施政報告最大贏家—白石角樓盤，同埋兩隻股票．銀行地產強，阿里巴巴反彈． 加人工有乜公司最受影響？美國違約或被下調評級，乜嘢資產最大鑊？The First Rule of Compounding。China is taking a different road (Patreon)

施政報告最大贏家—白石角樓盤，同埋兩隻股票

銀行地產強，阿里巴巴反彈

每日一圖— 加人工有乜公司最受影響？美國違約或被下調評級，乜嘢資產最大鑊？

Good Read —The First Rule of Compounding。China is taking a different road

FB Post Summary —　5美仙獨眼龍眼罩，占士邦影評，譚仔新股，請吃飯的姐姐，曼聯插水

1. 介紹返，今個星期六黃昏在尖沙咀有個收費講座，當然係我真人上陣。內容唔會在其他地方公開，呢度都唔會（保障返出席者嘛）。上次搞過反應都不錯，可以提早send 兩條問題去homeblogger，到時一定會答。另外亦可以拎本書同我合照簽名之類。唔得閒去嘅，之後可以網上重溫，價錢一樣。報名呢度。

施政報告最大贏家—白石角樓盤，同埋兩隻股票

2. 有關施政報告，實在冇乜好講，亦都冇乜好炒。實不相瞞，我甚至唔知星期三出，我以為星期四出。好彩我已經冇撈星展，否則又要煞有介事咁寫一堆垃圾。

3. 真係要講嘅？隻中國建築3311好似年年施政報告都例牌炒下，你可以留意下，下年請早，佢係中國海外688啲朋友，同一系．

4. 仲有？可能領展823有著數？你北區都會甚麼，250萬人，得罪講句，邊度變出嚟？你同我生？可能都係之後放更多新移民。而相信啲樓都唔會貴，可能公屋多，就可能都係領展一類嘅場。但留意，領展近年反而係走去海外。況且，起得嚟都唔知咩世界，所以都係夾硬搵啲嘢講下

5. 最大贏家，當然係白石角啲樓盤，變咗鐵路盤。

6. 我反而最想講嘅一樣嘢，以前都講過：你見啲親建制嘅傳媒（例如經濟日報），星期三朝早已經印埋出嚟，我懷疑網上版半夜三四點已經有。固然你應該冇可能半夜去買到層樓，但，what if 下次係啲股票受惠？呢個故事話你知，點解我睇唔同嘅嘢，我以前連大公文匯都睇，因為往往有啲獨家大陸料。

銀行地產強，阿里巴巴反彈

7. 大市嘅，冇乜特別，港股美股都普通，但唔係所有嘢都跌嗰種。我港股倉美股倉都跑贏大市（懶貼，但我啲嘢多數升跌都少過大市的，似乎應該進取啲？）。

8. 港股嘅，你見銀行股（債息升嘛）明顯跑出，香港地產股都一路強，因為之前真係跌突。我老早都話，咩「鬥地主」，頂多講三日。你只係睇啲KOL講嘢以為世界末日添，因為佢地係靠販賣恐懼嘛。

9. 另外特別講，阿里巴巴都反彈，雖然之前都試過N次反彈又破底，但至少見到畢菲特個friend第三季大手增持。

每日一圖— 加人工有乜公司最受影響？美國違約或被下調評級，乜嘢資產最大鑊？

10. 加人工有乜公司最受影響？—通脹未必係一件好壞嘅事，正如我成日講，Netflix 下個月加價10蚊你係咪唔睇？Facebook 廣告加價10%啲客係咪走去賣TVB？唔會的。但，當然都有個過程，而你明顯見到美國嘅人工就升緊。咁有乜行業最受影響？呢個圖畀你睇到，人工升1%，利潤會跌幾多。咁當然係啲labor intensive 嘅行業最甘，例如運輸，飲食。但留意，世事都唔係咁簡單，因為唔係所有行業都面對同樣嘅人工壓力。仲有，個圖話你知對盈利嘅影響，但有啲股票本身高估值，盈利跌少少股價都可以大跌。但至少你有個概念知道個世界點運作。

