都話美團罰錢係「好消息」。點樣在高位沽走746？我就做唔到啦。印度股市大過英國。40年前工人嘅生產力同人工開始脫節。全球標準稅率。The Contrarian 書評。NetFlix如何揀Thumbnail。點解冇買阿里巴巴。 (Patreon)

大師冇點你—都話美團罰錢係「好消息」

點樣在高位沽走746？我就做唔到啦

每日一圖— 印度股市大過英國。40年前工人嘅生產力同人工開始脫節。全球標準稅率

Good Read — The Contrarian 書評。NetFlix如何揀Thumbnail。點解冇買阿里巴巴。

FB Post Summary —　我的快樂時代。愛情回水一日遊。愛拼才會贏。考慮考慮到幾時？1000円買間日本公司

1. 首先，上星期六由於颱風關係，個講座取消咗，我覺得對我都係好事，要多啲時間準備。但嚴格嚟講唔係取消，只係延期，應該會係去到10月23日，都係星期六，時間地點一樣，遲下再通知大家。

2. 仲有，週末又整咗篇大作，講BlackRock，同埋成個資產管理行業。

3. 仲仲有，我在明報寫咗篇文講英國股市，冇特別講推介，但值得一睇。原文要訂戶先睇到，我upload咗上嚟，放在attachment

大師冇點你—都話美團罰錢係「好消息」

4. 港股你見昨日（星期一）做得幾好，有返北水成交都好。問題係，本人昨日都係跑輸大市嘅。實情原因好簡單，因為升幅由ATMX帶動，四隻之中我只有騰訊700，當然就會跑輸少少。但實在唔係咩大問題，掉返轉，之前呢堆嘢係咁跌時，你又會慶幸自己唔係全部都係呢啲嘢啫。你投資個回報唔使去到極神級，中中挺挺都可以，最緊要買得大，早開始，同埋唔好輸大錢。

5. 另外，上星期五都有提到，美團3690個罰款，市場根本當係好消息，你睇ADR都知，結果星期一升到你唔信，唔好咁直線思考以為罰錢又一定整死股價。你炒到極貴嗰陣爆呢啲嘢當然大件事，但到股價相當殘時，就對壞消息免疫了。永遠睇前景嘛。

點樣在高位沽走746？我就做唔到啦

6. 其他嘅走勢，都同上星期五差不多，不再講得太詳細。照樣係非中資銀行股強勢（債息有利息差），部份高估值股繼續大跌（但個別體育用品股已經冇再跌）

7. 理文化工746同東岳189呢啲喪炒股亦係跌返落嚟。之前理文化工早咗叫大家take profit（take 乜鬼profit 丫！），固然係因為我對公司信心都唔夠，但你亦見到，13蚊呢啲位真係只係曇花一現，兩星期就同你插一半啦。所以，真係冇乜可能捉到個頂沽，但另外，買嗰時唔該睇估值—有時唔易睇，但總唔好人地升晒你先去追。

8. 固然我都無數次試過歷史新高時買股票，但嗰啲股票多數都有長期增長，同理文化工呢類周期嘢始終唔同。長期增長嘅嘢，你買貴咗，都正路等等下就返家鄉，消化咗個估值，間公司一路增長，你買個價付出嘅市盈率就越嚟越低。但如果係周期嘢呢，就可以永不超生的。

9. 美股近排走勢好似仲悶過香港，但留意呢個星期開始又陸陸續續出業績了，密切留意，之後會同大家講。

10. 另外，啲日本股呢幾日有返啲起色（之前八連跌的），雖然多數仲係潛水中。

每日一圖— 印度股市大過英國。40年前工人嘅生產力同人工開始脫節。全球標準稅率

11. 印度股市大過英國— 留意我attach咗我明報篇文，講英國股市的，一路萎縮緊（但不等於不值得買）。另一邊廂，印度股市市值，好快會大過英國。首先你會諗，唔出奇啫，印度GDP同英國差不多（講股市當然係計nominal，因為股市市值都係nominal 嘅數字），仲要增長高啲，估值應該都高啲。不過你又諗下，新興國家，照計好多大公司都未上市的，印度都係，所以個市值居然有英國咁大，都幾誇張。仲有留意嘅係，英國股市仲有啲非英國公司，搵全球錢的。

12. 40年前工人嘅生產力同人工開始脫節—如圖，1948（二戰後）年至1979年，美國工人嘅生產力同人工，差不多同步咁升。1979年至2020年呢？生產力升好多，人工升得少少。發生乜事？未必有好短嘅答案。但再提提你，1971年正係金本位制終結，銀紙開始任印，我相信係最主要原因。

