Tesla 低位已升44%，下星期出業績．Reopening：國泰293，或者美股ETF．我嘅港股倉就跑贏，ATMX又跌，可能我會買多隻。但只係考慮下 (Patreon)

Tesla 低位已升44%，下星期出業績

Reopening：國泰293，或者美股ETF

我嘅港股倉就跑贏，ATMX又跌，可能我會買多隻。但只係考慮下

Tesla 低位已升44%，下星期出業績

1. 都好耐冇特別寫過Tesla，今日又寫下。特別有趣嘅係，呢個Patreon到而家，我只係短炒過兩次—第一次係Tesla，第二次係早排買波音期權。你勉強可以計埋2月時同你講CCL 嘉年華郵輪 Carnival，或者3月寫嘅理文化工，呢兩隻我冇買，但我都力推。咁你睇到，往績都算不錯，「唔係只係識買完唔沽」，但你見我真係要相當有信心先會做呢啲call，當中仲要有兩隻我冇買

2. 但講返Tesla，係最有趣嘅一隻。唔計我N年前買過又沽咗（不要提了），新讀者重溫下，故事係舊年年尾，Tesla卒之入標普指數，咁因為一入就去到頭十大，所以啲被動基金買盤好多，我就博短炒一轉，成功咗，都好多讀者有跟。

3. 但留意，我都係冇「食糊」，一路有得佢升。然後去到今年年頭（睇圖），九百蚊，之後二三月殺發夢股時高位跌三成幾，當時我沽咗一半，剩低嘅零成本咁滯，直到今日。

4. 好啦，做乜講？因為近期股價相當強勢。年頭至今只係升11%—但因為二三月時大瀉過，你由今年低位到而家，已經升44%。

5. 非常之靚仔，近幾個月慢慢咁升上去，任你買。你見呢啲冇乜新聞嘅時間，先係最好買股票嘅時機，唔係好消息升咗你又追，壞消息跌你又沽。

6. 但真係要解，近來嘅強勢都有原因。賣車之類都唔係重點，其中一個重點當然因為Bitcoin低位升返好多好多，10月已經升三成。而Tesla係買落唔少嘅。

7. 仲有另一樣嘢，好少人會講。你見幾間科企，都面對不同程度嘅監管。偏偏Tesla，就係一間冇呢啲問題嘅公司。最多就係Elon Musk食下大麻，或者在twitter亂講嘢畀證監罰，或者種族歧視賠億幾美金咁。但唔係嗰種壟斷指控，世界公敵。可能都有啲人避開 FAAMG而買佢（同樣地，NetFlix近來股價都好強）

8. 話時話，公司早排開股東會，原本股東話踢佢細佬同埋梅鐸個仔出董事會，但又好似冇咗聲氣。至於公司本身，10月20號出業績，到時有機會preview下，但出車量之類一早講咗，多數冇乜驚喜，又係睇啲碳排放交易，同埋炒Bitcoin

Reopening：國泰293，或者美股ETF

9. 另外都想講一排，你見國泰293股價好強，過去一個月升8%，跑贏晒大市。又再證明係炒預期，甚至根本唔使有乜好消息，夠殘就得。

10. 而你見昨日除咗國泰，仲有堆澳門股都強。加埋啲大陸嘅餐飲股（唔肯定關唔關事），我就認為，個大方向都真係要炒返reopening了。由於種種原因，你見全世界開始慢接受與病毒共存，因為啲措施真係太影響經濟，甚至影響供應鏈（例如越南封城）。況且有咗疫苗，當然唔係完美，但你話好似舊年年中咁大爆發嘅機會，應該細咗。

11. 同時間，你見到真係開放旅遊，唔同地方都係。新加坡，峇里，布吉，歐洲就更唔使講。而家你打咗針嘅，外遊真係做到，好多地方都唔使隔離，搞到我都心思思想去。當然你返到香港要隔離就後話（但，我咪去歐洲住半年咯！），或者堅持要去日本韓國台灣，都仲係未得。

12. 好啦，政治嘅嘢我唔講亦唔關心。最關心，有乜炒？如果只睇港股反而窄，大陸航空股就反而睇大陸入面嘅出遊，香港啲零售股就要睇大陸香港幾時通關。

13. 嚟嚟去去可能只係國泰（但都好視乎大陸通關！），但我冇乜興趣，太難炒，涉及太多政治。加上周期嘢。所以，不如睇美股吧！

14. 睇啲主題ETF，主要三間（有其他你話我知），幫你睇晒邊間做管理人，收費，規模，同埋渣住乜。你見近一個月真係跑贏晒

15. 第一隻真係出名，JETS，規模亦係三隻中最大，37億。收費0.6%。留意佢差不多完全係Airline嘅股票，管理人係U.S. Global Investors，我之前都唔識。間公司本身有上市，叫GROW，但好細

16. 第二隻，PEJ，管理人夠大，景順Invesco，收費0.63%，規模14億。留意佢係主打Leisure and Entertainment，所以持股有麥當勞 星巴克 迪士尼 ，仲有戲院。

17. 第三隻，AWAY，聽個名都知係乜。但定位係Travel Technology，收費最貴，0.75%，規模最細，3億資產。管理人係叫ETF Managers（個名就係咁！）， 持股好多科技股，有埋香港或美國上市嘅大陸公司。

18. 邊隻好？等於你問人邊個套餐好，冇答案，睇你口味。睇好航空公司咪JETS，科技股咪AWAY，餐廳之類嘅大名咪PEJ。

19. 其實呢類嘢已經可以放篇週末專題，有機會寫多啲。固然你上網就咁都搵到，但我又係幫你整理晒。

20. 不過整體你見我反而少買主題ETF，管理費比較貴都唔係問題，問題係揀啲股未必啱心水，即係好似食飯食套餐咁 —但又唔見得ETF套餐特別平嘛。美股可以一股股咁買，你買齊幾十隻就難，但買幾隻自己玩唔難。仲有，買個股學到嘅嘢係多啲的，你買ETF一定冇可能去睇晒幾十隻股票。咁所以只係啱你忽然有個諗法用咯，即係都係短啲嘅。

21. 當然，唯一例外係啲指數ETF，美股港股我固然有買，其他市場嘅我都遲下講下。雖然你見我買日本股，都唔買ETF的。冇咁好玩嘛。

我嘅港股倉就跑贏，ATMX又跌，可能我會買多隻。但只係考慮下

22. 港股嘛，廢事日日講，但強勢幾日又跌過，似乎又係驚監管科企嗰樣嘢，明顯又係科指跌得多啲。。冇法，都係不停在擔心中渡過，但，都話有個講法叫climb the wall of worry，牛市當然係在悲觀中誕生，在懷疑中成長，你睇美股都好，2020年3月咪又係個個話世界末日，之後連升半年都仲係大把人話同經濟脫節，到個個都信，就冇戲唱啦。咁唔係話港股會牛市或阿里巴巴會牛市，但，堆嘢低位都反彈不少啦。

23. 而一樣，ATMX之中，我只係得騰訊，咁到呢啲日子我又跑贏返了（實情唔使太執著於呢樣嘢，當然你長期升又少過人跌就多過人就有問題）。我開始考慮應該買返啲阿里巴巴。考慮咋下，況且我會係月供，或者渣好耐，跌幾成都唔多care

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。