11. 美國違約或被下調評級，乜嘢資產最大鑊？— 都講過，2011年未玩到違約，但都玩到被下調信貸評級，當時都有個小股災。當其時，美股標普指數（SPX）就跌17%，甘唔甘？納指100 QQQ反而少啲。HYG係high yield bond嘅ETF，但債格同股價冇乜可比性，債價咁跌都好誇張了。重災區係乜？係新興市場EEM，幾時都話美金係「我們的貨幣，你們的問題」。更大鑊係IWM，乜東東？就係細價股ETF

Good Read —The First Rule of Compounding。China is taking a different road

12. The First Rule of Compounding— 就係Never interrupt it unnecessarily。篇文後來好似越講越遠，但至少開頭好值得你睇。個個都知複利的威力，美股點樣三十年升幾多倍，蘋果十年升十幾倍。但點解冇人坐到？因為個個中途總係會停咗。可能因為驚，或者覺得貴。呢篇文示範咗個例子：如果我隻股票睇升幾倍，甚至十幾倍，我仲會唔會介意買貴10%或20%？但當然，幾時係necessary，就好深嘅問題了。

13. China is taking a different road— 講返中國近一年種種奇怪嘅政策。你在當權者嘅利益角度，唔畀上Facebook呀，維權畀人拉呀呢啲，十分正路。但近一年好多政策係令人相當R頭。當然有啲懶嘅人夾硬去搵啲理由，例如係「中共就係低能架啦」，問題係，呢類答案其實冇答過，好似話五個山洞五隻羊點解隻老虎食第二隻咁，「因為佢鍾意」。呢篇文嘅作者畀一個好啲嘅解釋，佢認為中國想「去金融化」。有睇我文嘅知道我成日提，我地呢50年生活在一個高度金融化嘅社會。當然「去金融化」係咪好事，就另一回事，亦都有人理解咁樣就係返返「社會主義」或者「共產」，隨你。而我甚至唔係好認同financial 同 real economy 可以分開，會唔會根本係你中有我我中有你？

FB Post Summary —　5美仙獨眼龍眼罩，占士邦影評，譚仔新股，請吃飯的姐姐，曼聯插水

14. 星期一因為FB死咗出唔到，所以今日一次過。有啲無聊食評之類就唔貼了。

15. 5美仙獨眼龍眼罩—可以講係近排我寫過嘅文，我最滿意嘅一篇。偏偏亦係收視最低嘅一篇。講「奧美」廣告教父嘅故事，亦都教你點創作，唔好話咩冇budget多限制。有budget冇限制阿豬阿狗都識做啦，就係有好多限制先睇到你有幾多創意。投資都係。雞犬皆升賺錢有幾難？

16. 占士邦影評 — 冇乜公眾性，照計同你投資或了解個世界都冇乜關。純粹個人感情。但當然，你由占士邦都會睇到，過去幾十年個世界點變。正如朋友講，好多人忽略咗1997年嘅Tomorrow Never Dies，楊紫瓊嗰套，除咗女性地位提升，要政治正確，啲邦女郎開始有戲份唔係玩具外，亦都因為「中國」。

17. 譚仔新股 — 今日（星期四）上市，暗盤跌過一成，後來收窄返啲。我就零興趣，上完市都仲可能睇下，你見我好少寫新股，亦唔係好明啲人做乜咁鍾意。新股多數都貴，入面有講點解。

18. 請吃飯的姐姐—華置私有化，預咗啦下話。未得閒慢慢計。但當然係相對於佢嘅book value 大幅折讓—但，一直都係咁架啦。又唔好單睇佢咩邊棟樓都值幾多億，仲有好多負債嘛。另外，當然佢啲資產價值都跌咗唔少，唔少係股票，當然仲有唔少係恒大。但，大劉嘅嘢，點會死錯人？況且大股東一早渣住百份之七十幾，拎十幾億出嚟就搞掂。

19. 曼聯插水—曼聯股價插水，財經新聞呀，我都係睇CNBC見到。原因？大股東減持。順手好簡單講下公司發新股同股東賣舊股嘅分別，財經101

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。