ivanliresearch

［回顧展望］十月股災？十月是好月份。話埋畀你知買乜 (Patreon)

Published:

2021-10-03 22:50:20

Edited:

2021-10-03 22:54:31

Imported:

2022-09

Content

年初至今股市相當好

港股第三季真係差

美股唔太差，但網紅股契媽股死晒

美股呢浪嘅調整好小事

十月股災？根本唔差

十月買啲乜 — 三隻日本股，一隻美股，兩隻歐洲股。「港股不了」

第四季睇乜？—美股業績，通脹，縮表，中國經濟，貿易戰，美國債務上限

1. 歡迎各位新讀者，亦多謝各位舊讀者支持。慎防新讀者唔知，正常每個週末係會有篇「專題」（月尾就可能冇），多數係啲深度啲嘅文，單一課題。以往嘅專題你可以搵返目錄（篇文最底亦有），有唔少真係值得一睇再睇，遲下我會整理下

2. 今次呢篇就係回顧及展望，我並唔係成日寫呢類文。不過之前9月股市的確表現比較差，10月又係傳統嘅「股災月」（其實全無根據）。加上又唔係好諗到寫乜，所以今次寫少少回顧，同10月展望。

3. 如果第四季展望？今個星期六（10月9日）黃昏在尖沙咀我同Homeblogger有個講座，之前都搞過一次。可以去報名，要收費的，但你可以之前send兩條問題去，保證詳細作答。唔得閒去嘅，第日網上重溫都可以，但一樣咁價錢。另外入面啲內容就第度冇的，Patreon都冇，保障返報咗名嗰啲。

年初至今股市相當好

4. 首先回顧少少，今年嘅股市，表現係相當好的，至少美股日本歐洲都係，「咁冇人叫你買晒香港」，你幾度都買（例如我咁），都絶對有錢贏。美股三大指數年初至今都升超過10%。

5. 另外，你見標普500指數入面，80%嘅成份股係有得升嘅，都真係少見。特別留意，舊年反而冇咁多，舊年嘅升幅只係集中在較少數股票，今年全面啲。

6. 標普指數已經連升6季，咁以往見到，多數都仲有得升。但都講過，呢啲參考價值唔算好大，因為美股過去N年都係長升長有。

港股第三季真係差

7. 不過港股第三季真係差，重災區。差不多全世界最差。（所以都係要分散）

8. 恒指跌4250點，15%，60隻成份股得6隻升。尤幸最差嗰五隻我都冇，都唔易架，我之前都買落唔少港股（我嘅持倉，呢度）。科指嘅仲大劑，跌25%。唔多唔少當然因為大陸不停出嘅整治政策，但某程度上都同啲科技股估值有關。

美股唔太差，但網紅股契媽股死晒

9. 美股表現都差，九月要跌5%，結果結束咗連升7個月嘅走勢。但你睇成個第三季，標普指數都仲有輕微升幅的。

10. 不過正如我之前都提過，你見講到大陸又限電呀，恒大又爆煲呀乜鬼。但你睇，9月A股只係微跌，跑贏美股一大截，世事冇你諗得咁簡單（又其實我係有諗過買A股，亦易買，但個股暫時冇乜心水，如果大路嘢又同香嘅差不多，就唔使了）

11. 但我最想提嘅，係堆網紅股，或者「契媽股」—兩者有啲分別，但往往都係啲高估值嘅嘢。你見，網紅股真係死得很慘的。固然你可以話AMC Game Stop之類比起未炒起前仲係升咗好多，但，你係咪好早買嗰堆？況且，就當你早買，我就唔知你係咪會止蝕定點了。你問我都係小買為妙，頂多拎些少錢玩下，唔好本末倒置。

12. 至於Cathie Wood堆嘢，一樣高位大回。邊個話估值唔緊要？

13. 佢隻ARKK，今年要跌11%，「衰過你買恒指」。但，記唔記得舊年個個當係神？呢個故事係好好嘅教訓。佢係咪唔識嘢？就肯定唔係。但，你諗下舊年啲人諗嘅嘢，點解唔應驗？諗下當時嘅想法幾咁短視？其實咪又係個個見到升就追入去。本質同啲師奶冇分別。

14. 所以你見到，佢隻嘢呢幾個月都係淨流出。但首先，呢個同佢隻嘢本身升跌冇關—好多人都誤解咗呢樣嘢，但你諗下，唔會因為盈富基金多錢流入，恒指就升的，ETF嘛，流入唔同你在街度買。另外第二，佢全年暫時仲係淨流入。但第三，之前最旺嗰時，佢收一兩個月管理費，根本都夠佢幾世唔使做了。遲下解

