華爾街之王—10萬億能量戰士 BlackRock (Patreon)

貝萊德用咗廿年成為asset management 一哥

完全拆解貝萊德點賺錢（有Excel）

其他公司，等死定等賣？但今年股價表現相當好

1. 今篇講嘅係「華爾街之王」。乜水？高盛？JP Morgan？索羅斯？畢菲特？Cathie Wood？Ray Dalio？全部都唔係，係Larry Fink，同埋佢間BlackRock（BLK，貝萊德），話你知唔少人居然未聽過間公司，或者佢本人。

2. 篇文除咗講貝萊德，亦有講成個行業。最初我會講貝萊德嘅故事，然後整咗個Excel，幫你睇佢盤數。如果你都係冇興趣，想聽冧把，可以跳去最尾。

3. 話埋你知，資料參考FT（呢度，同呢度），同埋WSJ（呢篇，同呢篇）。但，你都未必肯畀錢睇，你訂咗亦未必有時間睇，我幫你睇，再四碗水煮埋一篇文。就係你訂呢個Patreon嘅原因。

4. 每次寫完周末專題都令我十分累，用嘅時間差不多等於平時三四篇。不過都係老土講句，聽聞反應幾好，咁就係我嘅動力。

貝萊德用咗廿年成為asset management 一哥

5. 首先要講，貝萊德我係有買嘅，（我持倉詳情呢度），一度係得意之作。一年前550蚊買，而家850，一度升咗54%，還不錯。今年升18%，同大市差不多。不過高位已經跌咗12%，唔通我又走去止蝕？

6. 點解係「華爾街之王」？貝萊德做乜的？就係資產管理asset management，但留意佢好大部份係收被動ETF管理費。金融界最偉大嘅三個英文字，OPM，Other People’s Money，其他人嘅錢。佢就只係過河濕腳拎小小錢，但因為背後個規模大得太恐怖，所以已經好發。

7. 一定要了解一個術語，AUM，asset under management，主動被動基金都係講呢樣嘢，你個fund有幾大。留意呢啲唔係公司嘅錢，係其他人嘅錢。而一般嚟講，收fee就係基於個AUM再一個百份比，例如好多對沖基金係2/20 two and twenty，即係你放100萬，不論贏輸，我每年抽你2萬先。然後如果賺咗嘅我再分賺嗰部份嘅20%（輸錢咪冇，但2%必定照收）。當然美股啲大嘅指數ETF就收到好平，例如貝萊德追蹤標普500指數嘅IVV，就只係收0.03%（你問同SPY冇乜分別？近乎冇，即係感冒藥咁人人都賣）

8. 貝萊德嘅AUM有幾大？講緊係10 Trillion，10萬億美金，全世界最大。10萬億有幾大？好簡單，就係等於全世界所有VC（Venture capital，創投基金），對沖基金 同埋PE（Private Equity）私募基金嘅規模加埋。

9. 點變到咁大？首先因為平，而呢個行業往往大嘅更大，因為你可以將個fee減到好平，對手好難鬥。以前都講過，呢個行業嘅特色係scalable，留意下公司收入16倍，但純利升25倍

10. 我由1萬億美金變到管10萬億美金，如果收費不變，收入升10倍，成本當然高咗，但唔會高10倍的—變咗我可有空間減價。然後你規模冇咁大嘅公司，唔跟我咁平，啲客就好少幫襯你。你跟我咩？我就仲有錢賺，你就可能輸錢。

11. 第二，就係靠收購，之後會再講

12. 貝萊德而家已經係好多巨企（Apple, Microsoft, JP Morgan）嘅最大股東，當然佢只係代客泊車，成為最大股東，因為啲指數基金渣好多巨企。

13. 貝萊德嘅歷史好短，而家嘅CEO Larry Fink亦係創辦人，1988年先成立，1999年先上市。當時AUM係1650億，而家10萬億。點變大？除咗自然增長，亦因為收購，轉捩點就係金融海嘯。

14. 2008年，雷曼爆煲後，英國巴克萊（Barclays）買咗雷曼美國業務。但之後消化不良，要籌錢，因為唔想政府救。結果2009年想賣 Barclays Global Investors， 原本賣畀私墓基金CVC，只賣iShares ETF（安碩），44億。貝萊德橫刀奪愛，成間買起，作價135億。留意，貝萊德部份用股票畀，所以巴克萊拎咗貝萊德20%股權。呢個故事話你知，機會留畀有實力嘅人，貝萊德在金融海嘯中企得較穩，就有能力執平貨。另外因為股價相對硬淨，仲可以用新股買嘢。

15. iShares是甚麼？頭先講過，美股標普500指數嘅ETF  IVV正係iShares，仲有香港嘅安碩中國2801同安碩A50 2823都係。但留意，最初買返嚟，都要整合幾年的，收購合併從來唔係易事。

16. 不過話說回頭，因為個 fee真係算低，盤生意又唔係極暴利（利錢高，但銀碼唔算好大）。你睇市值都知，1300億美金，甚至都未打入全世界頭100，細過間愛馬士。可能係好事，因為樹大招風，雖然而家已經招咗，但至少公司唔係 萬億市值嗰啲巨企。

17. 但，1300億嘅市值，已經同高盛差不多，亦都大過後面一大堆TRowe Price, Franklin Templeton, Invesco（景順）, Janus Henderson, Schroders 同State Street（道富）嘅市值……加埋

