1137 最新數字麻麻地（有Excel），北水返嚟成交強，非中資銀行股撐大市。美團3690壞消息當好消息，體育用品股插水。 度度都係富者越富。美國業主年紀三十年升咗16歲。共和黨定民主黨有利經濟？任你點玩。通脹嘅嘢大家識條鐵咩 (Patreon)

1137 最新數字麻麻地（有Excel）

北水返嚟成交強，非中資銀行股撐大市

美團3690壞消息當好消息，體育用品股插水

每日一圖— 度度都係富者越富。美國業主年紀三十年升咗16歲。

Good Read —共和黨定民主黨有利經濟？任你點玩。通脹嘅嘢大家識條鐵咩

FB Post Summary —　星期六講座

1. 好似打完風，很好。最後召集，今日（星期六）黃昏五至七點在尖沙咀有個收費講座，我真人上陣。你可以send兩條問題去homeblogger問，一定會解答。如果唔得閒嚟嘅，之後網上重溫都可以，價錢一樣。內容唔會在其他地方公開，呢度都唔貼（保障返報咗名嘅讀者）。鍾意拎本書嚟簽名或合照都可以，報名呢度。

1137 最新數字麻麻地（有Excel）

2. 首先講下HKTV 1137，唔記得幾時叫你買，我自己都有買。如圖（呢個華盛倉就只得隻1137），暫時賺緊20%，相當不錯。

3. 不過留意返，剛剛出咗嘅9月數字，就認真麻麻。詳情在個Excel度有．留意公司都有解釋返9月向來都係比較淡，仲有提埋因為今年10月派消費券，話啲人控制9月消費咁喎。我就唔係好信服。另外留意全年嘅GMV目標（公司自己定的）只係做到74%，一年就已過9個月，即係75%，而一般呢啲目標都保守，如果最後全年做唔到都幾難睇。

4. 股價會唔會跌？唔知呢。但扯遠少少講，唔少公司都公佈每個月嘅營運數字，但好少會個個月特別解釋。你可話1137透明度高，肯溝通，但又會唔會令到大家太在意啲短期數字波動？（有啲公司因為咁嘅理由，而唔會出啲月度數字，甚至季度業績都唔會想出）

北水返嚟成交強，非中資銀行股撐大市。美團3690壞消息當好消息，體育用品股插水。

5. 港股嘅，北水返嚟，成交好返好多。另外留意啲非中資銀行（匯控5，中銀香港2388，恒生11，渣打2888）做得唔錯，當然係因為債息升。

6. 另外，監管風暴停不了，美團3690又被罰錢，3%收入，即係34億人民幣。但相當有趣地，似乎市場嘅反應幾好！覺得罰得少！而美團ADR似乎同香港比仲要升，相當奇怪。

7. 呢類現象，似乎真係代表啲估值夠殘，壞消息都冇乜反應，甚至變咗好消息咁。另外留意下，港股科指唔係特別強，但最大嘅騰訊700阿里巴巴9988都強，似乎市場係捧大型股份先。

8. 另一方面，見到啲體育用品股散晒，當然係因為高估值。之前有一輪炒起呢啲嘢，因為覺得政策風險細啲。咁而家似乎掉返轉，有啲投資者願意買返中資科企。

9. 甚至你可以話，東岳189同理文化工746呢排高位跌都係咁嘅原因。

每日一圖— 度度都係富者越富。美國業主年紀三十年升咗16歲。

10. 度度都係富者越富—首先留意，佢用嘅指標係睇最高收入嘅10%人，佔咗總收入嘅幾多，當然數字越高代表貧富不均越犀利。美國當然高過歐洲地方，但你估唔到嘅係，原來日本都同美國差不多高。仲有留意，差不多所有地方，過去幾十年數字都係上升趨勢，唯一例外係法國。

11. 美國業主年紀三十年升咗16歲 — 當然唔係同一班人三十年只係大咗16歲。而係睇返，1981年時美國買樓人士嘅年紀中位數係31歲。去到而家嘅中位數係47歲。原因你當然都估到，當然係樓價升得快，貧富不均，年青人上流嘅機會細咗等等。特別留意過去十年，買樓人士嘅年紀中位數升咗8年。原因？你話呢？分水嶺正係2008年，量化寬鬆之後。明顯呢個係全球問題，唔止香港。

Good Read —共和黨定民主黨有利經濟？任你點玩。通脹嘅嘢大家識條鐵咩

12. 呢兩篇都相當學術，仲有埋原本嘅paper 畀你睇。

13. 共和黨定民主黨有利經濟？任你點玩。 — 某程度上可以用嚟攻擊或恥笑絶大多數「共和黨定民主黨執政下經濟好啲」嘅討論（包括有時我都貼）。因為首先你點度經濟？用就業？GDP？通脹？定股市？而所謂「共和黨定民主黨」，計總統？洲長？參議院？眾議院？以上呢啲嘢你仲可以自由組合，揀兩樣又得，三樣又得，砌到啱為止。呢篇文網頁幫你拎晒啲數，幫你計埋，你鍾意邊個黨好啲都可以砌到結論出嚟，佢仲會確保個p value夠細，你篇嘢可以出paper．咩係P value？統計學嘢，呢個情況下係睇你搵出嚟個「關係」有幾顯著，定係只係因為巧合隨機。P value 細嘅，代表夠顯著，應該唔會係巧合隨機。玩完呢個，仲有話你知「嚴謹」嘅方法應該點做，就係呢篇嘢。結論？差不多在任何指標下，都係民主黨嘅總統好啲。篇論文研究埋解

14. 通脹嘅嘢大家識條鐵咩— 傳統嘅講法，有所謂「通脹期望」，即係大家覺得會高通脹就真係會高通脹，因為工人覺得之後物格會升，就會要求加人工。自我實現預言。而中央銀行嘅任務就係管理大家嘅期望。問題係，歷史數字見到，即使係中央銀行嘅經濟學家，掌握咁多數據，佢地預期嘅通脹數字，同真實數字都一直差得幾遠。似乎證明根本大家通脹嘅理解，成套理論都係錯的。另外篇論文仲有講，過去N年的確係低通脹預期同埋低嘅真實通脹，但係因為真實通脹低導致預期低，而唔係預期低所以通脹低。論文在呢度。

FB Post Summary —　星期六講座

15. 星期六講座 —雖然係廣告，但都值得睇下。人年紀左咗，就會覺得好多嘢都可能係最後幾次。如果有80歲命，我都已經行咗超過一半，so sad．而有幾多日子幾多時間真係做到自己想做嘅嘢？

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。