港股美股繼續殺高估值，舊經濟同reopening trade跑出．交代返10月買咗乜．恒大爆煲基金冇驚過。加息股票冇驚過。下調評級美債冇驚過． 數學物理電腦問題大雜燴。整個萬億銀仔美國就唔會違約。美股冧把爭奪戰 (Patreon)

港股美股繼續殺高估值，舊經濟同reopening trade跑出

「我正在買貨」 — 交代返10月買咗乜

每日一圖— 恒大爆煲基金冇驚過。加息股票冇驚過。下調評級美債冇驚過

Good Read — 數學物理電腦問題大雜燴。整個萬億銀仔美國就唔會違約。美股冧把爭奪戰

1. 今日堅，有三個圖同三篇Good Read你。點解？因為Facebook死咗，我貼唔到FB Post summary，就騰咗啲篇幅出嚟。

2. 照舊，歡迎新讀者，多謝舊讀者。週末出咗篇10月展望，請去睇下。十月唔係股災月，不過星期一港股美股都唔靚仔，雖然亦唔算係失控式咁跌。但我一直講，市場唔會一路都好，早早叫你做好準備。呢個Patreon舊年8月開始搞，市場一路都算好順風順水，呢個幾月就算係最差了。就唔好問我幾時會好返，答你唔到，但跌市你先有機會買貨，同埋先見到你嘅實力，否則你永遠只可以係乜都升嗰時買少少，然後只能贏少少。

3. 另外，今個星期六真人講座，報名呢度，過兩日再詳細講

港股美股繼續殺高估值，舊經濟同reopening trade跑出

4. 首先講港股，恒指又跌500點，因為冇北水所以成交好細。恒指國指科指都係跌2%，但留意，跌嘅主要係啲高估值嘅股票。你見我個報價名單上唔少嘢都唔使跌，特別啲本地地產股，同埋大型內房都唔使跌，所以可以話你知我自己啲港股冇跌2%，雖然冇乜點值得高興。留意報價名單上不代表我一定有買，亦不代表我睇好，想知我買咗乜股票，睇舊文。

5. 另一個值得講嘅，就係你見普遍仲係舊經濟股跑贏，美股特別明顯。首先新經濟股往住by default就係估值高。另外，亦都係炒啲reopening trade．點解？同上星期五一樣，Merck話有隻肺炎口服藥，咁市場自然再憧憬下旅遊會再加速。你見國泰293都升，大陸國航753東航670南航1055更加勁

6. 上星期五都冇講，Merck嘅口服藥一出，啲疫苗股就散晒。首先好多本身估值都超貴，另外，你有口服藥，唔多唔少啲人會覺得唔使再打針（雖然未必係），所以股價死晒。

7. 但留意，周末篇文有提到買Roche羅氏藥廠，計劃冇變（當然都要睇我有冇閒錢），你見 Roche仲有得升，其他輝瑞Pfizer PFE或者強生Johnson JNJ都冇乜點跌。點解？因為呢啲公司唔係只係做疫苗嘛。

8. 至於市場跌乜？講到尾，高估值就固然乜都驚。不過你真係想知嘅，主要兩樣嘢，第一樣係美國個債務上限。第二樣係通脹。前者我從冇擔心過，但後者……之前我一路都話冇擔心，而家開始擔心多啲。唔好笑或鬧轉軚，正好相反，情況有變我當然轉想法，甚至情況冇轉我都可以轉想法，可能之前諗得唔周詳，甚至諗錯。記住，唔好因為你嘅面子影響你嘅想法同判斷。

9. 點解開始擔心？因為的確唔同咗。最初就真係因為低基數，同埋reopening，仲有一啲臨時嘅問題（二手車價升）。但搞搞下，供應鏈問題一路都搞唔掂，就開始真係有壓力了，類似嘅問題以前Good Read都講過（所以，真係要成日睇）。睇下聯儲局可以企硬話「通脹只係暫時」幾耐，搞唔好分分鐘鮑威爾冇得連任。