18. 留意漏咗一間，Vanguard（領航，又有人叫先鋒），冇上市的。佢係ETF二哥，道富三哥，景順四哥。

完全拆解貝萊德點賺錢（有Excel）

19. 第二部份，同大家睇下貝萊德條數。個Excel整埋畀你，可以download 自己玩。公司嘅網頁有業績公佈，同埋附件。留意公司10月13日開市前會出業績

20. 首先係撮要，GAAP就係真係核數師簽嘅數，adjusted就公司自己調整返啲一次性嘢咁。留意最重要嘅有三個數，首先係AUM（平均咪成季平均，唔係頭加尾除二），第二係個net flow，第三base fee，陣間講。

21. 如果我冇睇錯呢，佢個operating income係已經扣咗開支，所以可能叫做operating profit 仲合理。

22. 仲有留意，operating margin往往在40%以上—即係有幾高？高過蘋果Google咁咯，驚未？

23. 同埋留意，公司都做咗唔少回購的。有啲債，但唔多，你見利息開支好細。想再借錢回購應該都得。

24. 仲有，如果你睇交易所文件，發現公司嘅資產先1800億。又話10萬億 AUM？好簡單，AUM唔在資產負債表上，因為唔係你嘅資產，係客嘅。（但銀行嘅貸款，例如你嘅按揭貸款就係銀行資產，而銀行嘅負債就包括你嘅存款）

25. AUM大家知係乜了，留意公司有極之詳細嘅拆細，機構投資者先係大生意，ETF都只係佔三成AUM。另外唔好以為只係得股票。

26. Net Flow，就係你成日聽嘅咩淨流出流入，呢度有埋細節。留意，AUM嘅增減，唔止係因為Net Flow。即係點？你睇2020年第一季（肺炎股災），仲係淨流入350億。但，AUM跌咗10000億！咩回事？因為股市跌嘛，你啲嘢咪會跌。正如一個基金，個規模越嚟越大，可以係因為多咗人新認購，亦可以係因為股票升。

27. Base fee，你大約可以當係「管理費」，應該佔咗公司七八成嘅收入。呢度亦有拆細。你當公司今年大約150億 base fee左右？10萬億 AUM。Very roughly，全部撈埋，0.15% fee ratio。公司冇出呢個數，應該係咁計，有錯指正。

28. 之後睇下公司嘅Income Statement，見到真係base fee佔收入七八成。另外仲有小部份嘅表現費，但佔總收入唔夠一成。開支？最大開支當然係人工。其他item不多，留意investment gain係公司自己嘅錢，唔係堆AUM。另外留意交稅交得多的，之後加稅反而冇乜影響，政治上亦唔會畀人話逃稅。

29. 展望嘅，只講幾句。首先真係一個鬥規模嘅行業，而其他對手有排都未追得上（下面會講）。但會唔會太大畀人搞？公司市佔率又未去到好誇張（未夠四成），市值連全世界頭100都未入，又似乎唔太危險。

30. 另外，留意下Larry Fink似乎在美國幾吃得開，唔止一次，啲政府任務都係搵佢。甚至有人覺得貝萊德已經取代高盛嘅地位，因為以前好多美國官員就嚟自高盛，又或者離開政府後加盟，而家就變咗貝萊德。仲有，Larry Fink係忠實民主黨員。

31. 至於近年啲咩ESG云云，更加係貝萊德（仲有SPGI或MSCI之類）嘅商機，因為ESG嘅基金就大條道理可以收貴啲嘅fee．況且，基本上越多呢啲麻煩嘢，就對大公司越有利。大公司有嘅係資源，細公司只係應付呢啲嘢都死。

其他公司，等死定等賣？但今年股價表現相當好

32. 剛才講過，asset management 有Big3，貝萊德，領航同埋道富。實情只係Big2，道富雖然早過貝萊德，已經落後好多，四哥景順更加細一大截。另外留意領航係冇上市的，有好有唔好，但在印公仔紙做收購就蝕底了

33. 今年你見到，貝萊德後面嗰幾間公司，股價全部都幾好的！全部都跑贏貝萊德，死未。點解？業務固然係原因，但另一樣嘢，亦係炒收購整合。大家都知呢個行業一路都係玩收購整合。

34. 早前傳嘅，就係三哥道富同四哥景順合併。聽落好似唔錯，道富有全世界最大嘅標普500指數ETF SPY，又有最大嘅黃金ETF GLD。景順就有隻追蹤納指100嘅QQQ，聽落好似強強聯手？

35. 不過，夾埋都好，AUM都只係大約16000億，在ETF市場嘅市佔率都只係16%，兩間夾埋都未追到領航，亦未及貝萊德一半。

36. 而且，各有各嘅問題，合併從來唔係易，之前Invesco 57億食咗 Oppenheimer，都消化不良，搞咗一大輪。

37. 況且，道富嘅主要業務其實唔係ETF或者資產管理，而係做Custody，呢個業務道富市佔率第二。呢個業務係道富命根，佔佢一半收入。但，正係呢個業務，亦限制咗道富發展ETF或資產管理—因為啲客會不滿。我啲錢放在你度畀你賺，你又落埋場同我爭？係有啲問題的。唔一定係監管上嘅問題，而係其他基金覺得唔順，你又要落場爭我生意，咁我仲要畀錢養大你？我轉去第間唔會同我爭生意嘅公司，例如Bank of New York啦（而家Custody一哥）

38. 所以啦喎，都唔係好驚。固然你可以一路買啲細公司搏畀人收購，但我暫時都係繼續只係買貝萊德。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。