鬥地主香港地產股照升，美國債務上限美股照升，債息升科技股照升．已買Palantir (Patreon)

鬥地主香港地產股照升，美國債務上限美股照升，債息升科技股照升

已買Palantir

1. 介紹返，今個星期六黃昏在尖沙咀有個收費講座，當然係我真人上陣。內容唔會在其他地方公開，呢度都唔會（保障返出席者嘛）。上次搞過反應都不錯，可以提早send 兩條問題去homeblogger，到時一定會答。另外亦可以拎本書同我合照簽名之類。唔得閒去嘅，之後可以網上重溫，價錢一樣。報名呢度。

鬥地主香港地產照升，美國債務上限美股照升，債息升科技股照升

2. 大市？靚仔啦，港股又大升，美股又大升（但冇港股咁勁）。我只揀幾樣嘢嚟講

3. 首先，留意返，美中不足港股嘅成交仲係好少。我當然知道星期四冇北水，星期五先有。但即使冇北水嘅情況下都係少。

4. 星期五有返北水，我反而驚有啲反高潮，唔好忘記大陸放假期間都發生相當多事。千萬唔好以為冇北水買就會跌，有北水買就會升。

5. 仲有，香港地產股大升。最奇怪係你見施政報告嗰日（星期三）都唔係咁，去到星期四先大升。可能根本唔關事。當然你可以理解話新界北都會大把樓有得起有得賣，長玩長有。甚至話施政報告完全冇打擊地產商嘅政策就係利好。但掉轉，如果跌嘅，扯，你咪又可以話供應大增拖冧樓價。你諗下，明明早兩星期先又鬥地主呀 共同富裕 強行徵地呀乜，我老早都話頂多講幾日。結果？最初明明又話最多農地會遭殃嘅恒地12，就升得最多。教訓？咪話好多人只係販賣恐懼，仲有，根本壞消息你先應該買。當然唔易咁做，有時壞消息真係壞。咁點算？咪你定期投資，你見我根本唔理啲嘢升定跌，照買。

6. 美股嘅，一樣，當然美股冇咁多陰謀論，大多數人都知道咩債務上限之類，一定係玩一大輪又冇事，2011年美國玩到畀標普下調信貨評級都係咁啦，嗰次玩到美股差不多跌兩成，今次我嫌佢玩得唔夠大添（但，應該仲有得玩）。一樣，你話咩「等確認見底先買」，請問點確認？低位升返1000點你又唔敢買了。與其搞咁複雜，不如回歸基本，有錢咪買。捉timing有幾難？你睇下自己嘅往績咪知。我冇乜好叻，但我有自知之明。

7. 阿里巴巴嘅，昨日同你提咗啦，畢菲特個老死芒格增持。但其實你見啲科技股全線回勇，中概股都係，美股啲垃圾科技股都係（所以我買垃圾股亦可以用嚟做金絲雀），似乎啲風險胃納返晒嚟。而係冇人會事先話你知的。你睇，美國債息仲要照升的，「咁點解科技股都升」？冇得解，投資係藝術，唔好當hard science

已買Palantir

8. 是咁的，我買咗Palantir。兩萬五港紙，已經係我手頭上所有嘅現金。唔好忘記之前又有啲月供港股 又有VOO QQQM 3187 仲買埋 Mizuno 仲要供樓 仲要找卡數  仲要畀埋錢埃汾太，呼。

9. 呢隻嘢，月頭已經講咗會買，就買埋，絶冇呃你。咁其他提過嘅甚麼Roche Spotify栃木銀行 Asics，可能今個月都未必買，無限金錢咩大佬。

10. 但講返Palantir，你去睇news，當然見到早兩日佢拎咗美國軍方嘅合約，盤後升10%（一度唔止），我睇到當然係講咗句粗口，因為未買。但，嗰晚我原本都係諗住照追的，後來太忙唔記得咗，之後冇升到咁多係後話。但天地良心，你見升咗10%，好多人唔敢追入去，我係照買的。都講過，我目標係執幾倍嘅（當然不一定成功），我唔會介意10%。

11. 我買隻嘢，當然唔只係因為咩軍方合約，一早我已經話要買。更奇怪嘅係，我舊文明明寫過唔睇好。咁而家做乜轉軚？業務好咗？唔係喎（其實我根本冇留意業務）。股價跌咗落嚟好吸引？你同高位比係得返一半。但同上市時比（差不多一年前），仲係一個開。

12. 我重新留意返，一來的確因為股價今年唔得，只係持平，跑輸大市。但更重要係，我只係買一個人。就係買Peter Thiel。我就連間公司最近點，做乜業務，咩估值，全部都唔理咁滯。可想而知，佢老哥在我心中真係神級。我2016年大選已經留意佢，有講起佢（當年我在seminar都有講，香港冇乜人知佢係乜水），因為佢係極少數支持侵侵嘅科技人，佢仲要係基嘅，科技基佬去支持侵侵，係咪十分奇怪？（但，我主觀地認為，佢只係希望利用侵侵去做到佢想做嘅嘢。又或者話，佢對民主黨恨之入骨）

