通脹超預期，又話縮表，但納指照跑贏，垃圾倉照大升，點解？業績：LVMH普通但照升，JP Morgan勁但跌，BlackRock AUM跌但股價升．新興市場長期跑輸。低收入人士收入增長卒之跑贏高收入！資產管理行業十年最好景。MetaVerse！ (Patreon)

通脹超預期，又話縮表，但納指照跑贏，垃圾倉照大升，點解？

業績：LVMH普通但照升，JP Morgan勁但跌，BlackRock AUM跌但股價升

每日一圖— 新興市場長期跑輸。低收入人士收入增長卒之跑贏高收入！

Good Read — 資產管理行業十年最好景。MetaVerse！

FB Post Summary —　富途節目。八號風球唱唔到美金。是日樓盤

1. 記憶中好似冇試過咁短時間打兩次八號波，仲要又撞埋重陽，港股連續兩日冇市。但Anyway，美股都大把嘢寫。實情今日根本寫唔晒，堆業績我會留返聽日甚至週末再寫深入啲。因為有啲數仲要慢慢入。

2. 另外，上星期六（10月9日）我個尖沙咀講座因為打風取消咗。而家有期了，都會係星期六，下個星期六（10月23日），時間地點照舊。報咗名嘅到時出現，未報嘅可以再報。

通脹超預期，又話縮表，但納指照跑贏，垃圾倉照大升，點解？

3. 雖然港股冇市，但美股都大把嘢講。首先係通脹數字，CPI高過預期，30年新高。另外又有聯儲局講11月中啟動縮表。但你見美股唔太差，最有趣係納指跑出。我個垃圾倉都大升，隻SGH大成交下大升，應該係之前出咗業績

4. 原因？似乎係因為債息不升反跌。點解會咁？唔知，但亦可能係你睇核心CPI，就低過預期的，即係只係因為能源價推起咗，「應該暫時」。

5. 又你見到，今日我啲美股就跑贏大市啦，幾個指數都跑贏。

6. 都順便半回應返，有讀者問係咪如果只買大公司，就多數跌又少過大市升又少過大市？答案就唔係的，都係睇個市由乜推動。

LVMH業績普通但照升，JP Morgan業績勁但跌，BlackRock AUM跌但股價升

7. 另外，三間有買嘅公司出咗業績，全部開市前出咗。首先係LVMH，業績普普通通，同預期差不多，但管理層完全唔擔心大陸「共同富裕」嘅問題。你見出完股價都幾強，帶動埋其他奢侈品股（例如愛馬士）。當然之前股價跌咗不少亦係原因。

8. 之後係JP Morgan，業績勁的。每股盈利3.74，街估係3。收入304億，街估299億。投行收入30.3億，亦好過街估嘅26.5億。但股價照跌，可能因為已經升得太多，今年升咗30%，跑贏大市一截。乜都反映晒了，亦可能同債息跌返有關。

9. 最後係週末先寫過嘅BlackRock（你睇啲文幾咁有用！），業績亦係好，股價即升。每股盈利10.89，街估9.39。收入50.5億，街估48.2億。不過留意，個AUM低過預期，去唔到10萬億，得9.5萬億，低過分析員估，仲要按季倒退。但收入同盈利先係最重要，AUM只係手段。而第三季股市差當然都影響AUM。

10. 應該會星期四或週末再寫深入啲。

每日一圖— 新興市場長期跑輸。低收入人士收入增長卒之跑贏高收入！

11. 新興市場長期跑輸。- 呢個訊息量夠晒大。固然中國股市近N年長期跑輸，有其本身嘅問題，但之前都貼過，新興市場整體近十年都係跑輸一大截，美股獨大。不過留意，之前十年係掉番轉。另外，個圖係Financial Times，個故事其實係俄羅斯同越南會升級！俄羅斯由Secondary Emerging Market 升做advanced emerging，越南就由Frontier 升做Secondary Emerging．當然只係FTSE富時嘅分級。有機會可能Facebook寫下。至於咩係「新興市場」？舊文有寫。

12. 低收入人士收入增長卒之跑贏高收入！—你可能都聽過K型復蘇，疫情下被炒嘅係低收入人士（服務業，餐廳酒店），高收入人士被炒機會低好多，加上仲要股樓皆升。不過如果只睇收入增長，反而係低收入人士跑贏—唔多唔少因為各種派錢措施。但，呢度當然只係計收入，冇計財富，高收入人士啲股樓升就冇計入去了。

Good Read — 資產管理行業十年最好景。MetaVerse！

13. 資產管理行業十年最好景— 2020年，成個行業嘅AUM去到115 trillion（留意Black Rock差不多有10 trillion），AUM增長係金融海嘯後第二好嘅一年，唔止因為股市表現好，淨流入都勁。點解？好多時就係股災後啲人先的起心肝想搵人幫佢。文入面有更詳細分析。亦證明我買Blackrock有先見之明（2020年中已經想買了）

14. MetaVerse！—Benedict Evans嘅文，以前都貼過，今次呢篇算短。講返Metaverse，實在係今年嘅buzzword（你未知嘅記住學），好多科企公司都提。事實金融界亦都提，我一位好朋友（做Big Tech firm的）都有留意到。乜嘢係Metaverse？呢篇文唔算解得好清楚，只係講AR/VR，但留意一樣嘢，next cycle．過去十五年，差不多所有嘢都係由智能手機帶動，但大家都知市場同技術都成熟，咁下一樣係乜？加密貨幣狂熱者固然覺得係加密貨幣，但另外更多人認為就係Metaverse。例如你見Facebook就好大力咁去投資，而家係digital marketing嘅霸主，希望第時係Metaverse廣告嘅霸主

FB Post Summary —　富途節目。八號風球唱唔到美金。是日樓盤

15. 富途節目 —是咁的，早排上去富途錄咗個節目，只係主持人訪問我，唔使答埋啲師奶問題，或者大市點睇。由我工作呀，創作呀，講到投資心法咁。「即係好似我本書咁」。原定今星期五播，但因為打風，可能佢地未夠時間，到播出會再講。好睇的

16. 八號風球唱唔到美金— 類似嘅問題之前都寫過，但幾有趣的。我個情況係美金轉港紙，但實情八號波，好多Ebanking 唱外幣都係做唔到的。反而半夜呀，聖誕呀之類嘅日子就得。背後同銀行有冇人返工有關。咁如果你趕住買美股都有啲煩，自己做預備

17. 是日樓盤— 講長實嘅 #LYOS（原來要有埋個#）。又日文又韓文hashtag，原來係……洪水橋。順手講埋香港樓盤各種古怪嘅廣告同名字，都係慾望嘅投射。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。