美股呢浪嘅調整好小事

15. 長期讀者一定聽過，美股自從舊年3月後都冇10%調整，5%都要數到舊年9月，之前平均一年係3次，咁今次卒之等到美股調整5%了。

16. 留意以上個圖，同我上一段講嘅有少少唔同。呢個圖係計埋intraday高低位，我對上一段只係講收市。

17. 但點計都好，5%嘅調整真係濕碎（10月第一日又有幾強力嘅反彈了），你睇即使之前美股10年牛市（當2009-2019，又，我知係11年），都經常有呢啲嘢。好多時都一年10%添

18. 呢個圖比較少出現，畫埋圖，睇下每年指數升跌，你見好多時就算大調整全年都係有得升。平均每年嘅pull back有15%，但無礙美股不停創新高。

十月股災？根本唔差

19. 好啦，去到戲肉。雖然成日話10月股災，但10月股市表現係唔差的。一般8月9月都係比較差，10月開始就升。好消息。

20. 呢個圖仲有趣，話你知11月至4月嘅回報，係5月至10月嘅38倍。但當然只係事後搵返個pattern 出嚟，你千萬唔好走去照跟。

21. 但的確見到美股一般第四季係勁嘅。特別係小型股（羅素2000）同科技股（納指），都係平均第三季特差，第四季特別強。今年都係的。

22. 呢個仲有趣，睇埋單數年份雙數年份，見到單數年嘅10月係特別強嘅，雙數年就平均要跌。原因？可能同總統選舉（一定係雙數年，中期選舉都係）有關。

10月買啲乜 — 三隻日本股，一隻美股，兩隻歐洲股。「港股不了」

23. 首先搞清楚，我只講我10月應該會買嘅嘢，唔等於你都應該照抄。我買嘅唔等於你要買，我唔買嘅亦唔等於你唔應該買。原因？因為有啲嘢我已經買咗嘛！可以睇返舊文睇我持倉。冇實際金額，但我冇乜邊隻佔到好多。冇一隻比重有10%

24. 呢度講嘅，係正路我會買嘅嘢，當然好難寫包單，點知會唔會有意外忽然間要用錢，又或者，如果隻波音生性嘅，咪會有啲意外之財。但，之前我多數都係話買就買，冇昆過讀者話買又唔買。多數都係即日（一有錢就買），唔使問我咩價買，向來都唔多睇價。

25. 煩氣講埋，呢度指個股。唔計我平時有每個月買開啲咩SPY（其實我係買VOO），QQQ（其實我係買QQQM）之類。亦冇計我有啲月供開嘅港股，或者每個月買兩手嘅3187。亦因為買呢啲都用咗啲錢，所以剩返玩個股嘅唔會好多

26. 好，首先係日本股，我應該真係會買嘅，ASICS或者Mizuno．舊文寫過呢兩隻，夠殘。周末專題亦寫過日本股全攻略（原來只係上個月中，點解好似好耐？證明我好勤力）。應該真係優先買呢隻，雖然未肯定買幾多

27. 另一隻，冇寫過的，栃木銀行（8550）。做乜買？夠殘！但真係冇其他賣點。純手痕，如果冇閒錢就唔買呢隻，priority 好低。

28. 美股嘅，都未完全揀定，Palantir（PLTR），或者Spotify（SPOT），又或者Roche羅氏藥廠，可能三隻買晒（照計唔會），或三隻都唔買（應該都唔會），視乎有冇錢。

29. 篇幅所限，可能要買咗先慢慢講（況且應該唔會買晒三隻，亦都好似冇好明顯嘅Priority）。但，Palantir舊年寫過，當時我唔睇好，覺得買Paypal好過。結果？如果計舊年到而家，Palantir跑贏Paypal好多，不過年初至今就買Paypal好啲。咁我擺明係打倒昨日之我了。其實都冇乜特別原因，但真係信Peter Thiel

30. Spotify，之前略寫過，但冇買到，只放咗在Monitor List。話時話呢個Monitor list都冇點正式貼過出嚟。因為好似太多隻，根本我自己都唔得閒睇，等我諗下點處理。瑞典公司，美國上市。

31. Roche只係講歐洲股時略為提過下。留意瑞士公司，照計IB買到的。唔得亦有ADR，到時話你知。

32. 記住，原則上，我買咗嘅就實會在呢度講你知，咁耐以嚟都全部公開。但有啲諗緊嘅（都未列晒），就可能留返星期六個Seminar先有了。

33. 港股？不了（雖然有啲月供緊）。反而英國股可能有興趣，但都話大把嘢想買，照計未排到英國股，除非我忽然中六合彩。所以之後再講吧。