. 另外，垃圾倉繼續升，金額微不足道，但會係金絲雀，晴雨表，度下風險胃納

6. 股市好，科技股強，其中一個關鍵係，你見到債息依然係冇升。相當奇怪，跌足兩日，我應該講過好多次，唔好用你自然科學嗰啲思考方法去諗，唔好直線思考。否則你唔會明，點解星期三又話縮表，通脹數字又勁，然後星期四就業數據又勁，個債息反而跌？唔好夾硬搵理由。雖然，我依然相信個通脹係「暫時」，但暫到幾時就好深嘅問題，我估好可能你去到2022年先見到回落。

7. 呢啲我應該會在下星期六Seminar細講（因為週末專題寫呢啲又太短，平時寫又太長），報名呢度。

美股銀行業績

8. 銀行業績嘅，Morgan Stanley，WellsFargo，Bank of America，Citi．但反正我一間都冇買（我只有JP Morgan），亦冇乜推過，所以唔特別講。你可以入去啲link自己睇。月頭JP Morgan新高時，已經講過今季啲投行收入會好勁。

富途老虎大跌，撈唔撈好？撈邊隻好？

9. 都有讀者留意，富途（FUTU）同老虎（TIGR）大插，讀者話想撈。「我上完富途佢就出事，勁過成龍」，講笑。但講真，因為剛上去做完節目，就費事在Facebook講呢單（呢個亦係你地加入Patreon嘅益處，有時啲嘢我唔方便公海講）

10. 當然又係嗰啲政策嘢。有幾大影響？我完全唔知。當然，唔會話「政策風險無法量化」就唔撈得。問題係，同騰訊之類有啲唔同，富途老虎呢啲，根本從來唔係我想買嘅公司（畐途都可能有諗過下嘅），即係如果一路想買，咁就可能借呢啲機會。但如果從來都唔係特別鍾意，又好似唔值得咁做。因為如果你都唔信間公司，係比較難坐得穩的，聽日再跌多兩三成包你嚇到沽返。

11. 但，如果二選一，都係選富途，至少有啲錢賺，啲估值亦唔算好離地—而家係高位嘅三份一。啲業務亦都比較正常，真係有人用。

12. 順手講埋，其實呢堆嘢，包埋咩華盛，USMART，甚至嚟緊我會講嘅WeBull（有著數畀大家，我都有，密切留意），都係齊齊抄RobinHood，變相啲生意護城河唔高，咁就好睇邊個背後阿媽實力夠，同埋睇邊個行得最先（或者話抄得最快，隨你），咁呢方面，都係富途排先。老虎呢啲，規模爭太遠，我就唔會諗，上得山多終遇虎呀。

13. 不過，再講一次，「真係要二選一我會叫你揀富途」，但實情我會建議你，兩隻都唔好買。Why Bother？都話can’t kiss all the girl，我已經十分花心，但都仲有好多公司想買而冇買，有排未輪到呢啲。唔好只係因為跌咗就想飛入去，「正如唔好因為個女仔或男仔畀人飛咗你就衝埋去」，都要你本身鍾意先得架嘛。

SRAD大升，唔知點解

14. 快手一講，SportsRadar，SRAD，星期四忽然勁升。成交算多（100萬股，平時50萬），但唔算好誇張。升乜？我都唔知。我係冇買嘅，雖然有諗過下。但就有讀者買咗，都畀大家望返。有興趣可以睇返上次篇文，雖然上次到而家隻嘢係跌咗唔少的。

有賭未為輸，但隻期權算失敗。「但都買到教訓」

15. 最後講下，美股咁強，隻波音都仲要跌，認真失威。好可能係因為787又話有問題，我隻期權就當然已經輸咗唔少。

16. 我依然仲係相當有信心，中國會宣佈大手買返波音飛機。但，到時係咪波音股價就即升好多？都未必。又或者，可能隻期權彈高都好，都彈唔返上我買嘅位。

17. 當然隻嘢又未到期，仲有希望，但暫時我覺得呢個Trade係失敗嘅。不過，首先，次次贏咩。二來，你見我只係買1000美金，志在玩下。三來，你由呢個例子都見到，你有個想法，覺得件事會發生，有利某公司—同你真係可以買佢贏到錢，真係兩回事。你就咁出個Post然後三個月後中咗出嚟認叻梗係易，但你真金白銀落去賭，就唔係咁易，都已經唔好講你中途有機會震走。所以呢啲Event Driven Trade唔易做，「除非有內幕」。中咗我當然出去打鑼打鼓，但搞咁多嘢，都係買完好公司長期持有簡單好多。