13. 全球標準稅率— 都唔少人問我有乜影響，答案係，影響不大。點解？首先新嘅機制，依然有大量空間畀啲公司（或政府）去豁免呢樣嗰樣。另外，15%最低稅率實在太低，好多地方而家係高過呢個稅率嘅。最大影響就只係本身低稅嘅國家，即係愛爾蘭同匈牙利。仲有，好多公司為咗稅務原因，都將歐洲總部設在愛爾蘭，例如啲科技股，咁之後當然要交多啲稅，但你見股市冇乜咩特別反應。仲有留意，「稅率」並唔係一個數字咁簡單，稅務條例極之複雜。你見兩個圖都係引OCED，但瑞士嘅稅率都已經好唔同。

Good Read — The Contrarian 書評。NetFlix如何揀Thumbnail。點解冇買阿里巴巴。

14. The Contrarian 書評—　之前提過，我買Palantir，就係因為Peter Thiel。但之前已經識佢啦，之前我都話唔買，點解轉軚？因為呢排又成日見到佢嘅嘢，因為有本新書講佢，就係The Contrarian，令我覺得都係應該要信佢。上次貼過節錄，今次呢篇係免費書評。仲有另一篇免費書評。

15. NetFlix如何揀Thumbnail —非常精彩嘅帖，有冇留意NetFlix啲Thumbnail（例如呢張圖）有啲奇怪？唔係用返電影海報啲，啲風格又唔知點咁。當然係大有原因，經過精密計算。首先公司知道Thumbnail好有用，然後仲會走去在套戲咁多格入面去揀幾張相，當然會睇顏色，構圖等等。你見人地揀張相都咁大工程，成功真係唔係符碌，點解NetFlix都要好高科技。同時諗真啲都幾可怕，你揀乜背後都係人地精密計算。同一個人 仲有另一強帖講ASML，實情佢寫啲嘢非常好睇。

16. 點解冇買阿里巴巴 — 一間英國投資公司講返佢地點解冇買阿里巴巴。而家講梗係易，但佢係今年年頭講的，亦都留意係好多客戶質疑佢地嘅決定，佢去回應返。「美中不足」係，呢篇文嗰時螞蟻上市已經撻咗Q，所以你可以話都聞到燶味 —但人地白紙黑字寫落嚟，就唔同你啲網友事後認叻。況且，佢亦唔止講螞蟻，仲講咗好多嘢的。我想再強調，今年年頭，你基金買阿里巴巴唔使解釋，唔買先要解釋，係unpopular view，Contrarian．

FB Post Summary —　我的快樂時代。愛情回水一日遊。愛拼才會贏。考慮考慮到幾時？1000円買間日本公司

17. 都寫咗唔少嘢

18. 我的快樂時代 — 近期爆紅嘅文，未睇記住睇。不如大家都去回想返，你暫時最開心嘅，係人生中邊個階段？固然會有啲難答，唔同階段有唔同期望，細個乜都唔識咪食百人一朱都好開心—但也是一種幸福。我最開心嘅，唔係物質最好嘅年代（即係而家），亦唔係最無憂無慮嘅童年，反而係大學年代。入面有講點解，但簡單嚟講，由被人管到冇王管，真正自由自在，而且嗰時唔會諗咁多嘢，唔似而家。有機會寫續篇。

19. 愛情回水一日遊— 寫聯想992，話回歸A股，炒咗上去。結果一日又話搞唔掂，仲化學過當時螞蟻上市。之前見「好消息」去買嘅又中晒伏了。但而家「壞消息」，又係咪去買？都唔係！咁幾時買？答案：唔好買。呢啲唔係有乜「護城河」嘅公司，五年前賺咁多錢，而家又係咁上下，好大程度都係周期嘢。要你好熟間公司，估值又夠晒殘，先好去買—例如我之前講隻理文化工746咁

20. 愛拼才會贏—主要係講有人八號風球去元朗買樓。但成篇其實真係冇乜重點，東拉西扯。我估我最想表達嘅係：大家明明唔係一無所有，但就走去學啲動畫或電影嘅搵命搏式投資，以為自己爛命一條—絶對唔係的。你諗下如果我廿年前咁做，應該死咗好耐。

21. 考慮考慮到幾時— 由天文台不停考慮落波開始講。但主題係：投資有風險，唔投資都有風險。我順手同你講埋action risk 同 inaction risk，人之常情，呢篇相當好睇。好多人只睇到投資嘅風險，但冇留意唔投資就必定輸死。啲友對待疫苗（唔止今次肺炎）好多都係咁上下，打針有事明明好細機會但會好驚自己害咗自己（或小朋友），唔打就更大機會出事但你會覺得唔係自己責任係天意。

22. 1000円買間日本公司— 無聊公告一則，收視居然好好，再次證明讀者口味好難捉。留意買家係香港嘅四州374，一年賺幾千萬，10億市值，都真係好多好多業務的。點解四州咁平買到間公司？因為本身佢都渣咗7成，而間公司又資不抵債。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。