「我正在買貨」 — 交代返10月買咗乜

10. 冇，循例交代返，有圖為證，絶不造假。但你心諗，冇嘢睇喎。呢啲係每月買嘅，3187，VOO，QQQM。3187就REIT，你當收下息（已派咗一次），或者可以有需要當「現錢」用。VOO同QQQM都係指數ETF啫，VOO就標普500，QQQM係Nasdaq 100（留意，好似冇一隻ETF係跟納指Nasdaq Composite Index的，我估因為成份股太多）。悶嘢，但講過每個月頭就買返啲，言出必行，主要唔希望個倉位偏離指數太多

11. In case有人問，以上三隻都係在富途買，而我啲持倉名單係跟唔同券商戶口的，舊文提過。

12. 咁你話，週末講嗰啲咩日本股 美股 歐洲股呢？當然唔會買得晒，但亦點都會買返一兩或三隻。都係月頭買，但分多幾日，等我每日都有啲活動，又可以分開寫下。之後幾日再話你知。

每日一圖— 恒大爆煲基金冇驚過。加息股票冇驚過。下調評級美債冇驚過

13. 恒大爆煲基金冇驚過—如圖，你見到恒大隻境外債派唔到息後，反而成交多咗好多。當然係因為有人仆入去買，唔少基金都有。同主流意見唔同，我唔認為有乜問題，「爆煲都買？」。如果唔爆呢？況且，債務重組唔等於冇得賠，一切只講值博率。呢個係好多外行人嘅盲點。

14. 加息股票冇驚過—呢個圖幾好，比較晒歷嚟嘅加息周期，你見美股都係升多過跌。不過記住，個圖由加息開始計起，唔代表之前就唔會跌。

15. 下調評級美債冇驚過—近排都係講美國債務上限，實情耐唔耐就玩一次，2011年嗰次玩到畀標準普爾下調信貸評級（然後美國仲去搞標普添），史上第一次。但，有圖你睇，美國嘅舉債成本，一樣係越嚟越低，而美債表現亦都好過其他國債。評級機構只能畀個意見，但最後都係買嘅人話事。

Good Read — 數學物理電腦問題大雜燴。整個萬億銀仔美國就唔會違約。美股冧把爭奪戰

16. 數學物理電腦問題大雜燴 — 呢篇佢只係列啲link畀你，但每一篇都夠你睇好耐，亦都未必全部會明。入面列咗好多違反你直覺同常識嘅問題（數學為主），我揀咗部份我以前寫文提過，而又唔會太深嘅。包括第一部份嘅：5（三粒骰仔互相克制），11（二手車問題，亦係經濟問題），13（贏家的詛咒，都係經濟會讀），15（Pizza），18（十億年一遇嘅嘢一個星期有兩次），22 （分數同整數一樣多）。第二部份嘅7（經典嘅三度門問題），8（意想不到的老虎），10（仔定女問題，聽落極簡單），15（兩個信封問題）。仲有互相有關係嘅31同32（兩堆xy數據分開睇正相關，夾埋晒就冇相關甚至負相關）（你去嘅餐廳，意粉好食就薄餅難食，薄餅好食就意粉難食，你以為負相關—但只係因為，有好多兩樣都難食嘅餐廳你根本唔會去）。總之，清彩。

17. 整個萬億銀仔美國就唔會違約 — 近排都討論緊共和黨如果玩嘢，唔放寬個債務上限，美國就會違約云云（照計玩到最尾又會傾掂）。但仲有一個方法解決，就係整個一萬億美金嘅銀仔出嚟，似乎係合法嘅，至少冇人反駁到。留意十年前嗰次已經有人講呢條橋，背後故事呢度。最初條橋點嚟？啲人用信用卡買美國政府金幣，當買十萬蚊，然後存返入銀行，銀行又要當係十萬蚊，然後找卡數。為乜？賺里數！成件事好有香港精神。

18. 美股冧把爭奪戰— 有冇諗過上市冧把或編號點分？香港啲好意頭冧把點嚟？香港就要公司捐錢畀公益金揀，美國呢？直頭免費。但近年因為多咗散仔炒股，啲靚嘅編號越嚟越多人爭，特別係啲古靈精怪ETF（例如有隻叫MEME，有隻叫WFG）．呢篇文大約話你知，成個機制係點。留意仲有幾個 單字嘅編號冇人用的，亦留意我地啲垃圾股（故事呢度，同呢度）有一隻就用咗個S字，之前係電訊公司Sprint的（被收購），然後再原本，就係百貨公司Sears（同人合併咗）。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。