垃圾股ZETA一日升三成，NetFlix JP Morgan新高．日本股跌足7日，高位插10%。但我照買Mizuno．中美貿易談判，隻期權等食糊．持股名單Excel Live Feed 版 (Patreon)

垃圾股ZETA一日升三成，NetFlix JP Morgan新高

日本股跌足7日，高位插10%。但我照買Mizuno

中美貿易談判，隻期權等食糊（講到實升咁，事實係潛緊水）

持股名單Excel Live Feed 版

1. 去到十月第一個星期一，歡迎各位新讀者，多謝所有舊讀者。新舊讀者都好，未買我本書嘅，記住買，開頭我覺得寫得唔係太好，但後來發現本書真係幾有用。HomeBlogger或HKTVMall有得賣。各大書局亦有。

2. 另外，未follow 我Facebook Page同埋Instagram亦記住去，好嘢嚟的。

3. 亦都可以善用Patreon文章目錄。十分有用，多謝讀者義工。以上種種，呢篇文最底有詳情

4. 最後，除咗港股美股（A股暫時冇買過，但不排除，never say never），我係仲會買其他地方股票嘅，啲古靈精怪嘢，我是用Interactive Brokers（IB）。未開嘅，用我呢個referral link吧。咁講明referral link我就有錢收返的（但好似要成年後，仲要你放夠十萬蚊，而你唔使理我）。而你都好似有著數拎返的，佢會送自己IB嘅股票畀你。除此以外我冇收佢地任何利益。

垃圾股ZETA一日升三成，NetFlix JP Morgan新高

5. 港股星期二叫做企穩，但依然悶。日本股直頭大瀉（都好多日了），反而美國又反彈返啲，好難捉的。之前又話科技股玩完，但個垃圾倉反彈（故事呢度，同呢度），隻ZETA一日升三成添呀！不過買得3000蚊，升三倍都冇用，純係實驗。

6. 大股嘅，特別留意core list（即係有買）NetFlix同JP Morgan創過新高，NetFlix仲要係成交異動。9百幾萬股，平時4百萬唔夠。

7. NetFlix升當然好多人估同《魷魚遊戲》有關，但可能都唔止係咁，啲收視數字出嚟之前，股價已經好強創過新高，公司亦都進軍遊戲，仲有早排無啦啦自己公佈啲劇有幾多人睇。記住之前係冇公開的，你話我諗多咗都好，我估公司諗緊一樣嘢：廣告。

8. 當然你話廣告影響觀影體驗，可能，但隨住訂戶點都會飽和，呢條路應該都係遲早問題。咪就係佢地去諗下點樣唔咁影響觀影體驗咯，啲友咁高人工就係幫股東解決呢啲問題啦，或者一個月畀多10蚊冇廣告咯，2億用戶喎，你諗下收到幾錢？第時可能在Facebook寫，但，呢度話你知先。

9. 至於JP Morgan？債息升有利銀行股嘛。仲有，投行今年嘅investment banking fee好勁的。拿，都話啲嘢環環相扣架啦（好耐冇講呢句！）

日本股跌足7日，高位插10%。但我照買Mizuno

10. 有關日本股，可以睇舊文（原來一個月未到，證明我真係寫好多嘢）。一個相當搞笑嘅問題：往往我係瞓到一兩點先起身，分分鐘落得盤嚟日本股市都收市（香港時間兩點收）。當然我對價格唔敏感，理論上瞓之前落定盤先都得，但總係覺得爭啲。

11. 無論如何，週末篇文同大家講咗會買Asics或者Mizuno，坐言起行，就買Mizuno。原因舊文有講，同佢啲嘢得唔得無關，亦同我消費無關（雖然我都有對，邊個話要跑步先可以著跑鞋？正如係咪要瀨屎先可以著瀨屎褲？）。

12. 一個字，夠殘，唔係股價今年表現唔好，而係你睇啲估值幾殘。0.5倍 price to sales．一間都叫做國際上有名氣嘅品牌，只係50億港紙市值。

13. 咁你見到了，日本股要100股咁買，一買就18500港紙。做乜唔買200股？仲要買其他嘢。

14. 另外，順手講埋，日本股市已經7連跌，外圍有影響，亦都聽聞新首相可能加稅之類。你一個月前覺得日本股天下無敵瞓身買嘅，高位已經跌10%，包你叫救命。對我嚟講都係嗰句，記得要分散，時間上地域上都係。我堆日本嘢，都係輸緊2.5%啫，濕碎（隻Panasonic就已輸10%）

中美貿易談判，隻期權等食糊（講到實升咁，事實係潛緊水）

15. 另一方面，唔少人都係仲講緊恒大或者花樣年，美股可能講債務上限同通脹。但我呢排十分留意中美貿易談判進展。原因舊文有講，因為買咗波音飛機（BA）嘅期權。

16. 暫時？情況係未知。再講一次，政治嘢，點估？特別係好多人將人地表面放出嚟啲嘢又當係真，況且唔同人可以有唔同演繹。一方面你見美國好似話「指控」中國未履行協議，要迫佢找數，否則就加關稅云云。問題係，美國要加關稅幾時要問過中國？你見侵侵加咗N次關稅，中國出口有冇崩潰？貿易順差創新高添。所以呢啲都只係迫返中國做返啲嘢嘅手段。而另一邊中國又放風，講到好有建設性咁喎，對面肯傾。

17. 任你點演繹，但我嘅法睇法係明顯兩邊都至少想傾啲嘢。正如我之前提過，習近平同拜登電話又講咗，孟晚舟又放咗，中國冇乜可能唔去做返啲嘢。加大返買美國貨，合情合理。波音飛機一向係兩國貿易嘅重點之一，一架已經抵你好多件玩具，反正中國都有買開，我睇唔到點解唔可以買返甚至買多啲。

18. 大約就係咁，星期二晚波音飛機有得升，但隻期權就要跌，死未。但我有耐性，依然相信最後中國好大機會宣佈大手買飛機—就算唔係咁，波音都仲有可能因為其他嘢升。當然仲有最大嘅考慮：我輸晒先1000美金多啲，中咗呢？固然可能幾倍，但都唔係重點（好多錢咩你估），重點係，可以出文牙刷嘛。

持股名單Excel Live Feed 版

19. 最後，介紹呢個東西，你在attachment 會搵到兩個Excel。同我之前公開嘅持倉好似係差不多嘅嘢。但呢舊嘢幾偉大，你reload data（資料—全部重新整理）係可以拎到股價及其他嘢的（當然唔會係即時，唔好混吉）。平時我啲持倉（例如日本股個圖）係用Yahoo Finance，免費嘢嚟講都唔錯，但用Excel更好用，我可以拎埋啲成交量呀，52星期新高呀，市值呀之類，完全自己customize

20. 以前我係用公司部Bloomberg整，早排都搵緊啲平價版嘅替代（幫助我寫文），但暫時就用住呢個。你可以拎返去自己用，咪自己改咗啲股票名佢，另外亦可以自己加減啲唔同嘅fields，詳情睇微軟教學。

21. 又，其實Google Sheet都有類似嘅嘢，可能更好用，又可以share，遲下得閒先再搞。

22. 留意返，有啲最新買嘅未放入去，另外，似乎係唔支援日本股嘅。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。