13. 我在話唔睇好Palantir篇舊文（記住睇返），已經大約提過Peter Thiel係神級，奇人一個。我當時唔相信佢，結果受到懲罰，隻嘢10蚊升到40蚊。（留意直接上市，所以冇招股價）

14. 做乜近來會又留意Peter Thiel？因為有本關於佢嘅新書出。The Contrarian，我仲未買仲未睇。又，書名已經話畀你知，作者筆下嘅Peter Thiel係乜嘢人，我舊文都係話佢Contrarian 之王。

15. 我好想去搵啲其他領域嘅比喻，但諗唔到。講有錢？佢都好有錢，但絶對唔係咩Jeff Bezos Elon Musk嗰啲級數。講名氣？佢係矽谷之神，但普通人唔少聽都未聽過佢乜水。講對你日常生活影響力？你又好似唔會見到佢啲產品。

16. 以前打足球遊戲，有項能力叫做Flair．可能叫做「天才波」？有Flair嘅，就係會忽然做出啲你估唔到嘅嘢，技驚四座，但未必係最好波嗰個。用我不輪不類嘅比喻，C朗拿度同美斯係球王，但伊巴謙莫域有Flair，或者係洛賓，或者迪斯高，甚至球員時代嘅蘇斯克查咁，奇兵。或者籃球嘅（舉啲例遠古啲，近年冇睇），米高佐敦嗰啲係波神，但Reggie Miller 或者 Allan Iverson就有Flair。

17. 所以好簡單，我就只係信佢一個人。講乜都假。我唯一小小擔心嘅，就係此人奇怪到一個點，佢甚至唔係為錢，佢真係有啲似你睇漫畫或睇戲啲奸角，佢只係為實現自己嘅理念，呢啲人可以好可怕。佢係咪有心將間公司變做好賺錢嘅機器？係一個好大嘅問題。當年佢借錢畀朱生搞Facebook，但佢係叫朱生早早賣咗佢，因為佢根本唔鍾意呢間公司。我估佢認為錢夠用已經得（佢都好Q有錢，美國頭500，幾十億美金身家起碼），唔使追求做十大富豪。

18. 有關Peter Thiel本書（唔係佢寫的，人地寫佢），可以睇呢篇，應該免費，應該係本書嘅節錄，由佢少年時代輕狂講起，已經睇到佢嘅核心想法：骨子裏嘅Contrarian，無限嘅自信，其他人想像唔到嘅成功，同埋嗰種「世界與佢為敵」嘅被迫害心理。

19. 其他嘅，仲有好多文提到，但多數要畀錢，你有訂嘅自己去睇，或者用你嘅方法。例如Economist，Bloomberg，Financial Times，Business Insider（仲有多篇）（順手講明，Business Inside嘅水平明顯低過另外幾檔，佢地都相當content farm，但我都照訂，睇多啲唔同嘅嘢）

20. 然後容許我講一次，相映成趣地，華文嘅傳媒，近乎完全唔講呢啲嘢。我亦唔見社交媒體有人討論。容許我學佢串嘴咁講一句：你唔睇鬼媒，你嘅視野就窄好多。我唔明做乜好多香港人仲可以日日打飛機覺得自己點醒。

21. 想免費嘢？佢本Zero To One，網上有得睇（我係有買的，我益你咋，而侵權係唔啱的）。懶到唔想睇嘅，有谷阿莫讀書報告（但篇文相當廢，你睇咗篇文可以扮睇過本書，在同事朋友面前吹水，但長遠你害緊你自己）。又或者，YouTube有佢在StanFord嘅talk，完全免費，仲有好多條片。啲英文唔深，亦冇講咩好難明嘅嘢。

22. （容許我呢度畀啲建議大家：學好你嘅英文，你唔使去到好叻，唔係講考試拎咩分或者可以扮ABC溝仔溝女，但至少你去到唔抗拒睇英文。原因正如我上面講，你唔睇英文，你睇嘅嘢真係比人地少好多。第二，財政狀況容許的話，訂呢啲鬼媒，當然冇可能睇得晒，耐唔耐睇都好。總好過你免費上網睇啲KOL寫埋啲垃圾）

23. 當然，我只係買咗25000港紙，固然因為手頭只得咁多錢，但有錢亦都未必買好多，講到尾，佢到底係咪有心將間公司變做賺錢機器，我仲係好有疑問。我就只係當支持偶像。但隻嘢先460億市值，照計……好有想像空間。

24. 仲有，留意Peter Thiel擺明係侵粉，但一樣在拜登任內拎到美軍合約，你話佢吃得開又好，世界仔又好（唔似），美國有制度公私分明又好，乜都好，至少見到啲生意仲有得玩。

25. 呢篇原本我想拆做週末專題，但放埋呢度吧。今個週末極忙，要搞Seminar，要預備，但都希望出到篇專題，不過可能要去到星期一二先有。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。